Nsumuinu 14:1-35
14 Mukaji udi bushuwa ne meji udi wibaka nzubu wende,+Kadi udi mutshimbakane udi umupula ne bianza biende yeye muine.
2 Muntu udi wenda mu bululame buende udi utshina Yehowa,Kadi muntu udi njila yende mikale ya bibenda* udi umupetula.
3 Mulangala wa didibandisha udi mukana mua mutshimbakane,Kadi mishiku ya bena meji neyibalame.
4 Muaba udi kawuyi ngombe, mu tshidilu mmutoke,Kadi bukole bua ngombe budi bupatula bia kunowa bia bungi.
5 Ntemu wa lulamatu kakushima to,Kadi ntemu wa dishima udi ushima bu mudiye weyela.+
6 Musekianganyi udi ukeba meji, kadi kena uapeta,Kadi dimanya didi dilua bipepele kudi muntu udi ne lungenyi.+
7 Ikala kule ne muntu mutshimbakane,Bualu kuakupeta dimanya ku mishiku yende to.+
8 Muntu mudimuke udi ujingulula njila udiye uyila ku meji ende,Kadi batatakane badi badingibua kudi* butshimbakane buabu.+
9 Batshimbakane badi baseka dipila,*+Kadi munkatshi mua bena bululame mudi dijinga dia kulengejangana.*
10 Muoyo mmumanye kanyinganyinga kawu,*Ne kakuena udi pambelu pawu udi mua kusanka nawu pamue.
11 Nzubu wa bantu babi neabutudibue,+Kadi ntenta wa bena bululame neatante.
12 Kudi njila udi umueneka muakane ku mêsu kua muntu,+Kadi ku ndekelu udi ufikisha ku lufu.+
13 Nansha mu tuseku muoyo udi mua kumvua kanyinganyinga,Ne ndekelu wa disanka udi mua kulua dibungama dikole.
14 Muntu udi ne muoyo wa buenzavi neapuole bipeta bia njila yende,+Kadi muntu muimpe udi upuola difutu dia bienzedi biende.+
15 Tshitaba mvinyingu* udi witaba dîyi dionso,Kadi muntu mudimuke udi welangana meji a tshidia tshionso tshidiye wela.+
16 Muena meji mmudimuke ne udi umbuka ku malu mabi,Kadi mutatakane katu utshiuka bualu* ne udi udieyemena.
17 Muntu udi ukuata tshiji lukasa udi wenza malu ne butshimbakane,+Kadi muntu udi ukonkonona malu bimpe* badi bamukina.
18 Bitaba mvinyingu* nebipiane butshimbakane,Kadi badi badimuke mbabase tshifulu tshia butumbi tshia dimanya.+
19 Bantu babi nebinamine bantu bimpe,Ne benji ba malu mabi nebiname ku biibi bia bantu bakane.
20 Mupele mbamukine too ne kudi bena mutumba nende,+Kadi balunda ba mubanji mba bungi.+
21 Muntu udi upetula muinende udi wenza mpekatu,Kadi muntu yonso udi uleja bapuekele luse ngua diakalenga.+
22 Badi bela tshifufu tshia kuenzelangana bibi kabakupambuka anyi?
Kadi badi ne dijinga dia kuenza malu mimpe nebapete dinanga dia lulamatu pamue ne lulamatu.+
23 Mudimu mukole wonso udi ne difutu,Kadi biyukiyuki bidi bifikisha ku dikengela dia bintu.+
24 Tshifulu tshia butumbi tshia bena meji mbiuma biabu;Kadi ditshimbakana dia mutatakane didi anu ditshimbakana.+
25 Ntemu mulelela udi upandisha mioyo,*Kadi wa dishima yeye udi ushima bu mudiye weyela.
26 Kudi muoyo mukole mu ditshina dia Yehowa,+Ne wowu newikale tshinyemenu tshia bana bende.+
27 Ditshina dia Yehowa didi mpokolo wa muoyo,Bua kuepula muntu ku mateyi a lufu.
28 Musumba wa bantu udi butumbi bua mukalenge,+Kadi mfumu udi kayi ne badiye ukokesha mmubutuke.
29 Muntu udi kayi ukuata tshiji lukasa udi ne dijingulula dia malu divule,+Kadi muntu udi kayi ne lutulu udi uleja butshimbakane buende patoke.+
30 Muoyo mupole udi upesha mubidi muoyo,*Kadi mukawu udi dibola bua mifuba.+
31 Muntu udi ushimakaja mupuekele bua kumudia bintu udi upenda Mufuki wende,+Kadi muntu yonso udi uleja bapele luse udi umutumbisha.+
32 Muntu mubi neapuekeshibue kudi bubi buende,Kadi muntu muakane neapetele tshinyemenu mu muoyo wende mutoke.+
33 Meji adi asomba talalaa mu muoyo wa muntu udi ne lungenyi,+Kadi adi ne bua kudimanyisha owu nkayawu munkatshi mua batatakane.
34 Buakane budi bubandisha ditunga,+Kadi mpekatu udi ufuishisha tshisamba bundu.
35 Mukalenge udi usanka bua muena mudimu udi wenza malu ne busunguluji,+Kadi tshiji tshiende tshikole tshidi kudi muntu udi wenza malu a bundu.+
Mamanyisha
^ Anyi “mikonyangale.”
^ Anyi pamuapa: “batatakane badi badinga bantu bakuabu ku.”
^ Anyi “dilongolola tshilema.”
^ Anyi “mudi muoyo wa bunnyana.”
^ Anyi, “kanyinganyinga kakole ka anyima wawu.”
^ Anyi “Muntu udi kayi ne dimanya.”
^ Anyi “mmuena tshiji tshikole.”
^ Anyi “muntu udi ukokesha mua kuela meji.”
^ Anyi “Badi kabayi ne dimanya.”
^ Anyi “anyima.”
^ Anyi “ufila bukole bua mubidi.”
