Lusengomono kwa Yoane 12:1-17
12 I bosi, sinsu kianene kimonekene kuna zulu: Nkento+ ovuete ntangwa, o ngonde kuna nsi a tambi yandi, vana ntu andi vakedi ye kolowa kia ntetembwa 12,
2 wayimita kakala. Okazidi muna ndunza zandi, e nsongo mia wuta mimbakidi.
3 Sinsu kiankaka kimonekene kuna zulu. Tala! Ngobodi ampwena wambwaki+ una ye ntu nsambwadi ye mpoka kumi, ye banda* nsambwadi ya kimfumu vana ntu miandi;
4 e nkil’andi uvolele tini kiatatu kia ntetembwa+ za zulu, utubidi zo ova ntoto.+ E ngobodi itelamene vana ndose a nkento+ ofinamene wuta kimana vava kewuta, kamina o mwan’andi.
5 Owutidi mwan’a yakala,+ ona ovungula zula yawonso muna mvual’a sengwa.+ O mwan’andi ozavuinu* kuna kwa Nzambi yakuna kunda kiandi.
6 O nkento otinini kuna makanga, kuna kakubikilwa e fulu kwa Nzambi, i kûna bekundikila mu 1.260 ma lumbu.+
7 Kukedi vita kuna zulu: Mikaele*+ ye mbasi zandi banuene ye ngobodi, o ngobodi ye mbasi zandi banuene yau,
8 kansi ke basundidi ko,* ngatu kala diaka ye fulu kuna zulu.
9 Muna kuma kiaki, o ngobodi anene+ ovetelo, e nioka ankulu,+ ona oyikilwanga vo Nkadi ampemba+ ye Satana,+ ona ovukumunanga nza yawonso;+ ovetelo ova nza,+ e mbasi zandi zivetelo yandi kumosi.
10 Ngwidi nding’a ngolo kuna zulu, ivovele vo:
“Owau, o luvuluzu lwizidi,+ ye nkuma, ye Kintinu kia Nzambi eto+ ye wisa kia Kuswa* kiandi, e kuma kadi o mfundi a mpangi zeto ovetelo, ona okubafundanga vana ndose a Nzambi eto, fuku yo mwini!+
11 Bansundidi+ mu kuma kia menga ma Mwan’a meme+ ye mu kuma kia diambu dia umbangi wau,+ ke bazolele mioyo* miau ko+ kana nkutu muna vonza kia lufwa.
12 Dianu vo, yangalala e zulu yo yeno nukalanga ko! Tâtu kwa ntoto ye kalunga,+ e kuma kadi o Nkadi ampemba okulumukini koko nuina, makasi mayingi kena mau, wau kazeye wo vo kolo kiakete kaka kasidi kiau.”+
13 Vava ngobodi kamwene vo ovetelo ova nza,+ obangikidi o nkento+ ona owutidi mwan’a yakala.
14 Kansi, mave mole ma ngo-zulu ampwena+ maveno kwa nkento kimana katilumuka kuna makanga kuna fulu kiandi, kuna kedikidilwa mu kolo kimosi ye kolo yole ye ndambu a kolo,*+ kavavuka vana ndose a nioka.+
15 O nioka olukidi maza nze nkoko muna nu’andi kuna nim’a nkento kimana o nkoko wankukulwisa.
16 Kansi o ntoto usadisi o nkento, uziwidi nu’andi, uminini o nkoko una kalukidi o ngobodi muna nu’andi.
17 O ngobodi ofungidi nkento makasi, wele nuanisa nsadisw’a mbongo andi,+ ana belundanga nkanikinu mia Nzambi, bena ye salu kia sia umbangi mu kuma kia Yesu.+
Mvovo vana yand'a lukaya
^ Yovo “kolowa ya kimfumu.”
^ Yovo “obakilu.”
^ Ina ye nsasa vo: “Nani Ofwanane yo Nzambi?”
^ Nanga, “kansi osundilu [i sia vo, ngobodi].”
^ Yovo “Kristu.”
^ Tala Nsas’a Mvovo.
^ I sia vo, kolo tatu ye ndambu.
