Samwele wa Bubidi 7:1-29
7 Mulopwe pa kushikata mu yandi njibo*+ ne Yehova pa kumupa kukōkolokwa ku balwana nandi bonso badi bamujokolokele,
2 mulopwe wanena mupolofeto Natana+ amba: “Ami yeu nshikete mu njibo ya mityi ya sedele+ inoko Sanduku wa Leza wa bine ushikete mu pema.”+
3 Natana nandi watentulula mulopwe amba: “Enda kalonge byonso bidi mu mutyima obe, mwanda Yehova udi nobe.”+
4 Mu bwine bufuku’bwa, kinenwa kya Yehova kyaiya kudi Natana amba:
5 “Enda kasapwile mwingidi wami Davida amba, ‘Yehova wanena namino amba: “Lelo abe ufwaninwe kungubakila njibo mwa kushikata?+
6 Mwanda nkyashikete mu njibo tamba difuku dyonatambije bantu ba Isalela mu Edipito kufika ne dyalelo,+ ino nadi njokoloka* mu pema ne mu kipema.+
7 Kitatyi kyonso kyonadi ñenda na bene Isalela* bonso, le kashā kendi munene nansha’tu kinenwa kimo ku mutangidiji kampanda wa mu kisaka kya Isalela onatongele kukumba bantu bami bene Isalela, amba, ‘Mwanda waka kungubakilepo njibo ya mityi ya sedele?’”’
8 Shi ke pano lombola mwingidi wami Davida amba, ‘Yehova wa bibumbo wanena namino amba: “Nakutambije ku madyo, kowadi ulonda luombe,+ amba wikale mutangidiji pa bantu bami bene Isalela.+
9 Nkekala nobe konso koenda,+ kadi nkapanga* balwana nobe bonso ku meso obe;+ nkakulongela+ dijina dikatampe pamo bwa dijina dya bantu bakatampe ba pano pa ntanda.
10 Nkatongela bantu bami bene Isalela kifuko ne kwibashikatyija’mo, nabo bakekala’mo kadi kebakakambakanibwapo monka; ne bantu babi nabo kebakebamweshapo malwa dikwabo mobadi bebalongela mafuku kunyuma,+
11 tamba difuku dyonatongele batyibi+ pa bantu bami bene Isalela. Nkebapa kukōkolokwa ku balwana nabo bonso.+
“‘“Ne kadi, Yehova wakulombwele amba Yehova ukakūbakila njibo.*+
12 Shi mafuku obe abafule+ kadi ubalādikwa mwanda wa kukōkolokwa na bakulutuba bobe, penepa nkemika lutundu* lobe lukāya’ko, ke obe mwana* kadi, nkakomeja pototo bulopwe bwandi.+
13 Aye ye ukōbaka njibo ya dijina dyami,+ kadi nkakomeja pototo lupona lwa bulopwe bwandi nyeke.+
14 Nkekalanga shandi, nandi ukekalanga wami mwana.+ Shi walonga kibi, nkamudingila na mukombo wa bantu ne na bikupilwa bya bana ba bantu.*+
15 Buswe bwami bwa ndamatyidile kebukatalulwapo pādi monatalwidile’bo padi Solo+ onafundwile ku meso obe.
16 Njibo yobe ne bulopwe bobe bikalamibwa nyeke ku meso obe; lupona lobe lukakomejibwa pototo nyeke.”’”+
17 Natana wasapwila Davida bino binenwa byonso ne kino kimonwa kyonso kituntulu.+
18 Ponkapo Mulopwe Davida watwela, washikata ku meso a Yehova kanena’mba: “Le ami ne ani, a Mfumu Mwinē Lupusa Lonso Yehova? Ne njibo yami mine i njibo’ka byowamfikija kuno konso?+
19 Ulanga’mba bino kebibwenepo, a Mfumu Mwinē Lupusa Lonso Yehova, ubesambila kadi ne njibo ya mwingidi obe kufika ne ku kitatyi kya kumeso bininge; ne kadi buno i bulombodi* bwa bantu bonso, a Mfumu Mwinē Lupusa Lonso Yehova.
20 Le mwingidi obe Davida ubwanya kukusapwila kadi bika byoundyukile kala biyampe,+ a Mfumu Mwinē Lupusa Lonso Yehova?
21 Pa mwanda wa kinenwa kyobe ne mungya bisaka mutyima obe,* ubalonga bino bintu byonso bikatampe ne kusokwela’byo mwingidi obe.+
22 O mwanda mwine wi mukatampe binebine,+ a Mfumu Mwinē Lupusa Lonso Yehova. Kekudipo nansha umo udi bwa abe,+ kekudipo Leza mukwabo poso’nka abe;+ byonso byotwaivwene na matwi etu bibingija kino.
23 Le i muzo’ka mukwabo pano pa ntanda udi pamo bwa bantu bobe bene Isalela?+ Leza wāendele wēbakūla ke bantu bandi,+ welongela aye mwine dijina+ na kwibalongela bintu bikatampe kadi bilenga nzuba.+ Abe wāpingile mizo ne baleza babo pa mwanda wa bantu bobe bowekūdīle mu Edipito.
24 Wākomeje pototo bantu bobe bene Isalela, ke bantu bobe kitatyi kyonso;+ kadi abe, a Yehova, ubaikala Leza wabo.+
25 “Shi ke pano, a Yehova Leza, fikidija mulao owalaa padi mwingidi obe ne njibo yandi kitatyi kyonso, kadi longa enka mowalaila’mo.+
26 Dijina dyobe dizunzulwe nyeke,+ amba bantu banene amba, ‘Yehova wa bibumbo i Leza kudi Isalela,’ kadi njibo ya mwingidi obe Davida ikomejibwe pototo ku meso obe.+
27 Mwanda abe, a Yehova wa bibumbo, Leza wa Isalela, ubasokwela mwingidi obe pa kunena’mba, ‘Nkakūbakila njibo.’*+ O mwanda mwingidi obe udi na kininga* kya kulombela ino milombelo kodi.
28 Shi ke pano, a Mfumu Mwinē Lupusa Lonso Yehova, abe wi Leza wa bine, kadi binenwa byobe i bya bine,+ ubalaa mwingidi obe bino bintu biyampe.
29 Loelelwa’po kwesela njibo ya mwingidi obe, kadi yendelele nyeke ku meso obe;+ mwanda abe, a Mfumu Mwinē Lupusa Lonso Yehova, ubalaa’kyo, kadi njibo ya mwingidi obe yeselwe nyeke madyese obe.”+
Kunshi kwa Dyani
^ Nansha’mba “njibo mikatakata.”
^ Kishima pa kishima i, “ñenda.”
^ Kishima pa kishima i, “bana ba Isalela.”
^ Kishima pa kishima i, “nkatyiba’ko.”
^ Nansha’mba “musuku wa bulopwe.”
^ Kishima pa kishima i, “lukunwa.”
^ Kishima pa kishima i, “yewa ukalupuka mu bipindi byobe bya munda.”
^ Bibwanika padi i, “Adama.”
^ Nansha’mba “kijila.”
^ Nansha’mba “kukwatañana na kiswa-mutyima kyobe.”
^ Nansha’mba “musuku wa bulopwe.”
^ Kishima pa kishima i, “watana mutyima wandi.”
