អត្ថបទអំពីក្របទស្សនាវដ្ដី | តើអ្វីជាអំណោយដ៏ល្អបំផុត?
«អំណោយដ៏ល្អបំផុតដែលខ្ញុំបានទទួល»
នេះជាអារម្មណ៍របស់ក្មេងស្រីម្នាក់អាយុ១៣ឆ្នាំពេលដែលនាងបានទទួលសត្វឆ្កែជាអំណោយ។ ស្ដ្រីដែលជាអ្នកជំនួញដ៏ជោគជ័យម្នាក់បាននិយាយថាកុំព្យូទ័រដែលឪពុកនាងបានឲ្យនាងកាលរៀននៅវិទ្យាល័យ គឺជាអំណោយដែលបានផ្លាស់ប្ដូរជីវិតនាង។ ម្យ៉ាងទៀត ប្ដីដែលទើបតែរៀបការម្នាក់គិតថាកាតខួបអាពាហ៍ពិពាហ៍ឆ្នាំដំបូងដែលប្រពន្ធគាត់បានធ្វើដោយផ្ទាល់ដៃ គឺជាអំណោយដ៏ល្អបំផុតដែលគាត់បានទទួល។
ជារៀងរាល់ឆ្នាំ មនុស្សជាច្រើនចំណាយពេលនិងកម្លាំងដើម្បីស្វែងរកអំណោយដ៏«ល្អបំផុត»សម្រាប់មិត្ដភក្ដិឬសាច់ញាតិក្នុងឱកាសពិសេសណាមួយ។ មនុស្សភាគច្រើនចង់ឃើញថាអ្នកទទួលអំណោយមានប្រតិកម្មដូចពួកអ្នកដែលបានត្រូវរៀបរាប់នៅដើមអត្ថបទ។ ចុះអ្នកវិញ? តើអ្នកចង់ឲ្យឬទទួលអំណោយដែលពិតជានាំឲ្យរំភើបចិត្ដឬទេ?
យើងអាចមានសេចក្ដីសង្ឃឹមដូច្នេះបាន មិនមែនគ្រាន់តែដោយសារឥទ្ធិពលដែលអំណោយអាចមានទៅលើអ្នកទទួលប៉ុណ្ណោះទេ តែក៏ដោយសារអារម្មណ៍របស់អ្នកដែលឲ្យអំណោយ។ យ៉ាងណាក៏ដោយ គម្ពីរចែងថា៖ «ការឲ្យគេ នោះនឹងផ្ដល់សុភមង្គលច្រើនជាងការទទួល»។ (សកម្មភាព ២០:៣៥) មែនហើយ សុភមង្គលដែលមកពីការឲ្យប្រហែលជាកើនឡើង បើអ្នកទទួលឲ្យតម្លៃយ៉ាងខ្លាំងចំពោះអំណោយ។
ពេលដែលឲ្យអំណោយ តើតាមរបៀបណាអ្នកអាចប្រាកដថា អ្នកផ្ទាល់និងអ្នកទទួលនឹងសប្បាយចិត្ដ? ម្យ៉ាងទៀត បើអ្នកមិនអាចឲ្យអំណោយដ៏«ល្អបំផុត» តើអ្នកអាចធ្វើអ្វីដើម្បីឲ្យអំណោយរបស់អ្នកមានតម្លៃ?