Jiova “Sabi di Wan dɛn we Nain Yon”
“If pɔsin lɛk Gɔd, Gɔd no se da pɔsin de nain yon.”
1. Gi wan ɛgzampul na di Baybul we sho aw sɔm pan Gɔd in pipul dɛn bin ful dɛnsɛf. (Luk di pikchɔ nia dis atikul in taytul.)
WAN mɔnin, Erɔn, we na bin di Ay Prist bin tinap bifo di tabanakul in domɔt. I bin ol wan tin we bin gɛt faya wit insɛns insay. Kora wit in 250 man dɛn bin de nia Erɔn. Dɛnsɛf bin de bɔn dɛn yon insɛns to Jiova. (Nɔm. 16:16-18) If yu nɔ no, yu go fil se dɛn ɔl bin de wɔship Jiova di rayt we. Apat frɔm Erɔn, Kora ɛn di wan dɛn we bin de biɛn am, bin prawd, tranga-yes, ɛn dɛn bin want ɔltin fɔ dɛnsɛf. Dɛn bin want fɔ pul di prist wok na Erɔn in an. (Nɔm. 16:1-11) Dɛn bin de ful dɛnsɛf, de tink se Gɔd go gri wit dɛn wɔship. Bɔt Jiova we de si wetin de na wi at, bin si dis as fityay bikɔs i bin no se na ipokrit dɛn de mek.—Jɛr. 17:10.
2. Wetin Mozis bin tɔk se Gɔd go du? Aw wetin i bin tɔk bin apin?
2 Di de bifo dis tin apin, Mozis bin dɔn tɔk se: “Bay mɔnin PAPA GƆD go [mek] dɛn no udat na udat, we min se PAPA GƆD go sho dɛn udat nain yon.” (Nɔm. 16:5) Aw Jiova bin sho se i no udat dɛn de wɔship am di rayt we ɛn udat dɛn de mek ipokrit? Jiova sɛn faya we bɔn Kora ɛn di 250 man dɛn we bin de bɔn insɛns. (Nɔm. 16:35; 26:10) Bɔt Jiova bin sev Erɔn. I bin mek ɔlman no se na Erɔn na di rial prist ɛn na in de wɔship am di rayt we.—Rid Fɔs Lɛta Fɔ Kɔrint 8:3.
3. (a) Wetin bin apin insay di apɔsul Pɔl in tɛm? (b) Us lɛsin wi lan frɔm wetin Jiova bin du to Kora ɛn di wan dɛn we bin de sɔpɔt am?
3 Afta 1,500 ia, dis sem kayn tin bin apin insay di apɔsul Pɔl in tɛm. Sɔm pipul dɛn we bin de tɔk se dɛn na Kristian bigin fɔ tich lay lay tin dɛn; bɔt, dɛn bin stil de na di kɔngrigeshɔn. To pɔsin we nɔ no, i go de fil se dɛn pipul ya we de tich lay lay tin dɛn na di sem wit di ɔda wan dɛn na di kɔngrigeshɔn. Bɔt dɛn lay lay tichin ya bin de ambɔg di wan dɛn we de wɔship Gɔd di rayt we na di kɔngrigeshɔn. Dɛn pipul ya we bin de tich dɛn lay lay tin ya bin tan lɛk ship bɔt we yu luk dɛn gud gud wan dɛn fiba dɛn bad bad wulf dɛn bikɔs dɛn bin “de mek sɔm pipul we bin biliv, bigin dawt.” (2 Tim. 2:16-18) Jiova bin de si wetin de apin? Yɛs, i bin de si. Pɔl bin no wetin Gɔd bin du to Kora ɛn di wan dɛn we bin de sɔpɔt am, so i bin biliv se Jiova no wetin de apin. Fɔ ɛp wisɛf fɔ biliv se Jiova no wetin de apin, i go fayn lɛ wi tɔk bɔt wetin di apɔsul Pɔl bin rayt to Timoti.
“PAPA GƆD NƆ DE CHENJ”
4. Wetin Pɔl bin biliv? Wetin i bin tɛl Timoti?
4 Pɔl bin shɔ se Jiova no di wan dɛn we de obe am ɛn di wan dɛn we de mek lɛk se dɛn de obe am. Fɔ sho se Pɔl bin rili biliv dis, i bin chuz di rayt wɔd dɛn we i bin de rayt to Timoti. Afta Pɔl bin dɔn tɔk bɔt di we aw di wan dɛn we de tich lay lay tin dɛn de ambɔg sɔm Kristian dɛn na di kɔngrigeshɔn, i bin rayt se: “Natin nɔ go shek di traŋa fawndeshɔn we Gɔd dɔn mek; di wɔd dɛn we rayt pan di fawndeshɔn na dɛn dis: ‘Di Masta sabi di wan dɛn we nain yon’ ɛn ‘Ɛnibɔdi we se in [de fɔ] di Masta fɔ lɛf fɔ du dɛn tin we nɔ rayt.’”—2 Tim. 2:18, 19.
5, 6. Wetin wi lan frɔm wetin Pɔl tɔk bɔt “di traŋa fawndeshɔn we Gɔd dɔn mek”? Aw dis tin we Pɔl tɔk bɔt bin ɛp Timoti?
5 Wetin wi lan frɔm di wɔd dɛn we Pɔl bin chuz fɔ rayt na dis skripchɔ? Na wangren say na di Baybul dɛn tɔk bɔt “di traŋa fawndeshɔn we Gɔd dɔn mek.” We di Baybul kin yuz di wɔd “fawndeshɔn,” i kin min difrɛn difrɛn tin dɛn. Fɔ ɛgzampul, we i bin tɔk bɔt Jerusɛlɛm we na bin di kapital siti na Izrɛl, i bin yuz di wɔd fawndeshɔn. (Sam 87:1, 2) Dɔn, di Baybul kin kɔmpia di wok we Jizɔs de du to fawndeshɔn. (1 Kɔr. 3:11; 1 Pit. 2:6) Wetin Pɔl bin de tray fɔ tɔk we i rayt bɔt “di traŋa fawndeshɔn we Gɔd dɔn mek”?
6 Pɔl tɔk bɔt “di traŋa fawndeshɔn we Gɔd dɔn mek” di sem say we i bin tɔk bɔt wetin Mozis bin rayt bɔt Kora ɛn di wan dɛn we bin de biɛn am. (Luk Di Nɔmba Dɛm 16:5) Pɔl bin tɔk bɔt di tin dɛn we bin apin insay Mozis in tɛm fɔ ɛnkɔrej Timoti ɛn mɛmba am se Jiova ebul fɔ no di wan dɛn we want fɔ ambɔg di kɔngrigeshɔn, ɛn i nɔ go alaw dɛn fɔ du dat. Jɔs lɛk aw Jiova nɔ bin alaw Kora ɛn di wan dɛn we bin de biɛn am fɔ ambɔg in pipul dɛn, na so i nɔ go alaw di wan dɛn we de tich lay lay tin dɛn fɔ ambɔg di kɔngrigeshɔn. Pɔl nɔ bin ɛksplen ɔltin bɔt wetin “di traŋa fawndeshɔn we Gɔd dɔn mek” min. Bɔt di tin dɛn we Pɔl bin tɔk bin ɛp Timoti fɔ biliv Jiova tranga tranga wan.
7. Wetin mek wi shɔ se Jiova fetful ɛn i go du wetin rayt?
7 Nɔbɔdi nɔ go ebul fɔ chenj wetin Jiova want. Insay Sam 33:11 Jiova se: “Wetin in se go bi, go mɔs bi[,] wetin i mekɔp fɔ in pipul fɔ du, go de sote go.” Ɔda skripchɔ dɛn de we se Jiova na Kiŋ, i lɛk wi, i de du wetin rayt, ɛn i fetful. Di Baybul se Jiova nɔ go ɛva chenj we i kam pan dɛn tin ya. (Ɛks. 15:18; Sam 106:1; 112:9; 117:2) Malakay 3:6 se: “PAPA GƆD nɔ de chenj.” Semweso, Jems 1:17 se Jiova “nɔ de chenj.”
DI “WƆD DƐN” WE DE MEK PƆSIN BILIV PAN JIOVA
8, 9. Us lɛsin wi lan frɔm di “wɔd dɛn” we rayt na di fawndeshɔn we Pɔl tɔk bɔt?
8 Insay Sɛkɛn Lɛta To Timoti 2:19, Pɔl bin tɔk bɔt wan fawndeshɔn we dɛn rayt sɔntin pan. Fɔs fɔstɛm, pipul dɛn bin lɛk fɔ rayt sɔntin pan os in fawndeshɔn. Sɔntɛm dɛn bin de du dat fɔ sho udat bil di os ɔ udat gɛt am. Pɔl na bin di fɔs pɔsin we yuz dis patikyula ɛgzampul na di Baybul. * Na tu tin bin rayt pan “di traŋa fawndeshɔn we Gɔd dɔn mek.” Di fɔs wan se, “Di Masta sabi di wan dɛn we nain yon” ɛn di sɛkɔn wan se, “Ɛnibɔdi we se in [de fɔ] di Masta fɔ lɛf fɔ du dɛn tin we nɔ rayt.” Dis de mɛmba wi wetin rayt na Di Nɔmba Dɛm 16:5. (Rid.)
9 Us lɛsin wi lan frɔm di “wɔd dɛn” we rayt na di fawndeshɔn we Pɔl tɔk bɔt? Wi lan tu impɔtant tin dɛn: (1) Jiova lɛk di wan dɛn we de fɔ am, ɛn (2) Jiova et wetin nɔ rayt. Aw dis lɛsin we wi lan gɛt sɔntin fɔ du wit di wan dɛn we de tich lay lay tin dɛn na di kɔngrigeshɔn?
10. Aw di wan dɛn we bin de tich lay lay tin dɛn bin de ambɔg di fetful Kristian dɛn we bin de insay Pɔl in tɛm?
10 Timoti ɛn ɔda fetful Kristian dɛn bin de wɔri bad bikɔs di wan dɛn we de tich lay lay tin dɛn bin de du tin dɛn we nɔ fayn na di kɔngrigeshɔn. Sɔm Kristian dɛn go dɔn de aks wetin mek dɛn alaw di wan dɛn we de tich lay lay tin dɛn fɔ de na di kɔngrigeshɔn. Sɔntɛm di wan dɛn we biliv pan Jiova go dɔn de wɔnda if Jiova ebul fɔ no di wan dɛn we de wɔship am di rayt we ɛn di wan dɛn we de mek lɛk se dɛn de wɔship am bɔt we nɔ de du wetin i se.—Akt 20:29, 30.
Timoti nɔ bin alaw ɛni lay lay tichin fɔ chenj di we aw i de tink (Luk na paregraf 10 to 12)
11, 12. Aw di lɛta we Pɔl bin rayt to Timoti bin ɛp Timoti fɔ gɛt mɔ fet?
11 Di lɛta we Pɔl bin rayt to Timoti bin ɛp Timoti fɔ gɛt mɔ fet. Pɔl bin mɛmba Timoti se trade trade Jiova bin sho klia wan se Kora ɛn di wan dɛn we bin de sɔpɔt am, na bin ipokrit dɛn ɛn i bin kil dɛn. Bɔt Jiova bin sev Erɔn we bin de fɔ am. We Pɔl bin tɔk dis, i bin de tray fɔ tɛl Timoti se pan ɔl we di wan dɛn we de tich lay lay tin dɛn stil de na di kɔngrigeshɔn, Jiova ebul fɔ no di wan dɛn we rili de fɔ am, jɔs lɛk aw i bin du insay Mozis in tɛm.
12 Jiova nɔ de ɛva chenj so wi fɔ abop pan am ɔltɛm. I et wetin bad, ɛn we di rayt tɛm rich i go pɔnish di wan dɛn we nɔ gri fɔ lɛf wetin bad. Pɔl bin mɛmba Timoti bak se i nɔ fɔ gri wit di wan dɛn we de tich lay lay tin dɛn na di kɔngrigeshɔn bikɔs ɛnibɔdi we de fɔ Jiova fɔ lɛf wetin bad. *
IF WI WƆSHIP GƆD DI RAYT WE, I NƆ GO BI FƆ NATIN
13. Wetin wi fɔ biliv se?
13 Di tin dɛn we Pɔl bin rayt kin ɛnkɔrej wisɛf tide. Dɛn de ɛp wi fɔ no se Jiova sabi di wan dɛn we de fɔ am. Jiova nɔ jɔs no di wan dɛn we de fɔ am bɔt i rili bisin bɔt dɛn. Di Baybul se: “PAPA GƆD in yay . . . de ɔlsay na di wanol wɔl, fɔ sho in pawa fɔseka di wan dɛn we . . . dɛn at klin fɔ am.” (2 Kro. 16:9) So wi fɔ biliv tranga wan se ɛnitin we wi du fɔ Jiova wit “klin at” nɔ go bi fɔ natin.—1 Tim. 1:5; 1 Kɔr. 15:58.
14. Uskayn wɔship we Jiova et?
14 I rili impɔtant fɔ no se Jiova et ipokrit wɔship. I nɔ lɛk ɛnibɔdi we de mek lɛk se i de obe am bɔt we nɔ de du wetin i want. Bikɔs Jiova de si “ɔlsay na di wanol wɔl,” i kin ebul fɔ no di wan dɛn we dɛn at nɔ “klin fɔ am.” Prɔvabs 3:32 se: “PAPA GƆD et udat de du bad,” mɔ di wan dɛn we de mek lɛk se dɛn de obe am bɔt we de ayd fɔ du bad tin. Pan ɔl we di wan dɛn we de du bad kin sabi fɔ ayd dɛn sin pan mɔtalman fɔ sɔm tɛm, Jiova we gɛt pawa pas ɔlman ɛn we de du wetin rayt dɔn tɔk se “udat ayd in sin nɔ de mek am na layf.”—Prɔv. 28:13; rid Fɔs Lɛta To Timoti 5:24; Di Ibru Pipul Dɛn 4:13.
15. Wetin wi nɔ fɔ de du? Wetin mek wi nɔ fɔ du am?
15 Bɔku pan Jiova in pipul dɛn lɛk am wit ɔl dɛn at. I nɔ izi fɔ lɛ pɔsin wɔship Jiova da ipokrit we bay wilful wan. Bɔt stil, if i bin apin insay Mozis in tɛm ɛn insay di apɔsul Pɔl in tɛm, dat min se dis sem tin kin apin bak tide. (2 Tim. 3:1, 5) Bɔt yu tink se wi fɔ de dawt wi kɔmpin Kristian dɛn, ɔ bigin de tink se sɔntɛm dɛn nɔ de wɔship Jiova wit ɔl dɛn at? Nɔ, wi nɔ fɔ du dat atɔl! I nɔ go fayn lɛ wi de dawt wi brɔda ɛn sista dɛn we wi nɔ gɛt gud rizin fɔ du dat. (Rid Lɛta Fɔ Rom 14:10-12; Fɔs Lɛta Fɔ Kɔrint 13:7.) If wi de dawt wi brɔda ɛn sista dɛn na di kɔngrigeshɔn, wi go ambɔg wi padi biznɛs wit Jiova.
16. (a) Wetin wi ɔl fɔ du fɔ mek wi nɔ wɔship Jiova da ipokrit we? (b) Us lɛsin dɛn wi lan frɔm di bɔks we se “ Una Fɔ De Jɔj Unasɛf. . .”?
16 Ɔlman we na Kristian fɔ “tink bɔt wetin i de du.” (Gal. 6:4) Bikɔs wi nɔ pafɛkt, sɔntɛm wi go bigin de wɔship Jiova fɔ di rɔng rizin we wi nɔ ivin no se wi de du dat. (Ibru 3:12, 13) So as tɛm de go, i go fayn lɛ wi de tink bɔt di rizin we mek wi de sav Jiova. Wi fɔ de aks wisɛf dɛn kwɛstyɔn ya: ‘A de wɔship Jiova bikɔs a lɛk am ɛn bikɔs na in gɛt di rayt fɔ rul mi? Ɔ na di gud tin dɛn nɔmɔ we a gɛt fɔ ɛnjɔy na Paradays mek a de sav am?’ (Rɛv. 4:11) Dɛn kwɛstyɔn ya go ɛp wi fɔ tink bɔt wetin wi de du, ɛn dɛn go ɛp wi nɔ fɔ wɔship Gɔd da ipokrit we.
DI WAN DƐN WE DE FƆ JIOVA GO GLADI
17, 18. Wetin mek wi nɔ fɔ mek ɛni ipokrit we wi de wɔship Jiova?
17 Wi go gɛt bɔku bɛnifit if wi tray tranga wan fɔ wɔship Jiova wit ɔl wi at ɛn nɔ mek ɛni ipokrit we wi de wɔship am. Wan pan di man dɛn we rayt di Sam buk, bin se: “I fayn fɔ da pɔsin we nɔ miks pan bɛnbɛn[,] PAPA GƆD nɔ de kip natin nain at fɔ am.” (Sam 32:2) Fɔ tru, di wan dɛn we nɔ de mek ipokrit we dɛn de wɔship Jiova go gladi naw, ɛn dɛn go gɛt tru tru gladi at tumara bambay.
18 I nɔ go te igen, Jiova go mek ɔlman no di wan dɛn we bin de du bad tin ɛn di wan dɛn we no am bɔt we de ayd fɔ du bad. Dis go mek ɔlman no “udat de du wetin PAPA GƆD want ɛn udat nɔ de du wetin PAPA GƆD want.” (Mal. 3:18) Te da tɛm de rich, wi gladi fɔ no se Jiova “in yay de pan dɛn pipul we de du rayt ɛn i de yɛri dɛn wɛn dɛn de pre.”—1 Pit. 3:12.
^ par. 8 Pɔl bin dɔn rayt in lɛta to Timoti lɔn lɔn tɛm bifo dɛn rayt Rɛvɛleshɔn 21:14 we tɔk se “na twɛlv ston dɛn bin tek bil di wɔl in fawndeshɔn” ɛn di 12 apɔsul dɛn nem bin rayt pan am.
^ par. 12 Di nɛks atikul go ɛp wi fɔ falamakata Jiova fɔ et wetin bad.
