Mukonda Diahi Kua Bhingi ku Tuendesa ku Nzumbi ia Nzambi?
Mukonda Diahi Kua Bhingi ku Tuendesa ku Nzumbi ia Nzambi?
‘Eie-muéne u Nzambi iami; o Nzumbi iê iambote i ng’endese.’—JISÁ. 143:10.
1. Bhana kifika kilondekesa kiebhi o nguzu ki i moneka ku mesu, i tena kulondekesa o njila ku muthu.
OKUILA saí kizuua ua bhingile kiá bússola phala ku ku kuatekesa kuijiia kuebhi ku uala? O bússola kama kófele ka kuatekesa o muthu kuijiia o njila—kilondekesu ngó, ki kalakala ni nguia ilondekesa ku thunda. O bússola íii iala ni nguzu, mu phutu a ixana magnetismo, ilondekesa kuebhi ku uala. M’ukulu o ajingumuni a ixi, ni jingenji akexile mu kala ni bússola phala ku alondekesa o njila, mu ikoka ni mu kalunga.
2, 3. (a) Nguzu iahi ia bhange na-iu Jihova o ibhangelu? (b) Mukonda diahi tua tokala ku kingila kuila o nzumbi ia tenena ia Nzambi, i tuendesa ku muenhu uetu lelu?
2 Saí dingi nguzu ia mukuá ia beta-kota phala ku tuendesa. O nguzu íii, ihi? O nguzu íii o kima a ki tange mu jivelusu ja dianga ja Bibidia. O Bibidia iamba kuma, phala ku bhanga kiki, Jihova ua tumina o nguzu iê ia tenena, o divulu dia Dimatekenu diamba: “Ku dimatekenu Nzambi ua bhange diulu ni ixi.” Ni kuila: “Nzumbi ia Nzambi anga i kala mu butamena.” (Dim. 1:1, 2, NW) Ihi ia kexile mu kalakala? O nzumbi ikôla—o nguzu ia tenena iene ia bhange o ima ioso. Phala tu kale ku muenhu, kua bhingile o nzumbi ikôla ia Jihova, ia bhange o ima ioso mu ngongo.—Jobe 33:4; Jisá. 104:30.
3 O kuila o athu, a tokala ku kingila kuila o nguzu ia tenena ia Nzambi ia endesa ku muenhu uâ? O Mon’a Nzambi uejidile kuila tua i bhindamena muene, Jezú ua zuela ku maxibulu mê: “O . . . Nzumbi ia kidi, mùene u mi endesa mu kidi kioso.” (Nzu. 16:13) Kiebhi ki tu tena kuijiia se o nzumbi ihi, ni mukonda diahi kua bhingi ku tuendesa ku nzumbi íii?
O Nzumbi Ikôla Ihi
4, 5. (a) O athu a xikina mu Tilindade, amba kuila o nzumbi ikôla ihi? (b) Kiebhi ki u tena ku jimbulula o nzumbi ikôla?
4 Nange o athu u ua zuela nau mu ukunji, a xikina mu Bibidia, Versão Rei Jaime, ni ji Bibidia ja mukuá j’amba Muthu Ukola. O athu a xikina mu Tilindade, amba kuila o nzumbi íii muthu ua sokela ni Nzambi, o Tata. (1 Kol. 8:6) Kienhiki, kioso kia lungulula o Bibidia, Versão Rei Jaime mu The Webster Bible, ku muvu ua 1833, o lexicógrafo a mu ixana Noah Webster, mukua Amerika ua bhinganesa o kizuelu “Muthu Ukola” mu kizuelu “Nzumbi Ikôla.” Webster ua bhange kiki, mukonda muéne uejidile kuila mu Mikanda Ikola, o kizuelu kiki, ki kilombolola “kizuzumbia ngó.” *
5 O nzumbi ikôla ihi? O kizuelu ku luiji ku divulu dia Dimatekenu 1:2, mu Bibidia Tradução do Novo Mundo das Escrituras Sagradas—Com Referências, dizuela kuila, o kizuelu ruʹach mu [Hebalaiku] ka ki soneka ngó “nzumbi,” a ki soneka ué “mulenge,” ni mu izuelu ia mukuá ilondekesa kuila nguzu ka tena ku i mona.” (Sokesa ni izuelu iala ku luiji mu divulu dia Dimatekenu 3:8; 8:1, mu phutu.) Kienhiki, kála o kitembu, ki tu tena ku ki mona, kiala ni nguzu, o nzumbi ikôla, ki tu tena ku i mona, maji i bhanga ima iavulu. O nzumbi o nguzu ia Nzambi, i bhangesa o athu ku bhanga o vondadi iê. O kuila ki bhonza ku xikina kuila o nguzu íii, i tunda kua Nzambi, o Muteni-a-Ioso? Kana!—Tanga Izaia 40:12, 13.
6. Ihi ia bhingi Davidi kua Jihova?
6 O kuila Jihova u tena ku bhangesa o nzumbi iê kuendesa o muenhu uetu? Muéne ua kanena o mukua jisalamu, Davidi: “Ngi ku longesa, ngi ku [idikisa] njila ioso i ua fuama [kuia].” (Jisá. 32:8) O kuila Davidi ua mesenene ku muendesa? Ua mesenene, mukonda muéne ua bhingi kua Jihova: “Ngi longe kubhanga o vondadi ié, kuma ‘Eie-muéne u Nzambi iami; o Nzumbi iê iambote i ng’endese.’ (Jisá. 143:10) Tua tokala ué ku bhinga kua Jihova, ni kuehela ku tuendesa ku nzumbi iê. Mukonda diahi? Tua-nda di longa pondo jiuana.
Ka tu Bhange ni Kutena Kua Kuendesa o Mienhu Ietu
7, 8. (a) Mukonda diahi ki tu tena kuenda sé o kikuatekesu kia Nzambi? (b) Jimbulula se mukonda diahi ki tu tena ku di endesa ku mundu iú ua iibha.
7 Kia dianga, tua tokala kuehela o nzumbi ia Nzambi ku tuendesa, mukonda ki tu tena ku di endesa mudietu. “O kuendesa” muthu, kulombolola “kulondekesa njila ia tokala ku i kaiela.” Mukonda Jihova ka tu bhange ni kutena kua ku bhanga o ima mu nguzu ietu, bhenge-bhenge mukonda dia ukexilu uetu ua ituxi. O polofeta iê, Jelemiia ua soneka: “Jihova, tata, eme ngejiia kuila o njila ienda o muthu ki iene bhu lukuaku lua muthu-muène, mba muthu kienda, muene u tongesa o makanda mê-muène.” (Jel. 10:23) Mukonda diahi o muthu ka tena ku di endesa? Jelemiia uevu o kizuelu kia Nzambi, se mukonda diahi ki tu ditundu kiambote kioso ki tu di endesa mudietu. Mu kuzuela ia lungu ni muxima uetu, Jihova uambe: “Muxima ua muthu u bhomba kinéne, ima ioso ndenge, ua bhukumuka kiavulu: Mukuahi u tena ku uijiia?”—Jel. 17:9; Mat. 15:19.
8 Ki ku tobha, o muthu kejiia o njila, kuenda mu kikangalakata ubheka ué sé kuambata o bússola phala ku mu londekesa o njila? Sé kuijiia ihi ia tokala o ku bhanga mu kikangalakata, sé ku tena ku sanga o njila phala ku bhixila kiambote ku kididi kua múia, muéne ueji kala mu iluezu. Kiene kimoxi ué o muthu u fika kuila u tena ku di endesa mudiê ku mundu iú ua iibha, sé kuehela Nzambi ku mu idikisa o njila ia kidi, u kala ué mu iluezu. O kima kia tokala ku bhanga o muthu phala kuenda kiambote ku mundu iú ua iibha, o ku bhanga kála kia sambe Davidi kua Jihova, kioso kiambe: “Makànda mami ma kuata mu ikoka ié, o inama iami ki i dianguka, kana.” (Jisá. 17:5; 23:3) Kiebhi o muthu kia tena ku mu endesa?
9. Kiebhi ki tena ku tu kuatekesa o nzumbi ia Nzambi, kála kilondekesa o dífue dia 19?
9 Se tu kala tu athu a lenduka, ni ku xikina kuila Jihova u tu endesa, muéne ua-nda tu bhana o nzumbi iê ikôla phala ku tuendesa. Kiebhi o nguzu íii ia tenena, i tena ku tu kuatekesa? Jezú ua jimbulula o maxibulu mê: “Maji o mukuatekexi ió-phe, muène muène Nzumbi Ikôla, a-ndu mu tumikisa kuala Tata mu dijina diami, muène u mi longa ima ioso, hé u mi lembalesa ima ioso i nga mi ambela.” (Nzu. 14:26) Kioso ki tuia ni ku di longa o Mak’â Nzambi, ni kusamba, ni ima ioso ia longo Kristu, o nzumbi ikôla ia-nda tu kuatekesa ku tendela dingi o unjimu ua Jihova, phala tu tene ku kumbidila kiambote o vondadi iê. (1 Kol. 2:10) Kienhiki, kabasa kibhidi ki tu sanga mu njila ia muenhu, o nzumbi ia-nda tu londekesa o njila i tua tokala kuendela. Ia-nda tu lembalesa o milongi ia Bibidia i tua di longo kiá, ni ku tu kuatekesa ku kala ni nguzu ia ku i kumbidila phala ku tuendesa kiambote.
Jezú a mu Endesele ku Nzumbi ia Nzambi
10, 11. Ihi ia kexile mu kingila o Mon’â Nzambi ku nzumbi ikôla, ni ihi ia tambula?
10 O kima kia kaiiadi kilondekesa se mukonda diahi, a tokala ku tuendesa ku nzumbi ikôla, o kuijiia kuila Nzambi uendesa o Mon’ê mu kaxi ka Nzumbi iê ikôla. Ande dia kuíza mu ixi, o Mon’â Nzambi, umoxi-élele uejidile o kikanenu kiambe: “Anga nzumbi ia Jihova ia kà mu tula ku thandu diê, iene o nzumbi ia unjimu ni ku tetuluka, nzumbi ia phangu ni ndongo, ifikidila muthu, iene nzumbi i bhekela muthu o kuijiia ni kukala ni uoma ua Jihova.” (Iza. 11:2) Xinganeka kiebhi kia divu Jezú kioso kia kexile mu kingila o ku tambula o kikuatekesu kia nzumbi ia Nzambi, phala ku tena ku dibhana ni ima ieji bhita na-iu mu ixi!
11 O izuelu ia Jihova ia di kumbidila. O Bibidia izuela o kima kia bhiti kioso Jezú kia zubha o ku mu batizala, kuila: “Jezú, uezala ni Nzumbi Ikôla, u tunda ku Njolodá, anga a mu bheka kuala Nzumbi mu mikáu ia hatu.” (Luk. 4:1) Kuenhoko Jezú ka di kima, ua kexile mu samba, ni ku xinganeka, nange Jihova ua longo o Mon’ê, iu ua mu londekesa ihi ieji bhanga. O nguzu ia tenena ia Nzambi, ia kexile mu kalakala mu kilunji ni ku muxima ua Jezú, mu kuendesa o ibanzelu iê, ni ima ia tokalele o ku bhanga. Mu kiki, Jezú uejile ihi ia tokalele o ku bhanga mu ithangana ioso, iu ua bhange kala kia mesene Tat’ê.
12. Mukonda diahi tua tokala ku bhinga o nzumbi ia Nzambi phala ku tu endesa?
12 Mu kuijiia o valolo ia nzumbi ia Nzambi ku muenhu uê, Jezú ua londekesa ku maxibulu mê, o valolo ia ku bhinga, ni ku a endesa ku nzumbi ikôla. (Tanga Luka 11:9-13.) Mukonda diahi o nzumbi ia Nzambi iala ué ni valolo phala etu? Mukonda i tena ku lungulula o ibanzelu ietu, phala tu banze kála ki banza Kristu. (Lom. 12:2; 1 Kol. 2:16) Mu kuehela kuila o nzumbi ia Nzambi iendesa o mienhu ietu, tu tena ku banza kála ki banza Kristu, ni ku kaiela o phangu iê.—1 Phe. 2:21.
O Nzumbi ia Mundu i Tena ku tu Jimbidisa
13. O nzumbi ia mundu ihi, ni ihi i bhanga?
13 O kima kia katatu kilondekesa se mukonda diahi, a tokala ku tuendesa ku nzumbi ikôla, o kuijiia kuila, sé o nzumbi ikôla, a tena ku tu jimbidisa ku mundu iú ua iibha, uene mu nganala o athu lelu. O mundu uala ni kutena kuê, u bhangesa o athu ku kala ni ídifua ia iibha ki ia difu ni ídifua ieji kala na-iu o athu se a belesela o itendelesu ia nzumbi ikôla. Mu veji dia ku suínisa o athu ku banza kala ki banza Kristu, o nzumbi ia mundu, iene mu bhangesa o athu ku banza, mba ku bhanga o ima kála ki bhanga o sobha ia mundu, Satanaji. (Tanga Efezo 2:1-3; Tito 3:3.) Kioso o muthu kia mu jimbidisa ku nzumbi ia mundu, ni ku bhanga o imbamba ia xitu, u kala ni ibhidi iavulu, i tena ku mu fidisa ku bokona mu Utuminu ua Nzambi.—Nga. 5:19-21.
14, 15. Kiebhi ki tu tena ku di tunda kiambote mu ku lenga o nzumbi ia mundu?
14 Jihova uene mu tu kuatekesa ku lenga o nzumbi ia mundu. O poxolo Phaulu uambe: “Suinenu mua Ngana, ni mu kutena kua nguzu iê . . . sungenu o kibhakatu kioso kia Nzambi! Phala ki bhixila o kizuua kiaiibha.” (Efe. 6:10, 13) Mu kaxi ka nzumbi ikôla, Jihova u tu suínisa ku nguzu i bhanga Satanaji phala ku tu nganala. (Dij. 12:9) O nzumbi ia mundu ia suína, etu ki tu tena ku i lenga. Maji né kiki, ki tu tokala kuehela ku tu nganala ku nzumbi íii. O nzumbi ikôla ia tenena, i tena ku tu kuatekesa!
15 Ia lungu ni athu a xisa o kilunga kia Nzambi ku hama ia dianga, o poxolo Phaulu uambe: “Kuma njila ia kidi a tokoka ku i ijiia!” (2 Phe. 2:15) Tua sakidila kiavulu, mukonda “tua tambula-phe, kana o nzumbi iene ku mundu, maji o Nzumbi i tunda kua Nzambi.” (1 Kol. 2:12) Ni kikuatekesu kiê, ni ku katula mbote ku milongi ioso i tu bhanga Jihova, tu tena ku di tunda kiambote mu ku dibhana ni nzumbi ia mundu iú ua iibha.—Nga. 5:16.
O Nzumbi Ikôla i Bhangesa ku Kala ni Ídifua Iambote
16. O nzumbi ikôla i tena ku tu kuatekesa ku bhanga ihi?
16 O kima kia kauana kilondekesa se mukonda diahi, a tokala ku tuendesa ku nzumbi ikôla, o kuijiia kuila iene i bhangesa ku kala ni ídifua iambote ku athu a u xikina. (Tanga Ngalásia 5:22, 23.) O kuila saí muthu u dituna ku bandekesa o henda, o ngalasa, ni kutululuka kuê? O kuila saí muthu u dituna ku bandekesa o ku xididika, o ku lenduka, mba o ku bhanga o mbote? O kuila saí muthu u dituna ku kala fiiele, ku belesela, mba ku di tumina jihanji? O nzumbi ia Nzambi i tu bhangesa ku kala ni ídifua iambote, ni ku dibhana kiambote ni athu. Phala ku kala ni ídifua íii, ku bhinga nguzu iavulu, mukonda ídifua ia nzumbi, se-ku mbambe phala ku ilondekesa.
17. Kiebhi ki tu tena kulondekesa o ídifua ia nzumbi ikôla mu ukexilu uoso?
17 Tu kala ngó tu athu a unjimu, se tu di tonginina kiambote, phala tuijiie muene se o izuelu ietu ni ima i tu bhanga ilondekesa kuila a mu tuendesa ku nzumbi ikôla, ni kuila tuene mu londekesa o ídifua iê. (2 Kol. 13:5a; Nga. 5:25) Se tu mona kuila saí kídifua kia nzumbi ki tua bhindamena, tua tokala ku belesela o nzumbi ikôla mu kulondekesa o ídifua íii. Tu tena ku bhanga kiki, mu ku di longa o ídifua íii ia tange mu Bibidia, mu madivulu metu. Tu tena ku mona kiebhi o ídifua ia nzumbi ia tokala ku ilondekesa ku muenhu uetu izuua ioso, ni ku ilondekesa ni ku suína kuoso. * Kioso ki tu mona, o ídifua ia nzumbi ia Nzambi ku muenhu uetu, ni ku jiphange jetu ja Jikidistá, ki tu kuatekesa kuijiia se mukonda diahi tua tokala kuehela kuila iene i tu endesa.
O Kuila ua mu Belesela o Nzumbi ia Nzambi?
18. Kiebhi Jezú kia tu xila phangu mu ku xikina o nzumbi ia Nzambi?
18 Mukonda dia ku kala “dixibulu” dia Nzambi, mu ku bhanga o ngongo, Jezú uejidile ioso ia lungu ni kima, kiexana mu phutu campo magnético kiene mu kuatekesa o athu kioso kia nhunga mu ixi. (Jisa. 8:30; Nzu. 1:3) Kienhiki, se-ku kima mu Bibidia kilondekesa kuila Jezú a mu endesa ku nguzu íii kioso kia kexile mu ixi. O Bibidia izuela kuila kioso kia kexile mu ixi, muéne ua tambula o kikuatekesu kia nzumbi ikôla ia Nzambi ku muenhu uê. Muéne ua xikina ku muendesa, ni ku i belesela. (Mar. 1:12, 13; Luk. 4:14) O kuila kiene ué ki uene mu bhanga?
19. Ihi i tua tokala o ku bhanga phala o nzumbi ikôla kuendesa o muenhu uetu?
19 O nzumbi ia tenena ia Nzambi, iene hanji mu kuatekesa o athu a belesela, ni ku a endesa. Kiebhi ki u tena kuehela kuila iene i ku endesa mu njila ia kidi? Samba izuua ioso kua Jihova phala ku tumikisa o nzumbi iê, ni ku ku kuatekesa ku i belesela. (Tanga Efezo 3:14-16.) Kumbidila ioso i ua bhingi ku musambu mu ku tokuesa kiambote o Mak’â Nzambi, o Bibidia—ia bhange mu kaxi ka nzumbi ikôla. (2 Tim. 3:16, 17) Belesela o itendelesu ia bhana, ni ku xikina ku kuendesa ku nzumbi ikôla. Xikina mu ku tena kua Jihova, kuendesa o muenhu uê ku mundu iú ua iibha.
[Tanga mu luji]
^ kax. 4 Ku mbandu ia dianga mu Bibidia iê, Webster ua soneka: “Ki kale se o izuelu íii a i tendela mu ukexilu uéngi, kála kia i soneka, ene kene mu longa o kidi kia Mak’â Nzambi ku athu.”
^ kax. 17 Phala kuijiia kiambote o ídifua íii, tanga o maka ambe, “Fruto do Espírito de Deus” ni diambu exi, “Listado Por Aspecto” mu divulu, Índice das Publicações da Torre de Vigia, mu phutu.
O Kuila ua Tendela o Jipondo Jiji?
• Ihi i bhanga o nzumbi ikôla ku muenhu uetu?
• Jebhi o ji pondo jiuana ji tu bhangesa ku xikina ku tuendesa ku nzumbi ia Nzambi?
• Ihi i tua tokala o ku bhanga phala ku tuendesa ku nzumbi ikôla?
[Ibhuidisu ia ku dilonga]
[Foto ku mbandu 17]
O nzumbi ia Nzambi ia kuatekesa Jezú
[Foto ku mbandu 19]
O nzumbi ia Nzambi i kuatekesa o muthu ku belesela o itendelesu
