Yee. Bibila beto dibakisaka mu telamana mabanza mamansoni ma tisembaka. (Mikunga 32:1-5) Tala ti musamu wa mbi tayirika mpe nkatika nionga tuniongaka, Nzambi mbo katulemokela, mpe mbo katubakisa mu wasa. (Mikunga 86:5) Bibila disongele ti mabanza ma tisembaka malendi bâ tima tia mbote—beto matumaka mu sungika ndiatulu ya mbi na mu lembo vutu ya kârila. (Mikunga 51:17; Bingana 14:9) Dieka bo, Bibila ditulombele mu lembo bwa mu mabanza ma yôka ma tisembaka. Mu tifwani, ka bwena bubote ko mu tâ ti ha meso ma Nzambi ba hombela twena, peleko ka twena salu ko. Tamana tomo tisembaka, musamu wo wulendi tu “nata ku bunôkena.”—2 Bisi-Korente 2:7, Nouvelle français courant.

•  Mu bungu dia nti mutima wulendi tu sembelaka?

•  Bwe tulendi telamana mabanza ma tisembaka?

•  Verse za Bibila zitariri mabanza ma tisembaka na mulemvo

 Tulendi bâ na mabanza ma tisembaka mu bungu dia misamu miamingi. Tulendi bâ na mabanza ma tisembaka tala ti tuta banza ti muntu wu tuzololo wutufwemese, peleko kani di takubika tulembane mu lungisa. Ntangu zakaka, mabanza ma tisembaka ma bâka neto malembo musamu. Mu tifwani, tala ti misamu mi tulembolo na lenda dia yirika tudingaka mu lungisa, tulendi tisemba bu tulembo lenda mu lungisa mio. Ntiangu Bibila ditulombaka mu kubikaka makani ma delakana.​—Ekleziaste 7:16.

 Ku bikandi mabanza ma tisemba makunôkesa, kâ sa ngolo mu tomesa misamu. Mu bungu dia nti?

•   Tambula makuba maku. Mu lusambulu, lomba kwe Nzambi, Yehova, a kakulemvokela. (Mikunga 38:18; Like 11:4) Lendi bâ na lukwikulu ti Nzambi mbo kakuwâ tala ti tomono soba mabanza mpe siri ngolo mu lembo vutu wa kârila. (2 Ntangu 33:13; Mikunga 34:18) Nzambi kena muntu ko, Yandi mabanza meto ma ku kati katalaka. Nzambi bu katumonaka, tala ti yêla tuta yêla mu bika nsalulu ya mbi, “Yandi wa kwikama mpe wa sungama wena mu lemvokela masumu meto.”​—1 Za 1:9; Bingana 28:13.

   Diangana, tala ti musamu wa mbi wayirika kwe muntu, kampe mbo bâ na nsatu ya tambula wo na ya lomba mulemvo mu bunsungu kwe muntu wô. Wulendi bâ musamu wa mpasi! Wulendi lomba wabâ na butindi, mpe wabâ wa kûluka. Kâ, mulemvo’eto wamana tûka ku mutima, mbo wubâ na ndandu zole: Mbo tomo mona bubote, mpe tindiku tiaku na muntu wo mbo tivutu bâ mu tidzunu.​—Matie 3:8; 5:23, 24.

•   Dimbitilaka mu verse zizonzelaka mulemvo wa Nzambi. Mu tifwani, tanga 1 Za 3:19, 20. Mu verse zo, tutengi ti “mutima’eto wulendi tu semba”​—diangana, ntangu zakaka semba kwingi tutisembaka. Ka tulendi’â tabanzaka ko ti luzolo lwa Nzambi ka lutufwanane’â ko. Kâ verse yo yitêle mpe ti “Nzambi yôkele mutima’eto. ”Ngano bwe wuta zolo tâ? Misamu mieto miamiansoni Nzambi mia kazebi, mpe mabanza meto na bunôkena bweto bwa kabakulaka. Yandi mpe zebi ti bantu ba masumu twena, mpe nsatu yivulu bâka neto ya yirika mbi. b (Mikunga 51:5) Yandi ka losaka bô batomo niongaka mu bungu dia masumu mawu ko.​—Mikunga 32:5.

•   Kubanzakandi mbi yi wayirika mu ntama. Bibila binsamu dizonzelaka bia bantu beri yirikaka misamu mia mbi mpe bayizi soba ndiatulu. Tabonga tifwani tia Saule wa ku Tarse, yandi wayizi bâ ntumwa Paulo. Bu kabâ Farize, yandi watomo kwamisa milongoki mia Yezu. (Bisalu 8:3; 9:1, 2, 11) Kâ, bu kabakula ti Nzambi keri telamanaka na Masiya (Kristo), yandi wasoba mabanza na ndiatulu, mpe wayizi bâ Mukristo wa mbote. Diangana, Paulo watomo nionga mu bungu dia misamu mi kayirika, kâ keri kwama kwe banzi misamu mia ntama ko. Yandi watomo bakula ti Yehova wamulemvokela. Yandi wayizi bâ tisamuni tie na luhemo mpe kahombesa tivuvu tiandi ko tia luzingu lwa mankululu.​—Bisi-Filipe 3:13, 14.

 Yeremi 31:34: “Mbo nilemvokela kuba diawu mpe ka nivutu’â bambukila masumu mawu ko.”

 Mbangululu: Nzambi bu kamana tu lemvokelaka, ka vutu’â kârilaka mbi yi tayirika ko. Mulemvo wa lunga kahanaka.