Ti antwort fon te Piipel

 Profetsii is een pexeet woo fon Kot khomt un tsaycht sayn ketanke un wile. Ti Piipel saat tas ti profeete “hon fon Kot aus kexproch, soo wii se fom hayliche kayst kelenkt waare.” (2 Pheeter 1:20, 21) Soo, een profeet is tee woo een pexeet fon Kot kriit un tuut se aus richte fer anere. (Aphostele sayn Kexicht 3:18)

In was fer aate hon ti profeete ti informatsyoone fon Kot kriit?

 Kot hot sayn ketanke fer ti profeete aus kericht in unerxiitliche aate:

•   Torich tas pexeet uf xraype. Kot hot tiise aat weenichst een mool penutst. Tee hot tas kemacht wii eyer ti tseen kepoote uf kexrip hot uf tswaay xteen thaafele un hot se fer Mooses ap kep. (Eeksotus 31:18)

•   Torich ëngele. Tsum payxpiil, Kot hot een ëngel penutst fer Mooses oryentiire iwich tas pexeet woo eyer solt fer te Faraoo fon Ejipt aus richte. (Eeksotus 3:2-4, 10) Als mool waar es neetich spetsiifixe wërter penutse in een pexeet. Fer tas, hot Kot ëngele penutst fer tas pexeet wërter noo wërter aus richte, soo wii eyer es kemacht hot wii tee fer Mooses saat: “Tuu solst tiise wërter uf xraype, wayl tëm noo tiise wërter, mache ich een pakt mit tich un mit Israël.” (Eeksotus 34:27. a)

•   Torich wisyoone. Als mool hot Kot wisyoone fer ti profeete kep wii se kans wach waare. (Isayas 1:1; Hapakuk 1:1) Etliche wisyoone waare soo reaal tas te persoon sich in ti wisyoon trin kexpiirt hot. (Lukas 9:28-36; Apokalipsis 1:10-17) Un anere mool waare ti wisyoon aus kericht wii te persoon in transe waar, in anere wërter, tii waar soo konsentriirt tas se net kemërkt hot was um rom pasiirt is. (Aphostele sayn Kexicht 10:10, 11; 22:17-21) Kot hot aach sayn pexeet aus kericht soo lang wii ti profeete kexloof hon torich treeme. (Tanyël 7:1; Aphostele sayn Kexicht 16:9, 10)

•   Torich ti ketanke lenke. Kot hot ti ketanke fon ti profeete kelenkt fer sayn pexeet aus richte. Un is tas was te neekste tekst wil saan: “Ti kans Xrift is torich Kot sayn kayst kep woer.” (2 Timoteus 3:16) Kot hot sayn hayliche kayst, sayn aktiiw kraft penutst fer sayn itee in ti ketanke fon sayn tiiner rin tuun. Tas pexeet waar fon Kot, awer ti profeete khonte ti wërter raus suuche woo se wolte penutse. (2 Samuël 23:1, 2)

Sin ti profetsiie ploos fer te tsukhunft foer raus saan?

 Nee, es is net ploos tas. Awer ti meyerste Kot sayn pexeete, hon etwas tsu tuun mit te tsukhunft. Tsum payxpiil, ti profeete hon ofts ti israeliiter awisiirt iwich ti xlechte tinge woo se kemacht hon. Tiise aanreete hon kexproch iwich ti kuute tinge wii se in tsukhunft teete kriin wën se folich weyere un aach iwich ti xlechte tinge woo teete pasiire mit tëne woo ti aanreete net foliche teete. (Yeeremias 25:4-6) Tëm noo was ti israeliiter raus kesuucht hon, waare se keseechent orer net. (Teuteronoomyum 30:19, 20)

Payxpiile fon piiplixe profetsiie woo net te tsukhunft foer raus kesaat hon

•   Een mool hon ti israeliiter Kot sayn hilef ferlangt. Kot hot een profeet kexik fer aus leye tas eyer net teet ti israeliiter helfe, wayl se net wolte sayn kepoote aan heere. (Richter 6:6-10)

•   Wii Yeesus mit een fraa fon ti xtat fon Samaria fertseelt hot, hot eyer kexproch iwich tinge woo in iire leepe pasiirt sin. Tee khont ploos tiise tinge wise weeche Kot sayn hilef. Noo tas, hot ti fraa Yeesus als een profeet erkhënt, opwool eyer aach niks iwich te tsukhunft kexproch hot. (Yoohan 4:17-19)

•   Wii Yeesus kericht woer is, hon sayn faynte tëm sayn kesicht tsu ketekt, hon tëm ferxlaa un hon kesaat: “Profetisiir! Weer hot tich ferxlaa?” Tii hon net ferlangt tas Yeesus solt iwich te tsukhunft xpreche. Tii wolte hon tas Yeesus Kot sayn macht penutse teet fer wise weer tëm ferxlaa hat. (Lukas 22:63, 64)