Nkia Ntangwa Iyantika e Vita ya Armangedo?

“Mbwene ndong’ayingi, ina ilembi tangakana kwa muntu, yatuka muna zula yawonso, yo makanda, ye nsi, ye ndinga . . . i yau yana batuka muna mpasi zayingi.”—LUSENGOMONO 7:9, 14.

NTANGWA iyantika e vita ya Armangedo ifwene. Mu nkia mpila?

Mu nz’amvimba vena ye nkangu usadilanga Yave yo zingila ngwizani ye nkanikinu mia Nkand’a Nzambi. Muna lusadisu lwa Nzambi, ulolo wa wantu betukanga muna zula yawonso, yo makanda ye ndinga belunganiswanga muna kintwadi kia wana-ngudi. E kintwadi kiaki kimonekanga vana vena Mbangi za Yave.—Yoane 13:35.

Ke kolo ko, Satana olungalakesa makesa mandi mu nwanisa nkangu wau wa luvuvamu, umonekanga vo ke ulendi kuyitanina ko. E vita yayi isunda vita zawonso kanwana kala. (Yezekele 38:8-12; Lusengomono 16:13, 14, 16) Aweyi tuzayidi wo vo ediadi vangama divangama? Nkand’a Nzambi uyikanga mambu masikididi malenda kutusadisa mu zaya e ntangwa e vita ya Armangedo iyantika. Mayingi muna mambu mama mu lungana mena.

Mambu Melungananga o Unu

Alongoki a Yesu banyuvula una o wantu bezayila vo e “mbaninu a tandu” kiaki ifinamene. (Matai 24:3) Muna mvutu kabavana, Yesu wayika e ntangwa ina e “zula itelamena zula, kintinu ye kintinu: mukala mvengele ye nzakama za ntoto o mwakamwaka.” I bosi wavova vo: “Omama mawonso, i lubantiku lua nsongo.” (Matai 24:7, 8) Paulu wa ntumwa wayikila ekolo kiaki vo “lumbu yambaninu.” Wavova vo e lumbu yayi ikala “nsungi za tema.” (2 Timoteo 3:1) Nga ongeye mpe omonanga vo e mambu mevangamanga o unu melungisanga ungunza wau?

Ekuma ekolo kiaki kikadila kikilu kiampasi? Yoane wa ntumwa wayika e kuma.  Wasakula vo vekala ye “kolo kiandwelo” kina Satana ye nkwiya miandi besonga nkum’au wawonso ova ntoto. Wayika mpe vo muna kolo kiaki Satana okala ye “makasi mayingi.” (Lusengomono 12:7-12) Nga kumonanga ko vo e fu kia funga makasi mayingi ye umpumbulu mu wokela kina mu nza yawonso?

Yesu wavova mpe vo muna kolo kiaki kia mpasi, salu kiampwena kisalwa. Wavova vo: “E nsangu zazi zambote za kintinu [kia Nzambi] zisamunwa muna nza yawonso, muna umbangi kwa zula yawonso; i bosi iluak’e mbaninu.” (Matai 24:14) O unu, vioka 235 ma nsi, Mbangi za Yave besamunang’e nsangu zambote za Kintinu kia Nzambi mu vioka 500 za ndinga. Yinkanda yole bevaikisanga, Eyingidilu ye Despertai!, eyi isasilanga Nkand’a Nzambi, i nkanda milutidi kayaneswa mu nza yawonso. Mbangi za Yave basekwele kala Nkand’a Nzambi mu vioka 100 za ndinga. E salu kiaki kisalwanga kw’awana bekuyivananga kuna mvevo. E nzimbu besadilanga mu tukau twa mvevo zitukanga. E salu kiaki kia samun’e nsangu zambote, nga ungunza wa Yesu kilungisanga?

Nkand’a Nzambi uyikanga mpe mambu metwasa vita vana vena Yave wa Nzambi ye mbeni zandi. Badika ungunza tatu ulungana.

Mambu Mebwa ke Kolo Ko

Ungunza 1. Nkand’a Nzambi usonganga vo esi zula besinga vova mu mpila yakiá vo “ngemba yo luvuvamu.” Nanga bebanza vo fioti fisidi belenda fokola mpasi zawonso bemonanga o wantu. Kansi, e mambu melandila e mvovo miami ke mekala ma luvuvamu ko.—1 Tesalonika 5:1-3.

Ungunza 2. I bosi, tuyalu twayingi tubak’e nzengo za telamena mabundu mu nza yawonso. Muna Nkand’a Nzambi, tuyalu twatu tusunzulwanga kwa bulu kiansisi; vo i nsambila zawonso zaluvunu zisunzulwanga kwa nkento ona ovwende vana ntandu a bulu kiaki. (Lusengomono 17:3, 15-18) Bulu kiaki kivanga diambu dina ketumwa kwa Nzambi, i sia vo, fwasa mabundu mawonso bevunanga vo Nzambi besadilanga.

Yoane wa ntumwa wayika una diambu diadi divangamena. Wasoneka vo: “Vo i mpaka zau ekumi, zin’omwene, ye bulu, yau besaul’o nkembi, yo kunkitula se nsona ye nkonga, yo dia nitu andi, yo kumbomesa vana tiya. Okala vo kadi o Nzambi osidi dio muna ntima miau, edi dia vanga lukanu luandi.”—Lusengomono 17:16, 17.

Ungunza 3. Vava befwasa nsambila zaluvunu, Satana ofila esi zula mu nwanisa awana besambilanga Yave wa Nzambi.—Lusengomono 7:14; Matai 24:21.

Adieyi Ofwete Vanga?

Avo kwakedi y’elau dia longoka Nkand’a Nzambi ko, dilenda kala diampasi kwa ngeye mu kwikila vo mambu tuyikidi mesinga vangama. Kansi, vena ye kuma kiasikila mu kwikila vo mambu mama mawonso melungana ke kolo ko. Ungunza wayingi wa Nkand’a Nzambi una walungana kala usonganga e ziku vo mambu mama vangama mevangama. *

Ekuma olembi vaulwila e ntangwa mu zaya e kuma Mbangi za Yave bekwikidilanga vo e “vit’a lumbu kianene kia Nzambi wa Mpungu-ngolo” ifinamene ye kuma kufwete kadila ye wonga wa vita yayi ko? Ubalomba bazayisa dina Nkand’a Nzambi uvovanga ofwete vanga kimana wakala muna buka ki’awana Yave wa Nzambi ketanina. (Lusengomono 16:14) Mana olongoka mekusadisa mu kala ye vuvu kia kusentu.

[Mvovo Vana Yand’a lukaya]

[Mvovo mia Sina muna lukaya lwa 8]

Nga e salu kia Mbangi za Yave ungunza wa Nkand’a Nzambi kilungisanga?