LAI bona medu negana ia ore murinai, Monday, September 1, 1919 ai, dina be ia siahu. Unai adorahi ai, Cedar Point, Ohio, U.S.A. dekenai, taunimanima 1,000 bamona be taunimanima 2,500 idia hebou diba ruma badana ta lalonai idia hebou. Gabu ia dibura neganai, taunimanima 2,000 bamona be bouti, motuka, bona trein amo idia mai. Tuesday ai, taunimanima be hutuma dainai, hebouhebou ena program oredia be au henunai idia karaia.

Dina ena diari be au raurau ena ataiai dainai, rau edia laulau be tatau edia siedi ai idia hedinarai. Lake Erie kahana amo ia mai lai ese hahine edia hati ai idia atoa manu huidia ia odaia. Tadikaka ta ia gwau: “Unai be paradaiso ai ai helai bamona, tanobada gunana ena rege gaudia be lasi.”

Unai gabu ai idia noho taudia edia moale toadia ena hairai ese unai gabu ena hairai ia hereaia. Niuspepa ta ia gwau: “Toana be ibounai ese idia kamonai gaudia idia abia dae momokani bona idia moale bada.” Baibel Student taudia be hebou karana idia moalelaia, herevana lagani haida gunana hahetoho idauidau idia davaria, hegeregere: tuari neganai dagedage idia vara; kongrigeisen ai lalotamona be lasi; Brooklyn Betele idia koua; Basileia dainai momo be dibura ruma ai idia atodia, orea idia hakaua tadikaka 8 danu idia siaia dibura ruma ai lagani 20 idia noho totona. *

Unai nega aukadia ai, Bible Student taudia haida be idia lalometau bona daradara bada dainai haroro gaukara idia rakatania. To, ma haida be idia haroro noho, herevana edia gaukara idia koua. Pulisi tauna ta ia gwau, ia nanadaidia Bible Student taudia momo idia gwau “idia ese Dirava ena hereva do idia harorolaia noho ela bona dokona,” herevana edia gaukara idia koua toho.

Unai hahetoho negadiai, abidadama Bible Student taudia be “Lohiabada ena hahekau dalana idia itaia, . . . nega ibounai idia guriguri Tamana ese ia gimadia totona.” Hari idia be mai moale ida Cedar Point dekenai idia haboua lou. Taihu ta ia gwau momo be idia laloa noho , edena dala ai “haroro gaukara do idia hamatamaia lou.” Idia ibounai idia ura bada haroro gaukara idia karaia lou.

Unai wiki ibounai lalonai, hebou idia mai taudia be inai leta rua, “GA” dainai idia daradara bada. Unai leta rua be hebouhebou ena program, welkam  kadi, bona hebouhebou gabuna ai idia noho bodi ai idia noho danu. Friday ai, unai be “Hesiai Taudia Edia Dina,” Joseph F. Rutherford ese idia hebou taudia 6,000 dekenai unai leta rua edia anina ia gwauraia hedinarai. “GA” ena anina be The Golden Age​—ia be magasin matamata, haroro gaukara totona. *

Tadikaka Rutherford ese horoa taudia ma haida ia herevalaia, ia gwau: “Ena be edia abidadama dainai hekwakwanai idauidau idia davaria, to idia laloa The Golden Age ese Mesia ena lohia karana ia hahedinaraia. . . . Idia mamia edia maduna badana be tanobada ibounai dekenai Golden Age do idia gwauraia hedinarai. Unai be Dirava ese idia dekenai ia henia gaukara ta.”

The Golden Age,“Hereva Momokani, Helaro Namona, bona Abidadama Magasin,” be idia gaukaralaia hereva momokani idia halasia totona bona ruma-ta-ruma-ta gaukara amo unai idia karaia. Tadikaka ia henanadai hida be unai gaukara do idia karaia neganai, helai taudia ibounai be mai moale ida idia gini. Bena, “mai goada bada ida “ anena idia abia: “Lohiabada e, emu diari bona hereva momokani oi siaia.” J. M. Norris ia gwau: “Lau laloaboio diba lasi unai negai, idia ane badabada dainai, au be idia mareremarere bamona.”

Hebouhebou murinai, hebou idia mai taudia be hora momo lalonai laini dekenai idia gini, edia magasin matamata idia abia totona. Momo edia hemami be Mabel Philbrick bamona, ia gwau: “Ai moale bada badina hari gaukara do ai karaia lou!”

Bible Student taudia 7,000 bamona be idia hegaegae idia gaukara totona. Pepapepa ladana Gaukara Ena Heau Dalana bona Gaukara Idia Abia Taudia buklet ese do idia karaia gaukarana ia hahedinaraia: Hedikwota ai ia noho Haroro Naria Dipatmen matamata ese haroro gaukara do ia hakaua. Kongrigeisen ai Hesiai Komiti do idia abia hidi, bona idia tadikaka ta ese hadibaia hereva do ia henia. Teritori ibounai be do idia haria, ta be ruma 150 bamona bona ma ta be ruma 200 bamona. Thursday adorahi be Hesiai Hebou idia karaia, unai amo tadikaka taihu ese edia haroro gaukara ena ekspiriens do idia herevalaia bona ripoti do idia atoa diba.

Herman Philbrick ia gwau: “Emai gabu ta ta dekenai ai giroa neganai, ai ibounai ai gaukara goada magasin matamata ena sabskripsen ai hariharilaia totona.” Gabu ibounai dekenai taunimanima idia kamonai. Beulah Covey ia gwau: “Tuari murinai, taunimanima be idia do lalohisihisi noho, unai dainai idia ibounai idia ura hekwakwanai ibounai do ia ore negana ena sivarai idia kamonai.” Arthur Claus ia gwau: “Kongrigeisen ibounai idia hoa bada, badina unai magasin matamata ena sabskripsen idia ura taudia be momo.” Magasin matamata idia abia bona hua rua murinai, The Golden Age magasin milioni ta mai kahana idia hariharilaia, bona unai magasin idia ura abia noho taudia be 50,000.

July 1, 1920, ena The Watch Tower ai inai atikol “Gospel of the Kingdom” dainai, A. H. Macmillan ia gwau, “unai atikol ese tanobada hegegemadai idia karaia haroro gaukarana ia herevalaia.” Unai atikol ese horoa Keristani taudia ibounai ia hagoadaia “tanobada taudia dekenai guba basileiana idia herevalaia totona.” Hari inai negai, Keriso ena tadikaka, “gaukara idia abia taudia” unai, be taunimanima milioni momo ida hereva momokani idia harorolaia, bona Mesia ena lohia karana ese do ia mailaia hahenamo idia naria noho.