Kwenda na mambu ke na kati

Kwenda na tansi ya malongi

 KITINI 4

Ntangu Nge Ke Kudiyangisa Sambu na Bifu na Nge—“Yobisa Mono Sambu na Disumu na Mono”

Ntangu Nge Ke Kudiyangisa Sambu na Bifu na Nge—“Yobisa Mono Sambu na Disumu na Mono”

“Kisalu na mono ya mpa tomisaka luzingu na beto ya dibuta, kansi yo salaka mpi nde mono yantika kusala mambu yonso yina Biblia ke buyisaka. Mono yantikaka kusala bankisi ya bilumbu ya kupema, kukota na mambu ya politiki mpi ata nkutu kukwenda na nzo-nzambi. Mono vandaka kuvukana diaka ve ti dibundu bamvula 40. Mutindu bamvula lutaka mingi, mono yindulaka nde Yehowa ta lolula mono diaka ve ata fioti. Mono vandaka kudiwa nde ata mono mosi, mono lenda kudilolula ve. Mono zabaka kieleka na ntwala nde mono kudikotisa na nzila ya mbi.”—Martha.

KUDIYANGISA sambu na bifu na beto lenda vanda kizitu ya ngolo. Ntotila Davidi sonikaka nde: “Bifu na mono kele na zulu ya ntu na mono; bonso kizitu ya kilo, yo me lutila mono mpila ya kunata yo kele ve.” (Nkunga 38:4) Mawa ya kuluta ndilu ke pusaka Bakristu ya nkaka na kudiyangisa; bo ke yindulaka nde Yehowa lenda lolula bo ve ata fioti. (2 Bakorinto 2:7) Keti yo kele kieleka? Ata nge me salaka masumu ya nene, keti nge me kumaka ntama kibeni ti Yehowa sambu yandi lolula nge ve ata fioti? Ve, nge me kumaka ve ntama ti yandi!

“Beto Tula Mambu na Ndonga na Kati na Beto”

Yehowa ke yambulaka ve bansumuki yina me balula ntima. Ya kieleka, yandi ke sadisaka bo! Na kingana ya mwana yina vilaka, Yezu fwanisaka Yehowa ti tata mosi ya zola yina mwana na yandi ya bakala yambulaka dibuta mpi kwendaka kusala luzingu ya mansoni. Na nima, mwana yina bakaka lukanu ya kuvutuka na nzo. “Ntangu yandi vandaka kaka mwa ntama, tata na yandi monaka yandi mpi waka mawa, ebuna yandi bakaka ntinu mpi yambaka yandi mpi pesaka yandi beze na mawete yonso.” (Luka 15:11-20) Keti nge ke zola kukwenda pene-pene na Yehowa, kansi nge ke kudiwa nde nge kele “kaka mwa ntama” ti yandi? Bonso tata yina Yezu tubilaka na kingana na yandi, Yehowa ke wila nge kibeni mawa. Yandi kele ti nzala ya ngolo ya kuyamba nge diaka.

Kansi inki nge fwete sala kana nge ke mona nde masumu na nge kele nene kibeni to mingi kibeni mpi Yehowa lenda lolula nge ve? Tadila emvitasio ya Yehowa yina kele na Yezaya 1:18: “Yehowa ke tuba nde: ‘Ntangu yai, beno kwisa mpi beto tula mambu na ndonga na kati na beto. Ata masumu na beno kele mbwaki bonso menga, yo ta kuma mpembe bonso mvula ya mpembe.’” Ya kieleka, Yehowa lenda lolula ata masumu yina ke monana mbwaki bonso menga na lele ya mpembe mpi mpila ya kukatula yo kele ve.

Yehowa ke zola ve nde nge landa kumona mpasi sambu na kansansa yina ke yangisa nge. Ebuna, inki mutindu nge lenda wa kiese yina ke katukaka na ndolula ya Nzambi mpi na kansansa ya bunkete? Beto tadila mambu zole yina ntotila Davidi salaka. Ya ntete, yandi tubaka nde: “Mono ta funguna mambi na mono na Yehowa.” (Nkunga 32:5) Kuvila ve nde, Yehowa me bingaka nge dezia na kukwenda pene-pene na yandi na nzila ya kisambu mpi na “kutula mambu na ndonga” ti yandi. Ndima emvitasio yina. Funguna masumu na nge na Yehowa, mpi monisa yandi mawi na nge. Sambu Davidi kutanaka ti mambu yina, yandi sambaka na masonga nde: “Yobisa mono sambu na disumu na mono. . . . Ntima ya kele na mawa mpi ya ke niokwama, O Nzambi, nge ta buya yo ve.”Nkunga 51:2, 17.

Ya zole, Davidi bakaka lusadisu yina katukaka na mbikudi Natani yina vandaka mumonisi yina Nzambi  ponaka. (2 Samuele 12:13) Bubu yai, Yehowa me tulaka na mabundu bankuluntu yina bo me longaka sambu na kusadisa bansumuki yina me balula ntima na kuvutula diaka kinduku na bo ti Yehowa. Kana nge kwenda pene-pene ya bankuluntu, bo ta sadila Masonuku mpi ta sala bisambu ya ngolo sambu na kulembika ntima na nge, kufiotuna to kukatula mawi ya mbi mpi kusadisa nge na kubeluka na kimpeve.Yakobo 5:14-16.

Yehowa ke zola nde nge wa kiese yina ke katukaka na kansansa ya bunkete

“Kiese na Muntu Yina Bo Me Lolula Mbi na Yandi”

Ya kieleka, nge lenda yindula nde kufunguna masumu na nge na Yehowa Nzambi mpi kukwenda kusosa bankuluntu lenda vanda na kati ya mambu ya kuluta mpasi yina nge lenda sala. Ntembe kele ve nde, Davidi vandaka ti mawi ya mutindu mosi. Yandi “vandaka pima” mwa ntangu sambu na masumu na yandi. (Nkunga 32:3) Kansi na nima, yandi monaka mambote yina yandi bakaka sambu yandi fungunaka masumu na yandi mpi sungikaka luzingu na yandi.

Mambote ya nene vandaka kiese yina Davidi waka diaka. Yandi sonikaka nde: “Kiese na muntu yina bo me lolula mbi na yandi, yina bo me lolula disumu na yandi.” (Nkunga 32:1, noti na nsi ya lutiti) Yandi sambaka mpi nde: “O Yehowa, kangula munoko na mono, sambu munoko na mono kuzabisa lukumu na nge.” (Nkunga 51:15) Sambu Nzambi sadisaka Davidi na kuyambula kudiyangisa sambu na bifu na yandi mpi yandi monisaka ntonda sambu na ndolula ya Nzambi, yo pusaka yandi na kuzabisa bantu ya nkaka mambu ya me tala Yehowa.

Yehowa ke zola nde nge wa kiese yina ke katukaka na kansansa ya bunkete. Mpi yandi ke zola nde nge zabisa bantu ya nkaka mambu ya me tala yandi mpi balukanu na yandi na masonga mpi ti kiese ya mingi, kansi ve ti mawi ya ke yangisa. (Nkunga 65:1-4) Kuvila ve emvitasio yina yandi ke pesa ya ‘kuvwansa masumu na nge, sambu bansungi ya kupema ya ke katuka na Yehowa yandi mosi kukwisa.’Bisalu 3:19.

Mambu yina kuminaka Martha. Yandi ke tuba nde: “Mwana na mono landaka kutindila mono Nzozulu ya Nkengi mpi Réveillez-vous ! Malembe-malembe, mono zabaka diaka Yehowa. Kima ya kuluta mpasi sambu na kuvutuka vandaka kulomba ndolula sambu na masumu yonso yina mono salaka. Kansi nsuka-nsuka, mono kwendaka pene-pene na Nzambi mpi mono lombaka yandi na kulolula mono. Yo kele mpasi na kundima nde bamvula 40 me luta na ntwala nde mono vutuka diaka na Yehowa. Mbandu na mono ke monisa nde ata na nima ya bamvula mingi, muntu lenda vanda ti dibaku ya kusadila Nzambi mpi kuzola yandi diaka.”