Rut 4:1-22
4 Boas mansang ngagai pintu penama kuta, lalu duduk ba dia. Maya nya, kaban belayan ke semak agi enggau Elimelek, ke disebut Boas, bisi mansa ba dia. Boas pan ngangauka iya: “Unggal, aram duduk ditu.” Iya pan datai lalu duduk.
2 Udah nya, Boas mai 10 iku bala tuai ba kuta nya datai kia. Ku Boas bejaku ngagai sida: “Aram sama duduk ba ditu.” Sida pan duduk ba dia.
3 Boas pan bejaku ngagai kaban belayan iya nya: “Naomi, ke udah pulai ari menua Moap, mesti nyual tanah ke diempu bala kitai, Elimelek.
4 Nyadi aku berunding aku patut madah ngagai nuan pasal tu: ‘Beli meh tanah nya ba mua orang ke diau ba kuta tu, enggau ba mua bala tuai bansa kitai. Enti nuan ka, tebus meh tanah nya. Tang enti nuan enggai, padahka meh ngagai aku ngambika aku nemu, laban nuan bisi agi hak ari aku nebus tanah nya. Enti nuan enggai, nya baru aku ulih nebus tanah nya.’” Ku iya nyaut: “Au, aku deka nebus tanah nya.”
5 Ku Boas nampung baru: “Lebuh nuan meli tanah nya ari Naomi, reti nya, nuan mega mesti meli tanah nya ari Rut, indu balu bansa Moap nya. Enggau nya, tanah nya deka mengkang diempu peturun laki iya ke udah nadai.”
6 Kaban belayan Elimelek lalu nyaut Boas: “Enti pia, enda ulih ga aku nebus tanah nya, enggaika aku rugi.* Nuan meh nebus tanah nya. Aku ngelepaska hak aku, laban aku enda ulih nebus tanah nya.”
7 Baka tu meh chara orang Israel ba jeman nya ngesahka semua pengawa bekaul enggau hak nebus enggau nukar hak milik: Siku orang deka muka kasut iya, lalu meri kasut nya ngagai siku da agi orang. Baka nya meh chara orang Israel ngesahka sesiti sempekat.
8 Nyadi, lebuh kaban belayan Elimelek madah ngagai Boas: “Nuan aja meh ke meli tanah tu,” iya lalu muka kasut iya.
9 Udah nya, Boas bejaku ngagai bala tuai enggau semua orang ba dia: “Aku deka meli ari Naomi semua utai ke diempu Elimelek, Chilion, enggau Mahlon. Seharitu, kita semua meh ke nyadi saksi.
10 Aku mega deka ngambi balu Mahlon, iya nya Rut, ke bansa Moap nya, nyadika bini aku. Enggau nya, tanah Mahlon deka mengkang diempu peturun iya. Nya mega ngasuh nama iya terus dikingatka bala kaban belayan iya enggau orang ke diau ba kuta tu. Seharitu, kita semua meh ke nyadi saksi.”
11 Lalu, bala tuai enggau semua orang ba pintu penama kuta nyaut: “Kami tu meh saksi. Awakka Jehovah merekatka bini nuan,* ngambika iya sama baka Rachel enggau Leah, ke udah ngadaka bansa Israel. Awakka nuan mujur ba Epratah sereta bisi nama ti manah ba Betlehem.
12 Awakka Jehovah meri nuan mayuh anak nengah indu nya, ngambika ruang bilik nuan baka ruang bilik Peres, anak Judah enggau Tamar.”
13 Nyadi, Boas kawin enggau Rut, lalu besetubuh* enggau iya. Jehovah lalu merekatka Rut. Nya alai, iya ngandung lalu ngadaka siku anak lelaki.
14 Udah nya, bala indu ba Betlehem madah ngagai Naomi: “Puji meh Jehovah, laban seharitu Iya udah meri siku orang kena nebus nuan. Awakka nama anak mit tu dipuji ba serata menua Israel.
15 Anak mit tu deka ngasuh nuan lantang ati baru, lalu nyaga nuan maya nuan tuai, laban iya udah diadaka menantu nuan ke rinduka nuan sereta manah agi ari tujuh iku anak lelaki.”
16 Naomi ngambi anak mit nya lalu merap iya, lalu Naomi ngibun iya.
17 Udah nya, bala indu ke diau semak Naomi meri anak mit nya nama. Ku sida madah: “Siku anak lelaki udah ada ke Naomi.” Nya alai, sida meri nama iya, Obet. Iya nyadi apai Jesi, lalu Jesi nyadi apai David.
18 Tu tusut peturun Peres: Peres nyadi apai Hesron;
19 Hesron nyadi apai Ram; Ram nyadi apai Aminadap;
20 Aminadap nyadi apai Nason; Nason nyadi apai Salmon;
21 Salmon nyadi apai Boas; Boas nyadi apai Obet;
22 Obet nyadi apai Jesi; lalu Jesi nyadi apai David.
