Kwenda na mambu ke na kati

NTENDULA YA BAVERSE YA BIBLIA

Baroma 5:8—“Kristo Fwaka Sambu na Beto Ntangu Beto Vandaka Kaka Bantu ya Masumu”

Baroma 5:8—“Kristo Fwaka Sambu na Beto Ntangu Beto Vandaka Kaka Bantu ya Masumu”

“Nzambi ke monisa zola na yandi sambu na beto na mutindu yai: Ntangu beto vandaka ntete bansumuki, Kristu fwaka sambu na beto.”—Baroma 5:8, Mbalula ya Nsi-Ntoto ya Mpa.

“Nzambi songaka beto mutindu yandi ke zolaka beto: Kristo fwaka sambu na beto ntangu beto vandaka kaka bantu ya masumu.”—Baroma 5:8, Bible en Kituba.

Ntendula ya Baroma 5:8

Yehowa * Nzambi monisaka zola ya mingi ntangu yandi ndimaka nde Mwana na yandi, Yezu Kristu, kufwa sambu na bantu ya masumu. (Yoane 3:16) Sambu beto kele bantu ya masumu, mbala mingi beto ke vandaka ti kikalulu ya kuyindula mpi kusala mambu na mutindu yina ke wakana ve ti bansiku ya Nzambi. (Bakolosai 1:21, 22) Ata mpidina, Nzambi yidikaka mambu sambu beto wakana diaka ti yandi “na nzila ya lufwa ya Mwana na yandi.” (Baroma 5:10) Mpidina, beto lenda zwa dibaku ya kuvanda ti kinduku ya mbote ti yandi sesepi mpi kuvanda ti kivuvu ya kuzinga mvula na mvula na bilumbu ke kwisa.—Baroma 5:11; 1 Yoane 4:9, 10.

Mambu ya Bo Ke Tubila na Baverse Yina Ke na Ntwala mpi na Nima ya Baroma 5:8

Ntumwa Polo sonikaka mambu yai na Bakristu yina vandaka kuzinga na Roma. Na mambu yina kele sesepi yai na kapu ya 5 ya mukanda yina yandi sonikilaka Baroma, Polo tendulaka sambu na nki Bakristu lenda vanda na kiese sambu na kivuvu na bo. (Baroma 5:1, 2) Kivuvu yina “ke pesaka ve nsoni,” sambu yo me simbama na zola ya nene yina Nzambi monisaka na nzila ya Yezu. (Baroma 5:5, 6) Yezu lemfukilaka Nzambi na mambu yonso, kansi muntu ya ntete, Adami, kukaka ve kusala kima yina. (Baroma 5:19) Kukonda bulemfu ya Adami natilaka bana na yandi disumu mpi lufwa. (Baroma 5:12) Kansi, bulemfu ya Yezu na mambu yonso mpi lufwa na yandi ya kimenga me sadisaka sambu bantu ya bulemfu kuvanda ti kivuvu ya kubaka luzingu ya mvula na mvula.—Baroma 5:21.

^ par. 3 Yehowa kele zina ya Nzambi mutindu Biblia ke monisaka yo.—Nkunga 83:18.