Nxeddem ayen akk umi i nezmer bac a d-nbeggen i yal yiwen belli nḥemmel-it, nelha yid-es yerna neţqadar-it. Ma nwala belli yiwen n Inigi n Yahwa yeḥbes leqdic-is amasiḥi yerna yeǧǧa inejmuɛen, neţnadi a nehdeṛ yid-es bac a s-d-nbeggen belli nḥemmel-it, yerna neţɛawan-it bac ad yuɣal ad iqerreb ɣer Ṛebbi (Luqa 15:4-7).

 Tikwal, zemren ad ssufɣen albeɛḍ si tejmaɛt ma yesɛa yir tikli (1 Ikurintiyen 5:13). Meɛna imi i nemyeḥmal, nxeddem kullec bac a t-nɛiwen iwakken ur t-ssufuɣen ara. Yerna xas yeffeɣ si tejmaɛt, nesbeggin-as-d belli nḥemmel-it yerna neţqadar-it, akken i ɣ-yeţweṣṣi Wedlis Iqedsen (Marqus 12:31; 1 Buṭrus 2:17).

Acuɣer i zemren ad ssufɣen albeɛḍ si tejmaɛt?

 Adlis Iqedsen yenna-d ɛinani belli ma yexdem umasiḥi kra n ddnub ameqran yerna ur yebɣi ara ad ibeddel, ilaq a t-ssufɣen si tejmaɛt (1 Ikurintiyen 5:11-13). Adlis Iqedsen ibder-ed ddnubat imeqranen i gzemren ad awin albeɛḍ a t-ssufɣen si tejmaɛt. Ger ddnubat-agi yella zzna, ssekṛan, tamgerṭ, tukerḍa akk-d leqher di twacult (1 Ikurintiyen 6:9, 10; Igalatiyen 5:19-21; 1 Timutawus 1:9, 10).

 Acu kan, lecyux a n tejmaɛt ur ssufuɣen ara din din si tejmaɛt win i gxedmen ddnub ameqran. Ţnadin qbel a t-ɛiwnen bac ad ibeddel tikli (Iṛumaniyen 2:4). Xeddmen ayen akk umi i zemren bac ad ḥazen ul-is. Ţmeslayen yid-es s wawal aẓidan yerna leḥḥun-as s leḥnana (Igalatiyen 6:1). Swakka, amednub-nni yezmer a d-yerr s lexbaṛ belli yeɣleḍ yerna yezmer ad itub (2 Timutawus 2:24-26). Meɛna, ma yeţkemmil ixeddem ayen i gḥeṛṛem Wedlis Iqedsen yerna yugi ad itub, ɣas akken lecyux nudan a t-ɛiwnen acḥal d abrid, ilaq a t-ssufɣen si tejmaɛt. Lecyux ad xebbṛen mbeɛd tajmaɛt belli amdan-agi, yuɣal mačči d Inigi n Yahwa.

 M’ara ssufɣen si tejmaɛt albeɛḍ yextaṛen ad ikemmel di ddnub i gxeddem, s wacu i gezmer a d-yeglu wayagi? Tamezwarut, tajmaɛt aţ-ţqader lumuṛ n Ṛebbi yeɛnan ṣṣfawa yerna aţ-ţḥareb ɣef iɛeggalen-is, axaṭer amednub-nni yezmer a sen-d-yawi lemḍerra (1 Ikurintiyen 5:6; 15:33; 1 Buṭrus 1:16). Tis snat, ayagi yezmer ad yawi amednub-nni ad yexḍu i ddnub i gxeddem yerna ad yexdem ayen akk ilaqen bac ad ibeddel (Iɛebṛaniyen 12:11).

Amek i sen-leḥḥun Inagan n Yahwa i wid i ssufɣen si tejmaɛt?

 Adlis Iqedsen yeţweṣṣi imasiḥiyen iwakken ‘ur ţxalaḍen ara’ albeɛḍ i ssufɣen si tejmaɛt, ‘yerna ula d učči ur teţţen ara d wergaz am wagi’ (1 Ikurintiyen 5:11). Ihi, ur neţxalaḍ ara win i ssufɣen si tejmaɛt. Acu kan, ur t-neţţarra ara di ṭṭerf. Neţqadar-it, yezmer a d-yas ɣer inejmuɛen yerna kra n Inagan n Yahwa zemren ad sellmen fell-as b. Yezmer daɣen ad yeḍleb i lecyux a t-ɛiwnen bac a d-yuɣal ɣer tejmaɛt.

 D acu i gḍerrun ɣef lemtel m’ara ssufɣen argaz si tejmaɛt meɛna tameṭṭut-is d warraw-is qqimen d Inagan n Yahwa? Ɣas akken argaz-agi yuɣal ur yeţţeɛbad ara Yahwa akk-d iɛeggalen n twacult-is, meɛna lɛalaqa i gesɛa yid-sen ur teţbeddil ara. Imi i ţɛicen akk deg yiwen wexxam, zzwaǧ-nsen ad ikemmel, tamɛict-nsen n twacult ur teţbeddil ara yerna ad kemmlen a d-sbegginen leḥmala gar-asen.

 Win i ssufɣen si tejmaɛt yezmer ad yeḍleb i lecyux a d-asen ɣur-es a t-ẓren. Ad ssexdmen Adlis Iqedsen akken a t-weṣṣin s leḥmala bac ad itub yerna a d-yuɣal ɣer Ṛebbi (Zaxarya 1:3). Ma yeǧǧa yir tikli-nni i gesɛa yerna yebɣa s wul-is ad yetbeɛ lumuṛ n Wedlis Iqedsen, yezmer a d-yuɣal ɣer tejmaɛt. Tajmaɛt ‘a s-tsemmeḥ yerna a t-tṣebber’, akken i xedmen imasiḥiyen n Kurintus i yiwen n umednub i gtuben yerna ibeddel tikli (2 Ikurintiyen 2:6-8).

D acu i d-nnan kra seg wid i ssufɣen si tejmaɛt mbeɛd uɣalen-d?

 Atan d acu i d-nnan kra n Inagan n Yahwa i ssufɣen si tejmaɛt, mbeɛd uɣalen-d ɣer Ṛebbi:

 “Asmi i ṭṭfeɣ leqrar a d-uɣaleɣ ɣer tejmaɛt, ɣileɣ a yi-d-ḍelben lecyux a sen-d-iniɣ ayen akk i xedmeɣ deg iseggasen-nni i ǧǧiɣ tajmaɛt. Meɛna, nnan-iyi-d kan: ‘Nebɣa aţ-ţreṣṣiḍ lbal-im ɣef wayen i glaq aţ-ţxedmeḍ tura.’ Daɣneţţa, yethenna mliḥ lxaṭer-iw” (Maria, Marikan).

 “Tajmaɛt teţṛaǧu s lḥir melmi ara d-uɣaleɣ. Ḥusseɣ belli sɛiɣ lqima. Atmaten ţ-ţyessetmatin-iw imasiḥiyen ɛawnen-iyi bac ad ḥusseɣ belli Yahwa akk-d tejmaɛt semmḥen-iyi, yerna ɛawnen-iyi bac ur ţxemmimeɣ ara ɣer wayen iɛeddan. Lecyux zgan ɣer tama-w bac a yi-ɛiwnen ad mṣalaḥeɣ akk-d Yahwa. Ṣebbren-iyi yerna ɛawnen-iyi bac ad fehmeɣ belli sɛiɣ lqima ɣer Yahwa yerna iḥemmel-iyi” (Malcom, Syeṛṛa Liyun).

 “Feṛḥeɣ mliḥ axaṭer Yahwa iḥemmel aṭas agdud-is. Ɣef wayagi i geţḥarab ɣef tuddsa-ines bac aţ-ţeqqim teṣfa. Asufeɣ si tejmaɛt yezmer a d-iban yewɛeṛ ɣer wid ur nelli ara d Inagan n Yahwa. Meɛna ilaq ad yili yerna d ayagi i d-yesbegginen belli Yahwa iḥemmel-aɣ s ṣṣeḥ. Ţcekkiṛeɣ mliḥ Ṛebbi, Baba-tneɣ n igenwan, axaṭer leḥmala-ines ţ-ţameqrant yerna yeţsamaḥ” (Sandi, Marikan).