25-زەرتتەۋ ماقالاسى
7-ٵن ەحوبا — ٴبىزدىڭ پانامىز
ەحوبانىڭ «ٴتىرى قۇداي» ەكەنىن ۇمىتپاڭىز
«ەحوبا — ٴتىرى قۇداي!» (ٴزاب. 18:46).
نەگىزگى وي
ٴبىز عيبادات ەتەتىن قۇداي — «ٴتىرى قۇداي». وسىنى ۇمىتپاعانىمىزدىڭ پايداسى زور.
1. بىزگە قيىندىقتارعا ەش بەرىلمەي، ەحوباعا قىزمەت ەتە بەرۋگە نە كومەكتەسەدى؟
كيەلى كىتاپتا ٴبىز ٶمىر ٴسۇرىپ جاتقان ۋاقىت «ەرەكشە قيىن ۋاقىت» ەكەنى ايتىلعان (ٴتىم. 2-ح. 3:1). ەحوبانىڭ حالقى بارلىق ادامداردىڭ باسىنا ٴتۇسىپ جاتقان قيىندىقتاردان بولەك، قۋعىن-سۇرگىنگە، قارسىلىقتارعا كەزىگەدى. سونداي كەزدە بىزگە قيىندىقتارعا ەش بەرىلمەي، ەحوباعا عيبادات ەتە بەرۋگە نە كومەكتەسەدى؟ ەحوبانىڭ «ٴتىرى قۇداي» ەكەنىنە سەنەتىنىمىز (ەرم. 10:10؛ ٴتىم. 2-ح. 1:12).
2. قاي ماعىنادا ەحوبا ٴتىرى قۇداي؟
2 ەحوبا — ٴتىرى تۇلعا، سوندىقتان ول ٶز قىزمەتشىلەرىن قيىن شاقتا قولداپ-دەمەيدى جانە ولارعا كومەكتەسۋدىڭ مۇمكىندىگىن ىزدەيدى (شەج. 2-ج. 16:9؛ ٴزاب. 23:4). ەحوبانىڭ ٴتىرى قۇداي ەكەنىن ەستە ۇستاساق، باسىمىزعا تۇسكەن كەز كەلگەن سىناققا توتەپ بەرە الامىز. بۇعان دالەل — ٴداۋىت پاتشانىڭ ٶمىرى.
3. ٴداۋىت «ەحوبا — ٴتىرى قۇداي» دەگەندە نە ايتقىسى كەلگەن؟
3 ٴداۋىت ەحوبانى جاقسى بىلگەن جانە وعان ارقا سۇيەگەن. جاۋلارى، سونىڭ ىشىندە ساۋل پاتشا، ولتىرمەك بولعاندا، ٴداۋىت دۇعا ەتىپ، ەحوبادان كومەك ىزدەگەن (ٴزاب. 18:6). ەحوبا ونىڭ دۇعالارىنا جاۋاپ بەرىپ، قۇتقارىپ قالعاندا، ٴداۋىت: «ەحوبا — ٴتىرى قۇداي!»— دەپ ماداق ايتقان (ٴزاب. 18:46). بۇل سوزدەرمەن ٴداۋىت قۇدايدىڭ جاي عانا بار ەكەنىن ايتقىسى كەلمەگەن. ٴبىر ەڭبەككە ساي، «ٴداۋىت ەحوبا ٶز حالقى ٷشىن ٵردايىم ارەكەت ەتەتىن ٴتىرى قۇداي ەكەنىنە سەنەتىنىن كورسەتكەن». ەحوبانىڭ ٴتىرى قۇداي ەكەنىنە ٴداۋىتتىڭ تالاي رەت كوزى جەتتى. سول سەنىمدىلىگى وعان ٵرى قاراي دا ەحوباعا قىزمەت ەتىپ، ونى ماداقتاي بەرۋگە كۇش بەردى (ٴزاب. 18:28، 29، 49).
4. ەحوبا ٴبىز ٷشىن ٴتىرى قۇداي بولسا، بۇنىڭ قانداي پايداسىن كورەمىز؟
4 ەحوبانىڭ ٴتىرى قۇداي ەكەنىنە كوزىمىز جەتسە، قىزمەتىمىزدى زور قۇلشىنىسپەن اتقارا بەرەمىز. سونداي-اق سىناقتارعا توزۋگە كۇشىمىز بولادى جانە ەحوباعا قىزمەت ەتۋگە دەگەن ىقىلاسىمىز سونبەيدى. بۇعان قوسا، ەحوبادان ٴبىر ەلى دە اجىرامايمىز.
ٴتىرى قۇداي سىزگە كۇش بەرەدى
5. سىناقتارعا توزە الاتىنىمىزعا نە نارسە سەنىمدىلىك بەرەدى؟ (فىلىپىلىكتەرگە 4:13)
5 ەحوبانىڭ ٴتىرى قۇداي ەكەنىن جانە ٵردايىم بىزگە كومەككە كەلەتىنىن ەستە ۇستاساق، كىشى بولسىن، ۇلكەن بولسىن، كەز كەلگەن سىناققا توتەپ بەرە الامىز. نەگىزى، ەحوبا شەشە المايتىن بىردە-ٴبىر قيىندىق جوق. قۇدىرەتى شەكسىز قۇداي بولعاندىقتان، ول بىزگە تاباندى بولىپ قالۋىمىز ٷشىن كۇش-قۋات بەرە الادى (فىلىپىلىكتەرگە 4:13 وقىڭىز). سوندىقتان بىزگە سىناقتاردان قورقۋعا ەش سەبەپ جوق. كىشىگىرىم سىناقتاردا ەحوبانىڭ قولداۋىن كورگەندە، ۇلكەن سىناقتاردا دا ول ٴبىزدى تاستامايتىنىنا سەنىمدى بولامىز.
6. جاس كەزىندەگى قانداي جاعدايلار ٴداۋىتتىڭ ەحوباعا دەگەن سەنىمدىلىگىن ارتتىردى؟
6 ٴداۋىتتىڭ ەحوباعا دەگەن سەنىمدىلىگىن ارتتىرعان ەكى وقيعانى قاراستىرايىق. ول جاس كەزىندە اكەسىنىڭ قويلارىن باعىپ جۇرگەندە، بىردە ايۋ، بىردە ارىستان وتارعا شاۋىپ، قويلارىن الىپ كەتكەن. ەكى جاعدايدا دا ٴداۋىت ەش قورىقپاي، جىرتقىشتاردى قۋىپ جەتىپ، قويلارىن امان الىپ قالدى. ٴبىراق ول بۇنى ٶز كۇشىممەن ىستەدىم دەمەدى. بۇلاردى ول ەحوبانىڭ كۇشىمەن ىستەگەنىن جاقسى ٴبىلدى (سام. 1-ج. 17:34—37). ٴداۋىت وسى وقيعالاردى ۇمىتپاي، سولار جايلى وي جۇگىرتىپ ٴجۇردى. وسىنىڭ ارقاسىندا ٴتىرى قۇداي ەحوبا بولاشاقتا دا كومەككە كەلەتىنىنە سەنىمدىلىگى ارتتى.
7. جاعدايعا دۇرىس قاراعانى داۋىتكە قالاي كومەكتەستى؟
7 كەيىنىرەك، ٵلى دە بوزبالا شاعىندا بولسا كەرەك، ٴداۋىت يسرايل اسكەرىنىڭ قوسىنا باردى. سويتسە، يسرايل ساربازدارى زارە-قۇتتارى قالماي، قورقىپ تۇر ەكەن. ويتكەنى ٴفىلىستىردىڭ الىپ ساربازى عوليات: «يسرايل جاساعىن ماسقارا قىلامىن!»— دەپ ٴبوسىپ تۇرعان ەدى (سام. 1-ج. 17:10، 11). يسرايل ساربازدارىنىڭ قورىققان سەبەبى — ولار وزدەرىن مازاق ەتىپ تۇرعان الىپ عولياتتان باسقا ەشتەڭەنى كورمەدى (سام. 1-ج. 17:24، 25). ال ٴداۋىت بۇل جاعدايعا مۇلدەم باسقاشا قارادى. ول عوليات جاي عانا يسرايل جاساعىن ەمەس، «ٴتىرى قۇدايدىڭ جاساعىن» قورلاپ تۇرعانىن ٴتۇسىندى (سام. 1-ج. 17:26). ٴداۋىت ەحوبا قۇدايدى نازارىندا ۇستادى. ول قوي باعىپ جۇرگەن كەزدە كومەككە كەلگەن قۇداي وسى كەزدە دە كومەكتەسەتىنىنە سەنىمدى بولدى. ٴداۋىت وسى سەنىمدىلىگىمەن عولياتقا قارسى اتتاندى. ٴسۇيتىپ، ارينە، جەڭىپ شىقتى! (سام. 1-ج. 17:45—51).
8. سىناق كەزىندە ەحوبانى ەستە ۇستاۋ ٷشىن نە ىستەۋىمىز كەرەك؟ (سۋرەتتى دە قاراڭىز.)
8 ٴبىز دە سىناقتاردان تايسالماي ٶتۋ ٷشىن ٴتىرى قۇدايىمىز كومەككە كەلۋگە دايىن ەكەنىن ەستە ۇستاۋىمىز كەرەك (ٴزاب. 118:6). بۇعان دەگەن سەنىمدىلىگىمىزدى بەكەمدەۋ ٷشىن ەجەلدە ەحوبانىڭ نە ىستەگەنىن قاراستىرساق بولادى. مىسالى، كيەلى كىتاپتان ول قىزمەتشىلەرىن قالاي قۇتقارعانى جايلى وقيعالاردى وقىپ كورىڭىز (يشايا 37:17، 33—37). سونداي-اق jw.org تور بەكەتىنە كىرىپ، قازىرگى ۋاقىتتا ەحوبا باۋىرلاستارىمىزعا قالاي كومەكتەسىپ جاتقانىن كورىڭىز. ول وزىڭىزگە قالاي كومەكتەسكەنىن دە ەسكە الىڭىز. ەگەر ٴسىز «مەن ٴداۋىت سياقتى ايۋمەن، ارىستانمەن كۇرەسپەگەنمىن، ومىرىمدە سونشالىقتى ەرەكشە جاعداي بولا قويعان جوق» دەپ ويلاساڭىز، كوڭىلىڭىز تۇسپەسىن. ويتكەنى ەحوبا ٴسىزدىڭ ومىرىڭىزدە دە كوپ نارسە ىستەگەن! مىسالى، ول ٴسىزدى وزىنە جاقىنداتىپ تارتتى (جوح. 6:44). وسى كۇنگە دەيىن شىندىقتا جۇرگەنىڭىزدىڭ دە تەك ەحوبانىڭ ارقاسى. نەگە ەحوباعا دۇعا ەتىپ، ونىڭ قولىن كورگەن ساتتەردى ەسىڭىزگە ٴتۇسىرۋىن سۇراماسقا؟ مىسالى، ەحوبا دۇعاڭىزعا جاۋاپ بەرگەن جاعدايلاردى، ٴدال ۋاقىتىندا كومەككە كەلگەن نە قيىن شاقتان وتۋگە كومەكتەسكەن كەزدەرىن ەسكە تۇسىرۋگە تىرىسىڭىز. وسىنداي ساتتەر جايلى وي جۇگىرتسەڭىز، ەحوبا الداعى ۋاقىتتا دا كومەككە كەلەتىنىنە سەنىمدى بولا تۇسەسىز.
كەزىگىپ جاتقان سىناقتارىمىز داۋلى ماسەلەنىڭ ٴبىر بولىگى (8، 9-ابزاستاردى قاراڭىز)
9. سىناقتارعا قالاي قاراۋىمىز كەرەك؟ (ناقىل سوزدەر 27:11)
9 ەحوباعا ٴتىرى تۇلعا دەپ قاراساق، سىناقتارعا دا دۇرىس قارايمىز. قالايشا؟ ٴبىز كەزىگىپ جاتقان سىناقتارىمىز ەحوبا مەن شايتاننىڭ اراسىنداعى ۇلكەن داۋلى ماسەلەنىڭ ٴبىرى بولىگى ەكەنىن تۇسىنەمىز. شايتان ٴبىزدى قيىندىققا كەزىكسەك، ەحوبانى تاستاپ كەتەدى دەيدى (ٵيۇپ 1:10، 11؛ ناقىل سوزدەر 27:11 وقىڭىز). ٴبىراق ٴبىز سىناقتاردان سۇرىنبەي وتسەك، شايتاننىڭ وتىرىكشى ەكەنىن، ال ەحوبانى جاقسى كورەتىنىمىزدى دالەلدەيمىز. بالكىم، ٴسىز قازىر ۇكىمەت تاراپىنان قارسىلىققا نە ەكونوميكالىق قيىندىققا ۇشىراپ جۇرگەن شىعارسىز. يا بولماسا ۋاعىزدا ەشكىم تىڭدامايتىن شىعار نە باسقا دا قيىندىقتارىڭىز بار بولار. قانداي سىناققا كەزىكسەڭىز دە، ونى ەحوبانىڭ جۇرەگىن قۋانتۋدىڭ مۇمكىندىگى دەپ قاراستىرىڭىز. مىنانى دا ۇمىتپاڭىز: ەحوبا ٴسىزدىڭ شامادان تىس سىنالۋىڭىزعا جول بەرمەيدى (قور. 1-ح. 10:13). تاباندى بولىپ قالۋىڭىز ٷشىن ول سىزگە كۇش بەرەدى.
ٴتىرى قۇداي سىزگە سي بەرەدى
10. ٴتىرى قۇداي ٶزىنىڭ قىزمەتشىلەرىنە نە بەرەدى؟
10 ەحوبا — ٶزىنىڭ قىزمەتشىلەرىنە ٵردايىم سي بەرەتىن قۇداي (ەۆر. 11:6). قازىردىڭ وزىندە ول بىزگە تىنىشتىق پەن قاناعات سيلاپ وتىر. ال بولاشاقتا ماڭگىلىك ٶمىر بەرەدى. ٴبىز ەحوباعا ٴجۇز پايىز سەنىمدىلىكپەن ٷمىت ارتا الامىز. ويتكەنى ونىڭ بىزگە سي بەرۋگە قالاۋى دا بار، قۇدىرەتى دە جەتەدى. وسىعان سەنىمدى بولساق، ەحوباعا بارىمىزدى سالىپ عيبادات ەتۋگە تالپىنامىز. وسىنداي سەنىمدىلىك ەحوبانىڭ بۇرىنداعى قىزمەتشىلەرىنە دە تالپىنىس بەرگەن. سولاردىڭ ٴبىرى — ٴبىرىنشى عاسىردا ٶمىر سۇرگەن تىموتە (ەۆر. 6:10—12).
11. تىموتەنى قاۋىمدا جان سالا ەڭبەكتەنۋگە نە تالپىندىردى؟ (تىموتەگە 1-حات 4:10)
11 تىموتەگە 1-حات 4:10 وقىڭىز. تىموتە ٴتىرى قۇدايعا ٷمىت ارتقان، سوندىقتان دا ول جان سالا ەڭبەك ەتىپ، كۇش سالعان. مىسالى، ەلشى پاۋىل ونى قاۋىمدا جانە قىزمەتتە ٴتالىم بەرۋ جاعىنان جاقسارۋعا تالپىندىرعان. سونداي-اق پاۋىل وعان جاستارعا دا، ۇلكەندەرگە دە ۇلگى كورسەتۋدى ايتقان. بۇدان بولەك، تىموتەگە قيىن تاپسىرمالار بەرىلدى. مىسالى، ول قاجەت كەزدەرى قاتاڭ، ٴبىراق سۇيىسپەنشىلىكپەن كەڭەس بەرۋ كەرەك بولعان (ٴتىم. 1-ح. 4:11—16؛ ٴتىم. 2-ح. 4:1—5). كەيدە وزگەلەر ونىڭ ەڭبەگىن بايقاماسا دا، باعالاماسا دا، ول ەحوبا سي بەرەتىنىنە سەنىمدى بولدى (ريم. 2:6، 7).
12. اقساقالداردى قاۋىمدا جان سالا ەڭبەك ەتە بەرۋگە نە تالپىندىرادى؟ (سۋرەتتى دە قاراڭىز.)
12 بۇگىندە اقساقالدار دا ەحوبا ولاردىڭ ەڭبەكتەرىن كورەتىنىنە، باعالايتىنىنا سەنىمدى بولسا بولادى. كوپ اقساقالدار باقتاشىلىق ساپار جاساۋ، ٴتالىم بەرۋ، ۋاعىزداۋدان بولەك، قۇرىلىس جوبالارىنا قولداۋ كورسەتەدى جانە اپاتتان زارداپ شەككەندەرگە كومەكتەسەدى. سونداي-اق ناۋقاستارعا كومەك كورسەتۋ توپتارىندا جانە اۋرۋحانالارمەن بايلانىس كوميتەتتەرىندە قىزمەت ەتەتىن اقساقالدار دا بار. وزدەرىن وسىنداي ىستەرگە ارناپ جۇرگەن اقساقالدار قاۋىم قانداي دا ٴبىر ادامنىڭ ەمەس، ەحوبانىڭ مەنشىگى ەكەنىن تۇسىنەدى. سوندىقتان ولار قىزمەتتەرىن جان سالا اتقارادى جانە ەڭبەكتەرى ٷشىن ەحوبادان سي الاتىندارىنا تولىق سەنەدى (قول. 3:23، 24).
قاۋىم ٷشىن ايانباي ەڭبەك ەتسەڭىز، ٴتىرى قۇداي سىزگە سي بەرەدى (12، 13-ابزاستاردى قاراڭىز)
13. بارىمىزدى سالىپ اتقارىپ جاتقان قىزمەتىمىزگە ەحوبا قالاي قارايدى؟
13 ارينە، قاۋىمدا ٴبارى بىردەي اقساقال بولا المايدى. ٴبىراق ٴبارىمىزدىڭ دە ەحوباعا بەرەرىمىز بار. وعان قىزمەت ەتۋ ٷشىن قولدان كەلگەننىڭ ٴبارىن جاساساق، ول مۇنى قاتتى باعالايدى. مىسالى، دۇنيەجۇزىلىك ىسكە جاساعان كىشىگىرىم ساداقامىزدىڭ ٶزىن ەحوبا بايقايدى. قاۋىمدا ۇيالشاقتىعىمىزدى جەڭىپ، قول كوتەرىپ جاۋاپ بەرسەك جانە وزگەلەردىڭ قاتەلىگىنە ٴمان بەرمەسەك، ولاردى شىن جۇرەكتەن كەشىرسەك، مۇنىڭ ٴبارى ەحوبانى قۋانتادى. ەحوباعا ٶزىڭىز قالاعانداي كوپ بەرە الماي جاتساڭىز، ول شاماڭىز كەلگەنشە جاساپ جاتقان ىستەرىڭىزدى باعالايتىنىنا سەنىمدى بولىڭىز. ەحوبا ٴسىزدى وسى ٷشىن جاقسى كورەدى جانە ۋاقىتى كەلگەندە سيىن بەرەدى (لۇقا 21:1—4).
ٴتىرى قۇدايدان ٴبىر ەلى دە اجىراماڭىز
14. ەحوبامەن جاقىن دوستىعىمىز وعان ادال بولىپ قالۋعا قالاي كومەكتەسەدى؟ (سۋرەتتى دە قاراڭىز.)
14 ەگەر ەحوبا ٴبىز ٷشىن ٴتىرى تۇلعا بولسا، وعان ادال بولىپ قالۋ قيىن بولمايدى. بۇنى ٴجۇسىپتىڭ وقيعاسى دالەلدەيدى. ول ازعىندىققا بارۋدان ٷزىلدى-كەسىلدى باس تارتقان. ويتكەنى قۇداي ول ٷشىن ٴتىرى تۇلعا بولعان جانە ٴجۇسىپ ونىڭ جۇرەگىن اۋىرتاتىن ەشتەڭە ىستەگىسى كەلمەگەن (مۇس. 1-ج. 39:9). ەحوبا ٴبىز ٷشىن دە ٴتىرى تۇلعا بولسىن دەسەك، وعان دۇعا ەتۋگە جانە ونىڭ ٴسوزىن وقىپ-زەرتتەۋگە ۋاقىت تابۋىمىز كەرەك. وسىلاي ەحوباعا جاقىن بولا تۇسەمىز. ال ەحوبامەن دوستىعىمىز جۇسىپتىكىندەي بەرىك بولسا، ٴبىز دە ەحوبانى رەنجىتەتىن ەشتەڭە ىستەمەيمىز (جاق. 4:8).
ٴتىرى قۇدايعا جاقىن بولساڭىز، وعان ادال بولىپ قالاسىز (14، 15-ابزاستاردى قاراڭىز)
15. ٴشول دالادا جۇرگەن يسرايلدىكتەردەن قانداي ساباق الامىز؟ (ەۆرەيلەرگە 3:12)
15 ەحوبانىڭ ٴتىرى قۇداي ەكەنىن ەستەن شىعارعان ادام ودان تەز-اق الشاقتاپ كەتەدى. مىسالى، يسرايلدىكتەردىڭ ٴشول دالادا جۇرگەن كەزىن ەسكە تۇسىرەيىك. ولار ەحوبانىڭ بار ەكەنىنە كۇماندانباعان، ٴبىراق ولاردىڭ قامىن ويلاپ، جاعدايلارىن جاسايتىنىنا كۇماندانا باستاعان. ولار ٴتىپتى «ەحوبا ٴبىزدىڭ ارامىزدا ما، جوق پا؟» دەگەن سۇراق كوتەرگەن (مۇس. 2-ج. 17:2، 7). اقىر اياعىندا ولار قۇدايعا قارسى بۇلىك شىعاردى. بۇل وقيعا ٴبىز ٷشىن ەسكەرتۋ بولىپ تابىلادى. ٴبىز قايتا-قايتا مويىنسۇنباعان يسرايلدىكتەرگە ۇقساپ ٴتىلازار بولىپ كەتكىمىز كەلمەيدى (ەۆرەيلەرگە 3:12 وقىڭىز).
16. قانداي كەزدەرى سەنىمىمىز سىنالۋى مۇمكىن؟
16 قازىرگى دۇنيەدە ەحوباعا ەتەنە جاقىن بولىپ قالۋ وڭاي ەمەس. بۇگىندە كوپ ادام قۇدايدىڭ بار ەكەنىن مويىندامايدى. بۇعان قوسا، قۇدايدىڭ تالاپتارىن ەلەمەيتىندەر شالقىپ ٶمىر ٴسۇرىپ جاتقانداي كورىنەدى. وسىنى كورىپ، سەنىمىمىز سىنالاتىن شىعار. ارينە، مۇندايدا ٴبىز قۇدايدىڭ بار ەكەنىنە كۇماندانىپ قالمايمىز. ٴبىراق ول ٴبىزدىڭ قامىمىزدى ويلايتىنىنا كۇماندانا باستاۋىمىز مۇمكىن. كەزىندە 73 ٸنشى جىردى جازعان ٴزابۇر جىرشىسى دا وسىنداي كۇمانعا بوي الدىرعان. ول اينالاسىنداعى ادامدار قۇداي زاڭدارىن ەلەمەسە دە، باقىتتى ٶمىر ٴسۇرىپ جۇرگەندەرىن كورگەن. سول كەزدە ول قۇدايعا قىزمەت ەتۋدىڭ پايداسى بار ەكەنىنە كۇماندانا باستاعان (ٴزاب. 73:11—13).
17. ەحوباعا جاقىن بولىپ قالۋىمىزعا نە كومەكتەسەدى؟
17 ٴزابۇر جىرشىسىنا ويىن وزگەرتۋگە نە كومەكتەستى؟ ول ەحوبانى ۇمىتقان ادامدارمەن نە بولاتىنى جايلى ويلاندى (ٴزاب. 73:18، 19، 27). سونداي-اق قۇدايعا قىزمەت ەتىپ جۇرگەندەر قانداي يگىلىك كورەتىنى جايلى وي جۇگىرتتى (ٴزاب. 73:24). ٴبىز دە ەحوبانىڭ قانداي باتالارىنا كەنەلىپ جاتقانىمىز جايلى ويلانىپ تۇرۋىمىز كەرەك. «ەحوباعا قىزمەت ەتپەگەندە ٶمىرىم قانداي بولار ەدى؟» دەپ تە ويلانعانىمىز ٴجون. سوندا ەحوباعا دەگەن ادالدىعىمىزدان ەش تايمايمىز جانە ٴزابۇر جىرشىسى سياقتى: «مەنىڭ قۇدايعا جاقىن بولعانىم قانداي يگى!»— دەپ قۋاناتىن بولامىز (ٴزاب. 73:28).
18. ٴبىز الداعى قيىندىقتاردان نەگە قورىقپايمىز؟
18 وسى سوڭعى كۇندەرى باسىمىزعا قانداي قيىندىقتار تۇسپەسىن، ٴبارىن دە جەڭە الامىز. ويتكەنى ٴبىز «ٴتىرى دە شىنايى قۇدايدىڭ قۇلىمىز» (سال. 1-ح. 1:9). قۇدايىمىز ٴتىرى تۇلعا بولعاندىقتان، ول ٶز قىزمەتشىلەرىنە ٵردايىم كومەككە كەلەدى. ول ەجەلدە ٶز قىزمەتشىلەرىن قالدىرماعان، بۇگىندە ٴبىزدى دە قالدىرمايدى. جۋىردا ەشقاشان بولماعان زور الاپات كەزىندە دە ٴبىز جالعىز بولمايمىز. بىزبەن بىرگە ەحوبا بولادى (يشايا 41:10). ەندەشە، ٴبارىمىز دە: «ەحوبا — مەنىڭ كومەكشىم. مەن ەشتەڭەدەن قورىقپايمىن»،— دەپ باتىل ايتايىق (ەۆر. 13:5، 6).
3-ٵن سەن بىزگە كۇش بەردىڭ، ٷمىت بەردىڭ
