Amose 7:1-17
7 Mfumu Mwinē Lupusa Lonso Yehova wanombwele kino’ki: Tala! Aye walongele kibumbo kya njie kitatyi kyashilwile kutamba bikunanwa bya mfulo.* Bino byadi bikunanwa bya mfulo papwile kuketwa biyombo bya mulopwe.
2 Kibumbo’kya pa kupwa kudya munamuna ya mu ntanda, nanena’mba: “A Mfumu Mwinē Lupusa Lonso Yehova, nakwisāshila wibalekele!+ Le Yakoba ubwanya kupanda* namani? Mwanda i muzoze!”+
3 Penepo Yehova washinta milangwe pa* kino’ki.+ Yehova wanena’mba, “Kekikalongekapo.”
4 Mfumu Mwinē Lupusa Lonso Yehova wanombwele kino’ki: Tala! Mfumu Mwinē Lupusa Lonso Yehova waletele mfuto na mudilo. Nao wasōka mema mangimangi a mushike, kadi wasōka ne kipindi kya ntanda.
5 Penepo nanena’mba: “A Mfumu Mwinē Lupusa Lonso Yehova, nakwisāshila leka kulonga kino.+ Le Yakoba ubwanya kupanda* namani? Mwanda i muzoze!”+
6 Penepo Yehova washinta milangwe pa* kino’ki.+ Mfumu Mwinē Lupusa Lonso Yehova wanena’mba, “Ne kino kine kekikalongekapo.”
7 Wanombola kino’ki: Tala! Yehova wadi wimene pa lubumbu lulongwe na monji wa kūbaka nao,* kadi wadi na monji wa kūbaka nao mu kuboko kwandi.
8 Penepo Yehova waunena’mba: “A Amose, le ubamone bika?” Nami nanena’mba: “Monji wa kūbaka nao.” Ebiya Yehova wanena’mba: “Nsa kutūla monji wa kūbaka nao mu bantu bami bene Isalela. Nkikebafwilapo lusa monka.+
9 Mitenta ya Izake+ ikasalwa, ne bipandulwe bya Isalela nabyo bikasalwa;+ kadi nkatamba njibo ya Yeloboame na kipete.”+
10 Amazia kitobo wa Betele+ watumanya bakasapwile Yeloboame+ mulopwe wa Isalela namino amba: “Amose ukukutyilanga kitumba’nka mu njibo ya Isalela.+ Ntanda keibwanyapo kutyumwina mu manwi binenwa byandi byonso.+
11 Mwanda Amose wanena’mba, ‘Yeloboame ukafwa ku kipete, kadi bine Isalela ukatamba mu yandi ntanda ne kwenda bu musungi.’”+
12 Penepo Amazia wanena Amose amba: “A mumoni wa bimonwa, enda, nyemena lubilo ku ntanda ya Yuda, kasokole mikate* kwine’kwa, kadi ukanene’ko bupolofeto.+
13 Ino kufwaninwepo kunena bupolofeto monka mu Betele,+ mwanda i kipandulwe kya mulopwe+ kadi i njibo ya bulopwe.”
14 Penepo Amose walondolola Amazia amba: “Ami nkyadipo mupolofeto nansha mwanā mupolofeto; ino nadi mukumbi,+ kadi nadi ntala mityi ya bikuyu bya shikama.*
15 Ino Yehova wauntalula ndeke kulonda mikōko, kadi Yehova waunena’mba, ‘Enda, kanene bupolofeto ku bantu bami bene Isalela.’+
16 Shi ke pano ivwana kinenwa kya Yehova: ‘Ubanena’mba, “Kokanena bupolofeto pa Isalela,+ kadi kokasapula+ pa njibo ya Izake.”
17 O mwanda Yehova wanena namino amba: “Obe mukaji ukekala ndumba mu kibundi, kadi bobe bana bana-balume ne bana-bakaji bakapona ku kipete. Ntanda yobe ikeabilwa na lukamba lwa kupima nalo, kadi abe nobe ukafwila mu ntanda ya disubi, Isalela nandi ukatamba mu yandi ntanda ne kwenda bu musungi.”’”+
Kunshi kwa Dyani
^ Ko kunena’mba, mu Kweji wa Kwanza ne Kweji wa Bubidi.
^ Kishima pa kishima i, “kwimana.”
^ Nansha’mba “wealakanya pa.”
^ Kishima pa kishima i, “kwimana.”
^ Nansha’mba “wealakanya pa.”
^ Nansha’mba “monji wa kōlola nao.”
^ Kishima pa kishima i, “kadye mikate.”
^ Nansha’mba “nadi nsula bikuyu bya shikama.”
