1, 2. Kiebhi etu ki tu difu mu ukexilu ua tu sase ku muiji, ni ua tu longo o kidi kia Bibidia?

JIHOVA muéne ua bhange o muiji. (Efe. 3:14, 15) Né muene se tua tokala ku muiji umoxi, kala muthu uala ni ídifua iê. Nange a ku sase ku jitata jê. A mukuá nange kala dingi ni jitata, nange afú mukonda dia uhaxi, dia divuua, mba ima ia mukuá dingi. A mukuá nange kejiia o jitata jâ.

² Etu tua tokala ku muiji ua abhezi a Jihova, maji kala muthu ua di longo o kidi mu ukexilu uê. Nange a ku sase ku jitata ja ku ‘longo o itumu ia Bibidia tundé mu undenge.’ (Mate. 6:6, 7) Mba nange eie uala bhu kaxi ka jimidi ni jimidi ja athu, a di longo o kidi kia Bibidia ni kikuatekesu kia jiselevende ja Jihova.—Loma 10:13-15; 1 Tim. 2:3, 4.

3. Ihi i bhita ni etu enioso?

³ Sumbala a tu sase mu maukexilu ka difu, saí ima i bhita ni etu enioso. Mukonda dia kituxi kia Adá, etu enioso tua lundula o kituxi ni kalunga. (Loma 5:12) Maji né kiki, tu tena kuixana Jihova “Tata ietu,” mukonda tu abhezi a kidi. M’ukulu, o mundu ua Nzambi uo solele, ua tenene ku tumbula o izuelu mu divulu dia Izaia 64:8: “Jihova ei’eie u Tat’etu.” Jezú ua mateka ué o musambu uê ni izuelu: “Tata ietu uene mu diulu, dijina dié a dixile.”—Mat. 6:9.

4, 5. Ihi i tua-nda di longa, phala ku bandekesa o henda ietu kua Tata ietu ia diulu, Jihova?

⁴  Tata ietu ia diulu u langa o muiji uê ua abhezi a kidi, kioso kia bhindamena kikuatekesu. Kála kia tange o mukua Jisálamu, Jihova uambe: “Mukonda [o mubhezi ua kidi] ua ngi naminina ni henda, eme-phe, ngi mu kudila; ngi mu tudika ditala ka mu tena, mukonda ua ng’ijiia o dijina.” (Jisá. 91:14) Jihova Nzambi mu henda iê u bhulula o mundu uê ku jinguma, u a langa ué, phala ka a buike.

⁵ Phala ku bandekesa o henda ietu kua Tata ietu ia diulu Jihova, tu di longe ima itatu: (1) Tata ietu, Mubhani uetu. (2) Jihova Mulangidi uetu. (3) Nzambi Kamba dietu dia beta-o-kota. Kioso ki tua-ndaia ni ku di longa o jipondo jitatu jiji, tu xinganeke kiambote mu ukamba uetu ni Nzambi, tu di longe kiebhi ki tu tena ku bhana kijingu, kua Tata ietu. Xinganeka ué mu mabesá a kanena Jihova kua ió a mu zukama.—Tiia. 4:8.

6. Mu ukexilu uahi mu londekesa Jihova kuila muéne Mubhani ua “ujitu uambote?”

⁶ Dixibulu Tiiaku ua soneka: ‘Kuma o ujitu uambote u tu tambula, ni uhete ua uabha, u tunda ku diulu. Ima ioso íii i tuluka kua Nzambi, Tata ua bhanga o mikengeji ia diulu.’ (Tiia. 1:17) O muenhu, ujitu ua dikota ua tundu kua Jihova. (Jisá. 36:9) Se tu bhakula o muenhu uetu mu ku bhanga o vondadi ia Jihova, tua-nda tambula mabesá avulu lelu, ni muenhu ua kalela-ku ku mundu uobhe. (Jisa. 10:22; 2 Phe. 3:13) Maji kiebhi ki tu tena ku tambula o muenhu iú, se etu enioso tua lundula o kituxi ni kalunga kua Adá?

7. Ihi ia bhange Nzambi phala tu kale ni ukamba uambote ni muéne?

⁷ Mu kidi, Jihova Mubhani ua Dikota, ki tu tena ku tanga o ima ioso ia tu bhana. Mu kifika, mukonda dia mbote iê, muéne u tu bhulula. Mu kidi, etu enioso tua lundula o kituxi kia Adá. (Loma 3:23) Maji mukonda dia henda iê, Jihova ua bhange ioso phala tu kale ni ukamba uambote ni muéne. O poxolo Nzuá ua soneka: “Muene mua tu tukuluila Nzambi o henda iê ia tu kuatela, Nzambi kia katula Mon’ê umoxi-èlele, anga u mu tumikisa mu ngongo, phala etu ni tu mone muenhu kua muène. Muenhumu mua kala o henda, mu kuila: Etu ki etu tua zola Nzambi, maji muène-ku ua tu zola, iú ua tumikisa Mon’ê mu kukala kiluuluilu kia ku tu lolokesa o ituxi ietu.”—1 Nzu. 4:9, 10.

8, 9. Kiebhi Jihova kia londekesa kuila muéne Mubhani ua Dikota mu izuua ia Mbalahamu ni Izake? (Tala o foto ia dianga.)

⁸ Kua bhitile kizulukutu ku muenhu ua Mbalahamu, ku hama 19, ande dia Jezú ku mu vuala, kia londekesa kuila Jihova ueji bhana o muenhu ua kalelaku ku athu oso a mu belesela. O divulu dia Jihebeleu 11:17-19, dizuela: “Kiejila mu kuxikana, Mbalahamu kia mu lola, anga u bhakula Izake kala sata. Muéne Mbalahamu a mu bhele o polomesa kuala Nzambi, ia ku di sokolola ndumba ia miji, sumbala kiene, muène ua bhakuile mon’ê umoxi-eléle mu ku mu vuala. Nzambi ua mu ambelele uixi: Mua Izake mua kà sokoloka miji ia ndumba, i kala mu dijina diê. Mbalahamu kia mu tetulukila kuila Nzambi ua soko-bho kubheka dingi Izake ku muenhu, né ku’alunga ku aii, o ki kia bhiti kifua Mbalahamu ua tambula muene mon’ê Izake ku’alunga.” Kála kia bhangele Mbalahamu ua mesenene ku bhana mon’ê, Jihova ua bhana Mon’ê Jezú Kristu phala ku bhulula o mundu.—Tanga Nzuá 3:16, 36.

⁹ Xinganeka kiebhi kia divu Izake mu kuijiia kuila keji mu jibha dingi! Sé phata, muéne ua sangulukile, mu ku mona kuila Jihova ua bhanene mbudi phala ku i satela bhu kididi kiê. (Dim. 22:10-13) Mukonda dia kiki, o kididi kieniókio a kixana “Jihova-jileh,” mu ku ki lombolola  edi ‘Jihova Muéne Ua-nda Bhana.’—Dim. 22:14.

10, 11. A nanhi a dianga ku bhanga ‘o kikalakalu kia ku bhangesa kuila akuâ uâ a bhiluka makamba a Kristu,’ ni kiebhi kia bhange o kikalakalu kiki?

¹⁰ Kioso ki tu xinganeka mu ima ioso ia bhange Jihova phala etu, tu mona kuila sé o sata ia kukula kua Jezú, ki tueji tena ku kala makamba a Nzambi. Phaulu ua soneka: ‘Mukonda tua k’ijiia kuila muthu umoxi ua fuile bhu kididi kia athu ene oso, mu kiki, athu ene oso a tambula mbandu mu kufuá kuê. O muéne ua fuile bhu kididi kia athu ene oso, phala oso ala ku muenhu, ki ki kale ene dingi a di vu, maji ua a vu muéne ua a fuile bhu kididi, iú ua fukunuka.’—2 Kol. 5:14, 15.

¹¹ Mukonda o Jikidistá ku hama ia dianga a zolele Nzambi, ni kuila a bhanene valolo iavulu ku ujitu ua ku mu sidivila, ni henda ioso ene a xikina ‘o kikalakalu kia ku bhangesa kuila akuâ uâ, a bhiluka makamba a Kristu.’ O kikalakalu kiki, kia lungu ni ku boka o njimbu, kieji bhangesa o athu ku kala ku paze ni Nzambi, ku kala makamba mê, ni ku kituka an’a a Nzambi ku diulu. Lelu, o jiselevende ja Jihova a a undu, a bhanga ué o kikalakalu kiki. Ene a sidivila kala akunji a Nzambi ni a Kristu. O kikalakalu kiâ kia ku boka, ki bhangesa o athu a lenduka ku zukama kua Jihova ni ku kituka jiselevende jê.—Tanga 2 Kolindo 5:18-20; Nzuá 6:44; Ika. 13:48.

12, 13. Kiebhi ki tu tena kulondekesa kuila tu sakidila o ima ioso iene mu tu bhana Jihova?

¹² Mukonda o jimbudi ja mukuá ala ni kisakidilu mu kuijiia kuila Jihova muene o Mubhani ua Dikota, ene a kalakala kumoxi ni Jikidistá a a undu, mu ku boka o njimbu iambote. Kioso ki tuia mu sidivisu ia ku boka, tuambata o Bibidia, mukonda ujitu ua dikota ué ua tu bhana Nzambi. (2 Tim. 3:16, 17) Kioso ki tu longa o Bibidia ni uhete mu sidivisu ia ku boka, tu kuatekesa akuetu ku tambula o muenhu ua kalelaku. Jihova u tu bhana ué o nzumbi iê ikôla. Kala muthu mudietu u dielela o nzumbi ikôla, phala ku tu kuatekesa mu sidivisu ietu ia ku boka. (Zak. 4:6; Luka 11:13) Kála kilondekesa o divulu Anuário das Testemunhas de Jeová, o sidivisu ietu ia ku boka i kuatekesa athu avulu kuijiia o kidi. Ujitu ua dikota ku kuatekesa o kikalakalu kiki ni ku bhana kijingu kua Tata ietu, o Mubhani uetu!

¹³ Mu kuijiia kuila Nzambi ua bhange ima iavulu phala etu, tua tokala ku di ebhuidisa: ‘O kuila nga mu bhanga ioso mu sidivisu ia ku boka phala kulondekesa kua Jihova kuila, nga sakidila o ima ioso ia ngi bhana? Kiebhi ki ngi tena ku kala ni uhete mu ku boka?’ Se tu sakidila o ima ioso i tu bhana Nzambi, tua-nda tá o Utuminu ua Nzambi ku pholo ku muenhu uetu. Se tu bhanga kiki, Jihova ua-nda tu bhana o ima ioso i tua bhindamena. (Mat. 6:25-33) Mukonda Jihova mukua henda, etu tua mesena ku bhanga ioso i tua tena phala ku mu sangulukisa o muxima.—Jisa. 27:11.

14. Kiebhi Jihova kiene mu Bhulula o mundu uê?

¹⁴ Davidi uembi: “Eme-phe, bhu ngal’abha, ngi ngadiama, nga tâte; maji o Ngana-phe ua ngi bhake muxima ni ku ngi sasa; eie ngó u mukuatekexi uami, u mubhuludi uami.” (Jisá. 40:17) Jihova uexile Mubhuludi ua mundu uê mu veji javulu, benge-benge kioso kia a zukutisile kiavulu ku jinguma jâ. Tu sakidila kiavulu, mukonda ithangana ioso Jihova u tu bhana i tua bhindamena phala ku kolokota mu ufiiele uetu, kioso ki tu dibhana ni ibhidi.

15. Bhana phangu i londekesa kiebhi o tata ia henda kia lange o mon’ê.

¹⁵ O tata ia henda ka bhana ngó ku  tuana tuê o ima ia bhindamena, maji u a langa ué. Muéne ueji ku a bhulula ni lusolo, se kua monekene kiluezu. Saí phange u di lembalala kiebhi tat’ê kia mu bhulula, kioso kiexile hanji mon’a ndenge. Muéne ni tat’ê akexile mu tunda mu sidivisu ia ku boka, kioso kia sange o honga. Mu kamene kenióko, kua nokene kiavulu, mu kiki o honga iezalele ni menha. Phala ku tuka o honga, ene a tokalele ku tuka tundé ku ditadi dionene dia kexile ku mbandu iâ, katé ku ditadi dia mukuá dia kexile ku mbandu ia mukuá. O mona ndenge ua tuamenene, maji mu ku tuka, ua xangumuka iú ua lauka mu menha, anga uia koxi uíza kulu dia menha, mu veji jiiadi. O kamona koko, ka sakidila kiavulu kioso o tat’ê kia mu sungu ni maku, anga u mu bhulula ku kalunga. Kiene kimoxi ué, Tata ietu ia diulu u tu langa mu iluezu ku mundu iú ua iibha, ni kua ngana ia mundu iú, Satanaji. Mu kidi, Jihova muéne o Mubhuludi ua dikota.—Mat. 6:13; 1 Nzu. 5:19.

16, 17. Kiebhi Jihova kia kuatekesa ni ku langa akua Izalaiele, kioso kia lua itá ni akua Amaleke?

¹⁶ Ni henda ioso, Jihova ua lange o mundu uê ku muvu ua 1513 A.K.K. Muéne ua bhuluile kiá akua Izalaiele ku ubhika, ua a langele ué kioso kia zauka o Kalunga ka Kusuka. Kioso kia kexile mu kuenda mu kikangalakata phala kuia ku Mulundu ua Sinai, o akua Izalaiele a bhixila ku Lefidimi.

¹⁷ Mukonda dia kikanenu mu divulu dia Dimatekenu 3:15, Satanaji nange ua thandanganhele mu ku sota ndunge iéngi phala ku zukutisa akua Izalaiele, exile kala athu ka kexile ni mulangidi. Muéne ua bhange kiki bhu kaxi ka akua Amaleke, exile jinguma ja mundu ua Nzambi. (Dia. 24:20) Xinganeka ia bhange Jihova bhu kaxi ka kiuana kia mala a fiiele —Josuué, Mozé, Alá ni Hule. Kioso Josuué ni makuenz’iê akexile mu luua ita ni akua Amaleke, Mozé, ni Alá, ni Hule a kexile ku mulundu bhua zukamene. Kioso Mozé kia kexile mu leka o lukuaku, o akua Izalaiele akexile kota ku nguzu. Kioso muéne kia bhuila, Alá ni Hule akexile ku mu kuatekesa ku leka o lukuaku. Mukonda Jihova ua kexile mu ku a kuatekesa ni ku a langa, ‘Josuué anga u buikisa Amaleke ni mundu uê.’ (Mak. 17:8-13) Mozé anga u tunga-bhu kalatódio, u ka luka o dijina dia “Jihova-nisi.” Kifua uambe, uixi: “Jihova muene o dibandela diami.”—Tanga Makatukilu 17:14, 15; Tala ku luiji.

18, 19. Kiebhi Nzambi kia langa o jiselevende jê mu izuua ietu?

¹⁸ Jihova u langa ió a mu zolo, ni ió a mu belesela. Kála o akua Izalaiele mu Lefidimi, tu dielela kua Nzambi phala ku tu langa ku jinguma jetu. Tundé ukulu, Jihova uene mu langa o kilunga kiê kioso mu ixi, ka fulu o ku tu bhulula ku ibhetu ioso ia Diabhu. Xinganeka kiebhi Jihova kia bhulula o jiphange jetu a a zukutisile mukonda dia ku dituna kuia mu ita. Mu kifika, kiki kia bhitile mu ixi ia Alemanha ni jixi ja mukuá ku utuminu ua ji Nazi, ku muvu ua 1930, ndu ku dimatekenu dia muvu ua 1940. O ku tanga ni ku xinganeka mu misoso i tanga o divulu Anuário, ia lungu ni kiebhi Nzambi kia lange o jiselevende jê mu ithangana ia kizukutisu, kua-nda suínisa o kidielelu kietu kua Jihova, o Dilengelu dietu.Jisá. 91:2.

¹⁹ Jihova u tu langa ué mu ku tu bhana itendelesu bhu kaxi ka kilunga kiê ni madivulu mê. Xinganeka kiebhi o itendelesu íii ia mu tu langa lelu. O mundu iú ua suína mu ku bhana valolo ku undumbu, ku uhôlua ni ufusa. Maji Jihova ua tu bhana itendelesu ni kikuatekesu ki tu langa mu ima i tena ku zanga o ukamba uetu ni muéne. Mu kifika, tua tambula itendelesu kua Tata ietu ia diulu, i tu kuatekesa ku di langa mu kibhetu kia ku kala ni ukamba ni athu mu internete. *—1 Kol. 15:33.

20. Kikuatekesu, mba itendelesu iahi i tu tambula mu kilunga?

²⁰ Kiebhi ki tu tena kulondekesa kuila tu “maxibulu a Jihova?” Mu ku belesela o itumu iê. (Iza. 54:13) O ilunga ietu, ididi ia kondama mu tu tena ku tambula itendelesu, mba mua tena ku tu langa. Mu ilunga, o tufunga a tu bhana itendelesu ia Bibidia. (Nga. 6:1) Jihova u tu langa bhu kaxi ka ‘athu a a uanena maujitu.’ (Efe. 4:7, 8) Ihi i tua tokala ku bhanga se o tufunga a tu bhana itendelesu? Tua tokala ku belesela. Se tu bhanga kiki, Jihova ua-nda tu besoala.—Jihe. 13:17.

21. (a) Ihi i tua tokala o ku bhanga? (b) Ihi i tua-nda di longa mu milongi ia-nda kaiela?

²¹ Tu dielele ku nzumbi ikôla phala ku tu kuatekesa, tu xikine ué o itendelesu ia Tata ietu ia diulu. Tua tokala ué ku xinganeka mu ima ia bhange Jezú Kristu, ni ku bhanga ioso phala ku kaiela o phangu iê. Jezú ua tambula dibesá dia dikota, mukonda ua tumaka katé mu kufuá. (Fil. 2:5-11) Tua-nda tambula ué mabesá se tu dielela kua Jihova ni muxima uoso. (Jisa. 3:5, 6) Tu dielele kua Jihova, mukonda muene o Mubhani, o Mulangidi ua dikota. Ujitu ua dikota ku mu sidivila, mukonda kiki, ki tu bhekela kisangusangu kia dikota! Kiebhi Jihova kia kala Kamba dietu dia beta-o-kota? O henda ietu kua muéne ia-nda dibandekesa dingi, kioso ki tua-nda di longa o kitambuijilu kia kibhuidisu kiki mu milongi ia-nda kaiela.