Hosea 2:1-23
2 “Padah ngagai bala menyadi lelaki nuan: ‘Kita nembiak Aku!’*
Padah ngagai bala menyadi indu nuan: ‘Kita ke bulih pengasih ari Petara!’*
2 Dawa meh indai kita; dawa meh iya,Laban iya ukai agi bini Aku, lalu Aku ukai agi laki iya.
Iya patut badu nyundal,*Lalu iya patut badu agi butang.*
3 Enti enda, Aku deka nelanjaika iya ngambika iya telanjai baka lebuh iya baru ada.
Aku deka ngasuh iya baka menua puang,Sereta baka tanah ti rangkai.
Aku deka ngasuh iya mati aus.
4 Aku enda kasihka bala anak iya,Laban bala anak iya ada ketegal pengawa nyundal.
5 Indai sida udah nyundal.
Iya ngandungka sida, lalu ngereja utai ti amat ngemaluka.
Ku iya: ‘Aku deka mansang betemu enggau bala ambai aku.
Sida meh ke udah meri aku roti enggau ai,Lalu sida mega meri aku bulu bedus, kain linin, minyak, enggau ai irup.’
6 Nya alai, Aku deka mempang jalai iya ngena pagar ti beduri,Lalu Aku deka nirika dinding batu kena mempang iya,Ngambika iya nadai jalai pansut.
7 Iya deka begagaika bala ambai iya, tang iya enda tegagaika sida;Iya deka begigaka sida, tang iya enda tetemuka sida.
Udah nya, ku iya madah: ‘Aku deka pulai baru ngagai laki aku,Laban pendiau aku suba manah agi ari ke diatu.’
8 Iya enda sedar Aku meh ke meri iya bijirin, wain ti baru, enggau minyak.
Aku meh ke meri iya mayuh pirakEnggau emas, ke nyau dikena iya nyembah Baal.
9 Nya alai, Aku deka ngambi pulai baru bijirin Aku ba musin iya,Lalu Aku mega deka ngambi pulai baru wain Aku ti baru ba musin iya.
Aku deka ngambi pulai baru semua bulu bedus enggau kain linin ke dikena iya nutup tubuh iya.
10 Aku deka nelanjaika iya ba depan bala ambai iya,Lalu nadai orang ke ulih nyelamatka iya ari jari Aku.
11 Aku deka madamka semua pengaga ati iya.
Aku deka ngasuh semua pengerami iya, nyengkaum pengerami bulan baru, pengerami Sabat iya, enggau semua pengerami iya ke bukai ngetu magang.
12 Aku deka nganchurka pun anggur enggau pun ara iya. Ku iya kala nyebut pasal semua utai tanam nya:
‘Tu upah ke diberi bala ambai aku.’
Aku deka ngasuh semua utai tanam nya nyadi utan,Lalu jelu liar ba padang deka ngerusakka semua nya.
13 Aku deka ngukum iya ketegal pemayuh hari ke dikena iya nyerahka pemeri ngagai patung-patung Baal.
Iya udah ngias diri ngena tinchin sereta barang kemas, lalu begagaika bala ambai iya.
Iya udah enda ingatka Aku, Jehovah.
14 Tang Aku deka mujuk iya,Lalu Aku deka ngiring iya ngagai menua puang.
Aku deka bejaku enggau iya kena ngulihka ati iya.
15 Udah nya, Aku deka mulaika baru ladang anggur iya,Lalu Aku deka meri iya Lebak Akor nyadika pintu harapan.
Ba din, iya deka nyaut Aku baka lebuh iya agi biak,Iya nya lebuh iya pansut ari menua Ejip.
16 Ba hari nya, Aku, Jehovah deka madah ngagai iya:
‘Nuan deka ngangauka Aku laki nuan, lalu nuan nadai agi ngangauka Aku tuan nuan.’*
17 Aku enda ngemendarka iya nyebut nama patung-patung Baal nya agi,Lalu iya deka nadai agi ingatka nama patung-patung nya.
18 Ba hari nya, ketegal nembiak Aku, Aku deka ngaga sempekat enggau jelu liar ba padang,Sereta enggau burung-burung ba langit enggau jelu ke ngerayap ba tanah.
Aku deka muai panah enggau pedang, lalu Aku deka muai semua perang ba menua sida.
Aku deka ngasuh sida idup likun.
19 Aku deka ngambi iya nyadika bini Aku belama iya.
Aku deka ngambi iya nyadika bini Aku sejalai enggau pengelurus sereta utai ti adil,Sejalai enggau pengerindu ti setia sereta pengasih.
20 Aku deka ngambi iya nyadika bini Aku lalu Aku deka mengkang setia ngagai iya.
Aku meh Jehovah, lalu iya tentu deka ngelala Aku.
21 Ba hari nya, Aku, Jehovah, deka madah:
‘Aku deka meri utai ke dipinta langit,Lalu langit deka meri utai ke dipinta bumi.
22 Bumi deka meri utai ke dipinta bijirin, wain ti baru, enggau minyak;Lalu sida deka meri utai ke dipinta Jesril.*
23 Aku deka naburka iya ngagai bumi baka ke nabur benih,Lalu Aku deka ngayanka pengasih ngagai iya ke nadai bulih pengasih.*
Aku deka madah ngagai sida ke ukai nembiak Aku* munyi tu: “Kita meh nembiak Aku,”Lalu sida deka madah: “Nuan meh Petara kami.”’”
