Mivu ioso tuene mu bhanga ji Bibidia javulu phala ku ji bhana ku athu, tuene mu bhanga ué madivulu a mukuá. Tuene mu tunga jifiliale ku mundu uoso ni kusumba ji makina ja kubhangela madivulu. Jimidi ni jimidi ja ilunga ene mu diongeka mu ididi ia iuka a i xana Ididi ia Ubhezelu. Nanhi uene mu bhana o kitadi phala kubhanga o ima ioso íii?

O ikalakalu ietu tuene mu i bhanga ni kitadi ki bhana o athu mu vondadi iâ. (2 Kolindo 9:7) Ku muvu ua 1879, o Mulangidi uambe: “‘Tuejiia kuila JIHOVA ua mu kuatekesa o kadivulu, Torre de Vigia de Sião,’ [o dijina dia dianga dia kadivulu kaka] kienhiki, nuka tua-nda bhinga jimola ku athu phala ku tu kuatekesa.” O izuelu íii iene mu di kumbidila katé lelu.

O kitadi kiene mu bhana o athu mu vondadi iâ, ene mu ki tumikisa ku filiiale ietu mba ku ki ta mu ji kaxa jene mu kala mu Kididi kia Ubhezelu. Maji etu ki tuene mu bhinga madijimu, mba kubhinga kitadi ku athu mukonda dia ikalakalu ietu mba madivulu metu. Kene mu tu futa mukonda dia kuboka, kulonga mu ilunga mba kutunga ididi ia ubhezelu. Mukonda Jezú uambe: “Mua tambula ngoho, bhenenu ngoho.” (Matesu 10:8) Jimbangi joso ja Jihova ene mu kalakala mu jifiliale jetu ni mu mbonge ietu ku Estados Unidos, kala o jiphange jetu a tokala mu Kibuka kia Utuminu kia Jimbangi ja Jihova, kene mu a futa.

O kitadi kiene mu bhana o athu mu vondadi iâ, ene mu kuatekesa na-kiu ué o jiphange jetu kioso kia bhita mu mavuua. O Jikidistá ja dianga a sangulukile mu kusangela kitadi phala kukuatekesa o jiphange jâ, akexile mu bhita bhu ibhidi. (Loma 15:26) Etu ué tuene mu kuatekesa o jiphange jetu a tate, mu kutunga o jinzo jâ ja bu, mukonda dia mavuua, kutunga ididi ia ubhezelu, kua a bhana kudia, izuatu ni milongo.