FINAMA NZAMBI
‘Nukwamanana Lomba, Ozevo Nuvewa’
“E Mfumu, utulong’o samba.” (Luka 11:1) Mosi muna alongoki a Yesu wavanga ndomba yayi. Muna mvutu zandi, Yesu wayika yingana yole ilenda kutulonga e mpila tulenda sambila yo wakana kwa Nzambi. Avo okatikisanga kana vo Nzambi owanga e sambu yaku, sia sungididi muna mvutu za Yesu.—Tanga Luka 11:5-13.
E kingana kiantete kisianga sungididi kwa ndiona osambanga. (Luka 11:5-8) Lusansu lwalu luyikanga muntu watambula nzenza muna fuku, kansi kakala ye madia ko muna kumvana. O ntambudi a nzenza, wamona vo kafwete vanga diambu. Kana una vo nzenza mu kati kwa fuku kalwaka, o ntambudi a nzenza wayenda kwa nkundi andi kansompeka mbolo. Kuna lubantinu, o nkundi kazola sikama ko kadi wakilekela kala kumosi y’esi nzo andi. Kansi, wau vo watatamena kunlomba, o nkundi andi wasikama ye kumvana madia. *
Nkia diambu dikutulonganga e kingana kiaki mu kuma kia sambu? Yesu okutulonganga vo tufwete kwamanana o lomba, vava, yo dodela. (Luka 11:9, 10) Ekuma? Nga Yesu wasonga vo Nzambi okatikisang’o wá sambu yeto? Ve. Yesu edi kazola vova, nswaswani ye nkundi ndiona wakatikisanga, Nzambi oyangalelanga vana e mvutu za sambu y’awana bekunlombanga kuna kwikizi. Tusonganga lukwikilu lwalu vava tuzizidilanga muna sambu. Vava tukwamanananga o lomba mun’owu wa luzolo luandi, tusonganga vo tuzolele kikilu tambula dina tulombanga ye tukwikilanga vo okutuvana dio.—Maku 11:24; 1 Yoane 5:14.
E kingana kia zole kisianga sungididi kwa ndiona “Owanga sambu.” (Nkunga 65:2) Yesu wayuvula vo: “Nki’ese vava nwina, dilombwa mbolo kwa mwan’andi, kakumvan’etadi? Ovo mbizi a maza, oyandi kayambula mbizi a maza, kamvan’e nioka? Ovo diaki kelombwa, kakumvana nkutu?” Dialudi vo, ka vena se dimosi ko dianzodi olenda vana lekwa kiambi kwa wan’andi. I bosi, Yesu wasasila kingana kiaki: Avo mase malembi lunga ‘bevananga tukau’ twambote kwa wan’au, o Tata kun’ezulu, nkia nduta keluta van’o mwand’avelela’ una vo i lukau lusundidi kw’awana bekunlombanga! *—Luka 11:11-13; Matai 7:11.
Nzambi oyangalelanga vana e mvutu za sambu y’awana bekunlombanga kuna kwikizi
E kingana kiaki adieyi kikutulonganga mu kuma kia Yave ndiona “Owanga sambu”? Yesu okutusadisanga mu zaya vo Yave una nze Se dianzodi ndiona una ye luzolo lwa lunga-lunga nsatu za wan’andi. Muna kuma kiaki, asambidi a Yave kondwa kwa wonga balenda kumfinama muna lomba mana bazolele. Wau bazeye wo vo Nzambi ovanganga mawonso muna wete diau, betambulwilanga konso mvutu kevananga muna sambu yau kana nkutu vo ke zau ko bavingilanga. *
Ntangilu a Nkand’a Nzambi mu Ngonde ya Abidi
^ tini. 4 Muna zaya diaka mambu makaka mu kuma kia sambu yo wakana kwa Nzambi, tala kapu kia 17 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave.
^ tini. 6 E kingana kia Yesu kisonganga fu ye mambu mebwanga muna zingu kia lumbu ke lumbu. Ayuda babadikilanga e fu kia tambula nzenza nze diambu diamfunu. Esi nzo bavanganga mbolo zafwana muna mwini, ozevo ke diakala diampasi ko muna sompeka mbolo kwa muntu wakondwanga zo. Ana bakala vo asukami, esi nzo yawonso va ntoto balekanga muna suku dimosi.
^ tini. 7 Nkumbu miayingi Yesu wasadilanga e mvovo “nkia nduta kelut’o” van’o muna songa vo Nzambi osundidi ovana ke mu wantu ko.
