Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN YU GO DU FƆ LƐF FƆ WƆRI?

Fɔ Wɔri bɔt Denja

Fɔ Wɔri bɔt Denja

Wan uman we nem Alɔna tɔk se: “We a yɛri di sawnd, mi at bigin fɔ bit ɛn a rɔn go ayd usay dɛn kin ayd we bɔm wan skata. Bɔt ivin we a de de, a bin stil de wɔri. I kin bad-ɔf we a de na do, we no say nɔ de fɔ ayd. Wan tɛm, we a bin de waka na strit, a bigin fɔ kray ɛn a nɔ bin ebul fɔ blo. I tek lɔng tɛm fɔ lɛ a fil fayn. Dɔn di sawnd bigin bak.”

Alɔna

Wɔ na wan pan di tin dɛn we kin mek wi layf de pan denja. Fɔ ɛgzampul, we yu kam no se yu ɔ pɔsin we yu lɛk sik siriɔs wan i jɔs tan lɛk we dɛn ib bɔm pan yu. Ɛn ɔda pipul dɛn kin fred di tumara bambay ɛn dis kin mek dɛn wɔri. Dɛn kin wɔri ɛn aks se, ‘Fɔ se wi pikin dɛn ɔ granpikin dɛn go kam de na wɔl usay wɔ go de apin, usay bad bad tin dɛn go de apin, usay dɛn sik we de prɛd ɛn dɛn blak blak smok we de kil pipul dɛn go de, ɛn usay di wɛda go de chenj?’ Wetin go ɛp wi fɔ lɛf fɔ wɔri bɔt dɛn tin ya?

Di Baybul se: “Pɔsin we gɛt sɛns de si trɔbul ɛn ayd.” (Prɔvabs 27:12) Jɔs lɛk aw wi de tray fɔ protɛkt wi wɛlbɔdi wan, na so wi kin du sɔntin fɔ protɛkt di we aw wi de tink ɛn di we aw wi de fil. Dɛn fɛt-fɛt fim dɛn ɛn ivin di bad bad tin dɛn we wi kin yɛri na nyus kin mek wi ɛn wi pikin dɛn wɔri. We wi de tray fɔ protɛkt wisɛf frɔm dɛn bad bad  tin ya, na di rayt tin wi de du, bikɔs Gɔd nɔ mek wi fɔ lɛ wi de tink bɔt bad tin. Bifo dat, wi fɔ de tink bɔt “ɛnitin we tru, . . . ɛnitin we rayt, . . . ɛnitin we klin, . . . ɛnitin we fayn.” We wi de du dis, “di Gɔd we de gi pis” go mek wi gɛt kolat.—Lɛta Fɔ Filipay 4:8, 9.

WETIN MEK I IMPƆTANT FƆ PRE?

We wi gɛt strɔng fet, i go ɛp wi nɔ fɔ de wɔri. Di Baybul advays wi fɔ “rɛdi fɔ de pre ɔltɛm.” (Pita In Fɔs Lɛta 4:7) Wi fɔ pre to Gɔd lɛ i ɛp wi ɛn mek i gi wi sɛns ɛn maynd fɔ du wi bɛst we wi gɛt prɔblɛm, ɛn wi fɔ biliv se “i de yɛri wi we wi aks am fɔ ɛnitin.”—Jɔn In Fɔs Lɛta 5:15.

Wit in man, Avi

Di Baybul se nɔto Gɔd de rul dis wɔl, na Setan na “di wan we de rul dis wɔl” ɛn i tɔk bak se “di wan ol wɔl de na di wikɛd wan in an.” (Jɔn 12:31; Jɔn In Fɔs Lɛta 5:19) Na in mek we Jizɔs bin de tich wi aw fɔ pre, i tɛl wi fɔ pre mek Jiova “sev wi frɔm di wikɛd wan.” (Matyu 6:13) Dis ɛp wi fɔ no se Setan na rial pɔsin ɛn i ɛp wi fɔ no bak se Jiova ebul fɔ sev wi. Alɔna kɔntinyu fɔ tɔk se: “Ɛnitɛm we a yɛri di sawnd, a kin pre to Jiova lɛ i ɛp mi fɔ kɔntrol di we aw a de fil. Mi man kin kɔl mi ɛn pre wit mi. Prea dɔn rili ɛp mi.” Dat jɔs tan lɛk wetin di Baybul se, we i tɔk se: “Jiova de nia ɔl di wan dɛn we de kɔl am, ɛn ɔl di wan dɛn we de kɔl am wit ɔl dɛn at.”—Sam 145:18.

DI OP WE WI GƐT FƆ TUMARA BAMBAY

We Jizɔs bin de prich ɔp wan mawnten, i tɛl in disaypul dɛn fɔ pre se: “Lɛ yu Kiŋdɔm kam.” (Matyu 6:10) Gɔd in Kiŋdɔm go pul ɔl di bad bad tin dɛn we kin mek pipul dɛn wɔri. Ɛn ɔl dɛn tin ya nɔ go de igen. Gɔd go yuz Jizɔs we na di “Prins we Gɛt Pis” fɔ mek “wɔ dɔn ɔlsay na di wɔl.” (Ayzaya 9:6; Sam 46:9) “I [Gɔd] go jɔj bɔku pipul dɛn . . . Wan neshɔn nɔ go fɛt ɔda neshɔn ɛn dɛn nɔ go lan fɔ fɛt wɔ igen. . . . Ɛn nɔbɔdi nɔ go mek dɛn fred.” (Mayka 4:3, 4) Famili dɛn we gladi “go bil os ɛn de insay de, ɛn dɛn go mek gadin ɛn it wetin dɛn plant.” (Ayzaya 65:21) “Ɛn nɔbɔdi nɔ go se: ‘A nɔ wɛl.’”—Ayzaya 33:24.

Tide, pan ɔl we wi kin tray fɔ protɛkt wisɛf lɛ bad tin nɔ mit wi, nɔto ɔltɛm i kin pɔsibul fɔ lɛ wi protɛkt wisɛf frɔm “tin dɛn we wi nɔ no se go apin” ɔ fɔ avɔyd fɔ de na di rɔng ples di rɔng tɛm. (Ɛkliziastis 9:11) Frɔm trade trade, wɔ, fɛt-fɛt, ɛn sik de kɔntinyu fɔ kil gud pipul dɛn. Us op we dɛn gud pipul dɛn ya we dɔn day gɛt?

Bɔku bɔku pipul dɛn dɔn day, ɛn na Gɔd nɔmɔ no ɔmɔs pipul dɛn dɔn day ɛn i go gi dɛn layf bak. Fɔ naw dɛn de slip, te di tɛm we Gɔd go mɛmba ‘ɔl di wan dɛn we de na di grev’ ɛn gi dɛn layf bak. (Jɔn 5:28, 29) We di Baybul bin de tɔk bɔt di tɛm we di wan dɛn we dɔn day go gɛt layf bak, i tɔk se: “Dis op we wi gɛt tan lɛk ankɔ fɔ wi layf, i nɔ de fel ɛn i go mɔs bi.” (Di Ibru Pipul Dɛn 6:19) Ɛn Gɔd “dɔn mek ɔlman no se dis go bi bay we i gi [Jizɔs] layf bak.”—Di Apɔsul Dɛn Wok [Akt] 17:31.

Fɔ naw, pan ɔl we wi de tray fɔ du wetin Gɔd want, tin dɛn de we kin mek wi wɔri. We Pɔl, Jenɛt, ɛn Alɔna bin de fala di advays dɛn we de na di Baybul, ɛn dɛn bin de pre ɛn biliv wetin di Baybul se bɔt di tumara bambay, dat bin ɛp dɛn fɔ bia di prɔblɛm dɛn we bin de mek dɛn wɔri. Jɔs lɛk aw Gɔd ɛp dɛn, “mek di Gɔd we de gi op mek una gɛt gladi at ɛn pis bikɔs una abop pan am.”—Lɛta Fɔ Rom 15:13.