1, 2. Pengudah berikan sepemanjai malam, nama dipelajarka Peter?

TUJUH iku murid Jesus udah sepemanjai malam berikan ba Tasik Galili. Tang sida lalu bedau bulih ikan. Diatu pagi hari, lalu Jesus ke udah diangkatka idup baru bediri ba tebing, ngemataka sida. Udah nya, “iya lalu bejaku ngagai sida, ‘Tibarka jala kita ari tisi kanan perau. Nya baru kita deka bulih ikan.’ Sida lalu nibarka jala sida, lalu sida enda ulih narit jala nya, empa pemayuh ikan.”—Jhn. 21:1-6.

² Jesus nyediaka roti enggau ikan ke diempa bala murid iya pagi nya. Udah nya iya nguing ngagai Simon Peter lalu nanya: “Simon anak John, kati nuan rinduka aku lebih ari utai tu?” Jesus nemu Peter rindu berikan. Engka ketegal nya Jesus nanya Peter sekalika iya rinduka pengawa berikan lebih agi ari iya rinduka Jesus sereta utai ti diajar Jesus. Peter nyaut Jesus: ‘Sigi amat, Tuan. Nuan nemu aku rinduka nuan.’ (Jhn. 21:15) Berengkah ari sehari nya, Peter ngamatka utai ti disebut iya. Iya ngayanka pengerindu ke Kristus enggau  mengkang kisuk ba pengawa nginjil, lalu iya nyadi orang ke amat beguna ba eklisia Kristian.

3. Orang Kristian patut bejimat enggau nama?

³ Nama ulih dipelajarka kitai ari jaku Jesus ngagai Peter? Kitai patut bejimat ngambika enda ngelakka pengerindu kitai ke Kristus nyadi lemi. Jesus nemu, pengidup ba dunya tu deka nekan kitai lalu kitai deka napi pengirau sereta pemar. Ba sempama pasal orang ke nabur benih, Jesus madahka sekeda orang deka nerima ‘pesan pasal Perintah Petara’ lalu berengkah nyadi ransing. Tang udah nya, “pengangkun [sida] ke dunya, enggau ke pengaya” deka “ngalahka pesan nya,” lalu sida deka lenyau pengeransing. (Mat. 13:19-22; Mrk. 4:19) Enti kitai enda bejimat, pengirau ba pengidup besehari-hari deka ngachau pengawa kitai ke Jehovah. Nya alai Jesus nangkan bala murid iya: “Bejaga kita, ngambika kita enda gian ngirup, lalu mabuk, lalu selalu irauka pengidup.”—Luk. 21:34.

4. Nama deka nulung kitai nemu sekalika pengerindu ke Kristus nya teguh tauka enda? (Peda gambar ba pun artikel.)

⁴ Baka Peter, kitai ulih ngayanka diri rinduka Kristus enggau ngenuluka pengawa nginjil ba pengidup kitai. Baka ni kitai ulih nentuka diri ulih terus ngereja tu? Kitai ulih nanya diri empu: ‘Nama utai ti pemadu dikerindu aku ba pengidup? Kati pengaga ati aku datai ari gawa ke Jehovah tauka ari pengawa bukai?’ Kena nulung kitai nyaut tanya tu, aram kitai meresa tiga bengkah pekara ba pengidup ke tau ngurangka pengerindu kitai ke Kristus, iya nya kereja sekular, main, enggau reta.

5. Nama tanggung pengawa ke dikembuan bala tuai bilik?

⁵ Ba Peter, iya ukai semina rindu berikan. Nya pengawa ke dikereja iya kena ngulihka belanja ke diri sebilik. Kemaya hari tu mega, Jehovah udah meri bala tuai bilik tanggung pengawa ngulihka belanja ke sida sebilik. (1 Tim. 5:8) Sida enda tau enda bebendar ngereja tu. Taja pia, ba hari ti penudi tu, kereja sekular tau ngasuh ati balat irau.

6. Nama kebuah kereja sekular ulih ngasuh orang berasai ditekan?

⁶ Kesuah iya, kereja ke bisi enda mayuh enti dibanding enggau orang ke begunaka kereja. Ketegal tu, orang besemekih ngulihka kereja. Mayuh orang ngasaika diri patut bekereja lebih jam, taja pan upah iya mit. Pengawa dagang nguji deka ngasilka mayuh barang ngena mimit aja pekereja ari ke udah. Nya alai pekereja berasai ditekan, lelak, sereta sakit. Mayuh orang irauka diri lenyau kereja enti sida enda nitihka utai ti dikedekaka bos sida.

7, 8. (a) Ngagai sapa kitai patut taluk? (b) Nama dipelajarka seiku menyadi Kristian lelaki ari menua Thailand pasal kereja iya?

⁷ Ketegal nyadi orang Kristian, kitai taluk agi ngagai Jehovah ari ke taluk ngagai orang bukai, nyengkaum tuke kitai.  (Luk. 10:27) Kereja sekular nya chara kitai nyediaka utai ti diguna besehari-hari sereta kena nyukung pengawa nginjil kitai. Tang enti enda bejimat, tanggung pengawa ba kereja tau ngachau sembah kitai. Kitai ulih belajar ari peneleba seiku menyadi Kristian lelaki ari menua Thailand. Ku iya madahka: “Pengawa ngaduka komputer ngerinduka ati aku, tang pengawa tu begunaka mayuh jam. Ketegal tu, aku nyauka nadai jam ba pekara beroh. Udah nya aku nyau sedar, enti deka ngenuluka Perintah Petara, aku patut nukar kereja.” Nama digaga iya?

⁸ Ku iya madahka: “Pengudah merambu kira-kira setaun, aku mutuska runding deka nyadi penyual sekelim ba jalai. Terubah, aku tusah ngulihka belanja lalu berasai lemi semengat. Lebuh betemu enggau bala ke kala sama enggau bekereja, sida ketawa ke aku lalu nanya kebuah aku ngumbai nyual sekelim manah agi ari gawa ngaduka komputer ba endur ke bisi air-cond. Aku besampi ngagai Jehovah, minta Iya nulung aku mutar sereta nyapai juluk ati ngambika bisi mayuh agi awak ba pengawa beroh. Enda lama udah nya, gaya utai berinsur manah. Aku nyau nemu agi asai ti dikedekaka pelangan aku sereta landik agi ngaga sekelim. Udah nya, aku ulih nyual semua sekelim ninting hari. Kebendar, penatai pemisi aku diatu manah agi enti dibanding enggau lebuh aku gawa ngaduka komputer. Tu udah ngasuh aku lantang agi ati laban enda berasai ditekan sereta irau baka ke dikembuan aku ba kereja aku suba. Tang keberat agi, aku diatu berasai semak agi ngagai Jehovah.”—Bacha Matthew 5:3, 6.

9. Baka ni kitai ulih terus ngembuan runding ti betul pasal kereja sekular?

⁹ Jehovah gaga ati lebuh kitai bebendar gawa. Pengawa ti dikereja enggau bebendar deka diberekat. (J-lam. 12:14) Tang kitai patut nentuka pengawa kitai ke Jehovah nya beguna agi ari kereja sekular. Bejaku pasal utai ti diguna, Jesus madahka: ‘Giga dulu Perintah Petara enggau pengelurus Iya, lalu semua utai nya deka mega diberi ngagai kita.’ (Mat. 6:33) Tang baka ni kitai nemu sekalika kitai ngembuan runding ti betul pasal kereja sekular? Kitai ulih nanya diri empu, ‘Kati aku ngasaika kereja aku ngerinduka sereta ngagitka ati tauka ngumbai pengawa aku ke Jehovah nya pengawa ke biasa aja tauka enda ngerinduka ati?’ Berundingka tanya tu ulih nulung kitai enggau terang meda utai ti amat dikerinduka kitai.

10. Nama utai beguna ti diajar Jesus?

¹⁰ Jesus ngajar kitai pasal utai ti patut dikenuluka ba pengidup. Bisi sekali, lebuh iya nemuai ngagai dua iku menyadi, iya nya Maria seduai Marta. Tekala nya Marta lalu berengkah nyediaka pemakai ke Jesus, tang Maria duduk semak Jesus lalu mendingka utai ti diajar Jesus. Marta besebana laban Maria enda nulung iya. Ku Jesus madah ngagai Marta: “Maria  udah milih utai ti manah agi, lalu utai nya enda ulih dirampas ari iya.” (Luk. 10:38-42) Ditu Jesus ngajar utai ti beguna. Kena nyeliahka diri ari dilimpangka utai ti diguna kitai sereta kena nunjukka pengerindu kitai ke Kristus, kitai enda tau enda milih “utai ti manah.” Reti nya kaul kitai enggau Jehovah enda tau enda seruran nyadi utai ti pemadu beguna ba pengidup kitai.

11. Nama dipadah Bup Kudus pasal belelak?

¹¹ Pengidup kitai balat kisuk, nya alai kekadang kitai patut belelak. Dalam Bup Kudus kitai macha: “Utai ti pemadu manah ti tau dikereja kitai nya makai, ngirup lalu ngelantangka diri ngena utai ti udah ulih kitai.” (P-jar. 2:24) Jesus nemu, bala murid iya patut belelak. Ngambika chunto, pengudah sida bebendar ba pengawa nginjil, Jesus madah ngagai sida: “Aram kitai mupuk ngagai endur ti sunyi, kediri kitai aja, lalu belelak dia enda lama.”—Mrk. 6:31, 32.

12. Nama kebuah kitai patut bejimat enggau main sereta pemerindang? Beri siti chunto.

¹² Main sereta pemerindang ulih nulung kitai belelak. Tang kitai enda tau enda bejimat ngambika pengawa ngelantangka diri enda nyadi utai ti pemadu beguna ba pengidup kitai. Ba abad keterubah, mayuh orang bisi runding ke baka tu: “Aram kitai makai ngirup, laban pagila kitai mati.” (1 Kor. 15:32) Runding ti baka tu mega bisi ba dini-dini endur kemaya hari tu. Ngambika chunto, seiku lelaki ke biak di Eropah Barat berengkah datai ngagai gempuru Kristian. Tang iya balat rinduka pemerindang nyentukka iya ngetu begulai enggau Saksi-Saksi Jehovah. Tang udah nya iya sedar, ulah iya ke beberatka pemerindang udah ngasuh iya bulih mayuh penusah. Iya berengkah belajarka Bup Kudus baru, lalu nyau kelama, iya ulih berengkah enggau nusui berita manah. Pengudah dibaptisa, ku iya madahka: “Semina siti utai ke ngasuh aku nesal, iya nya aku udah masau mayuh awak sebedau aku sedar gawa ke Jehovah mai mayuh agi pengelantang ari ke ngiga pemerindang ke bisi ba dunya tu.”

13. (a) Padahka siti chunto ke nunjukka kebuah kelalu mayuh main sereta pemerindang nya enda manah. (b) Nama ulih nulung kitai ngembuan runding ti patut pasal main sereta pemerindang?

¹³ Main patut nulung kitai belelak sereta ngulihka pengering baru. Nya alai, ni penyampau jam patut dikena kitai ba main? Kena nyaut tanya tu, kitai patut berundingka utai tu. Mayuh orang rindu makai kek enggau gula batu. Tang kitai nemu, enti kitai majak makai kek enggau gula batu, nya deka ngachau pengerai kitai. Tang enti kitai deka bepengerai, kitai enda tau enda makai utai ti manah ke pengerai kitai. Pia mega, enti kitai ngena kelalu mayuh jam ba main sereta pemerindang, nya deka ngachau kaul kitai enggau Jehovah. Nama ulih nulung kitai nemu sekalika kitai ngembuan runding ti patut bekaul enggau main tauka enda? Siti utai ke ulih digaga kitai, iya nya milih siti minggu lalu nuliska penyampau jam ke dikena ba pengawa ke Jehovah, baka gempuru Kristian, pengawa nginjil, sereta belajarka Bup Kudus. Udah nya kitai tau nuliska penyampau jam dikena dalam minggu ti sama ba main, baka lumba, TV, tauka video game. Lebuh kitai mandingka  penyampau kedua-dua jam nya, nama ulih diperatika kitai? Kati kitai patut ngaga ubah?—Bacha Epesus 5:15, 16.

14. Nama ulih nulung kitai milih main sereta pemerindang ti manah?

¹⁴ Jehovah ngemendarka kitai milih main ke diri empu, lalu bala tuai bilik mega ulih milih main ke sida sebilik. Dalam Bup Kudus, Jehovah meri kitai prinsip ke madahka chara Iya berunding. Prinsip tu nulung kitai ngaga pemutus ti manah. * (Peda nota kaki.) Main ti manah nya ‘pemeri ari Petara.’ (P-jar. 3:12, 13) Endang amat, semua orang rinduka pemerindang ti enda sama. (Gal. 6:4, 5) Tang, enda ngira nama pemerindang ti dipilih kitai, kitai agi patut bejimat. Jesus madahka: “Dia alai pengaya kita, dia meh alai ati kita.” Reti nya lebuh kitai balat rinduka utai nya, utai nya deka beguna ba kitai lalu kitai deka mengkang beratika iya. (Mat. 6:21) Pengerindu ke Raja kitai, Jesus, meransang kitai berunding, bejaku, sereta ngereja utai ke nunjukka Perintah Petara nya beguna agi ba kitai ari utai bukai.—Plp. 1:9, 10.

15, 16. (a) Baka ni angkunka reta ulih nyadi panjuk ngagai kitai? (b) Nama jaku ajar ti manah ke diberi Jesus pasal reta?

¹⁵ Mayuh orang kemaya hari tu ngasaika diri enda tau enda ngembuan gari,  telefon, komputer, sereta utai bukai ti pemadu baru. Sida dikuingka pengingin angkunka reta, iya nya siti chara pengidup ke alai reta sereta duit nya beguna agi ari utai bukai. Ketegal nyadi orang Kristian, nama utai ti pemadu beguna ba nuan? Tanya diri empu: ‘Kati aku ngena mayuh agi jam berunding pasal kerita tauka pisin ti pemadu baru ari ke nyediaka utai ti dikena begempuru? Kati aku balat kisuk enggau pengawa besehari-hari nyentukka aku nadai mayuh awak dikena besampi tauka macha Bup Kudus?’ Enti kitai enda bejimat, pengerindu ke reta deka lebih agi ari pengerindu kitai ke Kristus. Kitai patut mikirka jaku Jesus: “Jaga diri ari semua macham pengamu.” (Luk. 12:15) Nama kebuah iya madah munyi nya?

¹⁶ Jesus madahka “nadai orang ulih betuaika dua iku tuan.” Ku iya agi: ‘Kita enda ulih betuaika Petara enggau duit [pengaya].’ Enti kitai betumpu ba reta, kitai enda ulih meri utai ti pemadu manah ke Jehovah. Jesus madahka, kitai deka “begedika siku, lalu rinduka siku, tauka angkunka siku.” (Mat. 6:24) Ketegal kitai enda sempurna, kitai enda tau enda terus ngelaban “pengingin tubuh,” nyengkaum angkunka reta.—Eps. 2:3.

17. (a) Nama kebuah sekeda orang ngasaika diri tusah deka ngembuan runding ti patut pasal reta? (b) Nama nulung kitai ngelaban pengingin angkunka reta?

¹⁷ Mayuh orang balat betumpu ba pengingin sereta pengelantang nyentukka sida ngasaika diri tusah deka ngembuan runding ti patut pasal reta. (Bacha 1 Korint 2:14.) Ketegal sida enda ulih berunding enggau manah, sida tusah deka nemu bida entara betul enggau salah. (Heb. 5:11-14) Pengingin sida ke reta majak balat-sebalat. Lalu mayuh agi reta ke diulih sida, bendar agi sida deka nambahka reta nya. (P-jar. 5:10) Tang bisi utai ke ulih digaga kitai kena ngelaban runding ke baka tu. Seruran macha Bup Kudus deka ngeringka kitai ngambika ulih nyeliah ari angkunka reta. (1 Pet. 2:2) Jesus belematika penemu-dalam ari Jehovah, lalu nya nulung iya nyeliahka penguji ke datai ari Sitan. (Mat. 4:8-10) Kemaya hari tu mega, enti kitai deka nyeliah ari angkunka reta, kitai patut nitihka penemu-dalam ari Jehovah. Tu deka nunjukka kitai rinduka Jesus lebih agi ari reta.

18. Nama deka digaga nuan?

¹⁸ Lebuh Jesus nanya Peter, “Kati nuan rinduka aku lebih ari utai tu?” iya ngingatka Peter, gawa ke Jehovah patut dikemeratka Peter ba pengidup. Nama Peter reti iya “Sigi Batu.” Kualiti manah ke dikembuan Peter ulih disamaka enggau batu. (SKR. 4:5-20) Kemaya hari tu, kitai mega deka pengerindu kitai ke Kristus teguh. Nya alai, kitai patut bisi runding ti betul pasal kereja sekular, main, sereta reta. Udah nya, kitai deka baka Peter ke nyebut: ‘Tuan. Nuan nemu aku rinduka nuan.’