ភាគ២
មនុស្សបាត់បង់សិទ្ធិរស់ក្នុងសួនឧទ្យាន
ទេវតាបះបោរមួយរូបបញ្ចុះបញ្ចូលបុរសស្ដ្រីទី១ អាដាមនិងអេវ៉ាឲ្យបដិសេធការគ្រប់គ្រងរបស់ព្រះ។ ជាលទ្ធផល ភាពខុសឆ្គងនិងសេចក្ដីស្លាប់ចូលមកពិភពលោក
យូរយារមុនព្រះបង្កើតមនុស្សជាតិ នោះលោកបានបង្កើតបុគ្គលវិញ្ញាណដែលយើងមើលមិនឃើញ ពោលគឺទេវតា។ នៅសួនអេដែន ទេវតាបះបោរមួយរូប ដែលក្រោយមកបានត្រូវហៅថាសាថាន ខំបោកបញ្ឆោតអេវ៉ាឲ្យបរិភោគផ្លែពីដើមដែលព្រះបានហាមពួកគាត់មិនឲ្យបរិភោគ។
ដោយប្រើសត្វពស់ឲ្យធ្វើហាក់ដូចជាកំពុងនិយាយ សាថាននិយាយបញ្ឆិតបញ្ឆៀងថា ព្រះបានទុកអ្វីមួយដែលមានប្រយោជន៍ មិនព្រមឲ្យដល់ស្ដ្រីនោះនិងប្ដីនាង។ ទេវតានោះប្រាប់អេវ៉ាថា នាងនិងប្ដីមិនស្លាប់ទេ បើពួកគាត់បរិភោគពីផ្លែដែលព្រះហាមនោះ។ ដូច្នេះ សាថានបានចោទព្រះថាកុហកមនុស្សដែលជាកូនរបស់លោក។ សាថានបានបោកបញ្ឆោតឲ្យគិតថាការមិនស្តាប់បង្គាប់ព្រះ ជាអ្វីដែលគួរឲ្យចង់ធ្វើដើម្បីឲ្យមានចំណេះពិសេសនិងសេរីភាព។ ប៉ុន្ដែ នេះជាពាក្យកុហកទាំងស្រុង ជាការកុហកលើកដំបូងនៅផែនដី។ តាមពិត ចំណុចដែលចង់ជំទាស់គឺទាក់ទងនឹងការគ្រប់គ្រងរបស់ព្រះ ពោលគឺតើព្រះមានសិទ្ធិគ្រប់គ្រងឬទេ ហើយតើលោកគ្រប់គ្រងតាមរបៀបសុចរិត និងដើម្បីមានប្រយោជន៍ច្រើនបំផុតដល់រាស្ដ្ររបស់លោកឬទេ។
អេវ៉ាបានជឿពាក្យកុហករបស់សាថាន។ នាងចាប់មានចិត្ដប្រាថ្នាចង់បានផ្លែនោះ រួចមកនាងបរិភោគផ្លែនោះខ្លះ។ ក្រោយមក នាងក៏ឲ្យប្ដីនាងបរិភោគខ្លះដែរ។ ដូច្នេះ ពួកគាត់ក្លាយទៅជាអ្នកប្រព្រឹត្ដអំពើខុសឆ្គង។ ការប្រព្រឹត្ដដែលហាក់ដូចជាតូចតាចនេះ តាមពិតគឺជាការសម្ដែងនូវការបះបោរប្រឆាំង។ ដោយសម្រេចចិត្ដមិនធ្វើតាមបញ្ញត្ដិព្រះ អាដាមនិងអេវ៉ា បានបដិសេធការគ្រប់គ្រងរបស់ព្រះដែលជាអ្នកបង្កើត ដែលបានឲ្យពួកគាត់នូវអ្វីៗទាំងអស់ រួមទាំងជីវិតល្អឥតខ្ចោះដែរ។
ពូជនោះ«នឹងកិនក្បាលឯង ហើយឯងនឹងចឹកកែងជើងគេ»។—លោកុប្បត្ដិ ៣:១៥
ព្រះបានវិនិច្ឆ័យទោសពួកបះបោរទាំងនេះ។ លោកបានទាយទុកជាមុនអំពីពូជសន្យា ឬអ្នកសង្គ្រោះដែលនឹងបំផ្លាញចោលសាថាន ដែលតំណាងដោយសត្វពស់។ ព្រះបានពន្យារពេលប្រហារជីវិតអាដាមនិងអេវ៉ាមួយរយៈ។ ដោយធ្វើដូច្នេះ លោកបង្ហាញសេចក្ដីមេត្ដាករុណាដល់កូនចៅដែលមិនទាន់កើតរបស់ពួកគាត់។ កូនចៅទាំងនោះមានមូលដ្ឋានសម្រាប់សេចក្ដីសង្ឃឹម ពីព្រោះបុគ្គលដែលព្រះនឹងចាត់មកនោះនឹងបំបាត់លទ្ធផលគួរឲ្យខ្លោចផ្សាផ្សេងៗដែលបណ្ដាលមកពីការបះបោរនៅសួនអេដែន។ តើគោលបំណងរបស់ព្រះស្ដីអំពីការចាត់អ្នកសង្គ្រោះនោះនឹងត្រូវសម្រេចតាមរបៀបណា? ហើយតើបុគ្គលដែលនឹងត្រូវចាត់នោះជានរណា? ចម្លើយចំពោះសំណួរទាំងនោះបានត្រូវបើកបង្ហាញជាបណ្ដើរៗកាលដែលសៀវភៅគម្ពីរបន្ដបន្ទាប់ពីនោះបានត្រូវសរសេរ។
ព្រះបានបណ្ដេញអាដាមនិងអេវ៉ាចេញពីសួនឧទ្យាន។ ពួកគាត់នឹងត្រូវធ្វើការយ៉ាងនឿយហត់ដើម្បីចិញ្ចឹមជីវិតដោយធ្វើស្រែចម្ការនៅក្រៅសួនឧទ្យាននោះ។ រួចមកអេវ៉ាមានផ្ទៃពោះក៏សម្រាលកូនឈ្មោះកាអ៊ីន ជាកូនទី១របស់អាដាមនិងអេវ៉ា។ គូស្វាមីភរិយានេះមានកូនប្រុសស្រីឯទៀត រួមទាំងអេបិល និងសេតដែលជាបុព្វបុរសរបស់ណូអេ។
—មានមូលដ្ឋានលើសៀវភៅលោកុប្បត្ដិ ជំពូក៣ដល់ជំពូក៥ ការបើកបង្ហាញ ១២:៩។
