Prɔvabs 28:1-28
28 Wikɛd pɔsin de rɔnawe we nɔbɔdi nɔ de rɔnafta am,Bɔt di wan we de du wetin rayt gɛt kɔnfidɛns lɛk layɔn.*
2 Ɛni land usay pipul dɛn de du bad,* dɛn go de chenj chenj dɛn prins dɛn,Bɔt say usay dɛn gɛt pɔsin we de si fa ɛn we gɛt sɛns fɔ ɛp dɛn, dɛn prins go rul fɔ lɔng.
3 Poman we de kruk pɔsin we dɛn nɔ tek mek natin,Tan lɛk ren we de go wit ɔl di it.
4 Di wan dɛn we dɔn lɛf fɔ obe lɔ de prez pɔsin we wikɛd,Bɔt di wan dɛn we de obe lɔ de rili vɛks pan dɛn.
5 Wikɛd pipul dɛn nɔ de ɔndastand wetin jɔstis min,Bɔt di wan dɛn we de luk fɔ Jiova kin ɔndastand ɔltin.
6 Poman we de waka tret na Gɔd in yay bɛtɛPas jɛntriman we kɔrɔpt.
7 Pikin we de ɔndastand de obe lɔ,Bɔt di wan we de kip kɔmpin wit pipul dɛn we bigyay de disgres in papa.
8 Di wan we de ad pan in jɛntri bay we i de aks fɔ intrɛst ɛn mek pasmak prɔfit,De gɛda am fɔ di wan we de sho sɔri-at fɔ poman.
9 If pɔsin nɔ de gri fɔ obe lɔGɔd rili et in prea.
10 Pɔsin we de mek di wan we de du wetin rayt du bad go fɔdɔm insay in yon trap,Bɔt di wan we nɔ gɛt wan fɔlt go gɛt wetin gud.
11 Jɛntriman de tink se i gɛt sɛns,Bɔt poman we de si fa go no di tru bɔt am.
12 We pɔsin we de du wetin rayt win, pipul dɛn de rili gladi,*Bɔt we wikɛd pɔsin gɛt pawa, pipul dɛn de ayd.
13 Pɔsin we de tray fɔ ayd in sin nɔ go ebul fɔ du dat,Bɔt Gɔd go sho sɔri-at to ɛnibɔdi we kɔnfɛs in sin dɛn ɛn lɛf fɔ du bad.
14 Pɔsin we rɛdi ɔltɛm go gladi,Bɔt ɛnibɔdi we gɛt strɔngat go gɛt trɔbul.
15 Wikɛd rula we de oba pipul dɛn we nɔ gɛt pɔsin fɔ ɛp dɛn,Tan lɛk layɔn we de mek sawnd bikɔs i dɔn vɛks ɛn lɛk bia we dɔn vɛks we rɛdi fɔ fɛt.
16 Lida we nɔ de si fa nɔ de yuz in pawa di rayt we,Bɔt di wan we et fɔ gɛt prɔfit bay kruk go gɛt lɔng layf.
17 Pɔsin we de fil bad bikɔs i kil ɔda pɔsin go kɔntinyu fɔ rɔn te i rich na di grev.*
Lɛ nɔbɔdi nɔ sɔpɔt am.
18 Pɔsin we de du tin we nɔ gɛt wan fɔlt go sev,Bɔt di wan we de pan bɛnbɛn go fɔdɔm di tɛm we i nɔ de ɛkspɛkt.
19 Pɔsin we de wok na fam go gɛt plɛnti it,*Bɔt di wan we de rɔnafta tin dɛn we nɔ gɛt wan yus go ɛnd-ɔp fɔ po.
20 Pɔsin we fetful go gɛt bɔku blɛsin,Bɔt pɔsin we want fɔ jɛntri kwik kwik wan nɔ go inosɛnt.
21 I nɔ fayn fɔ tek wan pɔsin bɛtɛ pas ɔda pɔsin;
Bɔt pɔsin kin du bad fɔ smɔl it.*
22 Pɔsin we want ɔltin fɔ insɛf* rili want fɔ jɛntri,Bɔt i nɔ no se i go ɛnd-ɔp fɔ po.
23 Ɛnibɔdi we kɔrɛkt pɔsin, leta dɛn go gladi fɔ am mɔPas pɔsin we de tɔk wɔd dɛn we de mek ɔda pɔsin in ed big.
24 Ɛnibɔdi we de tif in mama ɛn in papa ɛn se, “I nɔ bad,”
Na padi to pɔsin we de kɔz trɔbul.
25 Pɔsin we want ɔltin fɔ insɛf de sɛt ala-ala,Bɔt ɛnibɔdi we abop pan Jiova go go bifo.*
26 Ɛnibɔdi we de abop pan in yon at ful,Bɔt di wan we de du tin wit sɛns go ɛskep.
27 Ɛnibɔdi we de gi to di wan dɛn we po go gɛt wetin i nid,Bɔt di wan we de mek lɛk se i nɔ de si dɛn go gɛt bɔku swɛ.
28 We wikɛd pipul dɛn gɛt pawa, pɔsin de ayd insɛf,Bɔt we dɛn day, di wan dɛn we de du wetin rayt de bɔku.
Futnot
^ Ɔ “yɔŋ layɔn.”
^ Ɔ “usay pipul dɛn de mek ala-ala.”
^ Ɔ “pipul dɛn de gɛt glori.”
^ Ɔ “di ol.”
^ Ɔ “bred.”
^ Ɔ “bred.”
^ Ɔ “Pɔsin we milɛ.”
^ Insay Ibru, “go gɛt bɔdi.”
