1-2. Kidyelelu kyahi kyala nakyu o abhezi a Jihova?

KIMA kyambote kukala ni kidyelelu. Sayi athu ala ni kidyelelu kyakukala ni ukaza wasanguluka, kusasa kyambote otwana, ni kudisanza ku uhaxi wabhonzo. Etu tu Jikidistá twamesena we o ima yiyi, maji okidyelelu kitwalanakyu kyabetakota. Twala ni kidyelelu kyakukala ni mwenyu wakalelaku ni kudisanga dingi ni makamba metu ni jindandu jetu jafu kyá.

² Opoxolo Phawulu wambe: “Ngala we ni kudyelela . . . kuma hádya kukala difukunukinu dya athu ayuka ni athu abhukumuka.” (Ika. 24:15) Poxolo Phawulu kimwene watwama kuzwela kwila waxikinine kudifukunukinu. Jobe wexile we ni kidyelelu kyadifukunukinu. Mwene wambe kwila Nzambi weji mulembalala ni kumubheka dingi kumwenyu.—Jobe 14:7-10, 12-15.

3. Mukonda dyahi kima kyambote kudilonga o 1 Kolindu 15?

³ “O difukunukinu dya madifundu,” mbandu ya “disesa” mba “milongi yadyanga” ya ilongesu ya Jikidistá. (Jihe. 6:1, 2) Mumukanda wadyanga ku akwa Kolindu kibatulu 15, poxolo Phawulu wazwela yalungu ni difukunukinu. O ima yasoneka mwene yaswinisa kyavulu o Jikidistá mu izuwa yenyóyo. Némwene se uxikina kudifukunukinu mumivu yavulu, okibatulu kiki kyandakukwatekesa kukolesa dingi okidyelelu kyê.

4. Ihi itubhangesa kudyelela kudifukunukinu?

⁴ Odifukunukinu dya Jezú ditudyelelesa ni kidi kyoso kwila némwene se ndandu yetu, dikamba, mba etu mwene se tufwa, kwandakala difukunukinu. “Onjimbu yambote” yexile mubokela poxolo Phawulu ku akwa Kolindu yalungile we ni difukunukinu dya Jezú. (1 Kol. 15:1, 2) Mwene wambe we kwila, se Kidistá kaxikina kudifukunukinu, okixikanu kyê kikyala ni valolo.  (1 Kol. 15:17) Kuxikina kwila Jezú amufukununa kyene kitubhangesa kuxikina kwila o athu amukwá andakwafukununa we.

5-6. O izwelu mu 1 Kolindu 15:3, 4 ilombolola ihi phal’etu?

⁵ Mujivelusu jadyanga jakibatulu 15, poxolo Phawulu watumbula ima itatu, ene enya: (1) “Kidistu wafu mukonda dya ituxi yetu.” (2) “Amufundile.” (3)  “Mu kizuwa kyakatatu amufukununa kala kyosoneke mu Mikanda Ikôla.”—Tanga 1 Kolindu 15:3, 4.

⁶ Ihi ilombolola okufwa, kufunda ni difukunukinu dya Jezú phala etu? Polofeta Izaya wambe kwila, o Mexiya eji mu “batula mungongo anga mbila ye a ita bwamoxi ni ingumba mba ifumbe.” Maji kikyene ngó kyazwela Izaya, mwene wabandekesa kwila, o Mexia mwene weji ditwika “o ituxi ya athu avulu.” Jezú wabhange kiki, mukubhana omwenyu we phala kukula o athu. (Iza. 53:8, 9, 12; Mat. 20:28; Loma 5:8) Kyenyiki, okufwa, okufunda ni difukunukinu dya Jezú, dituxikinisa kwila, tutena kubhuluka kukituxi ni kalunga ni kwila ojindandu jetu ni makamba afu kyá, andavutuka kumwenyu.

7-8. Ihi itubhangesa kuxikina kwila, Jezú amufukununa?

⁷ Phala kudyelela kwila kwandakala difukunukinu, twabhingi kuxikina kwila Jezú amufukununa. Mukonda dyahi tutena kuxikina kwila Jihova wafukununa mwene Jezú?

⁸ Kyoso Jezú kyamufukununa, mukubhita kithangana athu avulu amumono anga atangela we akwa. (1 Kol. 15:5-7) Poxolo Phawulu wambe kwila omuthu wadyanga okubhana umbangi, Phetele amwijiya we mudijina dya Sefa. Kibuka kyamaxibulu azwela we kwila Phetele wamwene Jezú. (Luka 24:33, 34) Mukusuluka poxolo Phawulu wambe kwila, o “kwinyi ni kiyadi” kya jipoxolo amono we Jezú wafukunuka. Kupholo Kidistu “watukulukila hama jitanu ja axikini bhwamoxi.” Nange kiki kyabhiti mukyônge mu Ngalileya, kyoso omaxibulu kyasangulukile kyavulu, kala kilondekesa odivulu dya Matesu 28:16-20. Jezú “watukulukila we Tiyaku.” O Tiyaku mwenyu, nange phange a Jezú, kudimatekenu kaxikinine kwila Jezú mwene wexile o Mexiya. (Nzwá 7:5) Kyoso kyamono kwila Jezú amufukununa, Tiyaku waxikina kwila Jezú wexile mwene Mexiya. Kyoso Phawulu kyasoneka omukanda yu kumuvu wa 55 K.K., athu avulu amwene Jezú akexile hanji kumwenyu. Mukiki se sayi muthu wexile ni jiphata, mwene wejitena kwa ebhwidisa.

9. Kala kilondekesa Ikalakalu 9:3-5, ihi yabhiti ni Phawulu ilondekesa kwila odifukunukinu dya Jezú dyakidi mwene?

⁹ Mukubhita thembu, Jezú watukulukila Phawulu. (1 Kol. 15:8) Kyoso Phawulu mba Sawulu kyexile muya ku Damasku mwene wevu odizwí dya Jezú, anga mukisumwa, wamono Jezú kudyulu ni kubhenya kwavulu. (Tanga Ikalakalu 9:3-5.) O ima yoso yiyi yabhiti ni Phawulu ilondekesa kwila odifukunukinu dya Jezú dyakidi mwene.—Ika. 26:12-15.

10. Okixikanu kya Phawulu kudifukunukinu dya Jezú kyamuswinisa kubhanga ihi?

¹⁰ Phala amoxi, o umbangi wabhana poxolo Phawulu wexile ni valolo, mukonda mwene wexile muzukutisa o Jikidistá. Maji kyoso Phawulu kyaxikina kwila Jezú amufukununa, mwene wabhange nguzu yavulu phala kukwatekesa akwâ kuxikina okidi kiki. Phala kutula onjimbu ya kwila Jezú wafu, ya amufukununa, Phawulu wabhiti mu ibhidi kala yakumubeta, kumuta mukaleya ni yakuboba ni naviyu mumusanza wakalunga. (1 Kol. 15:9-11; 2 Kol. 11:23-27) Kuma poxolo Phawulu waxikinine ni kidi kyoso kwila Jezú amufukununa, mwene wexile polondo phala kufwa mukonda  dyakuzokela okidi kiki. Séphata, o umbangi wabhana o Jikidistá jadyanga, ukolesa okidyelelu kyetu kya kwila Jezú amufukununa, ubandekesa we okixikanu kyetu kudifukunukinu dyandabhita kuhádya.

11. Nange ihi yabhangesa akwa Kolindu kukamba kuxikina kudifukunukinu?

¹¹ Sayi athu mumbanza ya Kolindu, kejidile okidi kyalungu ni difukunukinu. Ene exile muzwela: “Kikwene kufukunuka mwalunga.” Mukonda dyahi? (1 Kol. 15:12) Mukonda ojingijiye mumbanza ya Atena exile mulokalala yó axikinine kwila Jezú amufukununa. O ukexilu yu wakuxinganeka nange wafwinyisa athu avulu mumbanza ya Kolindu. (Ika. 17:18, 31, 32) Amukwá nange kaxikinine kwila odifukunukinu dyexile mwene dyakidi. Ene akexile muzwela kwila, ande dya muthu kukituka Kidistá, ufwa mukonda dya kituxi. Maji kyoso kyakituka Kidistá, kifwa wavutuka dingi kumwenyu. Kuma kaxikinine kwila odifukunukinu kidi, okixikanu kyâ, kikyexile ni valolo. Mukiki, se Nzambi kafukunwine Jezú, kikweji kala sata yakukula, etu enyoso tweji suluka mukituxi. Woso kaxikinine kudifukunukinu kejitena kukala ni kidyelelu kyakidi.—1 Kol. 15:13-19; Jihe. 9:12, 14.

12. Kala kilondekesa omukanda wa 1 Phetele 3:18, 22, mukonda dyahi odifukunukinu dya Jezú kidyadifu ni dyabhitile ni athu engi?

¹² Phawulu wejidile ni kidi kyoso kwila, “Kidistu wafukunuka mwene mwalunga.” Odifukunukinu dya Jezú dyabetelekota odya athu akamukwa ndenge, mukonda oyó a afukunwine afu dingi. Poxolo Phawulu wambe kwila, Jezú mwene “o muthu a dyangele kumufukununa mw’alunga.” Mu ukexilu webhi Jezú mwene wadyanga? Mwene atwama kumufukununa kala muthu munzumbi, mwene we watwama kubanda kudyulu.—1 Kol. 15:20; Ika. 26:23; Tanga 1 Phetele 3:18, 22.

13. Ihi yambe Phawulu yalungu ni Adá ni Jezú?

¹³ Mu ukexilu webhi okufwa kwa muthu umoxi kwandabhulula omwenyu wamazunda a athu? Poxolo Phawulu watambwijila kyambote okibhwidisu kiki. Mwene wajimbulula se ihi yatubhekela Adá ni ihi yabhange Jezú phala etu. Yalungu ni Adá poxolo Phawulu wasoneka: ‘Okalunga kejila ku muthu umoxi.’ Kyoso Adá kyate okituxi, mwene wadibhekela kalunga, mwene wabhekela we okalunga kutwana twê. Katé lelu twene mutala hadi mukonda dya kubhukumuka kwa Adá. Maji mukonda dya Nzambi kufukununa monê, twala ni kidyelelu kyambote phala o hádya! Phawulu wajimbulula: “Ku muthu umoxi we kwene kwejila o kufukunuka kwa madifundu.” Omuthu yú Jezú. Mwene wambe dingi: “Wila ene oso kyafwila mwa Adá kyene we kyaphaphumukina ene oso mwa Kidistu.”—1 Kol. 15:21, 22.

14. Okwila Adá andamufukununa? Jimbulula.

¹⁴ Ihi yamesenene kuzwela Phawulu kyoso kyambe kwila “ene oso kyafwila mwa Adá?” Phawulu wexile muzwela yalungu ni mwiji wa Adá. Kuma ene alundula okituxi ni kukamba o kuyuka, ene ejifwa. (Loma 5:12) Adá kandabhanga mbandu ya yó anda kwa ‘phaphumuna mba kwafukununa’ mukonda mwene wexile muthu wayuka, maji muvondadi ye wasolo kubhukumukina Nzambi. Kyenyiki, mwene kakatula mbote musata yakukula ya Kidistu. Oyabhiti ni Adá yene we yandabhita ni yó andakwafundisa kwala “Mona muthu” kala “jihombo,” kifwa andakwabwikisa katé kuhádya ni hádya.—Mat. 25:31-33, 46; Jihe. 5:9.

15. O athu oso andatambula omwenyu, ananyi?

 ¹⁵ Poxolo Phawulu wambe, wixi: “Mwa Kidistu enyoso andatambula o mwenyu.” (1 Kol. 15:22) Phawulu wasoneka o mukanda yú phala o Jikidistá a a undu atungile mumbanza ya Kolindu, exile ni kidyelelu kya kwafukununa phala kuya kudyulu. O Jikidistá jiji ‘a asolo phala akale kumoxi ni Kidistu Jezú, yu wa exana phala kukala mundu wê.’ Phawulu wazwela we yalungu ni yó “oso kyá afwa jinga mu kuxikana Kidistu.” (1 Kol. 1:2; 15:18; 2 Kol. 5:17) Mumukanda wamukwa, Phawulu wasoneka kwila, ‘oso afu kala Jezú, andakwafununa we kala kyamufukununa mwene.’ (Loma 6:3-5) Jezú amufukununa kala muthu munzumbi, yu wayi kudyulu. Kyene we kyandabhita ni athu oso ‘ala kumoxi ni Kidistu’ mba o Jikidistá joso a a undu ni nzumbi ikôla.

16. Ihi yamesenene kulombolola Phawulu kyoso kyexana Jezú kala “o mbutu yadyanga?”

¹⁶ Poxolo Phawulu wasoneka we kwila, Kidistu ‘mwene o muthu wadyangela kufukunuka mwalunga.’ Twejiya kwila Lazalu amufukununa phala kukala dingi ni mwenyu mu ixi, maji Jezú mwene adyangele kumufukununa kala muthu mu nzumbi ni kutambula omwenyu wakalelaku. Mwene amusokesa ni “jimbutu jadyanga” jexile mubhongolola akwa Izalayele phala kujisatela kwa Nzambi. Kyenyiki Phawulu mukwixana Jezú kala o “mbutu yadyanga,” mwene wamesenene kwijidisa kwila, sayi athu eji kwafukununa we phala kukala ni mwenyu kudyulu. O Jipoxolo ni athu amukwa exile “kumoxi ni Kidistu” ejikwafukununa we phala kukala kudyulu, kala kyabhitile ni Jezú.

17. Thembu kuxi ejifukununa yó ‘atokala kwa Kidistu’ phala kukala ni mwenyu kudyulu?

¹⁷ Kyoso Phawulu kyasonekena akwa Kolindu, odifukunukinu dya yó ‘atokalele kwa Kidistu,’ kidyamatekene luwa. Phawulu walondekesa kwila, o ima yiyi, yejibhita ngó kuhádya. Mwene wambe: “Ene oso mu umoxi-umoxi: Kidistu mwene wadyangela kwa ene oso, hé kukayela oso akwa Kidistu, mwène hinu kyà kèza.” (1 Kol. 15:23; 1 Tes. 4:15, 16) Lelu twatungu mukithangana kiki, akixana kutukuluka kwa Kidistu. Ojipoxolo ni Jikidistá jamukwa a a undu abhingile kukinga katé mukithangana kiki kyakutukuluka kwa Kidistu, phala ‘kwafukununa kala kyafukununa Jezú,’ n’akale ni mwenyu kudyulu.

18. Ihi itukwatekesa kumona kwila kuhádya kwandakala dingi difukunukinu dyamukwá? Kala kilondekesa o 1 Kolindu 15:24-26, ihi yandabhita kudyulu?

¹⁸ Ihi yandabhita ni yó kala ni kidyelelu kyakutunga  ni Kidistu kudyulu? Ene we ala ni kidyelelu kya difukunukinu. O Bibidya yamba kwila, poxolo Phawulu ni yó andaya kudyulu, andakwafukununa “mwaxaxi ka madifundu kudifukunukinu dya dyanga.” (Fil. 3:11) Ovelusu yiyi yalondekesa kwila, kuhádya kwejikala dingi difukunukinu dyamukwá. Kiki kyadifu ni yazwela Jobe yejibhita ni mwene kuhádya. Kiki kyene kyexile mudyelela Jobe. (Jobe 14:15) ‘Oso atokala kwa Kidistu, mukithangana kyakutukuluka kwê,’ ene andakala kudyulu kumoxi ni Jezú. Kyoso mwene kyandabwika ojinguvulu joso ni mawungana oso ala ni kutena. Kate mwene onguma isukidilaku, okalunga, andakabhwisaku. O afukununa phala kuya kudyulu, kandafwa dingi. Maji ihi itwamba yalungu ni athu akamukwá.—Tanga 1 Kolindu 15:24-26.

19. Kidyelelu kyahi kyalanakyu o athu andatunga mu ixi?

¹⁹ Kidyelelu kyahi kyala nakyu yó andatunga mu ixi? Okidyelelu kyasoneka poxolo Phawulu. Mwene wasoneka: “Ngala we ni kudyelela . . . kuma hádya kukala difukunukinu dya athu ayuka ni athu abhukumuka.” (Ika. 24:15) Kuma kudyulu kikwandabokona muthu wabhukumuka, o izwelu yiyi ilondekesa kwila kuhádya kwandakala difukunukinu mu ixi.

20. Kyebhi omilongi yiyi yakolesa okidyelelu kyê kudifukunukinu?

²⁰ Séphata, “kuhádya kwandakala difukunukinu!” Oyó andakwafukununa phala kukala ni mwenyu mu ixi, andakala ni mwenyu wakalelaku. Eye utena kudyelela mukikanenu kiki. Okidyelelu kiki, kitena kukuximbakatesa kyoso ki uxinganeka kujindandu ni makamba mê afu kyá. Ene andakwafukununa mukithagnana kyoso Kidistu ni athu yó ala ku ungana aká “tumina mu midi yamivu.” (Dij. 20:6) Eye utena kudyelela kwila se ufwa andi dya kithangana kiki, kuhádya andakufukununa. Okidyelelu kyetu “ki kitukwatesa jisonyi.” (Loma 5:5) Okidyelelu kiki, kitena kukuswinisa lelu ni kubandekesa okusanguluka kwê musidivisu ya Nzambi. Mumilongi yakayela, twandadilonga ombote yamukwa itukatula mu 1 Kolindu kibatulu 15.