Ki ki bhonzo kuzuela kuila o Satanaji i tanga o Bibidia, ulombolola ngó o kuiibha kuoso ku tuene mu mona ku mundu. Maji o kuila kiki, kiene muene ki longa o Bibidia? Se kiene, mukonda diahi o Bibidia ilondekesa Satanaji kuzuela ni Jezú Kristu ni Nzambi Muteni-a-Ioso? Tala kiebhi kiki kia bhiti.

Kioso Jezú kia mateka o ukunji uê, o Diabhu ua soto ku mu diangula veji jitatu. Kia dianga, kuma Jezú ua kexile ni nzala iu ua kexile ni kutena kua mu bhele Nzambi, Satanaji ua mu tumu ku lungulula o matadi mu jimbolo phala muéne o n’a di. Kia kaiadi, o Diabhu uambata Jezú ku kididi kia dileka kinene iu ua mu bhingi ku di takula bhoxi phala o ji-anju ku mu kuatekesa. Mu ku suka-ku, Satanaji ua mesenene ku bhana kua Jezú o ungana uoso ua mundu se Jezú ua xikinine o ku mu bheza. Maji Jezú mu ithangana itatu íii, ua ditunu, ua tumbula o Mikanda Ikola.—Matesu 4:1-11; Luka 4:1-13.

Jezú ua kexile mu zuela ni nanhi? O kuila ua kexile mu zuela ni kima kia iibha moxi diê-muene? Kala kilondekesa o Mikanda Ikola, Jezú “a mu thendalele mu ima ioso kala etu-ene, maji sé ngó ku ta kituxi.” (Jihebeleu 4:15) O Bibidia ué i zuela: “Muène muthu ka tele kituxi, mu kanu diê ki mua monekene makutu.” (1 Phetele 2:22) Katé ku ufuilu uê, Jezú ka te kituxi, ua kolokota fiiele. Muéne kehela kima kioso-kioso kia iibha ku kula moxi diê-muene. Kienhiki, tu tena kuzuela kuila Jezú ka kexile mu zuela ni kima kia iibha kia kexile moxi diê kana; muéne ua kexile mu zuela ni muthu ua kidi.

Kiki kilondekesa kuila Satanaji muthu ua kidi.

• Lembalala kuila o Diabhu ua mesenene ku bhana kua Jezú o ungana uoso ua mundu, se Jezú ua xikinine o ku mu bheza. (Matesu 4:8, 9) O ujitu ki ueji kala ni valolo se Satanaji kexile muthu ua kidi. Jezú ka ditunu ué kuila, Satanaji uexile ni ungana ua ku mu bhana o ima ioio.

• Kioso Jezú kia ditunu o ku bhanga kala kia mesenene Diabhu, o Diabhu “ua mu ambudisa hanji n’a kinge kithangana kiengi.” (Luka 4:13) O kuila kiki kilondekesa kuila, Satanaji ukexilu ngó ua iibha inga nguma ia dikota ua mesena ku tu bhanga kia iibha?

• Lembalala kuila “o ji-anju anga jiza, ji kala . . . mu xibhidila” Jezú. (Matesu 4:11) O kuila o ji-anju jojo jejile mu kuatekesa Jezú, jexile athu mu nzumbi? Sé phata, jexile athu mu nzumbi. Kienhiki, o  kuila tua tokala ku banza hanji kuila Satanaji kima ngó kia iibha, ki muthu ua kidi mu nzumbi?

O phangu ietu ia kaiadi, ia lungu ni musoso ua Jobe, uexile diiala di xila kiavulu Nzambi. O musoso iú u tu tangela ithangana iiadi, Satanaji ua di kundu ni Nzambi. Mu ithangana iiadi íii, Nzambi ua ximana Jobe mukonda dia ufiiele uê. Maji Satanaji uambe kuila, Jobe ua kexile mu bheza Nzambi ki mukonda dia henda kana, maji mukonda Nzambi ua kexile ku mu bhana ima iavulu. Mu kiki, o Diabhu ua kexile mu zuela kuila ua betele kuijiia Jobe, Nzambi ndenge. Jihova uehela Satanaji ku katula o jimbote joso ja Jobe, ku jibha an’ê ni ku mu bhekela uhaxi. * Mu ku bhita kithangana, o ima ia londekesa kuila Jihova uejidile kiambote Jobe ni kuila Satanaji uexile mukua makutu. Nzambi ua besoala Jobe mukonda dia ufiiele uê.​—Jobe 1:6-12; 2:1-7.

O kuila Jihova bhabha ua kexile mu zuela ni kima kia iibha moxi diê-muene? O Bibidia i zuela: “Njila ia Nzambi ia iuka.” (2 Samuuele 22:31) O Bibidia i zuela dingi: “U kôla, u kôla, Ngana Nzambi Muteni-a-ioso.” (Dijingunuinu 4:8) O kizuelu ukola, kilombolola ku zela mba kima kia kambe kituxi.

Jihova ki mukua ituxi kana. Muéne ka tena ku kala ni kifua kia iibha moxi diê.

Amoxi a tena hanji kuzuela kuila, Jobe kexile muthu ua kidi ni kuila o musoso ua kuila Satanaji ua zuela ni Nzambi, sabhu ngó. Maji o kuila kiki kidi muene? Ibatu ia mukua ia Bibidia, ilondekesa kuila Jobe uexile muthu ua kidi. Mu kifika, o divulu dia Tiiaku 5:7-11, di tu tangela kuila Jobe phangu iambote i suínisa o Jikidistá o ku kolokota mu ithangana ia bhonzo ni kuila Jihova u besoala oso a kolokota mu ufiiele uâ. O kuila se Jobe kexile muthu ua kidi ni kuila ka mu zukutisa kuala Satanaji, o phangu iê ieji tu bhana nguzu? O divulu dia Izekiiele 14:14, 20, di tumbula ué Jobe kumoxi ni Noué ni Daniiele kuila athu a iuka. Kála Noué ni Daniiele, Jobe uexile muthu ua kidi, diiala dia kexile ni kixikanu kia kolo. Se Jobe uexile muthu ua kidi, ki tu tokala ku xikina ué kuila a muzukutixi uê, Satanaji, muthu ua kidi?

Sé phata, o Bibidia ilondekesa Satanaji kala muthu ua kidi mu nzumbi. Maji nange eie ua di bhuidisa: ‘O kuila muéne u tena ku bhanga kia iibha ko kuami ni ku muiji uami lelu?’

Xinganeka kuila mu mbanza mu uala, mua bokona ifumbe. Sé phata, o ima mu mbanza ieji lunguluka, ki ieji kala dingi kididi kia kondama. Xinganeka kuila: Satanaji ni madimonho mê, athu a kidi mu nzumbi, a bhukumukina Nzambi ia a takula mu ixi. Kiebhi kieji kala o ixi? Xinganeka ku minangu i uene mu kuívua ku bhita ku diembu diê ni ku jixi ja makanga:

• O kuila uene mu mona kuila o ukexilu ua iibha ua athu ni ujibhangânga, uene mu sosoloka ni nguzu iene mu bhanga o athu phala ku u zubha?

• O kuila o jifilme ja lungu ni uanga, jene mu sosoloka mukonda dia ku thandanganha kua jitata javulu?

• O kuila uene mu mona athu ku zanga o ixi, sumbala ni nguzu iene mu bhanga o jinguvulu phala ku i langa?

• O kuila kiki kilondekesa kuila saí kima kia iibha ni ixi ietu—mba kima kia mesena ku tu buika?

Tala ihi i zuela o Bibidia se nanhi uene mu tu bhekela o mavuua oso iá: “Kimudikixi kia dikota anga a mu takuila ku kanga! A mu kaia, na Kinhoka kiokulu, a mu ila Diabhu, a mu ila Satana, mukua kunganala o mundu uoso. A mu lundumuina mu ngongo, ni ji-anju jê a ji lundumuina-nê kumoxi. . . . Lamba dienu mu ngongo ni ku musanza! Mukonda Diabhu ua mi tulukila ni njinda iavulu, kuma muène uejiia kuila o thembu iê ia butu kia.” (Dijingunuinu 12:9, 12) Mu ku tala kiambote o ima, athu avulu a xikina kuila Satanaji muthu ua kidi mu nzumbi, ua mesena ku tu bhanga kia iibha.

Nange ua mu dibhuidisa se kiebhi ki u tena o ku di fikidila. Kima kiambote o ku di bhuidisa kiki. O milongi ia kaiela ia-nda ku londekesa kiebhi ki u tena o ku bhanga kiki.