BIFO Jiova mek di wɔl, i bin dɔn mek enjɛl dɛn na ɛvin. Bɔt as tɛm de go, wan enjɛl bin want di wɔship we na Gɔd nɔmɔ fit fɔ gɛt. We dis enjɛl du sɔntin fɔ sho se i want di wɔship we Gɔd fɔ gɛt, i tɔn insɛf to Setan. Setan min “pɔsin we de agens ɔda pɔsin,” we min se i de agens Gɔd. Aw Setan bin sho se i de agens Gɔd?

Setan bin ful Iv fɔ lɛ i nɔ obe Gɔd. I yuz kɔni we fɔ tɛl Iv se Jiova Gɔd nɔ want lɛ i ɛnjɔy sɔntin we gud na in mek i tɛl am nɔ fɔ it di frut we bin de na wan patikyula tik. Setan nɔ shem fɔ se Gɔd de lay ɛn i tray fɔ tɛl Iv se i nɔ nid fɔ obe Gɔd in lɔ we i tɔk se: “I [Gɔd] no se if una it am, una yay go opin ɛn una go tan lɛkɛ am; dɔn una go no wetin gud frɔm wetin bad.” (Jɛnɛsis 3:​5) Iv bin biliv Setan in lay. Iv brok Gɔd in lɔ ɛn mek Adam du di sem tin. Frɔm da tɛm de, ɛnibɔdi we gɛt rial fet na Setan in ɛnimi. Ɛn te tide, Setan de kɔntinyu fɔ ful pipul dɛn. Aw i de du dat?

Setan bin yuz aydɔl wɔship ɛn dɛn tin we dɛn fɔstɛm pipul bin de lan pipul dɛn fɔ kɔrɔpt di Izrɛlayt dɛn. Jizɔs we na di Mɛsaya bin tɛl di bigman dɛn pan Gɔd biznɛs se bikɔs “dɛn de lan pipul dɛn lɔ we nɔto [Gɔd] yon,” na fɔ natin dɛn de wɔship Gɔd. (Matyu 15:​9) We da neshɔn de nɔ biliv di mɛsaya, Gɔd pul an pan dɛn. Jizɔs bin tɛl dɛn se: “Di rayt we una gɛt fɔ mek Gɔd rul una nɔ go bi una yon igen, na dɛn pipul we go du wetin Gɔd want go gɛt am.” (Matyu 21:​43) Na di wan dɛn we bin de fala Jizɔs Gɔd in an bin de pan naw.

Setan tray bak fɔ kɔrɔpt di wan dɛn we bin de fala Jizɔs. Yu tink se i bin ebul fɔ du dat? Jizɔs bin pul wan parebul fɔ tɛl wi wetin go apin. Insay di parebul, wan man plant wan gud sid we dɛn kɔl wit, na in fam. Leta, in ɛnimi kam ɛn plant gras midul di wit dɛn. Di man lɛf di wit ɛn di gras fɔ gro togɛda te di tɛm fɔ kɔt di plant rich. Dɔn di man pul di gras pan di wit dɛn ɛn bɔn am. Bɔt i gɛda di wit dɛn ɛn put am na in stɔ.

Jizɔs bin ɛksplen to in disaypul dɛn wetin di parebul min. Na in na di man we plant di fayn sid. Jizɔs se: “Di gud sid na di pipul dɛn we Gɔd de rul, ɛn di gras na di pipul dɛn we Setan de rul. Ɛn di pɔsin we nɔ lɛk di man we gɛt di fam, ɛn we plant di gras na Setan. Di tɛm we dɛn kɔt di plant dɛn na di tɛm we di wɔl go [“want fɔ,” NW] dɔn, ɛn di wokman dɛn we de kɔt di plant dɛn na di enjɛl dɛn.” (Matyu 13:​38, 39) Jizɔs kɔmpia in tru tru disaypul dɛn to wit. Bɔt Setan kam miks lay lay disaypul dɛn wit Jizɔs in tru tru disaypul dɛn jɔs lɛk we pɔsin plant gras usay dɛn bin dɔn plant wit. So wi si se jɔs lɛk wetin Jizɔs bin dɔn tɔk, afta i day, lay lay disaypul dɛn bigin fɔ tich lay lay tin dɛn. Dɛn bin de tich se Gɔd na Triniti. We min se Gɔd na Gɔd, Jizɔs na Gɔd, ɛn di oli spirit na Gɔd; bɔt dɛn nɔto tri Gɔd, dɛn ɔl na jɔs wangren Gɔd. Dɛn lay lay disaypul  dɛn ya bigin fɔ wɔship aydɔl dɛn ɛn put an pan pɔlitiks. Na jɔs smɔl disaypul dɛn bin de fala di tru tin dɛn we Jizɔs bin tich.

Bɔt as Jizɔs bin ɛksplen dat go chenj. Gɔd in enjɛl dɛn go pik pik di wan dɛn we nɔ gɛt rial fet ɛn dɔnawe wit dɛn. Dɔn i go izi fɔ si di wan dɛn we gɛt rial fet. Afta dat Gɔd go dɔnawe wit Setan we na di men ɛnimi we de agens di wan dɛn we gɛt rial fet. Fɔ tru, na di wan dɛn we gɛt rial fet go sev!

But aw yu go ebul fɔ no di pipul dɛn we gɛt rial fet tide? Na dis kwɛstyɔn wi go ansa nɛks.