1, 2. Insay Jɛnɛsis to Malakay, wetin di wɔd ‘di say we Gɔd de put in fut’ min?

JIOVA GƆD dɔn tɔk se: “Di ɛvin na mi ples we a sidɔm fɔ rul, ɛn di wɔl na di say we a de put mi fut.” (Ayz. 66:​1) We i bin de tɔk bɔt ‘di say we i de put in fut,’ i bin tɔk bak se: “A go mek di ples we a de put mi fut fayn.” (Ayz. 60:​13) Aw Jiova de du dat? Ɛn wetin dis min fɔ wi we de liv ‘na di say we Gɔd de put in fut’?

² Frɔm Jɛnɛsis to Malakay we di Baybul yuz di wɔd ‘di say we Gɔd de put in fut’ i nɔ jɔs min dis wɔl we wi de liv. Dɛn kin yuz dis wɔd bak fɔ tɔk bɔt di tɛmpul we bin de na Izrɛl trade trade. (1 Krɔn. 28:​2; Sam 132:​7) Di tɛmpul bin rili fayn na Jiova in yay, bikɔs na de na bin di men ples we dɛn bin de wɔship am. Dɛn bin de yuz am fɔ prez Jiova na dis wɔl.

3. Wetin tan lɛk tɛmpul na Gɔd in yay? Ustɛm i bigin?

³ Tide, wi nɔ gɛt tru tru tɛmpul na di wɔl we pipul dɛn de go fɔ wɔship Jiova di rayt we. Bɔt sɔntin de tide we tan lɛk tɛmpul na Gɔd in yay. Dis tɛmpul de prez Jiova fa fawe pas ɛni bildin. Dis tɛmpul na di arenjmɛnt we mek am pɔsibul fɔ  lɛ wi bi Gɔd in padi ɛn wɔship am. Ɛn na di prist wok we Jizɔs Krays de du ɛn di day we i day mek am pɔsibul. Dis arenjmɛnt bigin insay di ia 29 we Jizɔs baptayz ɛn we Jiova anɔynt am as Ay Prist fɔ dis tɛmpul.—Ibru 9:​11, 12.

4, 5. (a) Aw Sam 99 sho wetin Jiova in savant dɛn we de wɔship am di rayt we want fɔ du? (b) Us kwɛstyɔn wi fɔ aks wisɛf?

⁴ Fɔ sho se wi gladi fɔ di arenjmɛnt we Jiova dɔn mek fɔ lɛ wi wɔship am di rayt we, wi fɔ de prez am bay we wi de tɛl ɔda pipul dɛn bɔt in nem ɛn tɛl am tɛnki fɔ di day we i mek Jizɔs kam day fɔ wi. I rili fayn fɔ no se i dɔn pas et milyɔn tru Kristian dɛn tide we de prez Jiova! Sɔm pipul dɛn we lɛk Gɔd biznɛs kin fil se dɛn go prez Gɔd we dɛn go na ɛvin, bɔt ɔlman we na Jiova Witnɛs no se na dis wɔl dɛn fɔ prez Gɔd ɛn na naw dɛn fɔ du am.

⁵ Wi de fala di fayn ɛgzampul we Jiova in fetful savant dɛn sɛt fɔ wi na Sam 99:​1-3, 5-7. (Rid.) Di tin dɛn we de na dɛn vas ya de sho klia wan se Mozis, Erɔn, ɛn Samiɛl bin rili sɔpɔt di arenjmɛnt we Jiova bin mek fɔ lɛ pipul dɛn wɔship am di rayt we insay dɛn yon tɛm. Tide, bifo di balans anɔyntɛd Kristian dɛn go na ɛvin fɔ go bi prist wit Jizɔs, dɛn de wɔship Jiova fetful wan na dis wɔl ɛn dɛn de sɔpɔt di arenjmɛnt we Jiova dɔn mek fɔ lɛ pipul dɛn wɔship am di rayt we. Bɔku pan di “ɔda ship dɛn” de sɔpɔt dɛn anɔyntɛd brɔda ya. (Jɔn 10:​16) Pan ɔl we di anɔyntɛd dɛn ɛn di ɔda ship dɛn gɛt difrɛn op, dɛn ɔl de prez Jiova Gɔd togɛda na dis wɔl. Bɔt i go fayn lɛ wi aks wisɛf dis kwɛstyɔn, ‘A de du mi bɛst fɔ sɔpɔt di arenjmɛnt we Jiova dɔn mek fɔ wɔship am di rayt we?’

6, 7. Us prɔblɛm bin de na di Kristian kɔngrigeshɔn we bin de trade trade? Leta, wetin Jiova bin du?

⁶ Di Baybul bin dɔn tɔk se tɛm go kam we sɔm pipul dɛn go bigin tich lay lay tin dɛn na di kɔngrigeshɔn. Ɛn dat bin bigin fɔ apin ivin bifo di kɔngrigeshɔn rich ɔndrɛd ia. (Akt 20:​28-30; 2 Tɛsa. 2:​3, 4) Afta dat, i bin at fɔ no udat rili de sɔpɔt di arenjmɛnt we Gɔd bin dɔn mek fɔ lɛ pipul dɛn wɔship am di rayt we. Na leta Jiova yuz Jizɔs Krays we bin jɔs dɔn bi Kiŋ fɔ sho udat rili de wɔship am di rayt we.

⁷ Bay di ia 1919, Jiova mek pipul dɛn no klia wan udat dɛn i gladi fɔ ɛn udat dɛn de sɔpɔt di arenjmɛnt we i dɔn mek fɔ lɛ pipul dɛn wɔship am di rayt we. Dɛn bin ajɔst di tin dɛn we dɛn bin biliv so dat dɛn go rili wɔship Gɔd di we we i want. (Ayz. 4:​2, 3; Mal. 3:​1-4) Di tin we di apɔsul Pɔl bin si trade trade pan vishɔn bigin fɔ apin smɔl smɔl.

8, 9. Ɛksplen di tri tin dɛn bɔt di “paradays” we Pɔl bin si na vishɔn.

⁸ Di vishɔn we Pɔl bin si de na Sɛkɔn Lɛta Fɔ Kɔrint 12:​1-4. (Rid.) Na Jiova bin sho Pɔl di tin dɛn we i bin si insay dis vishɔn. Di tin dɛn we Pɔl bin si na tin dɛn we fɔ apin tumara bambay, nɔto tin dɛn we bin de apin di tɛm we Pɔl bin de. We Pɔl “bin go na di tɔd ɛvin,” us “paradays” i bin si? Fɔs, i go bi se i min di tru tru Paradays we gɛt fɔ bi na dis wɔl. (Lyuk 23:​43) Sɛkɔn, i kin min di pis we Jiova go gi in pipul dɛn na di nyu wɔl. Ɛn tɔd, i kin min di wɔndaful blɛsin dɛn we gɛt fɔ de na ɛvin na “Gɔd in paradays.”—Rɛv. 2:⁠7.

⁹ Wetin mek naw Pɔl bin se i “yɛri wɔd dɛn we nɔbɔdi nɔ ebul fɔ tɔk ɛn we nɔ rayt  fɔ mek ɛnibɔdi tɔk am”? Na bikɔs di tɛm nɔ bin rich yet fɔ lɛ i ɛksplen ɔl di wɔndaful tin dɛn we i si na di vishɔn. Bɔt tide Jiova dɔn alaw wi fɔ tɔk bɔt di blɛsin dɛn we in pipul dɛn de ɛnjɔy rayt naw!

10. Wetin mek wi buk ɛn magazin dɛn kin se Gɔd in pipul dɛn de na Paradays? Wetin di arenjmɛnt we Jiova dɔn mek min?

¹⁰ Bɔku tɛm, wi buk ɛn magazin dɛn kin se i tan lɛk se na Paradays Gɔd in pipul dɛn de. Wetin mek? Na bikɔs Jiova de gi in pipul dɛn pis. Dis de sho klia wan se na dɛn nɔmɔ de sɔpɔt di arenjmɛnt we Jiova Gɔd dɔn mek fɔ lɛ pipul dɛn wɔship am di rayt we. Wetin dis arenjmɛnt min? I min di wɔship we wi de wɔship Jiova. Ɛn na Jizɔs Krays in day dɔn mek dat pɔsibul.—Mal. 3:⁠18.

11. Us spɛshal wok wi gɛt fɔ du tide?

¹¹ I rili fayn fɔ no se frɔm 1919, Jiova dɔn alaw mɔtalman dɛn we nɔ pafɛkt fɔ wok wit am so dat di pis we i de gi go kɔntinyu ɛn fɔ mek bɔku pipul dɛn kam jɔyn dɛn fɔ ɛnjɔy dis pis na di wɔl! Yusɛf de ɛp fɔ du dis wok? Yu de si am se dis fɔ mek yu kɔntinyu fɔ wok wit Jiova fɔ mek di ‘ples we i de put in fut’ fayn mɔ ɛn mɔ?

12. Us gud rizin wi gɛt fɔ biliv se wetin Ayzaya 60:​17 bin tɔk dɔn bi? (Luk di pikchɔ nia dis atikul in taytul.)

¹² Di pat pan Jiova in ɔganayzeshɔn we de na dis wɔl dɔn mek bɔku chenj dɛn. Di Baybul bin dɔn tɔk bɔt dis insay Ayzaya 60:⁠17. (Rid.) Di wan dɛn we yɔŋ ɔ we jɔs kam na di trut go dɔn rid bɔt dɛn chenj ya ɔ ɔda pipul dɛn go dɔn tɛl dɛn. Bɔt na big big ɔnɔ fɔ di brɔda ɛn sista dɛn we bin de di tɛm we dɛn mek dɛn chenj ya! Na dis bin mek dɛn biliv se Jiova de yuz Jizɔs we dɔn bi Kiŋ fɔ sho in ɔganayzeshɔn wetin fɔ du! Dɛn gɛt bɔku bɔku rizin dɛn we mek dɛn biliv dis, ɛn wisɛf gɛt bɔku rizin dɛn fɔ biliv dis. We wi yɛri di gud tin dɛn we dɛn de tɔk bɔt di ɔganayzeshɔn, i go ɛp wi fɔ gɛt mɔ fet ɛn i go mek wi abop pan Jiova mɔ.

13. Wetin Sam 48:​12-14 tɛl wi fɔ du?

¹³ Ilɛk ɔmɔs ia wi dɔn tek na di trut, wi fɔ tɛl ɔda pipul dɛn bɔt Jiova in ɔganayzeshɔn. Di pis we Jiova in pipul dɛn de ɛnjɔy insay dis wikɛd wɔl, usay pipul dɛn kɔrɔpt, ɛn usay pipul dɛn nɔ lɛk dɛnsɛf, na rial mirekul! Wi fɔ gladi fɔ tɛl wi “granpikin dɛn,” bɔt di wɔndaful tin dɛn we wi no bɔt Jiova in ɔganayzeshɔn, we dɛn kin kɔl bak “Zayɔn,” ɛn tɛl dɛn bɔt di pis we Jiova de gi wi.—Rid Sam 48:​12-14.

14, 15. Wetin na sɔm chenj dɛn we di ɔganayzeshɔn bin mek insay dɛn 1970? Aw dɛn chenj ya dɔn bɛnifit wi?

¹⁴ Bɔku pan wi brɔda ɛn sista dɛn we dɔn ol dɔn si sɔm chenj dɛn we di ɔganayzeshɔn dɔn mek ɛn dɛn chenj ya dɔn mek di pat pan Jiova in ɔganayzeshɔn we de na dis wɔl fayn mɔ ɛn mɔ. Dɛn mɛmba di tɛm we wi bin jɔs gɛt wan kɔngrigeshɔn savant, wi nɔ bin gɛt ɛlda dɛn na di kɔngrigeshɔn. Trade, wi nɔ bin gɛt Branch Kɔmiti, wi bin jɔs gɛt wan branch savant. Ɛn na di prɛsidɛnt fɔ di Wach Tawa Sosayti na in bin de sho aw di prichin wok fɔ go, nɔto di Gɔvnin Bɔdi fɔ Jiova Witnɛs dɛn. Pan ɔl we dɛn brɔda ya bin gɛt ɔda pipul dɛn we de ɛp dɛn, na wan pɔsin nɔmɔ bin de disayd wetin fɔ du na di kɔngrigeshɔn dɛn, na di branch ɔfis dɛn, ɛn na di ɛdkwata. Insay dɛn 1970, di ɔganayzeshɔn bin disayd se nɔto wan pɔsin go de disayd wetin fɔ du, na sɔm ɛlda dɛn naw go de du dat.

¹⁵ Yu tink se dɛn chenj ya dɔn bɛnifit wi?  Yɛs, dɛn dɔn bɛnifit wi. Wetin mek wi se so? Na bikɔs di brɔda dɛn bin dɔn ɔndastand di Baybul mɔ ɛn dɛn bin want fɔ du wetin dɛn dɔn lan frɔm di Baybul. Naw nɔto wan pɔsin de disayd ɔl wetin fɔ apin, so di ɔganayzeshɔn de bɛnifit frɔm di gud kwaliti dɛn we ɔl di ɛlda dɛn gɛt. Ɛn di ɛlda dɛn “tan lɛk gift” we Jiova dɔn gi wi.—Ɛfi. 4:​8; Prɔv. 24:⁠6.

16, 17. Wetin na sɔm chenj dɛn we di ɔganayzeshɔn dɔn mek dɛn biɛn tɛm ya we yu rili lɛk? Wetin mek yu lɛk dɛn?

¹⁶ Tink bak bɔt sɔm chenj dɛn we di ɔganayzeshɔn jɔs dɔn mek, lɛk di we aw wi buk ɛn magazin dɛn de naw, di tin dɛn we de insay de, ɛn di we aw wi de sheb dɛn. Tide wi buk ɛn magazin dɛn fayn fɔ luk. Yu nɔ kin gladi mɔ we yu de yuz dɛn fɔ prich? Tink bɔt sɔm tin dɛn we sayɛnsman dɛn dɔn mek we wi de yuz fɔ prich, lɛk di jw.org Wɛbsayt. We wi de yuz dɛn tin ya, wi de falamakata Jiova fɔ ɛp pipul dɛn ɔlsay na di wɔl fɔ lan bɔt am ɛn wi de ɛp dɛn fɔ no di advays dɛn we de insay in Wɔd, di Baybul we dɛn rili nid fɔ no.

¹⁷ Wan ɔda chenj we wi nɔ fɔ fɔgɛt na di chenj we dɔn mek wi gɛt Famili Wɔship ɔ we dɔn mek wi gɛt mɔ tɛm fɔ stɔdi di Baybul wi wan. Wi gladi bak fɔ di chenj dɛn we dɛn de mek na wi asɛmbli ɛn kɔnvɛnshɔn program dɛn. Na dat mek bɔku tɛm wi kin se dis ia program fayn pas di wan las ia! Ɛn wi gladi bak fɔ di bɔku skul dɛn we di ɔganayzeshɔn dɔn mek fɔ tich wi di Baybul, dɛn skul ya de ɛp fɔ tren brɔda ɛn sista dɛn mɔ. Wi de si klia wan se Jiova in an de pan ɔl dɛn chenj ya. Smɔl smɔl, Jiova de mek in ɔganayzeshɔn de fayn mɔ ɛn mɔ ɛn i de mek wi kɔntinyu fɔ ɛnjɔy di pis we i de gi wi rayt naw!

18, 19. Wetin wi go du fɔ mek wi kɔntinyu fɔ ɛnjɔy di pis we Jiova de gi wi?

¹⁸ Na big big ɔnɔ wi gɛt fɔ lɛ Jiova alaw wi fɔ du sɔntin we go mek wi kɔntinyu fɔ ɛnjɔy di pis we i de gi in pipul dɛn. Wetin wi go du fɔ kɔntinyu fɔ ɛnjɔy dis pis? Na we wi de prich di gud nyus bɔt Gɔd in Kiŋdɔm wit zil ɛn ɛp fɔ mek mɔ pipul dɛn kam fɔ sav Jiova. Ɛnitɛm we wi ɛp pɔsin fɔ gi in layf to Jiova, wi dɔn mek mɔ pipul dɛn kam jɔyn wi fɔ ɛnjɔy di pis we Jiova de gi in pipul dɛn.—Ayz. 26:​15; 54:⁠2.

¹⁹ Wan ɔda tin we go mek wi kɔntinyu fɔ ɛnjɔy di pis we Jiova de gi in pipul dɛn na we wi de tray tranga wan fɔ gɛt gud abit dɛn. We wi du dis, wi go mek ɔda pipul dɛn want fɔ kam jɔyn wi fɔ ɛnjɔy dis pis we Jiova de gi. Bɔku tɛm nɔto di tin dɛn we wi de lan na di Baybul kin mek pipul dɛn want fɔ jɔyn wi, bɔt na di fayn we aw wi de biev na in kin mek ɔda pipul dɛn want fɔ kam na di ɔganayzeshɔn fɔ kam no bɔt Gɔd ɛn Krays.

20. Frɔm wetin Prɔvabs 14:​35 se, wetin wi go want fɔ du?

²⁰ Jiova ɛn Jizɔs kin gladi we dɛn de si se wi de ɛnjɔy dis pis tide! Di gladi we wi de gladi naw fɔ du sɔntin fɔ mek wi kɔntinyu fɔ ɛnjɔy dis pis, na jɔs smɔl tin we yu kɔmpia am to di gladi we wi gɛt fɔ gladi we wi go de wok fɔ mek di wan ol wɔl tɔn to Paradays. I go fayn mek wi de tink bɔt Prɔvabs 14:​35, we se: “Di kiŋ kin gladi fɔ in savant dɛn we de du tin wit sɛns.” So lɛ wi du tin wit sɛns ɔltɛm as wi de tray tranga wan fɔ du sɔntin we go mek wi kɔntinyu fɔ ɛnjɔy di pis we Jiova de gi in pipul dɛn!