1-2. Ba artikel tu, nama utai ke deka dikerandauka kitai?

KEKADANG kitai ngasaika pengidup tu pandak aja lalu seruran “ditinggang penusah.” (Jop 14:1) Nya alai, tu ngasuh kitai berasai asa. Mayuh nembiak Jehovah kelia menya ngasaika utai ti sama. Indah sekeda madahka diri deka mati. (1 Raj. 19:2-4; Jop 3:1-3, 11; 7:15, 16) Tang Jehovah seruran ngelantangka sereta ngeringka sida. Nya alai peneleba sida ditulis ngambika kitai bulih pengelantang sereta belajar ari sida.—Rom. 15:4.

² Ba artikel tu, kitai deka berandauka sekeda nembiak Jehovah ke napi penanggul baka Josep, anak Jakop, Naomi enggau menantu iya Rut, orang Lewi ke nulis Masmur 73 enggau rasul Peter. Baka ni Jehovah ngeringka sida? Nama utai ke dipelajar kitai ari peneleba sida? Saut ngagai tanya tu ngasuh kitai andal ‘Jehovah diau semak orang ke tusah ati lalu ngidupka sida ke nadai agi pengadang.’—Mas. 34:18.

3-4. Nama nyadi ngagai Josep lebuh iya agi biak?

³ Josep kira-kira beumur 17 taun lebuh iya bisi dua iti mimpi ke datai ari Petara. Mimpi tu reti iya Josep nyadi orang ti beguna sereta dipebasa diri sebilik. (P-kal. 37:5-10) Pengudah iya bulih mimpi nya, mayuh utai ti jai nyadi ba pengidup iya. Ari ke bebasaka iya, bala menyadi iya nyual iya nyadi ulun. Enda lama udah nya, iya nyadi ulun pemesai orang Ejip ke benama Potipar. (P-kal. 37:21-28) Dalam sekejap mata, pengidup Josep berubah. Ari nyadi anak ke  dikesayauka apai iya, iya lalu nyadi ulun ba menua Ejip, gawa ke orang ti enda nyembah Jehovah.—P-kal. 39:1.

⁴ Enda lama udah nya, pengidup Josep tusah agi. Bini Potipar nuduh Josep deka masung iya. Potipar enda nasat pekara tu dulu, lalu terus nepu Josep ba dalam jil, lalu ditanchang ngena rantai. (P-kal. 39:14-20; Mas. 105:17, 18) Gambarka asai ati Josep ke agi biak lebuh dituduh masung lalu baka ni jaku tuduh tu ngenyaika nama Jehovah. Nya tentu ngasuh Josep berasai asa ati!

5. Baka ni Josep mutarka asai asa ati?

⁵ Lebuh iya nyadi ulun sereta dalam rumah jil, Josep enda ulih ngubah utai ke nyadi ba pengidup iya. Nama utai ke ulih nulung iya ngembuan runding ti positif? Ari ke berundingka utai ti enda ulih digaga iya, iya bebendar ngereja pengawa ke diberi ngagai iya. Tang beguna agi, Josep seruran deka ngelantangka ati Jehovah. Ketegal nya, Jehovah merekatka utai ke digaga Josep.—P-kal. 39:21-23.

6. Baka ni mimpi ke diberi Jehovah suba ngelantangka ati Josep?

⁶ Josep engka bulih peransang ari mimpi ke diulih iya suba. Mimpi nya meri iya pengadang iya ulih betemu enggau diri sebilik iya baru lalu gaya pengidup iya deka nyadi manah agi. Lalu tu endang nyadi! Lebuh Josep beumur 37 taun, mimpi iya dikeamatka enggau chara ti ngalitka ati!—P-kal. 37:7, 9, 10; 42:6, 9.

7. Nitihka 1 Peter 5:10, nama nulung kitai tan napi penguji?

⁷ Utai ke dipelajarka kitai. Utai ke nyadi ba pengidup Josep nunjukka dunya tu amat jai lalu orang nadai lurus enggau kitai. Bala menyadi Kristian mega engka ngemediska  kitai. Tang enti kitai belindung ba Jehovah, kitai enda ngetu nyembah Iya tauka asa ati. (Mas. 62:6, 7; bacha 1 Peter 5:10.) Kingatka, lebuh Josep beumur 17 taun, Jehovah meri iya mimpi. Tu nunjukka Jehovah arapka nembiak Iya ti biak. Kemayaharitu, mayuh bala nembiak baka Josep, ke bisi pengarap ti kering ngagai Jehovah. Sekeda ari sida dikurung dalam jil ketegal tetap ati ngagai Jehovah.—Mas. 110:3.

8. Nama nyadi ngagai Naomi enggau Rut?

⁸ Ketegal lapar pungkang, Naomi enggau diri sebilik ninggalka rumah sida di Judah lalu ngentapka diri ba menua bansa bukai, iya nya di Moap. Ba din, laki Naomi Elimelek mati, lalu Naomi tinggal kediri enggau anak lelaki iya dua iku. Udah nya, dua iku anak lelaki iya jadi enggau indu Moap, iya nya Rut enggau Orpah. Kira-kira sepuluh taun udah nya, anak Naomi dua iku pan nadai, lalu ninggalka bini sida kediri sereta nadai anak. (Rut 1:1-5) Gambarka penusah ati ti diasaika tiga iku indu tu! Taja pan Rut enggau Orpah ulih kawin baru, tang baka ni enggau Naomi ke mansang tuai? Naomi balat tusah ati nyentukka iya madah: ‘Anang ngumbai aku Naomi. Kumbai aku Marah, laban Petara ti Pemadu Bekuasa udah ngasuh aku merinsa idup.’ Ketegal napi semua utai tu, Naomi mutuska deka pulai ngagai Betlehem. Rut lalu mupuk enggau iya.—Rut 1:7, 18-20.

9. Nitihka Rut 1:16, 17, 22, baka ni Rut meransang Naomi?

⁹ Nama nulung Naomi mutarka penusah ati iya? Rut nunjukka iya rinduka Naomi sereta taluk lebuh iya enda ninggalka Naomi. (Bacha Rut 1:16, 17, 22.) Di Betlehem, Rut bebendar gawa ngumpul barli ke iya enggau Naomi. Ketegal nya, iya bulih nama ti manah.—Rut 3:11; 4:15.

10. Baka ni Jehovah ngayanka pengerindu ngagai orang ke seranta baka Naomi enggau Rut?

¹⁰ Nitihka adat ke diberi Jehovah ngagai bansa Israel, sida enda tau ngetau gandum ba tisi umai ngambika orang ke seranta tau ngumpul gandum nya. Adat tu nunjukka penyiru Jehovah ngagai orang ke seranta baka Naomi enggau Rut. (Lew. 19:9, 10) Nya alai, Naomi enggau Rut ulih ngulihka pemakai enggau chara ti dipebasa laban seduai iya enda ibuh minta pemakai ari orang bukai.

11-12. Baka ni Boas ngasuh Naomi enggau Rut gaga ati?

¹¹ Rut ngumpul gandum ba umai orang ke kaya ke benama Boas. Pengerindu enggau penetap ati Rut ngagai Naomi negu ati Boas. Nya alai Boas jadi enggau Rut lalu meli pulai tanah pesaka enggi Naomi sebilik. (Rut 4:9-13) Seduai iya bisi anak ke benama Obet, ke deka nyadi aki Raja David.—Rut 4:17.

¹² Gambarka pengaga ati Naomi lebuh iya megai Obet ke agi mit, lalu meri sampi terima kasih ngagai Jehovah! Tang Naomi enggau Rut tentu deka agi gaga ati lebuh seduai iya diangkatka idup baru lalu nemu Obet nyadi peturun Jesus Kristus, Messiah ti Disemaya!

13. Nama ulih dipelajarka kitai ari utai ke nyadi ba Naomi enggau Rut?

¹³ Utai ke dipelajarka kitai. Lebuh kitai napi penguji, kitai engka ngasaika tusah ati. Kitai engka ngumbai penanggul enda ulih diputarka. Nama patut digaga kitai maya nya? Kitai patut arapka Apai kitai di serega, lalu mengkang semak enggau bala menyadi Kristian. Endang amat, Jehovah enda muai penanggul kitai. Ambika chunto, Iya enda ngidupka baru laki Naomi sereta anak iya.  Tang Iya deka nulung kitai napi penguji, kekadang nengah bala menyadi Kristian kitai.—J-lam. 17:17.

14. Nama kebuah seiku orang Lewi nyadi enda diperansang?

¹⁴ Masmur 73 ditulis seiku orang Lewi. Ketegal iya orang Lewi, iya bisi pengawa ti berega ba rumah sembiang Jehovah. Bisi sekali iya berasai enda diperansang. Nama kebuah? Iya berengkah ngining orang ke sumbung enggau orang ke jai laban meda sida nyamai diau. (Mas. 73:2-9, 11-14) Sida bisi pengaya, pengerai sereta nadai pengirau. Lebuh orang Lewi meda tu, iya mega berasai asa lalu nyebut: “Enti pia, nama guna aku diau tuchi lalu enda bedosa?” Runding ke baka tu ulih ngachau pengarap iya.

15. Nitihka Masmur 73:16-19, 22-25, baka ni orang Lewi ke nulis Masmur nya mutarka penusah ati iya?

¹⁵ Bacha Masmur 73:16-19, 22-25. Orang Lewi nya “mansang ngagai Rumah [Jehovah].” Ba dia, iya meda orang nyembah Jehovah. Iya berasai lantang sereta bisi runding ti manah, lalu besampika utai ke ditapi iya. Ari nya iya nemu runding iya enda manah lalu tau ngujungka iya lenyau kaul enggau Jehovah. Iya nemu orang ke jai “ba endur ti lichin” lalu “pengujung sida amat jai.” Ngambika iya enda ngining orang ke jai sereta berasai asa ati, iya sedar iya patut ngembuan runding Jehovah. Lebuh iya ngereja nya, iya enda agi tusah ati. Ku iya: “Laban aku bisi [Jehovah], nama utai bukai agi dikedekaka aku di dunya tu?”

16. Nama ulih dipelajarka kitai ari seiku orang Lewi?

¹⁶ Utai ke dipelajarka kitai. Anang meh ngining ngagai orang ke jai ke nyamai diau! Pengaga ati sida enda lama, lalu sida enda ulih idup belama iya. (P-jar. 8:12, 13) Enti kitai ngining sida, kitai empu deka asa ati lalu lenyau kaul enggau Jehovah. Nya alai, enti nuan bisi ngasaika baka orang Lewi nya, tunda meh utai ke digaga iya, baka nitihka jaku lalau Petara sereta begulai enggau  orang ke ngereja peneka Jehovah. Enti nuan rinduka Jehovah lebih agi ari utai bukai, nuan deka ngasaika pengaga ati ti bendar sereta ba jalai “pengidup ti bendar.”—1 Tim. 6:19.

17. Nama utai ke ngasuh Peter tusah ati?

¹⁷ Rasul Peter orang ti ransing. Kekadang, iya ngereja utai sereta nyebut utai enggau chara ti enda berunding, lalu udah nya iya nesal enggau utai ke disebut sereta digaga iya. Ambika chunto, lebuh Jesus madahka bala rasul iya, iya deka diperinsa sereta dibunuh, Peter ngerara iya lalu madah: ‘Utai nya enda tau sekali-kali nyadi ba nuan!’ (Mat. 16:21-23) Jesus lalu ngemetulka Peter. Pia mega, lebuh orang datai deka nangkap Jesus, Peter ngereja utai enggau enda berunding lebuh iya mutuska pending seiku ulun iman besai. (Jhn. 18:10, 11) Sekali agi, Jesus ngemetulka Peter. Peter mega madah, enti sema rasul ke bukai rari ninggalka Jesus, iya enda ngereja nya. (Mat. 26:33) Tang Peter kelalu andalka diri empu. Malam pengudah nya, rasul Peter nyadi takut sereta madahka diri enda ngelala Jesus tiga kali. Peter amat tusah ati nyentukka iya “pansut lalu duie-duie nyabak.” (Mat. 26:69-75) Iya tentu berunding enti Jesus ulih ngampunka iya.

18. Baka ni Jesus nulung Peter mutarka asai asa ati?

¹⁸ Taja pia, Peter enda nejuka diri iya kelalu asa ati. Tang, pengudah iya ngaga penyalah, iya terus nyembah Jehovah. Udah nya kitai meda iya bisi begulai enggau bala rasul ke bukai. (Jhn. 21:1-3; SKR. 1:15, 16) Nama udah nulung Peter? Jesus kala besampi ngambika pengarap Peter kering lalu Jesus mega bisi meransang iya pulai  ngambika ulih ngeringka bala menyadi ke bukai. Jehovah nyaut sampi nya. Udah nya, Jesus pegari ba mua Peter. Nya tentu udah meransang Peter! (Luk. 22:32; 24:33, 34; 1 Kor. 15:5) Jesus mega pegari ba mua bala rasul lebuh sida berikan sepemanjai malam, tang nadai bulih ikan. Ba maya nya, Jesus meri Peter peluang kena madahka diri rinduka Jesus. Jesus udah ngampunka pangan iya, lalu meri iya mayuh agi pengawa.—Jhn. 21:15-17.

19. Baka ni Masmur 103:13, 14 ngajar kitai runding Jehovah lebuh kitai ngereja penyalah?

¹⁹ Utai ke dipelajarka kitai. Chara Jesus nunjukka iya bisi pengasih ngagai Peter, lalu Jesus nunda pengasih Apai iya. Nya alai, lebuh kitai ngaga penyalah, kitai anang ngumbai Jehovah enda ulih ngampunka kitai. Kingatka, Sitan deka kitai ngembuan asai ati ke baka nya. Tang aram meh kitai belematika pengerindu Jehovah ke kitai. Iya nemu tatak kitai, lalu deka ngampunka kitai. Enti bisi orang bukai ngemediska kitai, kitai deka neladan pengasih Jehovah.—Bacha Masmur 103:13, 14.

20. Nama deka dipejuraika ba artikel pengudah tu?

²⁰ Utai ke nyadi ba Josep, Naomi enggau Rut, seiku orang Lewi enggau Peter nulung kitai andal ‘Jehovah diau semak orang ke tusah ati.’ (Mas. 34:18) Kekadang, Jehovah ngemendarka kitai ditinggang mayuh macham penguji sereta berasai asa. Tang, lebuh kitai tan napi penguji nya enggau tulung ari Jehovah, tu ulih ngeringka pengarap kitai. (1 Pet. 1:6, 7) Ba artikel pengudah tu, kitai deka bejuraika baka ni Jehovah terus nyukung nembiak Iya ke asa ati, engka ketegal pengelemi sida tauka gaya ti tusah.