Go dayrɛkt to di men tin

Go dayrɛkt to di say we di difrɛn difrɛn atikul dɛn de

“Una Na Mi Witnɛs Dɛn”

“Una Na Mi Witnɛs Dɛn”

“[“Jiova,” NW] se, “Una na mi witnɛs dɛn.””—AYZ. 43:10.

1, 2. (a) Udat na witnɛs? Wetin di wan dɛn we de tɔk bɔt wetin de apin na di wɔl, nɔ de tɛl pipul dɛn? (b) Wetin mek Jiova nɔ abop pan dɛn?

UDAT na witnɛs? Wan dikshɔnari se witnɛs na “sɔmbɔdi we si usay sɔntin apin ɛn tɔk wetin i si.” Fɔ ɛgzampul, insay wan siti na Sawt Afrika, we dɛn kɔl Pitamaritbɔg, wan nyuspepa de de we dɛn kɔl The Witness. I dɔn pas 160 ia we dɛn dɔn de print am. Dis nem fit dis nyuspepa, bikɔs nyuspepa fɔ tɔk bɔt di tru tin dɛn we de apin na di wɔl. Di pɔsin we bigin fɔ rayt The Witness nyuspepa bin prɔmis siriɔs wan se dis nyuspepa go tɔk “di tru ɔltɛm, i nɔ go tɔk ɛnitin we nɔto tru.”

2 Bɔt i sɔri fɔ no se di wan dɛn we de tɔk bɔt di tin dɛn we de apin na di wɔl, nɔ kin tɔk di tru ɔltɛm. Dɛn pipul ya nɔ de tɔk di tru bɔt Gɔd ɛn wetin i dɔn du. Bɔt Jiova we pas ɔl di ɔda rula dɛn na di wɔl, nɔ abop pan dɛn fɔ tɔk di tru bɔt am. Na dat mek i tɛl in prɔfɛt Izikɛl fɔ rayt se: “Di neshɔn dɛn go no se na mi na [“Jiova,” NW].” (Izi. 39:7) Jiova gɛt lɛk et milyɔn Witnɛs dɛn so we de tɛl pipul dɛn ɔlsay na di wɔl bɔt am. Dɛn Witnɛs ya de tɔk bɔt di tin dɛn we i bin dɔn du trade, di tin dɛn we i de du naw, ɛn di fayn fayn tin dɛn we i dɔn prɔmis fɔ du tumara bambay. We wi de put di prichin wok fɔs na wi layf, i de sho se wi na Jiova in witnɛs dɛn fɔ tru. Na dat mek Jiova tɔk na Ayzaya 43:10 se: “Una na mi witnɛs dɛn, ɛn mi savant we a dɔn pik.”

3, 4. (a) Ustɛm di Baybul Studɛnt dɛn gɛt nyu nem? Aw dɛn bin fil bɔt di nem? (Luk di pikchɔ nia dis atikul in taytul.) (b) Us kwɛstyɔn dɛn we wi go kam tɔk bɔt?

 3 Na big big ɔnɔ wi gɛt fɔ lɛ Jiova kɔl wi in witnɛs dɛn, bikɔs Jiova na “di Kiŋ we bin de, we de naw ɛn we go de sote go.” Ɛn Jiova insɛf sɛf bin dɔn tɔk se: “Na mi nem dis sote go. Na dis nem ya ɔl di jɛnareshɔn dɛn go de yuz fɔ kɔl mi”! (1 Tim. 1:17; Ɛks. 3:15; luk Ɛkliziastis 2:16.) Na insay 1931 di Baybul Studɛnt dɛn gɛt di nem Jiova Witnɛs. Afta wi dɔn gɛt dis nem, plɛnti brɔda ɛn sista dɛn bin rayt lɛta fɔ sho se dɛn rili gladi fɔ di nem. Ɛn dɛn bin rayt plɛnti tin dɛn we dɛn brɔda ɛn sista ya bin se, insay Di Wachtawa. Wan kɔngrigeshɔn na Kanada bin rayt se: “Wi rili gladi fɔ yɛri se wi na ‘Jiova in witnɛs dɛn,’ ɛn dis dɔn gi wi mɔ zil fɔ du di tin dɛn we go sho se wi fit fɔ gɛt dis nyu nem.”

4 Aw wi go sho se wi gladi fɔ di ɔnɔ we wi gɛt fɔ bi Jiova Witnɛs? Yu ebul fɔ ɛksplen di skripchɔ usay wi gɛt di nem Jiova Witnɛs?

GƆD IN WITNƐS DƐN WE BIN DE TRADE TRADE

5, 6. (a) Aw Izrɛlayt mama ɛn papa dɛn bin bi witnɛs fɔ Jiova? (b) Us ɔda tin we Gɔd bin tɛl di Izrɛlayt mama ɛn papa dɛn fɔ du? Wetin mek mama ɛn papa dɛn fɔ du di sem tin tide?

5 Jiova bin pik di Izrɛlayt dɛn fɔ bi in “witnɛs dɛn.” Dis min se ɔl di Izrɛlayt dɛn fɔ tɔk bɔt am. (Ayz. 43:10) Wan we we di Izrɛlayt mama ɛn papa dɛn bin de sho se dɛn na Jiova in witnɛs na we dɛn bin de tich dɛn pikin dɛn bɔt di tin dɛn we Gɔd bin dɔn du trade trade we dɛn fɔstɛm papa dɛn bin de. Fɔ ɛgzampul, we Jiova bin tɛl di Izrɛlayt dɛn fɔ sɛlibret di Pasova ɛni ia, i bin tɛl dɛn se: “We una pikin dɛn aks una wetin na di rizin fɔ ɔl dis sɛrimɔni, una fɔ tɛl dɛn se, ‘PAPA GƆD  bin pas oba di Izrɛlayt dɛn os na Ijipt ɛn i bin kil di Ijipshian dɛn bɔt i bin sɔri fɔ di Izrɛlayt dɛn.’” (Ɛks. 12:26, 27) Dɛn Izrɛlayt mama ɛn papa ya go dɔn tɛl dɛn pikin dɛn bak se di fɔs tɛm we Mozis bin go to Fɛro fɔ tɛl am se mek i lɛf di Izrɛlayt dɛn mek dɛn go wɔship Jiova na di ɛmti land usay pɔsin nɔ go ebul liv, Fɛro bin aks se, ‘Udat na Jiova ɛn wetin mek a fɔ lisin to am fɔ mek di Izrɛlayt dɛn go?’ (Ɛks. 5:2) Wetin Jiova bin du we Fɛro bin tɔk dis? Jiova bin mek tɛn bad bad tin dɛn apin na Ijipt ɛn i bin kil ɔl di Ijipshian sojaman dɛn na di Rɛd Si bɔt i bin sev di Izrɛlayt dɛn. So ɔlman bin si klia wan se na Jiova gɛt pawa pas ɔlman. Ɛn di Izrɛlayt dɛn bin kam fɔ no bak se Jiova na di tru Gɔd ɛn i de du ɛnitin we i prɔmis.

6 Di Izrɛlayt dɛn we bin gladi fɔ bi Jiova in witnɛs go mɔs dɔn tɛl dɛn pikin dɛn bɔt dɛn wɔndaful tin ya we Jiova bin du. Bɔt nɔto dɛn pikin dɛn nɔmɔ dɛn bin tɛl, dɛn bin tɛl dɛn slev dɛn bak we bin kɔmɔt na ɔda kɔntri. Wan ɔda impɔtant tin we Jiova bin tɛl di Izrɛlayt mama ɛn papa dɛn fɔ du, na fɔ tren dɛn pikin dɛn fɔ obe Gɔd in lɔ we se dɛn fɔ oli. Jiova bin se: “Dɛn fɔ oli bikɔs [in] we na dɛn Gɔd oli.” (Lɛv. 19:2; Dit. 6:6, 7) Dis na fayn ɛgzampul fɔ mama ɛn papa dɛn tide. Dɛnsɛf fɔ tren dɛn pikin dɛn fɔ du di rayt tin so dat dɛn go briŋ prez ɛn ɔnɔ to Gɔd in nem!—Rid Prɔvabs 1:8; Lɛta Fɔ Ɛfisɔs 6:4.

We wi de tich wi pikin dɛn bɔt Jiova, wi de ɔnɔ in nem (Luk na paregraf 5 ɛn 6)

7. (a) We di Izrɛlayt dɛn bin fetful to Jiova, aw di ɔda neshɔn dɛn bin de si dɛn? (b) Wetin ɔl di wan dɛn we na Jiova in witnɛs dɛn, fɔ du?

7 We di Izrɛlayt dɛn bin fetful to Gɔd, dɛn bin de mek ɔda pipul dɛn prez Gɔd in nem. Jiova bin tɛl dɛn se ‘di wanol wɔl go si se una na mi pipul dɛn ɛn dɛn go rɛspɛkt una.’ (Dit. 28:10) Bɔt o-ya, i sɔri fɔ no se plɛnti tɛm, di Izrɛlayt dɛn nɔ bin de du wetin Jiova want. Dɛn bin de lɛf Jiova ɛn go wɔship aydɔl. Di Izrɛlayt dɛn bigin fɔ du wikɛd tin dɛn, jɔs lɛk di Kenanayt gɔd dɛn we dɛn bin de wɔship. Dɛn bin de bɔn dɛn pikin dɛn na faya ɛn tek advantej pan dɛn po pipul dɛn. Dis na pawaful lɛsin we de sho wi se wi fɔ tray fɔ falamakata Jiova we oli, bikɔs wi na in witnɛs dɛn!

“A DE DU NYU TIN”

8. Wetin Jiova bin tɛl Ayzaya fɔ du? Aw Ayzaya bin fil we di pipul dɛn bin kɔntinyu fɔ tɔn dɛn bak pan Gɔd?

8 Jiova bin yuz Ayzaya fɔ wɔn di Izrɛlayt dɛn se i gɛt fɔ pwɛl Jerusɛlɛm, we na dɛn kapital siti, ɛn i go mek dɛn kɛr dɛn go as slev na Babilɔn. Bɔt Jiova bin se leta, i go pul di Izrɛlayt dɛn ɔnda di pipul dɛn na Babilɔn. (Ayz. 43:19) Jiova, we no wetin de na mɔtalman at, bin tɛl Ayzaya fɔ kɔntinyu fɔ wɔn di pipul dɛn pan ɔl we i no se dɛn nɔ go lisin to am. Ayzaya bin sɔprayz ɛn i bin want fɔ no aw lɔng di pipul dɛn go kɔntinyu fɔ tɔn dɛn bak pan Gɔd. Gɔd bin ansa am se: “Sote di siti dɛn ɔl lɛf ɛmti ɛn pɔsin . . . nɔ tap de, ɛn nɔbɔdi nɔ tap na di os dɛm, ɛn nɔbɔdi nɔ tap na di land.”—Rid Ayzaya 6:8-11.

9. (a) Ustɛm di tin we Ayzaya bin tɔk bɔt Jerusɛlɛm bin apin? (b) Us wɔnin we wi fɔ pe atɛnshɔn to?

9 Jiova bin gi Ayzaya dis wok insay di las ia we Kiŋ Uzaya bin de rul, ɛn dat na bin lɛk 778 ia bifo Krays. Ayzaya bin kɔntinyu fɔ du in prɔfɛt wok fɔ lɛk 46 ia te afta 732 bifo Krays. Dis na bin di tɛm we Ɛzikaya bin de rul as kiŋ. Ɛn dat na bin 125 ia bifo dɛn pwɛl Jerusɛlɛm insay di ia 607 bifo Krays. So Jiova bin wɔn in pipul dɛn bifo tɛm bɔt wetin gɛt fɔ apin to dɛn. Tide sɛf, Jiova de yuz in pipul dɛn  fɔ wɔn ɔda pipul dɛn bɔt di tin dɛn we gɛt fɔ apin tumara bambay. Fɔ 135 ia naw, Di Wachtawa magazin dɔn de tɛl pipul dɛn se i nɔ go te igen, Setan nɔ go rul di wɔl igen ɛn Jizɔs Krays go bigin fɔ rul di wan ol wɔl fɔ Wan Tawzin Ia.—Rɛv. 20:1-3, 6.

10, 11. Aw di Izrɛlayt dɛn we bin de na Babilɔn bin kam fɔ si se ɔl wetin Jiova bin tɛl Ayzaya fɔ rayt, bin apin?

10 Di Ju dɛn we bin obe Jiova ɛn gri fɔ put dɛnsɛf ɔnda di pipul dɛn na Babilɔn bin sev di tɛm we dɛn bin kam fɔ pwɛl Jerusɛlɛm, ɛn dɛn bin kɛr dɛn go as slev na Babilɔn. (Jɛr. 27:11, 12) Afta Gɔd in pipul dɛn dɔn tek 70 ia na Babilɔn, dɛn bin si se wetin Gɔd bin dɔn tɔk se go apin to Babilɔn, bin apin. Jiova bin dɔn tɛl dɛn se, ‘Fɔ una sek, a go brok ɔl di ayɛn ba dɛn na Babilɔn.’—Ayz. 43:14.

11 Jiova bin du wetin i se. Insay Ɔktoba 539 bifo Krays, di kiŋ na Babilɔn ɛn in bigman dɛn bin de drink wayn insay di kɔp dɛn we dɛn bin pul na di tɛmpul na Jerusɛlɛm, ɛn dɛn bin de prez dɛn lay lay gɔd dɛn. We dɛn bin de du dat, di sojaman dɛn we bin kɔmɔt na Midya ɛn Pashya bin kam fɛt ɛn win Babilɔn. Insay di ia 538 ɔ 537 bifo Krays, Sayrɔs, we na bin di bigman pan di sojaman dɛn, bin tɛl di Ju dɛn se dɛn fɔ go bak na Jerusɛlɛm ɛn bil Gɔd in tɛmpul. Ayzaya bin dɔn tɔk se ɔl dis go apin, ɛn i bin tɔk bak se Jiova go protɛkt ɛn kia fɔ in pipul dɛn we dɛn de go bak na Jerusɛlɛm. Gɔd bin se di Ju dɛn ‘na di pipul dɛn we i dɔn mek fɔ insɛf so dat dɛn go prez am.’ (Ayz. 43:21; 44:26-28) We di Izrɛlayt dɛn bin kam bak na Jerusɛlɛm ɛn bil Jiova in tɛmpul, dɛn bin kam fɔ no se Jiova, we na di wangren tru Gɔd, de du ɛnitin we i tɔk.

12, 13. (a) Udat dɛn bin jɔyn di Izrɛlayt dɛn fɔ go bak na Jerusɛlɛm fɔ go wɔship Jiova? (b) Wetin di “ɔda ship dɛn” fɔ du we dɛn de sɔpɔt di anɔyntɛd Kristian dɛn? Us op di “ɔda ship dɛn” gɛt?

12 We di Izrɛlayt dɛn bin de go bak fɔ go bil di tɛmpul na Jerusɛlɛm, bɔku pipul dɛn we nɔto bin Izrɛlayt bin jɔyn dɛn fɔ go wɔship Jiova. Leta, bɔku bɔku ɔda pipul dɛn bak bin jɔyn dɛn fɔ wɔship Jiova. (Ɛzra 2:58, 64, 65; Ɛsta 8:17) Tide, “bɔku bɔku pipul” dɛn we na Jizɔs in “ɔda ship dɛn” de sɔpɔt di anɔyntɛd Kristian dɛn. (Rɛv. 7:9, 10; Jɔn 10:16; Gal. 6:16) Di bɔku bɔku pipul dɛn we de sɔpɔt di anɔyntɛd dɛn gɛt di ɔnɔ fɔ bi Jiova in witnɛs dɛn.

 13 We Krays go de rul fɔ Wan Tawzin Ia, di bɔku bɔku pipul dɛn we go sev we dis wɔl go dɔn, go gladi fɔ ɛksplen to di wan dɛn we go dɔn gɛt layf bak, bɔt aw i bin tan lɛk fɔ bi Jiova Witnɛs jɔs bifo di wɔl dɔn. Di wangren tin we go mek wi ebul fɔ du dis na we wi tɔk bɔt Jiova to ɔda pipul dɛn ɛn tray tranga wan fɔ bi pɔsin we oli. Bɔt no mata aw wi tray fɔ du wetin Jiova want, wi kin sin, so wi fɔ de beg Jiova ɛvride fɔ fɔgiv wi, ɛn mɛmba se na big big ɔnɔ wi gɛt fɔ bi Jiova in witnɛs.—Rid Jɔn In Fɔs Lɛta 1:8, 9.

WETIN GƆD IN NEM MIN?

14. Wetin Jiova in nem min?

14 Fɔ lɛ wi ɔndastand di kayn ɔnɔ we wi gɛt fɔ bi Jiova Witnɛs ɛn sho se wi gladi fɔ dat, i go fayn fɔ lɛ wi de tink bɔt wetin Gɔd in nem min. Di nem “Jiova” kɔmɔt frɔm wan Ibru wɔd we min “bi.” So di nem Jiova min “I de mek wetin i want bi.” Dis minin fit Jiova bikɔs na in mek di wan ol wɔl, di enjɛl dɛn, ɛn mɔtalman. Ɛn Jiova de du ɛnitin we i want fɔ du. As tɛm de go, Jiova de kɔntinyu fɔ du ɔl di tin dɛn we i dɔn tɔk se i go du, nɔbɔdi nɔ go ebul fɔ stɔp am fɔ du wetin i want. Ivin Setan sɛf we de tray fɔ pwɛl wetin i want, nɔ go ebul fɔ stɔp am.

15. Wetin wi lan frɔm wetin Jiova tɛl Mozis bɔt In nem? (Luk di bɔks we se “ Jiova in Nem Gɛt Big Big Minin.”)

15 We Jiova bin de sɛn Mozis fɔ go pul In pipul dɛn kɔmɔt na Ijipt, i bin tɛl Mozis sɔntin we mek wi ɔndastand mɔ bɔt wetin In nem min. “Gɔd tɛl Mozis se: “A Go Bi Ɛnitin we A Want fɔ Bi.” I tɔk bak se: “Na dis fɔ tɛl di Izrɛlayt dɛn, se A Go Bi dɔn sɛn mi to una.” (Ɛks. 3:14, NW) So no mata wetin apin, Jiova go bi ɛnitin we i want fɔ bi so dat i go ebul fɔ du wetin i want. Na dat i bin du fɔ di Izrɛlayt dɛn. I bin sev dɛn, protɛkt dɛn, gayd dɛn, ɛn gi dɛn ɔl wetin dɛn nid.

AW WI GO SHO SE WI GLADI?

16, 17. (a) Aw wi go sho se wi gladi fɔ di ɔnɔ we wi gɛt fɔ bi Jiova in witnɛs? (b) Wetin wi go tɔk bɔt na di nɛks atikul?

16 Jiova nɔ de chenj, i stil de kɔntinyu fɔ du wetin in nem min. Na dat mek i de gi wi ɔl wetin wi nid fɔ liv ɛn ɛp wi fɔ biliv pan am gud gud wan. Jiova in nem de tich wi wan ɔda tin bɔt am. I de tich wi se Gɔd kin mek ɔda pipul dɛn du wetin i want. Fɔ ɛgzampul, i kin yuz in Witnɛs dɛn fɔ du di wok we i want dɛn fɔ du. We wi de tink bɔt dis, i de gi wi mɔ zil fɔ kɔntinyu fɔ du di prichin wok gud gud wan. Wan brɔda na Nɔwe we nem Kɔra, we ol 84 ia, dɔn de prich wit zil fɔ 70 ia. I bin tɔk se: “Na big big ɔnɔ a gɛt fɔ sav Jiova, we na di Kiŋ we bin de, we de naw ɛn we go de sote go, ɛn a gladi fɔ de wit in pipul dɛn we i put in nem pan. Na big ɔnɔ wi gɛt fɔ ɛksplen di tru tin dɛn we de na di Baybul to ɔda pipul dɛn ɛn si aw dɛn kin gladi fɔ ɔndastand wetin dɛn de lan. Fɔ ɛgzampul, a kin fil fayn we a kin tich pipul dɛn bɔt di bɛnifit we Jizɔs Krays in day wan briŋ fɔ mɔtalman ɛn aw Jizɔs in day go mek dɛn gɛt layf we go de sote go wit kolat insay di nyu wɔl we ɔlman go de du wetin rayt.”

17 Na sɔm say dɛn we wi kin prich, i nɔ kin izi fɔ fɛn pipul dɛn we rili want fɔ lan bɔt Gɔd. Bɔt jɔs lɛk Kɔra, yu nɔ tink se yu go rili gladi we yu fɛn sɔmbɔdi we lisin to yu ɛn yu ebul fɔ tich am bɔt Jiova in nem? Bɔt aw wi go ebul fɔ bi Jiova in witnɛs ɛn bi Jizɔs in witnɛs bak? Na dis kwɛstyɔn wi go tɔk bɔt na di nɛks atikul.