Ku bokona mu madisá

Ku bokona mu madisá

O Kuila ua Luuala ni Nzambi?

O Kuila ua Luuala ni Nzambi?

“MUKONDA DIAHI EME? Mukonda diahi Nzambi uehela o ima íii kubhita n’eme?” O ibhuidisu íii ia thandanganhesa Sidnei, munzangala mukua Brazil ua kexile ni 24 ia mivu. Mukonda dia kiluezu kia bhiti na-kiu kioso kia kexile mu zóua, lelu muéne kinema uenda bhu kialu kia malola.

O hadi i bheka o iluezu, o kukata, kufua kua muthu u tua zolo, mavuua mba ita, i tena kubhangesa o athu kukala ni njinda ia Nzambi. O maka enhá a mateka ukulu. M’ukulu, Jobe ua katele kiavulu, ua bhiti ué mu mavuua avulu. Muéne ua tatela Nzambi, uixi: “Nga dikola kokoué, maji kua ngi vutuila; ng’emana muene, maji eie ua mu ngi tal’é ngó kienhiki, ku ngi suu. Ua ngi kitukila ni usuéia; ua mu’lua n’eme ni nguzu ia lukuaku lué.”Jobe 30:20, 21.

Jobe kejidile nanhi ua kexile mu mu talesa hadi, mba mukonda diahi muéne ua kexile mu bhita mu jiphaxi jojo. Maji o Bibidia i tu jimbulula se mukonda diahi tuene mu tala hadi ni kiebhi ki tua tokala kudibhana ni hadi íii.

O KUILA NZAMBI UA BHANGE O ATHU PHALA KUTALA HADI?

O Bibidia i tu tangela ia lungu ni Nzambi: “Kima kioso kia bhanga ki tenena—uendelu uê uoso uatetuluka; Nzambi muene o Kidi, o mua muene ki muene mangonha, izuua ioso muene ngó ua iuka, o kutetuluka ue muene ngó.” (Matendelelu 32:4) Kienhiki, o kuila kima kiambote kuxinganeka kuila, o Nzambi ‘ua iuka, ua tetuluka,’ ua bhange o athu phala kutala hadi mba u a bhekela ima ia iibha phala ku a kaxtikala?

Mu veji dia kiki, o Bibidia i tu tangela: “O muthu kia dianguka mu ithangana ia malamba ienhi’ii, k’ele, uixi: Nzambi muène ua ngi diangula. Mukonda Nzambi kene ku mu diangula ku kima kiaiibha kioso-kioso, o muène ue kene mu diangula muthu.” (Tiiaku 1:13) O Bibidia i tu tangela kuila Nzambi ka bhange o athu phala kutala hadi kana. Muéne ua bhana kua Adá ni Eva dibhata dia iuka, ua a bhana ima ioso ia bhindamene ni kikalakalu ki bheka kisangusangu ku muenhu. Nzambi ua a tangela: “Vualenu, mu sokoloke, mu izalesa ixi ioso, mu i tolole.” Adá ni Eva akexile ni ima ioso, ki bhua kambele kima phala kuluuala ni Nzambi.Dimatekenu 1:28.

Maji lelu, o muenhu uetu ki ua iuka. Tundé ukulu, o hadi ia mu dibandekesa izuua ioso. Ni kidi kioso o Bibidia i zuela: “Ibhangelu ioso hanji ia kuata kukema mu misusu kala ia kuvuala katé kindala.” (Loma 8:22) Ihi ia bhiti?

MUKONDA DIAHI TUENE MU TALA HADI?

Phala ku tu kuatekesa kuijiia se mukonda diahi tuene mu tala hadi, tua tokala kuvutuka ku dimatekenu kua matekena o hadi. Mukonda dia anju ia bhukumuka, a mu ila Satanaji a muila Diabhu, Adá ni Eva a ditunu o ijila ia Nzambi ia lungu ni ima ia uabha ni ima iibha, kála kia londekesele o kitumu kia kuila ka tokalele kudia ku “muxi ua kuijiia kiauabha ni kiaiibha.” O Diabhu ua tangela Eva kuila se a dile ku kibundu ene keji kufua, kienhiki Diabhu ua tatela Nzambi kuila mukua makutu. Satanaji ua tatela ué Nzambi mu kuila u fidisa o mundu uê kuijiia ene mudiâ ioso ia uabha mu íii ia iibha. (Dimatekenu 2:17; 3:1-6) Satanaji ua zuela kuila o athu eji beta kusanguluka sé o ungana ua Nzambi. Ima ioso íii ia vulumuna maka a dikota—O kuila Nzambi muéne ua tokalele kutumina o athu?

O Diabhu ua vulumuna dingi maka a mukuá. Muéne uambe kuila o athu kene mu bheza Nzambi mukonda dia henda. Ia lungu ni Jobe, diiala dia fiiele, Diabhu uambe kua Nzambi: “Manhi eie ku muizalesa ni jimbote, ni muene ni dibhata diê dioso ni ioso iala na-iu? . . . Maji zènga hanji ngó o lukuaku lué u mu kuate ku ioso iala na-iu, utale se ka-nda ku ku xonguena bhu pholo iê.” (Jobe 1:10, 11) Sumbala Satanaji ua tatela Jobe, maji mu kidi muéne ua kexile mu tatela athu oso kuila keji bheza Nzambi mukonda dia henda.

KIEBHI NZAMBI KIA BATULA O MAKA

Ihi ia tokalele kubhanga Nzambi phala kubatula o maka oso iá a vulumuna Satanaji? Nzambi, o njimu ia dikota, ua sangele ndunge iambote phala kubatula o maka—o ndunge íii ki i tu luualesa kana. (Loma  11:33) Muéne uehela o athu kuditumina ene mudiâ, phala kulondekesa, se nanhi uejiia o kutumina kiambote.

O ima ia iibha i tuene mu mona lelu mu ngongo, ilondekesa kiambote kuila o athu akua ituxi ka tena kutumina kiambote. O jinguvulu ja mundu ka mu tena kubheka o kutululuka, kukondama ni kusanguluka. Ene a mu bhanga uá ima iavulu iene mu bheka hadi iavulu ku athu. O ima íii ilondekesa o kidi kia Bibidia: ‘Muthu kienda, ki muéne uendesa o makanda mê.’ (Jelemiia 10:23) O ukexilu ua Nzambi ua kutumina uene ngó u tena kubheka kutululuka kua kidi, kuzediua ni mbote ku athu, mukonda íii iene ia mesena Nzambi ku athu.Izaia 45:18.

Mu kiki, kiebhi Nzambi kia-nda tena kukumbidila o vondadi iê ia lungu ni athu? Lembalala kuma Jezú ua longo akaiedi’ê o kusamba: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:10) Mu kidi, mu kithangana kia tokala, bhu kaxi ka Utuminu uê Nzambi ua-nda zubha o ima ioso iene mu bheka hadi ku athu. (Daniiele 2:44) O uadiama, mauhaxi ni kufua, ima ioso íii ia-nda bhita. Ia lungu ni uadiama, o Bibidia i tu tangela kuila, Nzambi ua-nda “bhindumuna o phulungu kioso kia dikola.” (Jisálamu 72:12-14) Ia lungu ni jihaxi, o Bibidia i zuela: ‘Ki bhua kà kala mukua-bhata uila: nga kata.’ (Izaia 33:24) Ia lungu ni athu ió afu maji ala mu kilunji kia Nzambi, Jezú uambe: “Kumbi dí diza, dia oso ala mu jimbila kuívua o dízui diê, ni kutunda-mu.” (Nzuá 5:28) Íii ikanenu ia kusanguluka!

O kudielela mu ikanenu ia Nzambi, ku tu fidisa ku luuala né

KIKUATEKESU PHALA KUDIBHANA NI KULUUALA

Mu kubhita 17 ia mivu tundé kia bhitile mu kiluezu, Sidnei, munzangala u tua mu tange kiá ku dima, uambe: “Eme nuka nga tatele Jihova Nzambi mukonda dia kiluezu ki nga bhiti na-kiu, maji ngi mi tangela kuila, ku dimatekenu nga luualele ni Jihova. Saí izuua kioso ki nga mu divua kia iibha, ngi dila kiavulu mu kuxinganeka mu unema uami. Maji o Bibidia ia ngi kuatekesa kuijiia kuila, Jihova ki muene ua ngi bhitisa mu kiluezu kana. Kála ki zuela o Bibidia, ‘o ibatu ni jithembu ja tokala ene oso.’ O kusamba kua Jihova ni kutanga o Bibidia, kuene mu ngi kuatekesa kukolokota mu nzumbi ni kukala ni ibanzelu iambote.”Ndongixi 9:11; Jisálamu 145:18; 2 Kolindo 4:8, 9, 16.

O kuijiia se mukonda diahi Nzambi uehela o hadi, ni kuijiia ué kuila hádia muéne ua-nda zubha o ima ioso ia iibha, ku tu fidisa ku luuala né. Tua dielela ni kidi kioso kuila, Nzambi muéne o “mukua kubhandulula oso a mu sota ni muanu.” Kana-bhu muthu u xikina kua muéne ni kua Mon’ê, u diela mu kubhanga kiki.Jihebeleu 11:6; Loma 10:11.