ГЪУЭГУ Іуфэм Іусу тхьэмыщкІапщІэ хэзых нэфитІыр игъэхъужа нэужь, куэд дэмыкІыу Хьисэ макІуэ Иерусалим пэмыжыжьэу щыт къуажэ цІыкІум. ЗдэкІуам и гъэсэнитІым йолъэІу: «Къуажэм фыкІуи шыд–шыщІэ фыхуэзэнущи, къыкІэрыфтІэтыкІи къысхуэфшэ»,— жеІэри.

Шыд–шыщІэр къыщыхуашэм, тотІысхьэри Иерусалим макІуэр. Къалэ дыхьэпІэм деж Хьисэ цІыху гупышхуэ къыщыпожьэр. Зыкъуомым я щыгъын щІыІу телъыр щахри гъуэгум траубгъуэ. Адрейхэм пальмэ къудамэхэр къыпаупщІри апхуэдэуи гъуэгум тралъхьэурэ гуфІэжу жаІэр: «Иеговэ и цІэкІэ къакІуэ пащтыхьым Алыхьым и нэфІыр щрырехуэ!»

Ижь–ижьыж лъандэрэ хабзэ щыІэт цІыхубэм зыкъезыгъэлъэгъуну хуей пащтыхьыщІэр шыд–шыщІэм тесу Иерусалим дэлъадэу. Иджыпсту Хьисэ ищІэри аращ. Хьисэ я пащтыхьу щытыну зэрыхуейр абыхэм къагъэлъагъуэ. Ауэ абы псори хуейкъым. Алыхьым и унэшхуэм къыщыхъуам дегъэлъагъу ар.

Унэшхуэм къыздэкІуам, Хьисэ нэфхэмрэ ныкъуэдыкъуэхэмрэ егъэхъуж. Абы щхьэкІэ сабийхэм инышхуэу макъкІэ Хьисэ ягъэлъапІэ. Абы Іейуэ дин пашэхэр къегъэгубжьри Хьисэ йоупщІ: «Зэхэпхрэ сабийхэм жаІэр?»

— ДауикІ, зэхызох,— къет жэуапу Хьисэ. — Сыт щхьэкІэ феджакъэ «Алыхьым сабийхэм я жьэкІэ фІыщІэ иригъэщІынущ» жиІэу Алыхьым и Псалъэм итым? Сабийхэми мыувыІэу адэкІэ ягъэлъапІэ Алыхьым тригъэува пащтыхьыр.

А сабийхэм дращхьыну дэ дыхуейкъэ? ЦІыху гуэрхэр зэран къытхуэхъуу къыщІэкІынщ Алыхьым и пащтыхьыгъуэм дытепсэлъыхьыну. Дэ тэмэмыр тщІэнущ, къэкІуэну зэманым Хьисэ цІыхухэм щхьэкІэ ищІэну фІыгъуэхэм теухуауэ дымыувыІэу адэкІэ нэгъуэщІхэм яжетІэмэ.

Хьисэ щІылъэм щыщыІам щыгъуэ, пащтыхьым хуэдэу унафэ щищІыну зэманыр иджыри къэсатэкъым. Дэпщэщ–тІэ а зэманыр къыщысынур? Хьисэ иригъаджэхэми ар ящІэну хуейщ. КъыкІэлъыкІуэ псалъащхьэм ар къыщытщІэнщ.