Samwele wa Bubidi 2:1-32
2 Kupwa Davida waipangula Yehova+ amba: “Le nkandile mu kibundi kimo kya Yuda?” Yehova wamulondolola’mba: “Kanda.” Davida waipangula monka’mba: “Le ñende kwepi?” Nandi amba: “Ku Hebelona.”+
2 Ebiya Davida wakandila kwine’kwa na bandi bakaji babidi, Ahinoame+ wa ku Yezelele ne Abikele+ mukaji wa kishala wa Nabalu mwine Kalamela.
3 Davida wasela ne bantu baadi nabo,+ muntu ne muntu na ba mu njibo yandi, bashikata mu bibundi bya kufulakufula kwa Hebelona.
4 Penepa bantu ba Yuda baiya, kadi kwine’kwa bashinga Davida māni bu mulopwe pa njibo ya Yuda.+
Basapwila Davida amba: “Bantu ba Yabeshe-Ngileade bo bajīkile Solo.”
5 Ebiya Davida watuma mikendi ku bantu ba Yabeshe-Ngileade webanena’mba: “Yehova emwesele dyese mwanda mubalombola buswe bwa ndamatyidile kudi mfumwenu Solo na kumujīka.+
6 Yehova emulombole buswe bwa ndamatyidile ne bubinebine. Nami nkemulombola kanye mwanda wa kino kyomwalonga.+
7 Shi ke pano komejai makasa enu, ikalai bana-balume bakankamane, mwanda mfumwenu Solo wafu, kadi njibo ya Yuda ibaunshinga māni kendi mulopwe wabo.”
8 Ino Abinele+ mwanā Nele, mukata wa kibumbo kya divita kya Solo, waselele Ishi-Boshete+ mwanā Solo watyibuluka nandi bukila kufika ne ku Mahanaimi+
9 wamubikika bu mulopwe pa Ngileade,+ pa bene Ashula, pa Yezelele,+ pa Efelaimi,+ pa Benjemani, ne pa Isalela ense.
10 Ishi-Boshete mwanā Solo wadi na myaka 40 paabikele pa Isalela, wabikele myaka ibidi. Ino njibo ya Yuda ayo yalamete Davida.+
11 Kitatyi* kyabikele Davida bu mulopwe mu Hebelona pa njibo ya Yuda, i myaka isamba-ibidi ne myeji isamba.+
12 Mwenda mafuku, Abinele mwanā Nele ne bengidi ba Ishi-Boshete mwanā Solo, batamba ku Mahanaimi+ baenda ku Ngibeone.+
13 Yoabe+ mwanā Zeluya+ ne bengidi ba Davida nabo batamba bakesambakana nabo pa kijiba kya Ngibeone; kibumbo kimo kyashikata buno bukila bwa kijiba, kikwabo nakyo bobwa bukila bwa kijiba.
14 Ku mfulo Abinele wanena Yoabe amba: “Leka bansongwalume bemane bekupile* ku meso etu.” Yoabe nandi watentulula’mba: “Bemane.”
15 Penepo baimana batyibuluka mungya buvule bwabo, bantu 12 ba Benjemani ne Ishi-Boshete mwanā Solo, ne bantu 12 ba mu bengidi ba Davida.
16 Bekwata yeu ku mutwe wa mukwabo yeu ku mutwe wa mukwabo, kadi muntu ne muntu watunga kipete kyandi mu mbavu ya mukwabo, bonso bapona kya pamo. O mwanda kine kifuko’kya, kidi mu Ngibeone kitwanga bu Helekate-Hazudimi.
17 Bulwi bwalondele’po bwanana bibi mu dine difuku’dya, mfulo mfulō Abinele ne bantu ba Isalela banekenibwa ku meso a bengidi ba Davida.
18 Kadi bana basatu ba Zeluya+ badi’ko—ba Yoabe,+ Abishai,+ ne Asahele;+ kadi Asahele wadi upēla ku maulu pamo bwa kasha mu ntanda.
19 Asahele walonda Abinele lubilo, katontelepo ku lundyo nansha ku lunkuso paadi ulonda Abinele.
20 Abinele pa kwela meso kunyuma waipangula’mba, “I abe yao, a Asahele?” Nandi walondolola’mba, “I ami.”
21 Kupwa Abinele wamunena’mba: “Tontela ku lundyo nansha ku lunkuso lobe ukwate’ko umo wa mu bansongwalume, usele kyonso kyokamuvūla ke kyobe.” Ino Asahele kasakilepo kuleka kumulonda lubilo.
22 Kupwa Abinele wanena monka Asahele amba: “Leka kunonda lubilo. Kyosakila nkwipaye i kika? Le nkabwanya namani kutala mwanenu Yoabe mu mpala?”
23 Ino aye wadi upela’nka kupela kwimana, penepa Abinele wamukinka nsongo ya mutyi wa mukobe+ mu difu, kadi mukobe wamutambila pa nyuma; wapona wafwa ponka na ponka. Muntu yense wadi wiya popa paponene Asahele ne paafwidile wadi wimana wetūkija pene’pa.
24 Ebiya Yoabe ne Abishai bakalonda Abinele. Dyuba podyadi kedikapone, bafika ku mukuna wa Ama witadidile na Ngia, mu dishinda dyenda mu ntanda mutuputupu ya Ngibeone.
25 Kwine’kwa bene Benjemani bekongela pamo kunyuma kwa Abinele, bapunga kitango kimo, baimana pa nsongo ya mukuna kampanda.
26 Kupwa Abinele waela Yoabe lubila’mba: “Lelo kipete kikasasamuna’nka kusasamuna pampikwa mfulo? Le kuyukilepo amba kukalupuka’nka bululu? Penepa usa kwilaija kufika ne kitatyi’ka kumeso kwa kulombola bantu bajoke kobalondalonda banababo?”
27 Ebiya Yoabe wanena’mba: “Bine ne Leza wa bine byadi mūmi, shi kwanenenepo longa bantu badi ba kuleka kulonda banababo enka ku lubanga.”
28 Ponkapo Yoabe waila kimpungidi, penepa bantu bandi baleka’byo kulonda Isalela, ne bulwi bwapwa.
29 Abinele ne bantu bandi bapita mu Alaba+ bufuku bonso, batyibuluka Yodano kupwa bapita mu kinkolankola monso,* ku mfulo bafika ku Mahanaimi.+
30 Yoabe pa kujoka kwaadi ukalondele Abinele, wakongela bantu bandi bonso pamo. Ku bengidi ba Davida, kwapatukile bantu 19, kutentekela’po ne Asahele.
31 Ino bengidi ba Davida banekenye bene Benjemani ne bantu ba Abinele, kadi mu bantu babo mwafwile bantu 360.
32 Basela Asahele+ bakamujīka mu kibundu kya shandi kidi ku Betelema.+ Penepa Yoabe ne bantu bandi baenda bufuku bonso butuntulu, bafika ku Hebelona+ ku lubanga.
Kunshi kwa Dyani
^ Kishima pa kishima i, “Bungi bwa mafuku.”
^ Nansha’mba “betāke.”
^ Bibwanika padi i, “mu Bitolone monso.”
