КХЪУЫХЬЫМ имытІысхьа цІыхухэр зэрыпсэуам хуэдэу псэурт. Абыхэм иджыри яфІэщ хъутэкъым псыдзэшхуэр зэрыщыІэнур. Иджы хъунт ахэр нэхъ Іеижу щыдыхьэшхыр. Ауэ куэд дэмыкІыу абыхэм дыхьэшхын щагъэтащ.

НапІэзыпІэм псыр къыкъуэуащ. Уэшхыр къежэхт, пэгункІэ къракІыхым хуэдэу. Нухь жиІар пэжт! Ауэ иджы кхъухьым уихьэжыфынутэкъым. Бжэр быдэу Иеговэ хуищІыжат.

Куэд дэмыкІыу къуакІэхэм псоми псыр дэз хъуащ. Псыр псыдзэшхуэу къакІуэт. Абы жыгхэр ириудтт, мывэшхуэхэр игъажэт, макъышхуэ ищІт. ЦІыхухэр Іейуэ гужьеят. Ахэр лъэгапІэхэм дэпщейт. Сыту Іейуэ хущІегъуэжат ахэр, Нухь едаІуэу бжэр иджыри щыІухам щыгъуэ, кхъухьым зэримыхьам! Иджы зыри пхуэщІэжынукъым.

Псыр нэхъ лъагэжу къыдэкІуеящ. Ар къешхащ махуэ 40-рэ жэщ 40-кІэ. Бгыхэр, куэд дэмыкІыуи къурш нэхъ лъагэ дыдэхэри псым щІигъэнащ. Алыхьым и псалъэр игъэзэщІащ: кхъухьым имысахэр псори хэкІуэдащ, къухьым исахэм зыри къащыщІакъым.

Нухьрэ и къуэхэмрэ кхъухьыр быдэу ящІат. Ар псым и гущІыІу къакІуэри есын щІидзащ. ИтІанэ уэшхым щигъэтыжри дыгъэ къепсыжащ. Сыту дахащэт дунейм и теплъэр! ДэнэкІэ умыплъэми хыт. Кхъухьым и закъуэт есыр.

Иныжьхэр афІэкІ щыІэжтэкъым. Иджы цІыхухэм зэран яхуэхъужынукъым ахэр. Ахэр хэкІуэдащ я анэхэмрэ адрей цІыху бзаджэхэмрэ я гъусэу. Сыт-тІэ абыхэм я адэхэм къащыщІар?

Иныжьхэм я адэхэр дэ тхуэдэу цІыхутэкъым. Ахэр щІылъэм цІыхуу щыпсэун щхьэкІэ, уафэм къеха мелыІычхэт. Абы щхьэкІэ, псыдзэшхуэр къыщиуам щыгъуэ, ахэр хэкІуэдакъым адрей цІыхухэм хуэдэу. А мелыІычхэм я цІыху Іэпкълъэпкъхэр къагъанэри уафэм дэкІуеижащ. Ауэ афІэкІа ахэр Алыхьым и мелыІычхэм хигъэхьэжакъым. Арати, ахэр ШейтІаным и мелыІыч хъуащ. Алыхьым и Псалъэр абыхэм жинкІэ йоджэ.

ИужькІэ Алыхьым жьышхуэ къригъапщэри псыдзэр нэхъ мащІэ хъужын щІидзащ. Мазитху нэужьым, кхъухьыр къурш гуэрым и щхьэ къыщыувыІащ. Махуэ куэд иджыри дэкІащ, кхъухьым исхэм къиплъу къуршым и щхьэр ялъагъуу хъун щхьэкІэ. Псыр нэхъ мащІэ хъууэрэ кІуэт.

Апщыгъуэм Нухь кхъухьым къуаргъ къригъэкІащ. ТІэкІурэ къилъэтыхьри, зытетІысхьэн имыгъуэту, абы къигъэзэжащ. ТетІысхьэпІэ къигъуэтыну зыбжанэрэ ар иужь итащ, ауэ сытым дежи имыгъуэту кхъухьым къигъэзэжащ.

Нухь щІылъэм псы тетыжрэ темытыжрэ къищІэну хуейти, кхъухьым тхьэрыкъуэ къригъэлъэтыкІащ. Ауэ тхьэрыкъуэми къигъэзэжащ, зытетІысхьэн имыгъуэту. Нухь тхьэрыкъуэр етІуанэу щригъэкІам щыгъуэ, оливкэ жыгым и тхьэмпэ жьэдэлъу къигъэзэжащ. ИтІанэ Нухь къыгурыІуащ псыр зэрыжэщІыжар. Нухь ещанэу иригъэкІащ тхьэрыкъуэр, ауэ иджы абы щІыпІэ гъущэ къигъуэтри щыпсэуну къэнащ.

Иджы Алыхьым Нухь зыкъыхуигъэзащ: «КъикІ кхъухьым. Уи унагъуэри хьэкІэкхъуэкІэхэри къыздиш»,— жиІэри. Илъэсым щІигъукІэ исащ ахэр кхъухьым. Уи нэгу къыщІэгъэхьэт щІылъэм къызэрытехьэжамрэ псэууэ къызэреламрэ щхьэкІэ абыхэм гуфІэгъуэу яІэр!