Amose 5:1-27
5 “Ivwanai kino kinenwa kyonesamba pomudi bu lwimbo lwa bulanda,* a njibo ya Isalela:
2 ‘Mujike, Isalela, wapone;Kabwanyapo kwimana monka.
Abamushiye pa nshi yandi;I kutupu nansha umo wa kumulangula.’
3 “Mwanda Mfumu Mwinē Lupusa Lonso Yehova wanena namino amba:
‘Kibundi kitamba na bantu kanunu kikashala na bantu katwa;Kadi kyokya kitamba na bantu katwa kikashala na bantu dikumi, ku njibo ya Isalela.’+
4 “Mwanda Yehova wanena njibo ya Isalela namino amba:
‘Nkimbei amba mwikale bōmi.+
5 Kemwakikimbai Betele,+Kemwakendai ku Ngilengale+ nansha kwabukila ku Bela-Sheba,+Mwanda bine Ngilengale ukenda bu musungi,+Kadi Betele ukekala ke wa bitupubitupu.*
6 Kimbai Yehova amba mwikale bōmi,+Kutyina’mba wakasabikila njibo ya Yosefa pamo bwa mudilo,Ne kusōka Betele, kwampikwa nansha umo wa kwiubula.
7 Mubaalamuna bululame ke ndulwe,*Kadi mubaela boloke panshi.+
8 Yewa walongele kibumbo kya ñenyenye kya Kima* ne kibumbo kya ñenyenye kya Keshile,*+Yewa walamunanga mwemba mukatampe ke lubanga,Yewa ufītyijanga dyuba pamo bwa bufuku,+Yewa witanga mema a dijibaMwanda wa kwiapungulwila pa ntanda+—Dijina dyandi i Yehova.
9 Aye ukalengeja bonakani butetukile yewa mukomo,Ne konakanya bifuko bikomejibwe.
10 Bashikilwe boba badingilañana pa kibelo kya kibundi,Kadi bashikilwe boba banena bya bine.+
11 Byomulomba mulanda munyenga wa madimi*Ne kuyata miseke yandi bu mulambu,+Kemukekalapo nyeke mu mobo a mabwe masōnge omūbakile+Nansha kutoma vinyu ya ku madimi malumbuluke a mañanza omudimine.+
12 Mwanda ndyukile muvudile butomboki* bwenuNe mubaile bubi bwenu—Mukambakanyanga moloke,Muyata bya majika-kanwa,*Kadi musuminwanga balanda byepelo byabo pa kibelo kya kibundi.+
13 O mwanda, boba ba bujinguludi bakekala talala nyā mu kine kitatyi’kya,Mwanda kikekala kitatyi kya kyamalwa.+
14 Kimbai kiyampe, ke kibipo, aa,+Amba mwikale bōmi.+
Nabya Yehova Leza wa bibumbo ukekala nenu,Monka momunenena’mba udi nenu.+
15 Shikwai kibi, sanswai kiyampe,+Boloke bunekenye mu kibelo kya kibundi.+
Kepabulwe padi Yehova Leza wa bibumboUkatōkelwa mutyima boba bashele’ko ba Yosefa.’+
16 “O mwanda Yehova Leza wa bibumbo, Yehova, wanena namino amba:
‘Mu bīkwe byonso mukekala kuyoyokota,Kadi mu bipito byonso bakanena’mo amba, “Yō, yō!”
Baketa babidimye bāye badileNe boba bapotolwele kudila bayoyokote miyoa.’
17 ‘Mu madimi onso a mañanza mukekala kuyoyokota;+Mwanda nkapita mu bukata mwenu,’ i Yehova unena.
18 ‘Malwa abo boba babila bininge difuku dya Yehova!+
Le penepo difuku dya Yehova dikemwikadila namani?+
Dikekala fukutu, ke kitōkejipo.+
19 Bikekala pamo bwa muntu unyema ntambo ino uluse wamutamba,Kadi aye pa kutwela mu njibo ne kutūla kuboko kwandi ku lubumbu, nyoka wamusuma.
20 Mwene difuku dya Yehova dikekala fukutu, ke kitōkejipo;Mwene dikekala na mfindi, ke mwinyapo?
21 Nshikilwe, kadi mfutulwile masobo enu,+Kadi nkisangelangapo luvumba lwa bitango byenu bikola.
22 Nansha shi munambule byamulambu bisōkwe bituntulu ne byabuntu bilambulwe,+Nkikebisangelapo;Kadi nkikatōkelwapo mutyima bitapwa byenu bya kipwano bya banyema banune.+
23 Mfundulei lunwa lwa ñimbo yenu;Kadi kemwakangivwanijai ñimbo mileululwe ya byombanwa byenu bya myonji.+
24 Bululame bukuke pamo bwa mema,+Boloke nabo pamo bwa kamunonga kakuka mulungu.
25 Le mwaundetele bitapwa ne byabuntu bilambulweMu yoya myaka 40 ya mu ntanda mutuputupu, a njibo ya Isalela?+
26 Pano mukasela Shikute mulopwe wenu ne Kiuna,*Bankishi benu, luñenyenye lwa leza wenu, omwelongēle banwe bene,
27 Kadi nkemutuma mu bu misungi kupita ne ku Damakasa,’+ i yewa wa dijina dya bu Yehova Leza wa bibumbo unena.”+
Kunshi kwa Dyani
^ Nansha’mba “lwimbo lwa madilo.”
^ Bibwanika padi i, “ukekala ke kintu kya maleñanya.”
^ Nansha’mba “bululu.”
^ Pakwabo i Kabwa na Nyema.
^ Pakwabo i Kidimina.
^ Nansha’mba “musonko wa ntanda.”
^ Nansha’mba “lupeto lwa kūbija talala.”
^ Nansha’mba “bibi.”
^ Padi bano baleza bonso babidi bafunkila pa umbuo wa Saturne, wadi utōtwa bu leza.
