Go dayrɛkt to di men tin

Go dayrɛkt to di say we di difrɛn difrɛn atikul dɛn de

Dis Na Wi Ples Usay Wi De Wɔship

Dis Na Wi Ples Usay Wi De Wɔship

“Di zil fɔ yu os go rili de insay mi.”—JƆN 2:17.

SIŊ DƐN: 127, 118

1, 2. (a) Us ples dɛn Jiova in savant dɛn we bin de trade trade bin de yuz fɔ wɔship am? (b) Aw Jizɔs bin fil bɔt Gɔd in tɛmpul we bin de na Jerusɛlɛm? (c) Wetin dis atikul go tɔk bɔt?

FRƆM trade trade, Gɔd in savant dɛn bin gɛt say dɛn usay dɛn de wɔship. I go mɔs bi se Ebɛl bin yuz ɔlta we i bin de mek in sakrifays to Gɔd. (Jɛn. 4:3, 4) Noa, Ebraam, Ayzak, Jekɔb, ɛn Mozis dɛn ɔl bin bil ɔlta dɛn. (Jɛn. 8:20; 12:7; 26:25; 35:1; Ɛks. 17:15) Jiova bin sho di Izrɛlayt dɛn aw fɔ bil di tabanakul. (Ɛks. 25:8) Leta, dɛn bil wan tɛmpul fɔ wɔship Jiova. (1 Kiŋ 8:27, 29) Afta dɛn fri di Ju dɛn frɔm Babilɔn, dɛn bin de gɛda ɔltɛm na di Ju mitin os dɛn. (Mak 6:2; Jɔn 18:20; Akt 15:21) Kristian dɛn we bin de insay di apɔsul dɛn tɛm, bin de mit na dɛn kɔmpin Kristian dɛn os dɛn. (Akt 12:12; 1 Kɔr. 16:19) Tide, Jiova in pipul dɛn de gɛda fɔ lan bɔt am ɛn wɔship am na bɔku bɔku Kiŋdɔm Ɔl dɛn ɔlsay na di wɔl.

2 Jizɔs bin rili lɛk Jiova in tɛmpul we bin de na Jerusɛlɛm. Na dis mek wan pan di man dɛn we bin rayt di Baybul bin tɔk bɔt am se: “Di zil fɔ yu os rili de insay mi.” (Sam 69:9; Jɔn 2:17) Wi nɔ go kɔl ɛni Kiŋdɔm ɔl “Jiova in os” jɔs lɛk aw dɛn bin de kɔl di tɛmpul na Jerusɛlɛm Gɔd in os. (2 Krɔn. 5:13; 33:4)  Bɔt pan ɔl dat, di Baybul gi wi sɔm advays dɛn we go sho wi aw wi fɔ yuz wi Kiŋdɔm Ɔl dɛn ɛn aw wi go sho se wi rɛspɛkt dɛn. Dis atikul go tɔk bɔt sɔm pan dɛn advays dɛn ya. Dɛn advays dɛn ya go ɛp wi fɔ no aw fɔ biev we wi de na Kiŋdɔm Ɔl, aw wi kin gi mɔni fɔ ɛp bil Kiŋdɔm Ɔl dɛn, ɛn aw wi go kɔntinyu fɔ kia fɔ dɛn. *

SHO SE YU GƐT RƐSPƐKT FƆ DI SAY DƐN WE WI DE WƆSHIP

3-5. Wetin di Kiŋdɔm Ɔl dɛn de fɔ? Aw wi fɔ fil bɔt wi mitin dɛn?

3 Di Kiŋdɔm Ɔl we de na wi eria na di men say we wi de wɔship Jiova. Wan pan di tin dɛn we Jiova dɔn gi wi fɔ no am bɛtɛ bɛtɛ wan na wi mitin dɛn we wi kin gɛt na di Kiŋdɔm Ɔl ɛni wik. Na de wi kin gɛt impɔtant advays dɛn we go mek wi ɛnjɔy wi padi biznɛs wit Jiova ɛn na de wi kin gɛt advays dɛn frɔm in ɔganayzeshɔn. Ɔl di wan dɛn we kin kam wi mitin dɛn na Jiova ɛn in Pikin de invayt dɛn. Pan ɔl we Jiova de invayt wi ɔltɛm fɔ kam it ‘na in tebul,’ dat nɔ min se wi nɔ fɔ tek am siriɔs.—1 Kɔr. 10:21.

4 Fɔ sho aw Jiova valyu wi mitin dɛn ɛn di ɛnkɔrej we wi kin ɛnkɔrej wisɛf, i tɛl di apɔsul Pɔl fɔ advays wi so dat wi nɔ go lɛf fɔ de mit togɛda. (Rid Di Ibru Pipul Dɛn 10:24, 25.) Yu tink se yu de rɛspɛkt Jiova if yu nɔ de kam na di mitin dɛn we yu nɔ gɛt no gud rizin fɔ du dat? Wi go sho se wi gladi fɔ Jiova ɛn di mitin dɛn bay we wi pripia fɔ go di mitin dɛn ɛn we wi de tek pat pan di mitin dɛn.—Sam 22:22.

5 Di we aw wi de kia fɔ wi Kiŋdɔm Ɔl ɛn di we aw de biev we wi de na di mitin dɛn fɔ sho se wi gɛt rɛspɛkt fɔ Jiova. Dɛn kin rayt Jiova in nem na wi Kiŋdɔm Ɔl dɛn, so yu nɔ tink se di we aw wi biev de sho aw wi fil bɔt Gɔd in nem?—Luk 1 Kiŋ 8:17.

6. Wetin sɔm pipul dɛn dɔn se bɔt wi Kiŋdɔm Ɔl dɛn? Wetin dɛn se bɔt di wan dɛn we de go wi mitin dɛn? (Luk di pikchɔ nia dis atikul in taytul.)

6 Ɔda pipul dɛn we nɔto Jiova Witnɛs kin notis aw wi kin rɛspɛkt di ples dɛn usay wi kin wɔship. Fɔ ɛgzampul, wan man na Tɔki bin tɔk se: “Di we aw di Kiŋdɔm Ɔl klin ɛn di we aw i ɔganayz bin mek a kɔle. Di pipul dɛn we bin de de bin drɛs fayn, dɛn bin de smayl ɛn dɛn bin grit mi fayn fayn wan. Dis bin mek a rili kɔle.” Dis man bigin fɔ kam di mitin dɛn ɔltɛm ɛn i nɔ tu te i bin baptayz. Insay wan siti na Indonishia, di brɔda ɛn sista dɛn bin invayt sɔm gɔvmɛnt wok man dɛn ɛn sɔm ɔda pipul dɛn di tɛm we dɛn bin de opin wan nyu Kiŋdɔm Ɔl. Di meyɔ bin kam dis program. I bin rili gladi fɔ di fayn we aw dɛn bil di Kiŋdɔm Ɔl, di fayn dizayn we dɛn gi am ɛn di fayn fayn gadin we i gɛt, ɔl dis bin mek i kɔle. I tɔk se: “Di we aw di Kiŋdɔm Ɔl klin sho se una rili gɛt fet.”

Di we aw wi de biev kin sho se wi nɔ de rɛspɛkt Gɔd (Luk na paregraf 7 ɛn 8)

7, 8. Us impɔtant tin dɛn di wan dɛn we de go mitin fɔ mɛmba?

7 Di we aw wi de drɛs ɛn di we aw wi de biev fɔ sho se wi rɛspɛkt Gɔd we dɔn invayt wi na wi mitin dɛn. So fɔ rɛspɛkt Gɔd min bak se wi fɔ avɔyd plɛnti tin dɛn. Wi dɔn notis se sɔm brɔda ɛn sista dɛn kin strit we i kam pan di we aw dɛn kin biev we dɛn de na mitin, bɔt ɔda wan dɛn nɔ kin tek am mek ɛnitin, dɛn kin biev lɛk se na dɛn os dɛn de. Jiova want lɛ in savant dɛn ɛn di wan dɛn we dɛn kin invayt fil fayn we dɛn de na mitin. Bɔt di wan  dɛn we de atɛnd di mitin dɛn nɔ fɔ du ɛnitin we go ambɔg di mitin, lɛk fɔ drɛs ɛnikayn we dɛn want, fɔ de ple ple wit dɛn fon dɛn ɔ fɔ de tɔk na di mitin, ɔ fɔ de it ɛn drink na mitin, ɔ du ɔda tin dɛn we go ambɔg di mitin. Mama ɛn papa dɛn fɔ tich dɛn pikin dɛn fɔ mek dɛn no se Kiŋdɔm Ɔl nɔto ples fɔ de rɔn rɔn ɔ fɔ ple.—Ɛkli. 3:1.

8 We Jizɔs bin si pipul dɛn de du biznɛs na Gɔd in tɛmpul, i bin vɛks ɛn drɛb dɛn kɔmɔt na do. (Jɔn 2:13-17) Wi kiŋdɔm Ɔl dɛn na ples usay wi kin go lan bɔt Gɔd ɛn wɔship am. So i nɔ go fayn fɔ du ɛni biznɛs we wi de insay di Kiŋdɔm Ɔl. Wi fɔ go du am ɔdasay.—Luk Nɛimaya 13:7, 8.

AW WI KIN GƐT MƆNI FƆ BIL WI KIŊDƆM ƆL DƐN?

9, 10. (a) Aw wi kin bil nyu Kiŋdɔm Ɔl dɛn? Aw wi kin gɛt mɔni fɔ du dat? We wi de du dis wetin dɔn apin? (b) Wetin dɔn ɛp kɔngrigeshɔn dɛn we nɔ gɛt mɔni fɔ bil dɛn yon Kiŋdɔm Ɔl dɛn?

9 Jiova in ɔganayzeshɔn kin tray tranga wan fɔ gi mɔni ɛn fɔ ɛp fɔ bil simpul Kiŋdɔm Ɔl dɛn. Na pipul dɛn we dɛn nɔ de pe kin bil ɛn dizayn wi Kiŋdɔm Ɔl dɛn, ɛn na dɛn bak kin mek di say dɛn we kin pwɛl. Wetin dɔn apin we dɛn de du dis? Frɔm Novɛmba 1, 1999, dɛn dɔn bil pas 28,000 ples dɛn usay wi fɔ wɔship, ɛn dɛn dɔn bil dɛn fɔ kɔngrigeshɔn dɛn we de ɔlsay na di wɔl. Dis min se insay di las 15 ia na lɛk 5 nyu Kiŋdɔm Ɔl dɛn, dɛn de bil ɛvride insay di ia.

10 Wi brɔda ɛn sista dɛn kin tray tranga wan fɔ sɔpɔt di wok fɔ bil Kiŋdɔm Ɔl dɛn ɛnisay we dɛn nid Kiŋdɔm Ɔl. We wi de du dis, wi de fala di advays we de na di Baybul we se di wan dɛn we gɛt mɔ kin ɛp di wan dɛn we nɔ gɛt, so dat “ɔltin go ikwal.” (Rid Sɛkɔn Lɛta Fɔ Kɔrint 8:13-15.) Dis dɔn mek sɔm kɔngrigeshɔn dɛn dɔn gɛt fayn fayn Kiŋdɔm Ɔl dɛn, if nɔto bin fɔ dis, dɛn kɔngrigeshɔn ya nɔ bin fɔ ebul fɔ bil Kiŋdɔm Ɔl dɛn fɔ dɛnsɛf.

11. Wetin sɔm brɔda ɛn sista dɛn se bɔt dɛn nyu Kiŋdɔm Ɔl? Aw dis mek yu fil?

11 Wan kɔngrigeshɔn na Kosta Rika we dɔn bɛnifit frɔm dis program bin rayt sɔntin bɔt dis, dɛn se: “We wi tinap bifo di Kiŋdɔm Ɔl, i tan lɛk na drim we de drim! Wi nɔ biliv. Dɛn bin dɔn fɔ bil dis wi fayn fayn Kiŋdɔm Ɔl insay et dez! Na Jiova in blɛsin mek wi gɛt dis Kiŋdɔm Ɔl. Ɛn na di arenjmɛnt we in ɔganayzeshɔn dɔn mek, wit di sɔpɔt we wi brɔda dɛn dɔn sɔpɔt wi mek wi gɛt dis Kiŋdɔm Ɔl. Dis Kiŋdɔm Ɔl na fayn fayn gift we Jiova dɔn gi wi ɛn na valyu tin i dɔn gi wi so. Wi rili gladi fɔ am” Wi kin rili  gladi we wi de yɛri aw wi brɔda ɛn sista dɛn de tɛl Jiova tɛnki fɔ wetin i dɔn du fɔ dɛn. Ɛn wi gladi fɔ no se wi brɔda dɛn na bɔku say dɛn na di wɔl go gɛt dɛn yon Kiŋdɔm Ɔl dɛn. Dis na Jiova in wok, na dat mek as dɛn kin dɔn fɔ bil nyu Kiŋdɔm Ɔl so, i kin ful-ɔp wit pipul dɛn we rili want fɔ no mɔ bɔt Jiova.—Sam 127:1.

12. Aw wi go ɛp fɔ bil Kiŋdɔm Ɔl dɛn?

12 Bɔku brɔda ɛn sista dɛn dɔn rili gɛt gladi at, bikɔs dɛn de ɛp fɔ bil Kiŋdɔm Ɔl dɛn. Ilɛksɛf wi de ɛp fɔ bil Kiŋdɔm Ɔl dɛn ɔ wi nɔ de ɛp, wi ɔl gɛt di ɔnɔ fɔ sɔpɔt dis wok. Aw? Na bay we wi de gi wi kɔntribyushɔn. We wi du ɔl wetin wi ebul fɔ sɔpɔt dis wok, wi go gladi bikɔs wi de gi, ɛn wi go gladi mɔ bikɔs wi de prez Jiova. Wi fɔ falamakata Gɔd in pipul dɛn we bin de trade trade, dɛn bin gɛt zil fɔ mek kɔntribyushɔn so dat dɛn go bil ples dɛn usay dɛn de wɔship.—Ɛks. 25:2; 2 Kɔr. 9:7.

FƆ KLIN KIŊDƆM ƆL

13, 14. Us advays na di Baybul tɛl wi fɔ de kip wi Kiŋdɔm Ɔl klin ɛn nit?

13 Di Gɔd we wi de wɔhip na Gɔd we oli ɛn klin, ɛn i ɔganayz, so na dat mek we dɛn bil nyu Kiŋdɔm Ɔl, wi fɔ de klin am fayn ɛn kip am nit, so dat i go briŋ prez to di Gɔd we wi de wɔship. (Rid Fɔs Lɛta Fɔ Kɔrint 14:33, 40.) Di Baybul tɔk se fɔ oli ɛn klin na Gɔd in yay, gɛt sɔntin fɔ du wit di we aw wi de klin wi bɔdi ɛn ɔda tin dɛn we wi gɛt. (Rɛv. 19:8) So if pɔsin want fɔ bi Jiova in padi, i fɔ de klin in bɔdi ɛn di say we i de.

14 Wit dis advays, wi fɔ fil fri fɔ invayt pipul dɛn to wi mitin dɛn, ɛn wi fɔ mek sho se di Kiŋdɔm Ɔl klin so dat dɛn go no se wi de du  wetin wi de prich. Dɛn go si se wi de wɔship Gɔd we klin, ɛn i nɔ go te igen i go tɔn dis wɔl to Paradays.—Ayz. 6:1-3; Rɛv. 11:18.

15, 16. (a) Wetin mek i nɔ kin izi fɔ klin di Kiŋdɔm Ɔl? Wetin mek i impɔtant fɔ klin? (b) Aw di ɛlda dɛn dɔn arenj fɔ klin di Kiŋdɔm Ɔl? Us big big ɔnɔ wi ɔl gɛt?

15 Sɔm pipul dɛn de we lɛk fɔ klin pas ɔda pipul dɛn. Di rizin fɔ dis na bikɔs, di we aw dɛn mɛn sɔm pipul dɛn difrɛn frɔm ɔda pipul dɛn. Ɛn sɔm pipul dɛn de na say usay pɔtɔpɔtɔ de, usay dɔst de, usay bɛtɛ rod nɔ de, ɛn usay dɛn nɔ gɛt bɛtɛ wata ɛn tin dɛn fɔ klin. Bɔt i nɔ mata usay dɛn mɛn wi ɔ usay wi de, wi Kiŋdɔm Ɔl fɔ bi ɛgzampul, we i kam pan klinin, bikɔs i gɛt Jiova in nem pan am ɛn na de wi de wɔship.—Dyut. 23:14.

16 Wi nɔ fɔ jɔs lɛf di Kiŋdɔm Ɔl in klin wan so nɔmɔ, ɛnitɛm we sɔmbɔdi fil i kam klin. Ɔl di ɛlda dɛn fɔ mek shɔ se dɛn arenj us grup dɛn fɔ klin, dɛn fɔ ɛng di list na di notis bɔd so dat ɔlman go no udat in tɔn fɔ klin, ɛn dɛn fɔ mek shɔ se dɛn gɛt di tin dɛn we dɛn fɔ yuz fɔ klin so dat di Kiŋdɔm Ɔl go klin fayn fayn wan. Bikɔs sɔm tin dɛn de we wi nid fɔ klin afta ɛvri mitin ɛn ɔda tin dɛn de we wi nɔ kin klin ɔltɛm, i go fayn lɛ di ɛlda dɛn ɔganayz dis fayn fayn wan, so dat ɔltin go klin. Ɔlman na di kɔngrigeshɔn fɔ tek pat fɔ klin di Kiŋdɔm Ɔl. Dis na big big ɔnɔ.

WI FƆ KƆNTINYU FƆ KIA FƆ DI PLES USAY WI DE WƆSHIP

17, 18. (a) Us advays na di Baybul we sho wi se wi fɔ de kia fɔ di ples dɛn usay wi de wɔship? (b) Wetin mek wi fɔ de kia fɔ Kiŋdɔm Ɔl dɛn?

17 Jiova in savant dɛn kin tray tranga wan fɔ mek di say dɛn we dɔn pwɛl na dɛn Kiŋdɔm Ɔl dɛn. Kiŋ Jɛoash we bin de na Juda, bin tɛl di prist dɛn fɔ yuz di mɔni we dɛn dɔn put na Jiova in os “fɔ mek di say dɛn we dɔn pwɛl na Gɔd in os, dɛn fɔ mek ɛnisay we dɔn krak.” (2 Kiŋ 12:4, 5) Leta afta 200 ia dɔn pas, Kiŋ Josaya insɛf bin yuz di mɔni we dɛn dɔn put na di tɛmpul fɔ mek di say dɛn we dɔn pwɛl na Jiova in os.—Rid 2 Krɔnikul 34:9-11.

18 Di branch ɔfis dɛn na di wɔl dɔn tɔk se, na sɔm kɔntri dɛn, pipul dɛn nɔ kin si am se i impɔtant fɔ kia fɔ di say we dɛn de, ɔ di tin dɛn we dɛn de yuz. Sɔntɛm, sɔm pipul dɛn we de na dɛn kɔntri ya, nɔ no bɛtɛ aw fɔ mek di say dɛn we dɔn pwɛl ɔ dɛn nɔ gɛt di tin dɛn we dɛn nid fɔ du di wok. Bɔt wi no se wi fɔ de kia fɔ wi Kiŋdɔm Ɔl dɛn, bikɔs if wi nɔ du dat, i go mek di bildin pwɛl ɛn i go mek pipul dɛn tɔk bad bɔt wi. We ɔlman na di kɔngrigeshɔn du ɔl wetin dɛn ebul fɔ klin di Kiŋdɔm Ɔl, i kin mek pipul dɛn prez Jiova ɛn i kin mek wi nɔ west di mɔni we wi brɔda dɛn de gi.

Wi fɔ de klin ɛn kia fɔ wi Kiŋdɔm Ɔl dɛn (Luk na paregraf 16 to 18)

19. Wetin yu dɔn rɛdi fɔ du fɔ di ples usay wi de wɔship Jiova?

19 Kiŋdɔm Ɔl na ples we dɛn dɔn gi to Jiova. So wi nɔ go se na ɛni kɔngrigeshɔn ɔ pɔsin gɛt am, ilɛk us nem de de. Di advays dɛn we de na di Baybul fɔ ɛp Kristian dɛn fɔ sɔpɔt di klinin so dat di Kiŋdɔm Ɔl go briŋ prez to Jiova. Ɔlman na di kɔngrigeshɔn kin du sɔntin fɔ sɔpɔt di klinin bay we dɛn de sho rɛspɛkt fɔ di Kiŋdɔm Ɔl, bay we dɛn de gi dɛn mɔni fɔ bil nyu Kiŋdɔm Ɔl dɛn, ɛn we dɛn de gi dɛn tɛm ɛn trɛnk fɔ klin ɛn kia fɔ di Kiŋdɔm Ɔl dɛn fayn fayn wan. We wi de du ɔl dis, i de sho se wi de falamakata Jizɔs. Ɛn wi de sho bak se wi gɛt zil ɛn wi de rɛspɛkt di say we wi de wɔship Jiova.—Jɔn 2:17.

^ par. 2 Na tru se dis atikul de tɔk bɔt wi Kiŋdɔm Ɔl dɛn, bɔt wi fɔ fala dɛn sem advays ya we i kam to wi Asɛmbli Ɔl dɛn ɛn ɔda say dɛn we wi de yuz fɔ wɔship Jiova.