1, 2. (a) Iehova ena Witnes taudia ese Baibel be edena bamona idia laloa? (b) Oi be edena Baibel bukana oi ura henia?

IEHOVA ENA WITNES TAUDIA be Baibel idia ura henia. Baibel ai hadibaia hereva namodia idia noho bona ita ia hagoadaia bona durua. (Roma 15:4) Ita dekenai, Baibel be taunimanima ese idia torea bukana ta sibona lasi, “to ia be momokani Dirava ena hereva.”​—1 Tes. 2:13.

² Momokani ita ta ta be Baibel ena buka idauidau ita ura henia. Haida be Evanelia Bukadia idia ura henia, unai bukadia ai Iesu ese Iehova ena kara ia hahedinaraia daladia idia herevalaia. (Ioa. 14:9) Ma haida be Baibel ena peroveta herevadia idia ura henia​—reana Apokalupo bukana, ia ese “kahirakahira do idia vara gaudia” ia hahedinaraia. (Apok. 1:1) Bona Salamo bukana ese ita ia hagoadaia eiava Aonega Herevadia bukana ai heduru herevadia ita abia diba. Momokani, Baibel be taunimanima ibounai totona.

3, 4. (a) Iseda buka bona magasin be edena bamona ita lalodia? (b) Ita abia pablikeisena be daidia totona danu?

³ Ita be Baibel ita ura henia dainai, Baibel idia herevalaia bukadia ita ura henia danu. Hegeregere, Dirava ena hereva idia halasia  buka, buklet, magasin, bona ma haida. Ita diba unai be Iehova ese ia henia gaudia bona ita idia durua ita gima noho, eda hetura karana Iehova ida ia hagoadaia bona iseda ‘abidadama lalonai ita gini goada’ diba.​—Tito 2:2.

⁴ Danu ita abia pablikeisen be Iehova ena Witnes taudia sibona lasi, to ma haida idia durua diba. Hegeregere, pablikeisen haida be matamata taudia totona; ma haida be tama sina ia durua. Idia printaia bona iseda web sait ai idia noho pablikeisen momo ese Witnes lasi taudia idia durua danu. Unai gaudia ese idia hahedinaraia Iehova be ena gwauhamata ia badinaia, ia ese “tanobada ena bese idauidau ibounai totona aria do ia karaia.”​—Isa. 25:6.

5. Dahaka ita karaia amo Iehova do ia moale?

⁵ Nega momo ita be nega lasi Baibel bona Baibel idia herevalaia bukadia ita duahia totona. To, bema hanaihanai Baibel ita duahia bona sibona eda stadi ita karaia, ita diba ita be eda ‘nega ita gaukaralaia namonamo’ bona Iehova be ita dekenai do ia moale. (Efe. 5:15, 16) Momokani, reana Baibel bona pablikeisen iboudiai be nega tamona lalonai do ita duahidia lasi. To, namona be ita naria namonamo. Dahaka dainai?

6. Dahaka lalohadai kererena ese ita ia veria diba bena Iehova ese ia henia gaudia do ita laloa bada lasi?

⁶ Reana do ita laloa Iehova ese ia henia gaudia haida be ita totona lasi, bema unai bamona ita laloa ita be gau namodia haida ita reaia diba. Hegeregere, bema Baibel ena kahana ta be iseda hekwakwanai ia herevalaia lasi be edena bamona? Eiava bema pablikeisen ta be ita ia herevalaia lasi be edena bamona? Unai bamona kahadia be do ita duahidia haraga sibona, eiava do ita duahidia lasi, a? Bema unai bamona ita karaia, ita be heduru namona ta ita reaia unai. Unai kara ita dadaraia totona, dahaka ita karaia be namo? Namona be ita laloatao, ita abia Baibel bona pablikeisen ibounai be Dirava amo idia mai. Dirava be peroveta tauna Isaia amo ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho.” (Isa. 48:17) Baibel bona Baibel bukadia amo namo ita abia totona, inai heduru daladia toi mani ita herevalaia.

7. Dahaka dainai mai laloa kehoa ida Baibel ita duahia be namo?

⁷ Mai laloa kehoa ida duahia. Baibel ia gwau: “Toretore Helagadia be Dirava ena hahekau henunai idia torea, bona ia be mai ena namo.” (2 Tim. 3:16) Momokani, Baibel ena kahana haida be tau ta o orea ta sibona ia herevalaia. Unai dainai mai laloa kehoa ida Baibel ita duahia be namo. Tadikaka ta ia gwau: “Baibel lau duahia neganai, nega ibounai lau laloatao, lau duahia kahana ese lau ia durua diba.” Ma ia gwau: “Unai lau laloatao dainai, egu Baibel duahia karana lau moalelaia.” Dirava ena Hereva ita do duahia lasi neganai, namona be laloa kehoa bona aonega totona ita guriguri, unai amo Iehova ia ura ita dibaia gaudia do ita lalopararalaia.​—Esr. 7:10; Iamesi 1:5 duahia.

8, 9. (a) Baibel ita duahia neganai, sibona dekenai dahaka henanadai do ita henia? (b) Elda taudia edia kara ia herevalaia siri ese ita dekenai Iehova be edena bamona ia herevalaia?

⁸ Sibona nanadaia. Baibel ena kahana ta oi duahia lalonai, oi laga-ani bona sibona oi nanadaia: ‘Inai kahana ese Iehova be edena bamona ia herevalaia? Egu mauri lalonai edena bamona lau badinaia diba? Edena bamona do lau gaukaralaia ma haida lau durua totona?’ Unai bamona henanadai ita laloa neganai, iseda Baibel duahiduahi amo namo bada do ita abia. Hegeregere, Baibel ese elda taudia edia kara ia herevalaia dalana mani oi  laloa. (1 Timoteo 3:2-7 duahia.) Ita ibounai be elda taudia lasi dainai, reana do ita laloa unai siri be elda taudia sibona ia herevalaia. To, henunai idia noho henanadai edia haere ita laloa neganai, do ita diba unai siri ese ita ia durua diba.

⁹ “Inai siri ese Iehova be edena bamona ia herevalaia?” Iehova ese unai kara ia herevalaia amo ia hahedinaraia, elda maduna idia huaia taudia ese iena kara maoromaoro taravatudia idia badinaia be namo. Ia ura idia ese haheitalai namona idia hahedinaraia, bona kongrigeisen idia kara henia hegeregerena idia do ia hahemaoro henia, badina idia be “ena Natuna ena rara amo ia hoia.” (Kara 20:28) Iehova ia ura ita be elda taudia edia henari henunai ita noho namonamo. (Isa. 32:1, 2) Unai dainai elda taudia edia kara ia herevalaia siri ese ita ia hadibaia Iehova be ita ia laloa bada.

10, 11. (a) Elda edia maduna ia herevalaia hakaua herevadia ita duahia neganai, edena dala ai eda mauri lalonai ita badinaia? (b) Edena bamona do ita gaukaralaia ma haida ita durua totona?

¹⁰ Egu mauri ai edena bamona do lau badinaia? Namona be elda taudia ese dina ta ta ai edia maduna ia herevalaia hakaua herevadia idia stadilaia. Unai amo do idia diba dahaka gaudia idia hanamoa be namo. Bema tadikaka ta “ia ura naria tauna ena maduna ia abia,” namona be unai maduna ia herevalaia hakaua herevadia ia diba namonamo bona ia badinaia. (1 Tim. 3:1) Momokani, unai siri lalonai Iehova ia ura do ita karaia gaudia ia herevalaia, unai dainai unai ese Keristani taudia ibounai do ia durua. Hegeregere, ita ibounai ita laloa maoromaoro be namo. (Fili. 4:5; 1 Pet. 4:7) Bema elda taudia be “mamoe oreana dekenai haheitalai namona” idia hahedinaraia, unai ese ita do ia durua ‘edia abidadama ita tohotohoa’ totona.​—1 Pet. 5:3; Heb. 13:7.

¹¹ ‘Edena bamona do lau gaukaralaia ma haida lau durua totona?’ Ita ese elda maduna ena hakaua herevadia be eda Baibel stiuden eiava kamonai taudia dekenai ita herevalaia diba, unai amo do idia laloparara Iehova ena Witnes taudia edia elda taudia be Kerisendom ena gunalaia taudia amo idia idau. Danu, unai ita herevalaia neganai, elda taudia edia gaukara namona ita herevalaia diba. Unai bamona ita karaia amo iseda huanai idia  gaukara goada taudia ita “matauraia.” (1 Tes. 5:12) Bona bema idia gaukara goada elda taudia ita matauraia, idia be mai moale ida edia gaukara do idia karaia.​—Heb. 13:17.

12, 13. (a) Idia noho tulu ita gaukaralaia dahaka tahua gaukara ita karaia totona? (b) Edena dala ai iseda tahua karana amo ita davaria gaudia ese ita ia durua gau ma haida ita dibaia totona? Haheitalai gwauraia.

¹² Tahua gaukarana karaia. Idia noho tulu idauidau ese ita do idia durua inai bamona henanadai edia haere ita davaria totona:

• Daika ese inai Baibel bukana ia torea?

• Edeseni bona edena nega ai ia torea?

• Unai Baibel bukana ia torea neganai dahaka gaudia idia vara?

Unai bamona henanadai edia haere tahua karana ese ita do ia durua matamanai ita lalopararalaia lasi gaudia do ita dibaia.

¹³ Hegeregere, Esekiela 14:13, 14 dekenai ia gwau: “Tanobada tauna e, bema tano ta ese lau dekenai idia karaia gwauhamata idia badinaia lasi kara dekena amo lau dekenai idia kara dika neganai, lau ese egu imana do lau abia isi, bona unai tano ena aniani abia dalana do lau koua. Lau ese hitolo do lau havaraia, vadaeni unai tano ena taudia bona mauri gaudia do lau alaia mase. Bona sedira bema inai tau toiosi, Noa, Daniela, bona Iobu be unai tano dekenai idia noho, to idia ese edia kara maoromaoro dainai haida do idia hamauria diba lasi. Idia sibona be do lau hamauria. Lau inai Lohiabada Dirava lau hereva vadaeni.” Bema tahua gaukarana ita karaia, do ita davaria Esekiela bukana ena kahana ta be lagani 612 B.C.E. ai idia torea. Unai nega ai Noa bona Iobu be idia noho lasi, badina idia be lagani 100 gunana ai idia mase vadaeni, bona Iehova be edia abidadama karadia ia laloatao. To Daniela be ia noho. Reana iena mauri lagani be 15 eiava 20 bamona neganai, Iehova ese ia hamaoroa ia be kara maoromaoro tauna ta, Noa bona Iobu bamona. Unai sivarai amo dahaka ita dibaia? Iehova be ia idia tomadiho henia taudia edia abidadama karana ia laloa bada, herevana edia mauri lagani be maragi o bada.​—Sal. 148:12-14.

14. Matamata taudia totona idia halasia pablikeisen ese edena dala ai idia ia durua, bona edena dala ai ma haida idia durua danu? (Laulau ginigunana herevalaia.)

¹⁴ Baibel bona Baibel ia herevalaia bukadia iboudiai ita stadilaia karana ese namo ia havaraia diba. Mani haheitalai haida ita herevalaia. Matamata taudia idia durua pablikeisen. Vanegai laganidia ai, iseda pablikeisen momo be matamata taudia totona idia halasia. ^[1] Unai bamona pablikeisen momo ese idia ia durua sikuli ai bona edia mauri lalonai idia vara hekwakwanai idia hanaia totona. Unai pablikeisen ita duahia karana ese edena dala ai ibounai ita durua? Bema unai bamona ita karaia, do ita diba eda abidadama matamata taudia be dahaka hekwakwanai idia haheaukalaia. Bona unai dala amo idia ita durua bona hagoadaia.

15. Dahaka dainai Keristani taudia badadia ese matamata taudia totona idia halasia pablikeisen idia duahia danu be namo?

¹⁵ Matamata taudia totona idia halasia pablikeisen ese idia herevalaia hekwakwanai be ita ibounai dekenai idia vara. Namona be eda abidadama ita gimaia, eda hemami ita biagua, eda turana edia laloani karadia, bona hebamo dikadia bona moale karadia dikadia ita dadaraia. Unai bamona topik bona topik ma haida be matamata taudia totona idia halasia pablikeisen ese idia herevalaia. To Keristani taudia badadia do idia laloa unai bamona pablikeisen be idia totona lasi be maoro, a? Lasi! Ena be unai bamona pablikeisen ese matamata taudia ia herevalaia, to ia  lalonai idia noho sisiba be Baibel amo, bona ita ibounai ese Dirava amo ia mai hahenamo ita moalelaia diba.

16. Iseda pablikeisen ese edena dala ma haida ai matamata taudia idia durua?

¹⁶ Iseda pablikeisen ese matamata taudia ia durua edia hekwakwanai idia haheaukalaia sibona lasi, to idia ia durua edia hetura karana Iehova ida idia hagoadaia bona ia kahirakahira idia lao. (Hadibaia Tauna 12:1, 13 duahia.) Keristani taudia badadia danu ese namo idia abia diba. Hegeregere, April 2009 ena Awake! ai atikol ladana “Young People Ask . . . How Can I Make Bible Reading Enjoyable?” ia noho. Unai atikol ai heduru herevadia momo idia noho, bona maua ta ia noho, unai maua oi utua bona emu Baibel ai oi atoa diba oi ia durua totona. Keristani taudia badadia be unai atikol amo namo idia abia diba, a? Sina ta, ena mauri lagani be 24, ia gwau: “Lau hekwarahi Baibel duahiduahia lau karaia totona. To unai atikol lalonai idia noho heduru herevadia ese lau ia durua bada, bona ia lalonai maua lau gaukaralaia noho. Hari egu Baibel duahiduahi lau moalelaia. Danu lau davaria siri ta ese siri ma ta ia hamomokania, bona edia sivarai be namo herea, laulau hairaina ta bamona. Baibel duahiduahi lau moalelaia bada.”

17, 18. Taunimanima ibounai totona idia halasia pablikeisen duahia karana ese edena dala ai ita do ia durua? Haheitalai gwauraia.

¹⁷ Taunimanima ibounai totona. Lagani 2008 amo ita ese Iehova ena Witnes taudia totona Gima Kohorona stadi gauna ita moalelaia bada. To iseda pablik magasin be edena bamona? Ita duahia neganai, namo do ita abia, a? Haheitalai ta ita laloa. Mani oi laloa, dina ta pablik tok ia do matamaia lasi lalonai oi boiria tauna be Kingdom Hall dekenai ia mai. Do oi moale, ani? Pablik tok ia hamatamaia neganai oi be unai tauna do oi laloa, ani? Reana oi be iena hemami oi laloa bona edena dala ai unai tok ese ia do ia durua ena mauri ia haidaua karana oi laloa noho. Unai tok namona dainai do oi moale bada.

¹⁸ Bema pablikesen ta ita duahia, unai hemami do ita abia danu. Hegeregere, Gima Kohorona pablik gauna ese Baibel ena henanadai badadia ia haerelaia bona Witnes lasi tauna ese ia lalopararalaia dalanai idia torea. Unai hegeregerena, iseda web sait ai idia noho atikol momo danu be unai bamona, idia be kahana ladana “Bible Questions Answered” bona “Frequently Asked Questions” ai idia noho. Bema unai pablikeisen ita duahidia, unai ese ita do ia durua ita dibaia hereva momokani ita laloa bada totona. Bona ita do ia durua haroro gaukara ai dala idauidau ai iseda abidadama do ita herevalaia totona. Unai hegeregerena, Awake! magasin ese ita ia durua ita abia dae momokani Dirava momokani ia noho, bona ita ia durua iseda abidadama ita gimaia totona.​—1 Petero 3:15 duahia.

19. Edena dala ai ita hahedinaraia, Iehova amo idia mai gaudia ita laloa bada?

¹⁹ Momokani, Iehova ese gau namodia momo be ita dekenai ia henia, unai amo ia ita “dibaia.” (Mat. 5:3) Namona be Dirava ese ia henia gaudia ita gaukaralaia. Unai bamona ita karaia amo iseda tanikiu karana Iehova dekenai ita hahedinaraia, badina ia ese iseda namo ia laloa bada.​—Isa. 48:17.