Go dayrɛkt to di men tin

Go dayrɛkt to di say we di difrɛn difrɛn atikul dɛn de

“Di Tɛm fɔ Sev Una Dɔn De Nia”!

“Di Tɛm fɔ Sev Una Dɔn De Nia”!

“Tinap stret ɛn es una ed ɔp, bikɔs di tɛm fɔ sev una dɔn de nia.”—LYUK 21:28.

SIŊ DƐN: 133, 43

1. Wetin bin apin insay di ia 66? (Luk di pikchɔ nia dis atikul in taytul.)

IMAJIN se yu na Kristian we de na Jerusɛlɛm insay di ia 66. Bɔku tin dɛn de apin usay yu de. Fɔs, wan Roman bigman we nem Florɔs go na di oli tɛmpul ɛn tif 17 talɛnt de. Wantɛm wantɛm, di Ju dɛn vɛks ɛn dɛn bigin kil di Roman sojaman dɛn we bin de insay Jerusɛlɛm ɛn dɛn bin de tɔk se dɛn nɔ want fɔ de ɔnda di Roman dɛn igen. So di Roman dɛnsɛf du sɔntin kwik kwik wan. Insay tri mɔnt, wan Roman gɔvnɔ na Sirya, we nem Sɛstiɔs Galɔs bin kam wit 30,000 sojaman dɛn. Di sojaman dɛn gɛda rawnd Jerusɛlɛm kwik kwik wan ɛn di Ju dɛn we bin dɔn tɔn dɛn bak pan di Roman dɛn go ayd insay di tɛmpul. So di Roman sojaman dɛn bigin fɔ pwɛl di tɛmpul in wɔl! Ɔlman na di siti de fred. Aw yu fil we yu si ɔl dɛn tin ya de apin?

2. Wetin di Kristian dɛn we bin de na Jerusɛlɛm insay di ia 66 bin nid fɔ du? Wetin bin mek dɛn ebul fɔ du dis?

2 I go mɔs bi se yu mɛmba we Jizɔs bin tɔk se: “We una si  amiman dɛn gɛda rawnd Jerusɛlɛm, una fɔ no se di tɛm fɔ lɛ dɛn pwɛl am dɔn nia.” (Lyuk 21:20) Bɔt yu go dɔn wɔnda, ‘Aw a go obe wetin Jizɔs bin se we i de gi dis wɔnin?’ Jizɔs bin tɔk bak se: “Lɛ di wan dɛn we de na Judia bigin rɔnawe go na di mawnten dɛn, lɛ di wan dɛn we de de kɔmɔt de, ɛn mek di wan dɛn we de nia de nɔ ɛnta insay de.” (Lyuk 21:21) Aw yu go kɔmɔt na Jerusɛlɛm we bɔku bɔku sojaman dɛn gɛda rawnd de? As yu de tink bɔt dis, wan wɔndaful tin apin. Yu bigin si di Roman sojaman dɛn de go bak usay dɛn kɔmɔt! As Jizɔs bin dɔn tɔk, dɛn “ridyus di tɛm” we dɛn fɔ atak Jerusɛlɛm. (Mat. 24:22) Naw yu gɛt di chans fɔ obe wetin Jizɔs bin dɔn tɔk. Wantɛm wantɛm, yu rɔn go na di mawnten dɛn we de na di ɔdasay na di Jɔdan Riva wit ɔda fetful Kristian dɛn we de na di siti ɛn ɔda Kristian dɛn we de arawnd Jerusɛlɛm. * Dɔn insay di ia 70, bɔku bɔku sojaman dɛn kam na Jerusɛlɛm ɛn pwɛl di siti. Bɔt yu sev bikɔs yu obe wetin Jizɔs bin se.

3. Wetin gɛt fɔ apin to Kristian dɛn jisnɔ we fiba wetin bin apin to di Kristian dɛn we bin de trade trade? Wetin wi go tɔk bɔt insay dis atikul?

3 I nɔ go te igen, dis sem tin go mit wi ɔl. Jizɔs nɔ bin jɔs wɔn Kristian dɛn se Jerusɛlɛm gɛt fɔ pwɛl bɔt i bin yuz di tin dɛn we bin apin trade fɔ sho wetin gɛt fɔ apin we da “big big trɔbul” go bigin. (Mat. 24:3, 21, 29) Di gud nyus na dat “bɔku bɔku pipul dɛn” gɛt fɔ sev we da big trɔbul go de ɔlsay na di wɔl. (Rid Rɛvɛleshɔn 7:9, 13, 14.) Wetin di Baybul tɛl wi bɔt dɛn tin ya we gɛt fɔ apin? I rili impɔtant fɔ lɛ wi no di ansa, bikɔs na dat go mek wi sev. Naw lɛ wi kam tɔk bɔt aw dɛn tin ya we gɛt fɔ apin tumara bambay go afɛkt wi ɔl.

DI TƐM WE DA BIG BIG TRƆBUL GO BIGIN

4. Wetin go sho se da big big trɔbul dɔn bigin? Aw dis go apin?

4 Aw da big big trɔbul go bigin? Di Baybul buk we nem Rɛvɛleshɔn ansa dis kwɛstyɔn. I sho wi aw dɛn go dɔnawe wit “Babilɔn we ɔlman no,” we na ɔl dɛn lay lay rilijɔn dɛn. (Rɛv. 17:5-7) I rili fayn we di Baybul kɔmpia ɔl dɛn lay lay rilijɔn dɛn to raregyal! Di bigman dɛn pan Gɔd biznɛs dɔn mek padi biznɛs wit di wan dɛn we de rul dis wikɛd wɔl. Bifo dɛn sɔpɔt Jizɔs ɛn in Kiŋdɔm, dɛn de sɔpɔt dɛn mɔtalman rula dɛn ɛn dɛn de pwɛl Gɔd in lɔ jɔs fɔ lɛ dɛn mek padi wit di wan dɛn we de pan pɔlitiks. Dɛn difrɛn fawe frɔm di anɔyntɛd dɛn we klin ɛn we fiba lɛk vajin na Gɔd in yay. (2 Kɔr. 11:2; Jems 1:27; Rɛv. 14:4) Bɔt udat go dɔnawe wit dis ɔganayzeshɔn we tan lɛk raregyal? Jiova Gɔd go put “wetin i want” insay di “tɛn ɔn” in at. Ɛn di tɛn ɔn de pan di “rɛd wayl bif.” Dɛn ɔn ya tinap fɔ ɔl di gɔvmɛnt dɛn we de naw we de sɔpɔt di United Nations, ɛn di United Nations na di ɔganayzeshɔn we tinap fɔ di “rɛd wayl bif.”—Rid Rɛvɛleshɔn 17:3, 16-18.

5, 6. Wetin mek wi se nɔto ɔl di pipul dɛn we de insay lay lay rilijɔn go day we dɛn go de dɔnawe wit lay lay rilijɔn?

5 Fɔ se ɔl di wan dɛn we bin de insay dɛn lay lay rilijɔn dɛn go day we dɛn go dɔnawe wit dɛn lay lay rilijɔn dɛn? Nɔ, nɔto so i go bi. Gɔd in spirit bin mek di prɔfɛt Zakaraya rayt bɔt wetin go bi da tɛm de. We Zakaraya bin de tɔk bɔt pɔsin we bin de insay lay lay rilijɔn, i se da tɛm de di pɔsin “ go se, ‘mi nɔto prɔfɛt. Mi na  man we de wok na fam, bikɔs wan man bay mi we a bin smɔl.’ Ɛn if sɔmbɔdi aks am, ‘Usay yu gɛt dɛn wund ya we de na yu shɔlda?’ i go ansa se, ‘Na mi padi dɛn os a gɛt dɛn wund ya.’” (Zak. 13:4-6) So ivin sɔm pan dɛn bigman dɛn pan Gɔd biznɛs go lɛf dɛn rilijɔn ɛn dinay se dɛn nɔ bin ɛva de insay lay lay rilijɔn.

6 Wetin go apin to Gɔd in pipul dɛn da tɛm de? Jizɔs bin se: “Infakt, if dɛn nɔ ridyus di tɛm, no mɔtalman nɔ go sev; bɔt fɔseka di wan dɛn we dɛn dɔn pik, dɛn go ridyus di tɛm.” (Mat. 24:22) As wi bin dɔn tɔk, insay di ia 66, di tɛm we da big trɔbul fɔ tek bin “ridyus.” Dis bin mek “di wan dɛn we dɛn dɔn pik,” dat na di anɔyntɛd Kristian dɛn, kɔmɔt na di siti ɛn ɔdasay dɛn we de rawnd di siti. Semweso, di fɔs pat pan da big big trɔbul go “ridyus” fɔseka “di wan dɛn we dɛn dɔn pik.” Gɔd nɔ go alaw di gɔvmɛnt dɛn we tinap fɔ di “tɛn ɔn” fɔ kil in pipul dɛn. Bifo dat, pis go de fɔ smɔl tɛm afta dɛn go dɔn dɔnawe wit ɔl dɛn lay lay rilijɔn dɛn.

DI TƐM WE DƐN GO TƐST ƐN JƆJ MƆTALMAN

7, 8. Us chans we tru Kristian dɛn go gɛt afta dɛn dɔn dɔnawe wit dɛn lay lay rilijɔn dɛn? Wetin go mek Gɔd in fetful pipul dɛn difrɛn da tɛm de?

7 Wetin go apin di tɛm we dɛn go dɔnawe wit ɔl dɛn lay lay rilijɔn dɛn? Na di tɛm dat we wi go sho wetin rili de na wi at. Bɔku bɔku pipul dɛn go abop pan dɛn ɔganayzeshɔn dɛn we mɔtalman mek we di Baybul kɔmpia to “di rɔk dɛn we de na di mawnten dɛn.” (Rɛv. 6:15-17) Bɔt Jiova in pipul dɛn go abop pan am fɔ lɛ i protɛkt dɛn. Insay di apɔsul dɛn tɛm, smɔl pis bin de we di Roman sojaman dɛn go bak usay dɛn kɔmɔt, bɔt dat nɔto bin tɛm fɔ lɛ bɔku bɔku Ju dɛn tɔn to Kristian. Na bin tɛm fɔ lɛ di wan dɛn we bin dɔn ɔlrɛdi bi Kristian du wetin Jizɔs bin dɔn tɔk. Semweso, wi nɔ fɔ tink se di smɔl pis we go de afta da big big trɔbul bigin go mek bɔku bɔku pipul dɛn kam bi tru Kristian. Bifo dat, ɔl di wan dɛn we na tru Kristian, go gɛt di chans fɔ sho se dɛn lɛk Jiova ɛn dɛn de sɔpɔt Krays in brɔda dɛn.—Mat. 25:34-40.

8 Pan ɔl we wi nɔ rili no ɔl wetin gɛt fɔ apin insay da tɛm de, wi no se wi go nid fɔ lɛf sɔm tin dɛn biɛn. Insay di apɔsul dɛn tɛm, Kristian dɛn bin gɛt fɔ lɛf dɛn prɔpati dɛn biɛn ɛn bia sɔm prɔblɛm dɛn so dat dɛn go sev. (Mak 13:15-18) I go fayn mek wi aks wisɛf dɛn kwɛstyɔn ya, ‘Fɔ lɛ a go kɔntinyu fɔ du wetin Jiova want, a go rɛdi fɔ lɛf prɔpati dɛn biɛn? A go rɛdi fɔ du ɛnitin we a nid fɔ du fɔ sho se a de sɔpɔt Jiova?’ Jɔs tink bɔt dis! Da tɛm de, na wi nɔmɔ go de fala di prɔfɛt Daniɛl in fayn ɛgzampul, bay we wi go kɔntinyu fɔ wɔship Gɔd ilɛk wetin apin.—Dan. 6:10, 11.

9, 10. (a) Us mɛsej Gɔd in pipul dɛn go prich da tɛm de? (b) Wetin di wan dɛn we et Gɔd in pipul dɛn go du?

9 Da tɛm de go bi di tɛm fɔ prich di “gud nyus bɔt di Kiŋdɔm.” Di tɛm fɔ dat go dɔn pas. “Di ɛnd” go dɔn kam! (Mat. 24:14) Gɔd in pipul dɛn go de prich wan mɛsej we ɔda pipul dɛn nɔ go want fɔ yɛri. I go mɔs bi se dɛn go de prich se di tɛm fɔ lɛ Gɔd dɔnawe wit ɔltin na Setan in wikɛd wɔl nɔ de fa igen. Di Baybul kɔmpia dis mɛsej to big big ays blɔk dɛn ɛn i se: “Big big ston dɛn we tan lɛk ays blɔk, kɔmɔt frɔm ɛvin ɛn bigin fɔ fɔdɔm pan di pipul dɛn. Ɛni wan pan dɛn ston ya we lɛk wan talɛnt mɔni ɛn di pipul dɛn bigin tɔk bad  bɔt Gɔd, bikɔs di ston dɛn bin de fɔdɔm pan dɛn, ɛn dɛn bin sɔfa bad bad wan.”—Rɛv. 16:21.

10 Gɔd in ɛnimi dɛn go yɛri dis mɛsej. Gɔd bin yuz Izikɛl fɔ rayt wetin Gɔg we de na Megɔg go du. Gɔg we de na Megɔg tinap fɔ neshɔn dɛn we go kam togɛda. Izikɛl bin rayt se: “Na dis Jiova we na di rula we gɛt pawa pas ɔlman se: ‘Da de de tin dɛn go kam na una at, ɛn una go mek wan bad plan. Una go se: “A de go fɛt di land we nɔ gɛt nɔbɔdi fɔ protɛkt am, a go kam fɔ di wan dɛn we de de wit kolat, we nɔ gɛt nɔbɔdi we de ambɔg dɛn, dɛn ɔl we de liv na say dɛn we nɔ gɛt wɔl, ba, ɔ get fɔ protɛkt dɛn.” Una go du am fɔ tek bɔku prɔpati dɛn, fɔ fɛt di pipul dɛn we dɔn kam bak togɛda frɔm ɔda neshɔn dɛn ɛn we de liv na ples dɛn we bin dɔn pwɛl, we de gɛda jɛntri ɛn prɔpati ɛn we de midul di wɔl.’” (Izik. 38:10-12) Gɔd in pipul dɛn go difrɛn frɔm ɔlman na di wɔl ɛn i go tan lɛk se dɛn de “midul di wɔl.” Dis go mɔna di neshɔn dɛn. So dɛn go magomago fɔ atak di wan dɛn we Jiova dɔn anɔynt ɛn di wan dɛn we de sɔpɔt dɛn.

11. (a) Wetin wi fɔ mɛmba bɔt aw tin dɛn go apin di tɛm we da big big trɔbul go de na di wɔl? (b) Wetin go apin we pipul dɛn si di sayn dɛn na di skay?

11 As wi de tɔk bɔt wetin gɛt fɔ apin, wi fɔ mɛmba se Gɔd in Wɔd nɔ tɛl wi di rayt tɛm aw dɛn tin ya go apin. I go mɔs bi se sɔm pan dɛn tin ya go apin di sem tɛm. We Jizɔs bin de tɔk bɔt di tɛm we di wɔl go dɔn, i bin se: “Sayn dɛn go de na di san, di mun ɛn sta dɛn, ɛn di neshɔn dɛn na di wɔl go vɛks we dɛn nɔ no wetin fɔ du bikɔs di si rɔf ɛn di wata de mek nɔys. Pipul dɛn go fent bikɔs dɛn de fred di tin dɛn we de kam bi na di wɔl, di pawa dɛn we de na di ɛvin go shek. Ɛn dɛn go si mɔtalman Pikin de kam na di klawd wit pawa ɛn glori.” (Lyuk 21:25-27; rid Mak 13:24-26.) Fɔ se dɛn fiaful sayn ya go bi tru tru wan na di skay? Pas wi wet ɛn si. Ilɛk wetin apin, di sayn dɛn go mek Gɔd in ɛnimi dɛn fred.

Wi go de tink di rayt we ɛn biliv se wi go sev! (Luk na paregraf 12 ɛn 13)

12, 13. (a) Wetin go apin we Jizɔs kam “wit pawa ɛn glori”? (b) Wetin Gɔd in savant dɛn go du da tɛm de?

12 Wetin go apin we Jizɔs kam “wit pawa ɛn glori”? I go blɛs di wan dɛn we fetful ɛn pɔnish di wan dɛn we nɔ fetful. (Mat. 24:46, 47, 50, 51; 25:19, 28-30) Afta Jizɔs dɔn tɔk bɔt di sayn, i pul di parebul bɔt di ship ɛn di got. I se: “We mɔtalman Pikin kam wit in glori ɛn wit ɔl di enjɛl dɛn, i go sidɔm na in wɔndaful chia usay i kin sidɔm fɔ rul. Ɔl di neshɔn dɛn go gɛda bifo am, ɛn i go sheb pipul dɛn, jɔs lɛk aw shɛpad kin put di ship dɛn wansay ɛn put di got dɛn ɔdasay. Ɛn i go put di ship dɛn na in rayt an, bɔt i go put di got dɛn na in lɛft an.” (Mat. 25:31-33) Wetin Jizɔs se go apin to di ship ɛn di got dɛn? Jizɔs ɛnd i parebul wit dɛn wɔd ya: “Dɛn wan ya [di got] go de na say we dɛn nɔ go gɛt layf igen igen, bɔt di wan dɛn we de du wetin rayt go de na say we dɛn go gɛt layf we go de sote go.”—Mat. 25:46.

13 Wetin di got dɛn go du we dɛn no se “dɛn nɔ go gɛt layf igen igen”? Dɛn “go kray bita bita wan.” (Mat. 24:30) Bɔt wetin Krays in brɔda dɛn ɛn di wan dɛn we de sɔpɔt dɛn go du? Dɛn go biliv Jiova Gɔd ɛn in Pikin, Jizɔs Krays, ɛn fala di advays we Jizɔs bin gi, we i se: “As dɛn tin ya bigin fɔ apin so, una fɔ tinap stret ɛn es una ed ɔp, bikɔs di tɛm fɔ sev una dɔn de nia.” (Lyuk 21:28) Fɔ tru, wi go de tink di rayt we ɛn biliv se wi go sev.

 DƐN GO SHAYN BRAYT BRAYT WAN NA DI KIŊDƆM

14, 15. Us gɛda dɛn gɛt fɔ gɛda sɔm pipul dɛn afta Gɔg we de na Megɔg bigin fɔ atak Gɔd in pipul dɛn? Aw dɛn go du dis wok?

14 Wetin go apin afta we Gɔg we de na Megɔg go bigin atak Gɔd in pipul dɛn? Matyu ɛn Mak bin tɔk se: “[Mɔtalman Pikin] go sɛn in enjɛl dɛn ɛn dɛn go gɛda ɔl di wan dɛn we i dɔn pik, frɔm di 4 kɔna dɛn, frɔm wan pat na di wɔl to di ɔda pat na di ɛvin.” (Mak 13:27; Mat. 24:31) Dis gɛda we dis skripchɔ tɔk bɔt nɔ min di pik we dɛn bin pik anɔyntɛd Kristian dɛn ɛn i nɔ min di las stamp we dɛn put pan di anɔyntɛd dɛn we lɛf. (Mat. 13:37, 38) Dɛn bin dɔn gɛt di las stamp bifo da big big trɔbul go bigin. (Rɛv. 7:1-4) So, wetin dis gɛda we Jizɔs bin tɔk bɔt min? Na di tɛm we di balans 144,000 anɔyntɛd Kristian dɛn go go na ɛvin. (1 Tɛsa. 4:15-17; Rɛv. 14:1) Dis tin ya go apin afta we Gɔg we de na Megɔg go bigin fɔ atak Gɔd in pipul dɛn. (Izik. 38:11) Dɔn dɛn tin ya we Jizɔs bin tɔk go apin: “Da tɛm de di wan dɛn we de du wetin rayt go shayn brayt wan lɛk di san insay dɛn Papa in Kiŋdɔm.”Mat. 13:43. *

15 Fɔ se di anɔyntɛd Kristian dɛn gɛt fɔ “rapchɔ”? Na so bɔku pipul dɛn we de go chɔch biliv. Dɛn biliv se Kristian dɛn go go na ɛvin wit dɛn mɔtalman bɔdi. Ɛn dɛn biliv se Jizɔs go kam bak na di wɔl fɔ rul ɛn ɔlman go si am. Bɔt di Baybul sho klia wan se “di sayn we de sho se mɔtalman Pikin de kam go apia na ɛvin,” ɛn Jizɔs go kam “na di klawd.” (Mat. 24:30) Dɛn tin ya we di Baybul tɔk sho se wi nɔ gɛt fɔ si  Jizɔs. Apat frɔm dat, “flɛsh ɛn blɔd nɔ de go na Gɔd in Kiŋdɔm.” So di wan dɛn we gɛt fɔ go na ɛvin go nid fɔ chenj “kwik kwik wan, as yu wink yu yay so, di tɛm we dɛn go blo di las trɔmpɛt.” * (Rid Fɔs Lɛta Fɔ Kɔrint 15:50-53.) So wi nɔ go yuz di wɔd “rapchɔ” we wi de tɔk bɔt dis bikɔs bɔku pipul dɛn ɔndastand dis wɔd di rɔng we. Bɔt dis skripchɔ de tɔk se di balans anɔyntɛd Kristian dɛn we fetful go gɛda togɛda wantɛm wantɛm.

16, 17. Wetin go apin bifo di Ship in mared bi na ɛvin?

16 We ɔl di 144,000 go dɔn de na ɛvin, dɛn go bigin fɔ mek di las ɛn las arenjmɛnt dɛn fɔ di Ship in mared. (Rɛv. 19:9) Bɔt sɔntin go apin bifo da mared de bigin. Lɛ wi mɛmba se, jɔs bifo di balans 144,000 go na ɛvin, Gɔg we de na Megɔg go atak Gɔd in pipul dɛn. (Izik. 38:16) I go tan lɛk se Gɔd in pipul dɛn we de na di wɔl nɔ gɛt ɛnibɔdi fɔ protɛkt dɛn. Wetin Gɔd in pipul dɛn go du? Dɛn go du wetin Jiova bin tɛl di Izrɛlayt dɛn fɔ du insay Kiŋ Jɛoshafat in tɛm. Jiova bin tɛl dɛn se: “Una nɔ go nid fɔ fɛt dis wɔ. Una tinap na di say we una fɔ de, una tinap tranga wan, ɛn si we Jiova de sev una. Mi pipul dɛn na Juda ɛn Jerusɛlɛm, una nɔ fred.” (2 Krɔn. 20:17) Bɔt na difrɛn tin go apin na ɛvin. We Rɛvɛleshɔn 17:14 de tɔk bɔt di tɛm we ɔl di anɔyntɛd Kristian dɛn go de na ɛvin, i se di wan dɛn we et Gɔd in pipul dɛn “go fɛt wit di Ship, bɔt bikɔs in na di Masta we pas ɔl ɔda masta dɛn ɛn in na di Kiŋ we pas ɔl ɔda kiŋ dɛn, di Ship go win dɛn. Ɛn di wan dɛn we de wit am we Gɔd dɔn kɔl ɛn pik ɛn we fetful, dɛnsɛf go win.Jizɔs ɛn di 144,000 we go rul wit am na ɛvin go kam fɔ sev Gɔd in pipul dɛn na dis wɔl.

17 Dis wɔ we dɛn go fɛt we na Amagɛdɔn go briŋ prez to Jiova in oli nem. (Rɛv. 16:16) Da tɛm de, di wan dɛn we tan lɛk got go “de na say we dɛn nɔ go gɛt layf igen igen.” No bad tin nɔ go de apin na di wɔl igen, ɛn bɔku bɔku pipul dɛn go sev we di las pat pan da big big trɔbul go bigin. We ɔltin go dɔn rɛdi, di las pat we fayn pas ɔl na di Baybul buk we nem Rɛvɛleshɔn go bi, dat na we di Ship go mared. (Rɛv. 21:1-4) * Ɔl di wan dɛn we go sev na di wɔl go ɛnjɔy Gɔd in blɛsin ɛn Gɔd go sho dɛn se i rili lɛk dɛn. Di mared pati go rili fayn! Wi rili de wet fɔ si da de de.—Rid Pita In Sɛkɔn Lɛta 3:13.

18. We wi dɔn no se fayn fayn tin dɛn gɛt fɔ apin, wetin wi fɔ mekɔp wi maynd fɔ du?

18 Wetin wi ɔl fɔ de du naw, we wi dɔn no se dɛn fayn fayn tin ya gɛt fɔ apin? Gɔd bin yuz di apɔsul Pita fɔ rayt se: “Ɛnti na so ɔl dɛn tin ya gɛt fɔ apin, una fɔ de tink bɔt uskayn pɔsin una fɔ bi ɛn aw una fɔ biev lɛk pipul dɛn we oli ɛn du tin dɛn we de sho se una de wɔship Gɔd, as una de wet ɛn kɔntinyu fɔ tink bɔt Jiova in de . . . So, mi brɔda dɛn we a lɛk, ɛnti una de wet fɔ dɛn tin ya, una du una bɛst fɔ lɛ i nɔ si wan bɔt pan una, ɛn lɛ una nɔ gɛt wan prɔblɛm ɛn una go gɛt kolat.” (2 Pit. 3:11, 12, 14) So lɛ wi mekɔp wi maynd nɔ fɔ gɛt ɛnitin fɔ du wit lay lay rilijɔn ɛn sɔpɔt di Kiŋ we de briŋ Pis.

^ par. 2 Rid di Epril 15, 2012, Wachtawa, pej 25 to 26.

^ par. 14 Rid di Julay 15, 2013, Wachtawa, pej 13 ɛn 14.

^ par. 15 Di anɔyntɛd Kristian dɛn we go de alayf da tɛm de nɔ go go wit mɔtalman bɔdi na ɛvin. (1 Kɔr. 15:48, 49) Dɛn mɔtalman bɔdi go lɔs jɔs lɛk aw pipul dɛn nɔ bin si Jizɔs in bɔdi.

^ par. 17 Sam 45 insɛf sho wi aw tin dɛn gɛt fɔ apin. Fɔs, di Kiŋ fɛt wɔ, ɛn afta dat di mared bi.