Go dayrɛkt to di men tin

Go dayrɛkt to di say we di difrɛn difrɛn atikul dɛn de

 SƐKSHƆN 6

Wetin Mek Gɔd Mek di Wɔl?

Wetin Mek Gɔd Mek di Wɔl?

GƆD mek di wɔl fayn wan fɔ lɛ mɔtalman ɛnjɔy fɔ liv insay de. Gɔd in Wɔd tɔk se Jiova “de na ɛvin, bɔt i lɛf di wɔl gi mɔtalman.”—Sam 115:​16.

Bifo Gɔd mek di fɔs man we nem Adam, Gɔd bin pik wan smɔl say na di wɔl we nem Idɛn ɛn mek wan fayn fayn gadin de. Di Skripchɔ dɛn tɔk se di riva Yufretis ɛn riva Taygris (Idikɛl) bigin na di gadin we bin de na Idɛn. * Sɔm pipul dɛn tink se di gadin we bin de na Idɛn go dɔn de na di say we Istɛn Tɔki de naw. Fɔ tru, di gadin na Idɛn bin rili de na dis wɔl!

Gɔd bin mek Adam ɛn put am na di gadin we bin de na Idɛn “fɔ mek i go tek kia ɔf am ɛn wok de.” (Jɛnɛsis 2:​15) Leta, Gɔd mek wɛf fɔ Adam we nem Iv. Gɔd tɛl Adam ɛn in wɛf se: “Una bɔn pikin dɛn, fɔ mek una de ɔlsay na di wɔl ɛn kɔntrol di wɔl.” (Jɛnɛsis 1:​28) Dis sho klia wan se Gɔd: “Mol dis wɔl ɛn mek am (i mek i tinap, i nɔ mek i bi ples we nɔ gɛt ɔda, i mek am fɔ pipul fɔ tap!)”—Ayzaya 45:​18.

Bɔt Adam ɛn Iv bin tɔn dɛn bak pan Gɔd ɛn brok in lɔ bay wilful. So Gɔd drɛb dɛn kɔmɔt na di gadin we bin de na Idɛn. Dɛn fɔfit Paradays. Adam in sin bin afɛkt ivin in pikin dɛn. Gɔd in Wɔd tɛl wi se: “Na wan man mek sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.”—Lɛta Fɔ Rom 5:​12.

Jiova bin want lɛ di wan ol wɔl bi Paradays ɛn mek pipul dɛn de de wit gladi at. Fɔ se i nɔ go mek di wɔl bi Paradays igen? Nɔ, paradays go de na dis wɔl bak. Gɔd tɔk se: “Mi wɔd we de kɔmɔt na mi mɔt . . . nɔ go tɔn bak kam to mi i nɔ du natin, bɔt i go du wetin a sɛn am fɔ du, ɛn i go du wɛl pan di tin we a sɛn am fɔ go du.” (Ayzaya 55:​11) Gɔd go mek di wan ol wɔl bi Paradays!

Aw layf go tan lɛk na Paradays? Tɔn to di nɛks pej ɛn rid bɔt di tin dɛn we Gɔd prɔmis se i go du insay Paradays.

^ par. 4 Jɛnɛsis 2:​10-14 se: “Wan big riva bin de flo ɛn wata di fam; ɛn i bin sheb to fo riva dɛn wɛn i kɔmɔt na di fam. Di fɔs riva nem Pishɔn . . . di sɛkɛn riva nem Giɔn . . . di tɔd riva in nem Taygris we de to di ist we yu kɔmɔt Ashɔ, ɛn di riva we mek fo na Riva Yufretis.” Nɔbɔdi nɔ no di fɔs tu riva dɛn ɛn di say we dɛn de.