Rut 3:1-18
3 Naomi, entua Rut, bejaku ngagai Rut. Ku iya: “Anak, aku patut ngiga laki ke nuan, ngambika nuan ulih idup lantang.*
2 Endaka Boas nya kaban belayan kitai? Iya nya meh ke ngasuh nuan nitihka bala pekereja indu iya. Malam tu, iya deka nampi barli ba endur alai ngindik utai ke diketau.
3 Nya alai, mandi dulu nuan lalu udah nya unsutka minyak wangi. Kena gari nuan ti pemadu manah,* lalu udah nya mupuk ngagai endur alai ngindik utai ke diketau. Tang, anang ngayanka diri ngagai Boas, nyentukka iya udah abis makai enggau ngirup.
4 Peda dini alai iya gali. Udah nya, mansang ngagai endur nya. Buka bungkur kaki iya, lalu gali semak kaki iya. Iya deka madah ngagai nuan utai ke patut digaga nuan.”
5 Ku Rut nyaut: “Aku deka ngereja semua utai ke diasuh nuan, indai.”
6 Nya alai, Rut pan mupuk ngagai endur alai ngindik utai ke diketau, lalu ngereja semua utai ke diasuh entua iya.
7 Maya nya, Boas udah makai enggau ngirup. Iya berasai lantang ati, lalu iya pan mupuk tinduk ba tisi tugung leka barli. Udah nya, Rut mansang begadai-gadai ngagai Boas, muka bungkur kaki iya lalu gali semak kaki iya.
8 Maya tengah malam, Boas tedani. Iya duduk lalu tepedaka siku indu gali semak kaki iya.
9 Ku Boas nanya: “Sapa nuan?” Ku Rut nyaut: “Aku tu, Rut. Jaga meh aku,* laban tuan bisi hak nebus kami.”
10 Ku Boas bejaku: “Awakka Jehovah merekatka nuan, endu. Sebedau tu, nuan udah setia ngayanka pengerindu. Tang diatu, nuan udah lebih agi ngayanka nya. Nuan enda ngiga lelaki ke biak, sekalika orang nya kaya tauka miskin.
11 Nya alai, anang irau endu. Aku deka ngereja semua utai ke dipinta nuan, laban semua orang ba kuta tu nemu nuan endang indu ti chukup manah.
12 Taja pan aku endang bisi hak nebus seduai, tang bisi siku agi kaban belayan ke semak agi ari aku, ke ulih nebus seduai.
13 Malam tu, ba ditu aja meh nuan. Pagi pagila, enti iya ka, awakka iya meh nebus seduai. Tang, enti iya enggai, aku besumpah atas nama Jehovah, Petara ti idup, aku empu deka nebus seduai. Ke diatu, bemalam aja meh ba ditu sampai pagi.”
14 Nya alai, Rut pan gali semak kaki iya sampai pagi. Iya dani sebedau hari tawas ngambika enda dipeda orang. Tu ketegal Boas enggai orang nemu bisi indu datai ngagai endur alai ngindik utai ke diketau.
15 Udah nya, iya bejaku ngagai Rut: “Bai kitu kain selindang ke dikena nuan lalu kerembaika kain nya.” Pengudah Rut ngerembaika kain nya, Boas pan nuangka enam bakul* leka barli ngagai kain nya, lalu meri nya ngagai Rut ngambika bisi dibai iya pulai. Udah nya, Boas mansang ngagai kuta.
16 Rut pulai ngagai entua iya, lalu entua iya nanya iya: “Nyadi baka ni deh anak?” Rut lalu madahka semua utai ke udah digaga Boas ke iya.
17 Ku Rut nampung baru: “Iya meri aku enam bakul leka barli lalu iya madah ngagai aku: ‘Anang pulai puang nadai mai utai ke entua nuan.’”
18 Udah nya, Naomi bejaku: “Ke diatu, nganti dulu meh anak sampai nuan nemu nama penyadi iya legi. Iya tentu enggai jenuh seagi-agi iya bedau tembu ngaduka pekara tu seharitu.”
