Go dayrɛkt to di men tin

Go dayrɛkt to di say we di difrɛn difrɛn atikul dɛn de

 DI TƆPIK NA DI FRƆNT PEJ | WETIN YU GO DU FƆ LƐF FƆ WƆRI?

Fɔ Wɔri bɔt Mɔni

Fɔ Wɔri bɔt Mɔni

Wan maredman we nem Pɔl ɛn we gɛt tu pikin dɛn bin tɔk se: “Mɔni biznɛs bin kam tranga na wi kɔntri, tin fɔ it kam dia ɛn i bin at fɔ si. Wi kin tinap na layn fɔ lɔng tɛm, bɔt sɔntɛnde di it kin dɔn bifo wi tɔn rich. Di angri bin mek pipul dɛn dray pasmak, ɛn sɔm bin ivin de fɔdɔm na strit. Di prayz fɔ di tin dɛn we wi nid bin jɔs de go ɔp. Tɛm kam, di mɔni we wi bin de yuz nɔ bin gɛt valyu igen. A lɔs mi mɔni we a bin gɛt na bank, a lɔs mi inshɔrans ɛn mi pɛnshɔn.”

Pɔl

Pɔl bin no se, fɔ lɛ in famili go liv, i nid fɔ “du di tin dɛn we [i] dɔn lan.” (Prɔvabs 3:21) I se: “Mi na bin ilɛktrikal kɔntraktɔ, bɔt a kin tek ɛni wok we dɛn gi mi, ilɛksɛf dɛn nɔ pe mi lɛk aw dɛn fɔ pe. Sɔm kin pe mi wit tin fɔ it ɔ tin dɛn fɔ yuz na os. If dɛn pe mi 4 ba sop, a kin yuz tu ɛn sɛl di tu. A kam gɛt 40 smɔl smɔl fɔl dɛn. We dɛn big, a sɛl dɛn ɛn bay 300 mɔ. Leta, a ɛkschenj 50 fɔl fɔ tu bag kɔnmil. Di wet na bin 110 pawn (50 kilo). Na frɔm dis tu bag kɔnmil, a bin de fid mi famili ɛn ɔda famili dɛn fɔ lɔng tɛm.”

Pɔl bin no bak se di bɛst tin we pɔsin go du, na fɔ abop pan Gɔd. We wi du wetin Gɔd want, i go ɛp wi. We Jizɔs bin de tɔk bɔt di tin dɛn we wi nid, i se: “Una lɛf fɔ wɔri tumɔs; . . . una Papa no se una nid ɔl dɛn tin ya.”—Lyuk 12:29-31.

I sɔri fɔ no se Gɔd in ɛnimi we na Setan, dɔn ful bɔku pipul dɛn fɔ put ɔl dɛn abop pan di tin dɛn we de na dis wɔl. Pipul dɛn de wɔri tumɔs bɔt di tin dɛn we dɛn nid, ɛn dɛn kin tray tranga wan fɔ gɛt di tin dɛn we dɛn nɔ rili nid. Bɔku pipul dɛn kin tek dɛt, ɛn dɛn kin sɔfa fɔ dat. Di Baybul se “di pɔsin we trɔs, na slev to di wan we trɔs am.”—Prɔvabs 22:7.

 Sɔm pipul dɛn kin disayd fɔ du sɔntin we kin ambɔg dɛn. Pɔl kɔntinyu fɔ tɔk se: “Bɔku pipul dɛn kin lɛf dɛn famili ɛn dɛn padi dɛn ɛn go ovasi fɔ go fɛn mɔni. Sɔm pipul dɛn kin go we dɛn nɔ gɛt di rayt dɔkyumɛnt dɛn ɛn dɛn nɔ kin ebul fɔ fɛn wok. Dɛn kin de ayd pan polisman dɛn ɛn dɛn kin slip na strit. Dɛn nɔ kin alaw Gɔd fɔ ɛp dɛn. Bɔt we wi kin gɛt mɔni prɔblɛm dɛn, wi kin tray fɔ sɔlv am togɛda as famili, ɛn Gɔd kin ɛp wi.”

WI DE FALA JIZƆS IN ADVAYS

Pɔl bin kɔntinyu fɔ tɔk, i se: “Jizɔs bin se: ‘Una nɔ wɔri bɔt tumara, tumara go gɛt in yon wɔri. Ɛnide gɛt in yon trɔbul.’ So, wetin a bin de pre to Gɔd fɔ ɛvride na fɔ lɛ i ‘gi wi wetin wi fɔ it fɔ di de’ so dat wi go kɔntinyu fɔ liv. Ɛn i bin ɛp wi jɔs lɛk aw Jizɔs bin dɔn tɔk. Nɔto ɔltɛm wi bin de gɛt di tin dɛn we wi rili want. Wantɛm, a go jɔyn wan layn fɔ bay tin fɔ it pan ɔl we a nɔ bin no wetin dɛn de sɛl. We a rich bifo, a kam si se na yɔgɔt dɛn de sɛl. A nɔ lɛk yɔgɔt. Bɔt na tin fɔ it, so da nɛt de, na yɔgot wi it. A tɛl Gɔd tɛnki bikɔs insay ɔl da tɛm de, mi famili nɔ ɛva slip wit angri.” *

Gɔd dɔn prɔmis wi se: “A nɔ go ɛva lɛf una, ɛn a nɔ go tɔn mi bak pan una.”—Di Ibru Pipul Dɛn 13:5

Pɔl bin kɔntinyu fɔ tɔk se: “Fɔ naw, tin nɔ dat tranga fɔ wi. Bɔt wi dɔn kam fɔ no se di tin we go ɛp wi fɔ lɛf fɔ wɔri na we wi abop pan Gɔd ɔltɛm. Jiova * go ɛp wi ɔltɛm if wi kɔntinyu fɔ du wetin i want. Wi dɔn si se wetin Sam 34:8 tɔk na tru, we i se: ‘Tes ɛn si se Jiova gud; di pɔsin we go kam ayd to am go gladi.’ Dis dɔn mek wi nɔ de fred igen. Ilɛksɛf tin tranga.

Gɔd kin ɛp in fetful savant dɛn fɔ gɛt “wetin fɔ it fɔ tide”

“Wi dɔn no naw klia wan wetin mɔtalman nid fɔ kɔntinyu fɔ liv, nɔto wok ɔ mɔni, bɔt na tin fɔ it. Wi de wet fɔ di tɛm we Gɔd go du ɔl wetin i dɔn prɔmis. Da tɛm de ‘bɔku bɔku it go de na di wɔl.’ Bɔt fɔ naw, ‘if wi gɛt tin fɔ it ɛn klos fɔ wɛr wi go satisfay wit dɛn tin ya.’ Di Baybul in advays kin rili ɛp wi, lɛk di wan we se: ‘Wi nɔ fɔ lɛk mɔni, bɔt wi fɔ satisfay wit wetin wi gɛt. Gɔd dɔn tɔk se: “A nɔ go ɛva lɛf una, ɛn a nɔ go tɔn mi bak pan una.” So dat wi go gɛt kɔrej ɛn tɔk se: “Na Jiova de ɛp mi; a nɔ go fred.”’” *

Fɔ lɛ wi go ebul waka wit Gɔd lɛk aw Pɔl ɛn in famili bin waka wit am, wi fɔ gɛt strɔng fet. (Jɛnɛsis 6:9) Ilɛksɛf wi gɛt siriɔs prɔblɛm dɛn we de mit wi naw, ɔ sɔntɛm we go mit wi leta, di fet ɛn sɛns we Pɔl bin gɛt tich wi impɔtant tin dɛn we wi fɔ fala.

Bɔt if famili prɔblɛm de mek wi wɔri, wetin wi go du?