Samwele wa Bubidi 22:1-51
22 Kadi Davida wasapwila Yehova binenwa bya luno lwimbo+ mu difuku dyamukūdile Yehova mu makasa a balwana nandi bonso+ ne mu makasa a Solo.+
2 Wanena’mba:
“Yehova i kidibwe kyami ne kifuko kyami kikomejibwe+ kadi i Aye unkūlanga.+
3 Leza wami i dibwe dyami,+ mwine monyemena,Ngabo yami+ ne disengo* dyami dya lupandilo,* kinyemeno kyami kya mutyima-ntenke*+Kadi i kifuko kyami kya kunyemena’mo,+ umpandiji wami;+ abe wampandije ku lūma.
4 Naite Yehova, mwine ufwaninwe kutendelwa,Kadi nsa kupandijibwa ku balwana nami.
5 Mantanki a lufu adi antetukila koku ne koku;+Milungu ya bantu ba bitupu yaikele kuntuyula.+
6 Myonji ya Kibundu* yanjokolokele;+Makinga a lufu antene.+
7 Mu tusua twami naityile Yehova,+Nadi ngita’nka kwita Leza wami.
Penepa aye mu tempelo yandi waivwana diwi dyami,Ne kwabija kwami kwafika ku matwi andi.+
8 Ntanda yashilula kutenkanatenkana ne kutetema;+Byalwilo bya madiulu byazakala+Kadi byatenkanatenkana mwanda bamulobeje.+
9 Mwishi wadi umutamba mu myulu,Ne mudilo uloteja watamba mu kyakanwa kyandi;+Makala a mudilo adyendyemuka atamba kwadi.
10 Wafiyukija madiulu paadi utūka,+Kadi mfindi bwī yadi munshi mwa maulu andi.+
11 Wakandile pa kelubi+ kaiya wipapa.
Wadi umweka pa mapapa a mushipiditu.*+
12 Kupwa watūla mfindi mimujokoloke pamo bwa mwemba,+Mu mema afītuluka ne makumbi afīta fututu.
13 Ku kitōkeji kidi ku meso andi makala a mudilo adi āka.
14 Kupwa Yehova washilula kukungula mūlu;+Mwine wa Peulu Mwine walengeja diwi dyandi divwanwe.+
15 Wasobola miketo+ yandi ne kwibapalakanya;Upena mapeni, ne kwibela mu kavutakanya.+
16 Kyalo kya dijiba kyamweka;+Byalwilo bya ntanda byatūlwa patōka pa kufuninwa na Yehova,Pa kuvuma kwa umpuya wa mu myulu yandi.+
17 Waolola kuboko kwandi aye kūlu;Wankwata waungabula mu mema malamala.+
18 Waunkūla kudi walwana nami mukomo,+Kudi boba banshikilwe, badi bakomo kumpita.
19 Bantambile’dyo mu difuku dya tusua twami,+Ino Yehova wankweshe.
20 Wantambije wantweja mu kifuko kilamwe senene;*+Wankūdile mwanda waundoelelwe.+
21 Yehova umpalanga mungya boloke bwami;+Undubwilanga mungya kubulwa mambo* kwa makasa ami.+
22 Mwanda nalamine mashinda a Yehova,Kadi nkyalekelepo Leza wami ku nshikani.
23 Butyibi bwandi bonso+ budi ku meso ami;Nkikasāsukapo ku bitungo byandi.+
24 Nkekalanga nyeke wampikwa kutopekwa+ ku meso andi,Kadi nkelamanga ku kilubo.+
25 Yehova andubwile mungya boloke bwami,+Mungya kubulwa mambo kwami ku meso andi.+
26 Kudi wa lulamato nobe wikalanga na lulamato;+Kudi wampikwa kutopekwa, mukomokomo, nobe uloñanga byampikwa kutopekwa;+
27 Kudi utōka nobe wimwekejanga bu utōka,+Ino kudi mukondame nobe wimwekejanga bu mukosoke.*+
28 Mwanda upandijanga boba betyepeje,+Ino meso obe keasakengapo boba bezunzula, kadi wibatūkijanga.+
29 Mwanda abe wi kinanu kyami, a Yehova;+I Yehova umunikilanga mu mfindi.+
30 Na bukwashi bobe mbwanya kutamba kibumbo kya bañonaona bulwi;Na bukomo bwa Leza mbwanya kukanda lubumbu.+
31 Dishinda dya Leza wa bine i dibwaninine;+Binenwa bya Yehova i bitōkejibwe tō.+
Aye i ngabo ku boba bonso banyemena mwadi.+
32 Mwanda, le i ani Leza shi ke’nkapo Yehova?+
Kadi le i ani dibwe mwene’nka Leza wetu?+
33 Leza wa bine i nsakwa mikomokomo,+Kadi ukalonga dishinda dyami dikale dibwaninine.+
34 Uloñanga maulu ami pamo bwa a kasha;Uñimikanga pa mitenta.+
35 Ufundijanga makasa ami divita;Maboko ami abwanya kukana buta bwa miketo bwa mukuba.
36 Ubaumpe ngabo yobe ya lupandilo,Kadi kwityepeja kobe kubambaija.+
37 Ubabaija kashinda ka matabula ami;Maulu* ami keakashetemukapo.+
38 Nkalondalonda balwana nami kadi nkebatukija fututu;Nkikajokapo enka ne byonebakubija.
39 Kadi nkebakubija ne kwibavingakanya, kutyina’mba bakalanguka;+Bakapona munshi mwa maulu ami.
40 Ukanumbila bukomo pa mwanda wa bulwi;+Ukaponeja boba banshikilwe munshi mwami.+
41 Ukanyemeja balwana nami kondi;*+Nkafikija ku mfulo* boba banshikilwe.+
42 Babijanga, ino kekudipo wa kwibapandija;Badidilanga’nka ne Yehova, ino kwibalondolola mpika.+
43 Nkebatwa bukulabukula pamo bwa luvumbi lwa panshi;Nkebavingakanya ne kwibatyimpakanya bwa bitoto mu bipito.
44 Ukankūla ku tuto tumboya bantu bami.+
Ukandama mwa kwikadila mutwe wa mizo;+Bantu bonkyayukilepo bakañingidila.+
45 Beni bakāya kondi na moyo;+Myanda yobevwana kondi ikebalengeja bankōkele.*
46 Beni bakabulwa bukankamane;*Bakāya bazakala batamba mu bifuko byabo bikomejibwe.
47 Yehova i mūmi! Dibwe dyami ditendelwe!+
Leza wa dibwe dya lupandilo lwami azunzulwe.+
48 Leza wa bine ulubulanga kinongo pa mwanda wami;+Unekenyanga bantu munshi mwami;+
49 Aye unkūlanga ku balwana nami;Untululanga pangala+ pa boba bantamba bulwi;Umpandijanga ku muntu wa lūma.+
50 O mwanda mwine nkakufwija’ko, abe Yehova, mu bukata bwa mizo,+Kadi nkembilanga dijina dyobe mitendelo:*+
51 Ulongelanga mulopwe wandi bilongwa bikatampe bya lupandilo;*+Ulombolanga mushingwe māni wandi buswe bwa ndamatyidile,Kudi Davida ne lutundu* lwandi nyeke ne nyeke.”+
Kunshi kwa Dyani
^ Tala Nshintulwilo ya Bishima.
^ Nansha’mba “mupandiji wami mukomokomo.”
^ Nansha’mba “mutenta wa mutyima-ntenke.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “a luvula.”
^ Nansha’mba “kifuko kikatampe.”
^ Kishima pa kishima i, “kutōka.”
^ Bibwanika padi i, “kulonga bwa mulembakane.”
^ Nansha’mba “Tumpo.”
^ Nansha’mba “Ukampa miongo ya balwana nami.”
^ Kishima pa kishima i, “kutalaja.”
^ Kishima pa kishima i, “Pa kwivwana kwa matwi, bakankōkela.”
^ Nansha’mba “bakafumba.”
^ Nansha’mba “nkombanga minjiki.”
^ Nansha’mba “bushindañani bukatampe.”
^ Kishima pa kishima i, “lukunwa.”
