Hosea 13:1-16
13 “Lebuh Efraim bejaku, semua orang getar-getar takut;Sida pemadu bekuasa ba Israel.
Tang sida bedosa ketegal nyembah Baal, lalu sida mati.
2 Diatu sida majak bedosa;Sida ngaga patung ari pirak.
Sida landik amat ngaga patung, baka pengawa ke digaga orang ke landik betukang.
Ku sida: ‘Awakka orang ke nyerahka korban nyium patung anak sapi.’
3 Sida deka baka kabus maya pagi hari,Sereta baka ambun ti jampat lenyau.
Sida deka baka ampa ti dikebuka kabut ari endur alai ngindik utai ke diketau,Sereta baka asap ke pansut ari churung asap.
4 Aku meh Jehovah, Petara sida kenyau ari maya sida agi ba Ejip.
Aku aja meh Petara ke dikelala sida,Lalu semina Aku aja meh penyelamat sida.
5 Aku udah nyaga sida ba menua puang, ba endur ti rangkai.
6 Sida puas ati enggau padang rumput sida;Sida puas ati nyentukka ati sida nyadi sumbung,Lalu enda ingatka Aku agi.
7 Aku deka nyerang sida baka singa ti biakSereta baka rimau bintang, ke ngipa sida ba jalai.
8 Aku deka datai ngagai sida baka indu beruang ke lenyau anak,Lalu nyarikka dada sida.
Aku deka makai sida baka singa,Lalu jelu liar ba padang deka nyarikka sida.
9 Israel tentu deka dipunaska,Laban sida udah ngelaban Aku, ke nulung sida.
10 Ni bala raja sida ke deka nyelamatka sida ba semua kuta sida?
Lalu ni bala pemerintah* ke alai sida nyebut munyi tu:
‘Beri meh kami raja enggau bala tuai’?
11 Enggau pengeringat, Aku udah meri sida siku raja,Lalu enggau ransi, Aku deka ngambi raja nya.
12 Penyalah Efraim meruan dikingatka;Dosa sida udah diitung lalu dirikut.
13 Pemedis orang ke beranak deka diasaika sida.
Tang sida baka anak ke beli;Sida baka anak ke enggai pansut ari kandung indai, taja pan udah datai maya iya patut ada.
14 Aku deka nebus sida ari kuasa Kubur.*
Aku deka ngelepaska sida ari pemati;O Pemati, nama penyadi ngagai sengat nuan?
O Kubur, nama penyadi ngagai kuasa kena nuan nganchurka utai?
Taja pia, Aku enggai kasihka Efraim.
15 Taja pan sida tumbuh galak begulai enggau lalang,Aku, Jehovah, deka ngenataika angin timur ari padang pasir;Angin nya deka datai lalu ngerangkaika mata ai enggau telaga sida.
Semua reta sida ti berega deka dirampas magang.
16 Samaria deka dikumbai salah laban sida udah ngelaban Aku, Petara sida.
Sida deka mati dibunuh ngena pedang;Bala anak sida deka dibunuh kejam,Lalu perut bala indu ke ngandung deka dibelah.”
Nota Kaki
^ Jaku Asal, “bala hakim.”
^ Tauka “Sheol,” iya nya pendam ke mensia. Peda Penerang Leka Jaku.
