DANIEL SEDUAI MIRIAM jadi melaki-bini kena September 2000, lalu bisi pengidup ti nyamai di Barcelona, Sepanyol. Daniel madahka: “Kami duai ulih makai ba restorant ke manah, raun ke menua bukai, sereta ngena gari ke bekualiti ketegal kereja ti dikembuan kami duai. Kami duai mega bejarit nginjil.” Tang udah nya bisi utai nyadi.

Ba konvensyen taun 2006, Daniel ninga siti cheramah ke bisi tanya: ‘Kati kitai enggau naka ulih nulung orang ke “diakim ngena atur ti enda lurus” nuju ngagai pengidup ti meruan belama iya?’ (Jaku Dalam 24:11) Cheramah nya madahka, kitai bisi tanggung pengawa nusui pesan Bup Kudus laban nyawa orang bepanggai ba pesan nya. (Kereja Rasul 20:26, 27) Daniel agi ingat, “Aku ngasaika Jehovah bejaku ngagai aku.” Cheramah nya mega madahka, kitai deka gaga agi ati enti ngereja mayuh agi pengawa ke Jehovah. Daniel nemu nya amat laban iya ulih meda Miriam amat gaga ati pengudah nyadi pengerintis.

Cheramah nya balat negu ati Daniel nyentukka iya berunding deka ngaga ubah ti besai ba pengidup iya. Iya berengkah ngurangka jam bekereja, berengkah nyadi pengerintis, sereta berundingka pengaga ati ti deka diasaika iya enggau Miriam enti seduai iya gawa ba endur ke begunaka mayuh agi penginjil Perintah Petara.

Kena Mei 2007, Daniel seduai Miriam badu bekereja lalu pindah ngagai Panama, siti menua ke kala dilawa seduai iya. Kandang endur alai seduai iya nginjil nyengkaum beberapa buah pulau ba Bocas del Toro Archipelago di Tasik Caribbean. Mayuh orang ke diau dia bansa Guaymi. Daniel seduai Miriam ngira diri ulih diau di Panama kira-kira lapan bulan enggau duit ke udah disimpan seduai iya.

Seduai iya ngagai pulau ngena perau, lalu pengudah ba pulau nya, seduai iya ngena basikal. Seduai iya agi ingat lebuh terubah iya ngena basikal kira-kira 30 kilometer (20 batu) nanjak bukit ke renjan maya hari balat panas. Daniel balat lelak nyentukka iya nyauka luput. Tang, ruang bilik bansa Guaymi ke enggau seduai iya betemu rindu bendar nerima temuai, kelebih agi pengudah seduai iya belajarka sekeda rambai jaku ba endur nya. Enda lama udah nya, seduai iya bisi 23 iku pelajar Bup Kudus.

Nama nyadi pengudah duit ke disimpan seduai iya abis? Daniel madahka: “Enggau ai mata, kami duai berengkah berunding pasal mulaika diri ke Sepanyol. Kami duai tusah ati deka ninggalka bala pelajar Bup Kudus.” Tang sebulan udah nya, seduai iya nerima berita ti ngagaka ati. Miriam madahka: “Kami duai dikangau nyadi pengerintis spesial. Endang ngagaka ati ulih neruska pengawa kami duai!”

Ketegal bisi ubah ba gerempung, Daniel seduai Miriam ngetu nyadi pengerintis spesial ba taun 2015. Nama digaga seduai iya diatu? Seduai iya pechayaka semaya ba Masmur 37:5: ‘Serahka pengidup nuan ngagai Jehovah. Panggaika pengarap nuan ba Iya, lalu Iya deka nulung nuan.’ Seduai iya ngiga kereja kena melanja diri nyadi pengerintis biasa, lalu diatu seduai iya enggau siti eklisia di Veraguas, Panama.

Daniel madahka: “Sebedau ninggalka Sepanyol, kami duai enda entu nemu sekalika ulih idup enggau pengumbas iya. Diatu, kami duai idup enggau pengumbas iya lalu nadai kurang ba nama-nama utai ti diguna.” Nama utai ti amat ngagaka ati seduai iya? Ku seduai iya madahka: “Nulung orang ke baruh ati belajar pasal Jehovah nya pengaga ati ke nadai banding!”