Nge ke zolaka nde Ndinga ya Nzambi kuvanda ya kuswaswana, Biblia me swaswanaka mpenza. Bo ke niemaka bamilio ya Biblia na bandinga mingi. Mayele yina kele na Biblia ke vandaka ti ngolo ya kusoba luzingu ya bantu.—Tanga 1 Batesalonika 2:13; 2 Timoteo 3:16.

Beto me zaba nde Biblia me katukaka na Nzambi sambu yo ke tubaka na ntwala mambu yina ta salama na bilumbu ke kwisa na siki-siki yonso. Ata muntu mosi ve lenda tuba mambu yai na mayele na yandi mosi. Beto tadila mambu yina kele na mukanda ya Yezaya. Bo sengumunaka kopi mosi ya mukanda ya Yezaya na dibulu mosi ya matadi pene-pene ya Nzadi-Mungwa ya Kufwa mvu-nkama mosi na ntwala nde Yezu kubutuka. Mukanda yango tubaka nde mbanza ya Babilone ta kuma mayumbu. Mambu yai lunganaka bamvula mingi na nima ya kisalu ya Yezu na ntoto.—Tanga Yezaya 13:19, 20; 2 Piere 1:20, 21.

Bo sonikaka Biblia na nsungi ya bamvula kuluta 1600. Bantu kiteso ya 40 yina sonikaka Biblia tubilaka ntu-diambu mosi mpi mambu ya bo sonikaka ke wakanaka. Inki mutindu mambu yai salamaka? Nzambi twadisaka mambu yina bo sonikaka.—Tanga 2 Samuele 23:2.

Bantangu ya nkaka, Nzambi solulaka ti bansoniki ya Biblia na nsadisa ya bawanzio, ya bambona-meso to ya bandosi. Mbala na mbala, Nzambi tulaka bangindu na yandi na mabanza ya bansoniki mpi yo pesaka bo nswa ya kupona bangogo yina bo sadilaka sambu na kusonika nsangu ya Nzambi.—Tanga Kusonga 1:1; 21:3-5.