Ṛuḥ ɣer wayen yellan deg-s

Ṛuḥ ɣer wumuɣ amecṭuḥ

Inagan n Yahwa

Taqbaylit

Inagan n Yahwa, beṭṭun tiwaculin neɣ sdukkulen-tent?

Inagan n Yahwa, beṭṭun tiwaculin neɣ sdukkulen-tent?

Inagan n Yahwa ţnadin ad sseǧhden lεalaqat ama di twaculin-nsen ama di twaculin n lɣir-nsen. D Ṛebbi i d Axellaq n twacult; neţqadar-it ɣef wannect-a. (Laṣel n ddunit 2:21-24; Ifasusiyen 3:14, 15) Deg Wedlis Iqedsen, Ṛebbi yesselmad kra n imenzayen i geţεawanen, di ddunit meṛṛa, yal argaz ţ-ţmeṭṭut-is ad ddukklen mliḥ w’ad ilin di lfeṛḥ.

Ayen i xeddmen Inagan n Yahwa bac ad εiwnen tiwaculin ad sεunt lεalaqat iǧehden akteṛ

Nxeddem lmeǧhud bac a netbeε lewṣayat n Wedlis Iqedsen axaṭer ţεawanent-aɣ a nuɣal d imezwaǧen n lεali yerna d imawlan n lεali. (Lemtul 31:10-31; Ifasusiyen 5:22–6:4; 1 Timutawus 5:8) S imenzayen yeččuṛen d lekyasa, i d-yekkan seg Wedlis Iqedsen, ula ţ-ţiwaculin ideg i mxallafen iεeggalen-nsent di ddin ţεicent di lfeṛḥ. (1 Buṭrus 3:1, 2) Daɣneţţa, wali d acu i d-nnan kra n lεibad, d irgazen neɣ ţ-ţulawin ur nelli ara d Inagan n Yahwa, meεna imezwaǧen-nsen uɣalen d Inagan:

  • “Seţţa iseggasen imezwura i d-nεac lwaḥid yeqwa deg-sen umennuɣ d leḥzen. Asmi i teqqel Ivete ţ-ţinigit n Yahwa, tuɣal ţ-ţaḥnint yerna ţ-ţaṣebrit.” Ayen i tbeddel di ṭṭbiεa-ines isellek-ed zzwaǧ-nneɣ.—Clauir, Brizil.

  • “Asmi i gebda wergaz-iw Chansa taɣuri n Wedlis Iqedsen akk-d Inagan n Yahwa, ur bɣiɣ ara axaṭer lliɣ nwiɣ-as beṭṭun tiwaculin. Meεna, rriɣ-d s lexbaṛ belli Adlis Iqedsen, di tin n ṣṣeḥ, iεawen zzwaǧ-nneɣ.”—Agness, Zambya.

Di leqdic-nneɣ n uberreḥ, nesskanay i lɣir-nneɣ belli ma ṭṭebbiqen lewṣayat yeččuṛen d lekyasa n Wedlis Iqedsen, ad issinen:

  • Amek ara yextiṛ yal yiwen akken ilaq amezwaǧ

  • Amek ara ɣelben uguren n useggas amezwaru n zzwaǧ

  • Amek ara sen-lḥun i iḍulan akk-d yemɣaren

  • Amek ara ţṣerrifen

  • Amek ara ḥebsen amceččew

  • Amek ara ḥefḍen ad ţţemsamaḥen

  • Amek ara ṛebbin dderya-nsen

Abeddel n ddin yeţţawi-d uguren ger imezwaǧen?

Ilaq a nesteεṛef belli tikwal abeddel n ddin yeţţili d ssebba n wuguren. Di 1998, yiwet n tkebbanit yesteklfen s lbeḥt umi qqaren Sofres tefka-d leḥsabat-agi: Mkul argaz ţ-ţmeṭṭut-is ger εecrin imezwaǧen, iseg yiwen umezwaǧ yuɣal d Inigi, mmugren-d uguren.

Σisa icar-ed belli wid ara itebεen aselmed-ines ad sεun tikwal uguren di twaculin-nsen. (Matta 10:32-36) Γef wayen yeεnan leḥwayeǧ iɣef i llan lεibad ţlummun imasiḥiyen n zik, di lweqt n leḥkem n Ṛṛuman, yiwen n umusnaw n umezruy yeţţusemman Will Durant yenna-d: “Ddin amasiḥi, ɣef wakken i d-qqaren, yella yeţţawi-d tawaɣit i yexxamen.” * Kra n Inagan n Yahwa ţqabalen llum yecban wagi ass-a. Nezmer a d-nefhem seg wannect-a belli d amezwaǧ-nni yellan d Inigi i d ssebba n wemceččew di twacult?

Axxam n ccṛeε n Luṛub n izerfan n wemdan.

Axxam n ccṛeε n Luṛub n izerfan n wemdan yenna-d awal-is ɣef taluft-agi i d-gren ɣef Inagan n Yahwa belli beṭṭun tiwaculin. Yenna-d belli d iεeggalen ur nelli ara d Inagan i d ssebba n wuguren n twacult di xilla n liḥalat, axaṭer ţţagin “ad qeblen w’ad qadren tilelli i gesεa weqrib-nni-nsen [yuɣalen d Inigi] akken ad yetbeε w’a d-ibeggen ddin-is.” Yerna-d daɣen ayagi: “Tiwaculin meṛṛa, ideg iεeggalen mxallafen di ddin, ţεicent liḥala-yagi; akken ula d Inagan n Yahwa.” * Ula m’ara sεun uguren d wid i gkeṛhen ddin-nsen, Inagan n Yahwa ţnadin ad ṭebbqen lewṣaya-yagi n Wedlis Iqedsen: “Ur ţţarrat ara i cceṛ s cceṛ. [...] Ma yella wamek, ma ɣur-wen i tella, ilit di lehna kwenwi d yemdanen meṛṛa.”—Iṛumaniyen 12:17, 18.

Inagan n Yahwa zewwǧen kan d wid yellan di ddin-nsen. Acuɣer?

Inagan ttabaεen lameṛ n Wedlis Iqedsen i geţdemmiren ɣer zzwaǧ “di Ssid” kan, yeεni d win yellan d Inigi am nutni. (1 Ikurintiyen 7:39) Uyerna lameṛ-agi i d-yekkan seg Wedlis Iqedsen mačči d ayen yellan d lmuḥal. Γef lemtel, εlaḥsab n yiwen umagrad n 2010 i d-yeffɣen deg ujeṛnan yeţţusemman Journal of Marriage and Family, “imezwaǧen yellan deg yiwen n ddin, yesεan yiwet n leεbada yerna i gεedlen deg wayen is i ţţamnen” * seεεun dima lεalaqat yelhan di zzwaǧ-nsen.

Acu kan, Inagan n Yahwa ur ţweṣṣin ara wid yellan di ddin-nsen ad msebḍun d wid ukud i zewǧen, ur nelli ara d Inagan. Yeqqar-ed Wedlis Iqedsen: “Ma yella yiwen seg watmaten isεa tameṭṭut ur numin ara, lameεna teqbel aţ-ţeqqim yid-es, ur s-iberru ara. Tameṭṭut yesεan argaz ur numin ara, lameεna yeqbel ad iqqim yid-es, ur tberru ara i wergaz-is.” (1 Ikurintiyen 7:12, 13) Inagan n Yahwa ttabaεen imeslayen-agi.

^ § 17 Ẓer Histoire de la civilisation, « César et le Christ », trad. J. Marty, Lausanne, Rencontre, vol. III, 1963, p. 320.

^ § 18 Ẓer ccṛeε i d-yeffɣen di temsalt Témoins de Jéhovah de Moscou et autres c. Russie, p. 26-27, § 111.

^ § 20 Ẓer Journal of Marriage and Family, vol. 72, no 4, août 2010, p. 963.