Go dayrɛkt to di men tin

Go dayrɛkt to di say we di difrɛn difrɛn atikul dɛn de

 SƐKSHƆN 9

Wetin Wi Kin Lan Frɔm di Mɛsaya

Wetin Wi Kin Lan Frɔm di Mɛsaya

GƆD bin dɔn tɔk se i go pik di Mɛsaya fɔ bi Lida fɔ ɔl di pipul dɛn. Gɔd no di kayn lida we wi rili nid ɛn i dɔn pik di bɛst wan fɔ wi. Uskayn Lida di Mɛsaya bin bi? Yu tink se na bin pawaful man we bin de bifo in kɔmpin dɛn fɔ fɛt wɔ? Na pɔlitishian we bin gɛt sɛns? Ɔ na bin masta sabi bukman? Di Oli Skripchɔ dɛn sho se di Mɛsaya na prɔfɛt Jizɔs ɛn in na prɔfɛt we bin difrɛn frɔm ɔl ɔda prɔfɛt dɛn.—Matyu 23:​10.

Gɔd mek shɔ se dɛn bɔn Jizɔs as pafɛkt mɔtalman we oli. Apat frɔm dat, Jizɔs nɔ bin ɛva alaw Setan fɔ kɔrɔpt am atɔl. Di tin dɛn we Jizɔs bin de du ɛn se nɔ bin gɛt wan bɔt, we sho se i bin de falamakata Gɔd fɔ yuz in pawa di rayt we, fɔ du tin stret, fɔ sho lɔv to ɔda pipul dɛn, ɛn fɔ du tin wit sɛns. Lɛ wi si sɔm we dɛn we wi kin lan frɔm Jizɔs.

Jizɔs bin de ɛp ɔda pipul dɛn

I bin de yuz di pawa we Gɔd gi am fɔ ɛp ɔda pipul dɛn. Jizɔs bin rili bisin bɔt pipul dɛn, ɛn i bin de yuz in pawa fɔ gi dɛn wetin dɛn nid. I tɔk se: “A sɔri fɔ dɛn pipul ya bikɔs . . . dɛn nɔ gɛt natin fɔ it.” (Mak 8:​2) Dɔn Jizɔs bin pafɔm mirekul fɔ fid dɛn bɔku pipul dɛn de we bin go fɔ yɛri wetin i de tich.

Jizɔs nɔ bin jɔs de fid pipul dɛn, bɔt i bin de go bak na bɔku ples dɛn fɔ tich ɛn “mɛn pipul we gɛt ɔlkayn sik.” (Matyu 4:​23) Dis bin mek bɔku pipul dɛn de fala am ɛn “ɔl di pipul dɛn bin de tray fɔ tɔch Jizɔs bikɔs pawa bin de kɔmɔt pan am we mɛn dɛn ɔl.” (Lyuk 6:​19) Fɔ tru, Jizɔs “nɔ kam fɔ mek mɔtalman bi in savant, bɔt i kam fɔ bi dɛn savant ɛn fɔ gi in layf fɔ sev plɛnti plɛnti pipul.” (Matyu 20:​28) * Ɔmɔs mɔtalman lida de du wetin Jizɔs du fɔ ɛp ɔda pipul dɛn?

Jizɔs lɛk pikin dɛn

I bin de du tin stret lɛk Gɔd. Jizɔs bin obe di lɔ dɛn we Gɔd gi ɛn i bin no wetin mek Gɔd gi dɛn lɔ dɛn de. Jɔs lɛk aw di Skripchɔ dɛn bin dɔn tɔk, Jizɔs fiba lɛk Devid we bin tɔk se: “A de ɛnjɔy fɔ du wetin yu want.” “A de kip yu lɔ na mi at so a go obe am.” (Sam 40:​8) Jɔs lɛk Gɔd, Jizɔs bin de trit ɔlman wit rɛspɛkt ɛn i nɔ bin de tek wan pɔsin bɛtɛ pas ɔda pɔsin, ilɛksɛf di pɔsin po, i jɛntri, na man, na uman, na pikin ɔ na big pɔsin. Wan tɛm, Jizɔs in disaypul dɛn bin vɛks pan sɔm mama ɛn papa dɛn we bin de briŋ dɛn pikin dɛn kam to Jizɔs. Bɔt Jizɔs tɛl in disaypul dɛn se: “Una mek di pikin dɛn kam to mi, una nɔ tap dɛn; na pipul lɛkɛ dɛn pikin ya, go kam ɔnda Gɔd in rul.”—Mak 10:​14.

I bin sho se Gɔd gi am sɛns. Jizɔs bin rili ɔndastand pipul dɛn. “Jizɔs insɛf sɛf bin no wetin de na dɛn at.” (Jɔn 2:​25) We Jizɔs in ɛnimi dɛn bin sɛn sɔm man dɛn fɔ go arɛst am, dɛn man ya bin tɔk se: “Nɔbɔdi nɔ tɔk lɛkɛ dis man ya wande.” Usay Jizɔs pul in sɛns? Jizɔs bin tɔk se: “Nɔto mi yon sɛns a de tek lan una, bɔt na Gɔd we sɛn mi tɛl mi wetin a fɔ lan una.”—Jɔn 7:​16, 46.

Jizɔs bin de sɔri fɔ di wan dɛn we sik ɛn i bin de mɛn dɛn

I bin lɛk pipul dɛn lɛk aw Gɔd lɛk pipul dɛn. Jizɔs bin gɛt sɔri-at fɔ pipul dɛn.  Wan tɛm, wan man bin gɛt wan “bad sik” we dɛn kɔl lɛprɔsi. Dis sik bin de ɔlsay na di man in bɔdi. Di man bin beg Jizɔs se: “If yu gri fɔ mɛn mi, yu ebul mɛn mi ɛn mek a klin.” Jizɔs bin rili sɔri fɔ di man so “i tret in an, tɔch di man ɛn se, ‘A want mɛn yu, wɛl naw!’ Di bad sik kɔmɔt pan di man in skin wantɛm,” ɛn i wɛl. (Lyuk 5:​12, 13; Mak 1:​41, 42) Jizɔs bin rili want lɛ da po man de lɛf fɔ sɔfa.

Yu tink se Jizɔs bisin bɔt yusɛf? Jizɔs insɛf bin ansa da kwɛstyɔn de we i bin tɔk se: “Una kam to mi, una ɔl we dɔn taya fɔ tot ebi lod, a go pul di lod pan una ed, mek una go blo. Una opin una at fɔ di tru tin dɛn we a de lan una, ɛn una lan ɔl wetin a de tɛl una, bikɔs a de bia wit una ɛn a nɔ de tɔk pan una; if una du dat, una go blo.”—Matyu 11:​28, 29.

Jizɔs na di bɛst Lida we wi go ɛva gɛt. Na dat mek i bin tɛl wi se: “Una lan ɔl wetin a de tɛl una.” Yu go want fɔ du wetin Jizɔs se? We yu du dat, i go mek yu gɛt gladi at na layf.

^ par. 6 Fɔ no mɔ bɔt di day we Jizɔs bin day fɔ pipul dɛn, rid chapta 5 na di buk we nem Wetin Rili di Baybul De Tich?