IEHOVA be Baibel amo hahegani momo ia henia. Hegeregere, ia ese matabodaga karadia, kaivakuku tomadiho henia karana, henaohenao, bona inuinu kekero karana ia taravatua. (1 Kor. 6:9, 10) Danu, Dirava ena Natuna, Iesu Keriso, ese ena murinai idia raka taudia ia haganidia, ia gwau: “Umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui lau hamaoroa gaudia ibounai be do idia badinaia. Bona lau be dina iboudiai umui ida do lau noho ela bona inai nega oromana ena dokona.” (Mat. 28:19, 20) Dirava ena taravatu bona hahegani ese ita ia gimaia! Unai taravatu bona hahegani ita badinaia dainai, sibona ita matauraia, ita gorere lasi, bona iseda ruma bese ia moale. Mai anina bada gauna be inai, Iehova ena hahegani ibounai, haroro gaukara ena hahegani danu, ita badinaia neganai, ia ese ita do ia lalonamo henia bona hanamoa.

2, 3. (a) Dahaka dainai Baibel be gau haida dekenai taravatu ia atoa lasi? (b) Inai stadi ai edena henanadai do ita herevalaia? (Laulau ginigunana herevalaia.)

 ² To, Baibel ese gau haida dekenai taravatu ia atoa lasi. Hegeregere, Keristani taudia ese do idia hahedokilaia dabua ia taravatua lasi. Unai ese edena dala ai Iehova ena aonega ia hahedinaraia? Idaunegai ema bona hari tano ta ta edia sitaelo bona kastom karadia be idia senisi noho. Bema Baibel be ita hahedokilaia dabua dekenai taravatu ia atoa, reana hari ita be idaunegai dabua sitaelo do ita tohotohoa. Unai hegeregerena, Baibel be Keristani taudia ese do idia abia hidi moni gaukarana, medikol heduru, bona moale karadia dekenai taravatu ia atoa lasi. Unai dainai ita ta ta bona ruma bese kwaradia sibona be unai gaudia dekenai abia hidi idia karaia diba.

³ Unai ena anina be iseda mauri lalonai mai anina bada abia hidi ta ita karaia neganai, ita karaia abia hidina be Iehova ese ia laloa bada lasi, a? Bema ita karaia abia hidi ese Baibel ena taravatu ta ia utua lasi, iseda guba Tamana ese unai do ia abia dae, a? Bema Baibel be gau haida ia taravatua lasi, edena dala ai do ita diba iseda abia hidi be Iehova ese do ia moalelaia?

4, 5. Edena dala ai iseda abia hidi ese ita bona ma haida ia hahekwakwanaia diba?

⁴ Taunimanima haida idia laloa, dina ta ta ai ita karaia abia hidi be gau badana lasi. To, Iehova ia hamoalea abia hidi namodia ita karaia totona, namona be iena Hereva lalonai idia noho taravatu bona hakaua herevadia ita laloa bona badinaia. Hegeregere, Dirava ena lalonamo ita abia totona, namona be ena taravatu rara dekenai ita badinaia. (Gen. 9:4; Kara 15:28, 29) Guriguri ese ita do ia durua Baibel ena hakaua herevadia bona taravatu hegeregerena abia hidi ita karaia totona.

⁵ Ita karaia abia hidi badadia bona maragidia ese iseda hetura karana Iehova ida ia hadikaia eiava hanamoa diba. Abia hidi namodia ese eda hetura karana Iehova ida do ia hagoadaia, to abia hidi dikadia ese unai do ia hadikaia. Danu, abia hidi dikadia ese ma haida edia hetura karana Iehova ida ia hadikaia, o idia ia hahekwakwanaia diba, o kongrigeisen ena lalotamona ia hadikaia diba. Unai dainai, iseda abia hidi be mai anina bada.​—Roma 14:19; Galatia 6:7 duahia.

6. Abia hidi ita karaia totona dahaka ita laloa be namo?

⁶ Baibel ese ia taravatua lasi karana ta be edena bamona do ita laloa? Unai bamona negadiai, namona be ita ura karaia abia hidi ita laloa namonamo bona abia hidi ita karaia neganai sibona eda lalohadai dekenai ita tabekau lasi, to Iehova ese do ia abia dae bona hanamoa dalana ita laloa.​—Salamo 37:5 duahia.

7. Bema Baibel ese ita ura karaia abia hidi ia taravatua lasi, edena bamona Iehova ena ura do ita diba?

⁷ Reana sibona oi nanadaia, ‘Bema Baibel ese gau ta dekenai taravatu ia atoa lasi, edena bamona do lau diba egu abia hidi be Iehova ese do ia abia dae?’ Efeso 5:17 ia gwau: “Iehova ena ura umui lalopararalaia noho be namo.” Bema Baibel ese gau ta dekenai taravatu ia atoa lasi, edena bamona Iehova ena ura ita lalopararalaia diba? Gau badana be ia ita guriguri henia bona ena lauma helaga ena hakaua dalana ita abia dae.

8. Edena dala ai Iesu ia hahedinaraia ia be Iehova ena ura ia lalopararalaia? Haheitalai gwauraia.

⁸ Iesu ese ena Tamana ena ura ia lalopararalaia dalana mani ita laloa. Nega idaudia rua ai, Iesu be ia guriguri guna bena hoa  dalana ai taunimanima hutuma dekenai aniani ia henia. (Mat. 14:17-20; 15:34-37;) To, tano gagaena ai ia hitolo bona Diabolo ese ia dibagania nadi be paraoa ai do ia halaoa neganai, unai ia karaia lasi. (Mataio 4:2-4 duahia.) Iesu be iena Tamana ena lalohadai ia diba dainai, ia ura lasi nadi be paraoa ai ia halaoa. Oibe, Iesu ia diba unai be Dirava ena ura lasi bema iena siahu be sibona ena namo totona ia gaukaralaia. Unai ia karaia lasi dainai, ia hahedinaraia ia be Iehova dekenai ia tabekau.

9, 10. Dahaka ese ita ia durua abia hidi maorodia ita karaia totona? Haheitalai gwauraia.

⁹ Bema Iesu hegeregerena, ita ura abia hidi maorodia ita karaia, namona be Iehova dekenai ita tabekau. Bona inai aonega herevana ita badinaia, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia. Oi sibona do oi laloa lasi oi be mai emu aonega, to Lohiabada dekenai do oi gari henia, bona kara dika dekena amo do oi raka siri.” (Aon. 3:5-7) Baibel stadilaia karana amo Iehova ena ura do ita lalopararalaia bona ena ura hegeregerena abia hidi do ita karaia. Iehova ena lalohadai ita dibaia namonamo neganai, nega ibounai ena hakaua dalana do ita badinaia.​—Ese. 11:19.

¹⁰ Mani inai oi laloa: Headava hahinena ta be stoa ta lalonai ia loaloa. Tamaka ia itaia bona ia ura henia, to ena davana be bada. Vadaeni sibona ia nanadaia, ‘Bema inai dava bada tamaka lau hoia, egu adavana be edena bamona do ia laloa?’ Momokani, ia be haere ia diba vadaeni, ena be ena adavana ia noho lasi. Edena bamona ia diba? Badina idia be lagani momo idia noho hebou, bona adavana ena lalohadai moni gaukaralaia karana dekenai ia diba namonamo. Unai dainai, dava bada gaudia hoia karana dekenai ena adavana ena lalohadai ia lalopararalaia. Unai hegeregerena, bema Iehova ena lalohadai bona dala ita diba namonamo, nega idauidau ai iseda guba Tamana ia ura do ita karaia gauna do ita lalopararalaia.

11. Baibel ita duahia o stadilaia neganai, dahaka henanadai ita laloa be namo? (Maua ladana  “Baibel Oi Stadilaia Lalonai, Sibona Oi Nanadaia,” itaia.)

¹¹ Iehova ena lalohadai ita diba totona, namona be hanaihanai sibona iseda stadi ita karaia. Dirava ena Hereva ita duahia o stadilaia neganai, sibona ita nanadaia, ‘Lau duahia herevana ese edena dala ai Iehova, iena kara maoromaoro, bona iena lalohadai ia hahedinaraia?’ Namona be salamo torea tauna bamona ita gwau: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia. Oiemu hereva momokani ena dala dekenai, lau do oi hakaua, bona inai hereva momokani, be lau dekenai do oi hadibaia. Badina oi be egu Dirava, oi ese lau oi hamauria noho. Nega ibounai oi dekenai lau abidadama henia noho.” (Sal. 25:4, 5) Baibel ena siri ta oi laloa dobu neganai, sibona oi nanadaia: ‘Egu mauri lalonai edena dala ai inai hakaua herevana do lau badinaia? Edeseni ai unai do lau badinaia? Egu ruma ai?, Gaukara gabuna ai?, o Sikuli gabuna ai?’ Unai oi dibaia neganai, do ia auka lasi oi badinaia totona.

12. Edena dala ai iseda pablikeisen bona hebou ese ita idia durua Iehova ena lalohadai ita dibaia totona?

¹² Iehova ena lalohadai ita dibaia dalana ma ta be, ena orea ese ia halasia Baibel hakaua herevadia ita badinaia. Hegeregere, Watch Tower Publications Index bona Iehova Ena Witnes  Taudia Edia Stadi Indeks ese ita idia durua Iehova ena lalohadai ita diba, unai amo eda mauri ai abia hidi ita karaia neganai iena lalohadai ita badinaia. Danu, Keristani heboudia ai ita kamonai namonamo bona haere henia karana amo namo ita abia. Unai hebou amo ita kamonai gaudia ese ita ia durua Iehova ena lalohadai ita dibaia bona badinaia. Bema Iehova amo ia mai gaudia ita gaukaralaia, iena dala do ita diba namonamo. Unai amo ita karaia abia hidi be iseda lalokau Diravana ese do ia hanamoa.

13. Edena dala ai Iehova ena lalohadai dibaia karana ese ita do ia durua abia hidi maorodia ita karaia? Herevalaia.

¹³ Iehova ena lalohadai ita dibaia karana ese ita ia durua abia hidi maorodia ita karaia totona. Mani inai haheitalai oi laloa: Ita be Basileia harorolaia taudia dainai, reana ita ura regula painia gaukara ita karaia. Unai ful-taim hesiai gaukara ita karaia totona, ita ese eda mauri lalonai gau haida ita haidaua. To, reana ita lalohekwarahi bema tauanina dalanai do ita dabu diba eiava lasi. Momokani, Baibel ese ita ia hagania Iehova do ita hesiai henia noho, herevana ita be painia taudia eiava pablisa ta sibona. Iesu ia gwau, Basileia totona gau haida idia rakatania taudia be hahenamo momo do idia abia. (Luka 18:29, 30 duahia.) Danu, Baibel ese ia hahedinaraia bema Iehova dekenai “hanamoa herevadia” ita gwauraia bona mai moale ida tomadiho momokani ita durua, Iehova be do ia moale. (Sal. 119:108, BHḡ; 2 Kor. 9:7) Unai Baibel ena hereva bona guriguri karana ese ita ia durua Iehova ena lalohadai ita lalopararalaia diba, ani? Unai gaudia ita lalohadailaia neganai, ita do ia durua abia hidi maorona ita karaia bona iseda guba Tamana amo hanamoa do ita abia.

14. Edena dala ai ita diba ita hahedokilaia dabua ena sitaelo be Iehova ese ia abia dae eiava lasi?

¹⁴ Mani haheitalai ma ta ita laloa: Oi be dabua ta ena sitaelo oi ura henia, to oi diba unai ese kongrigeisen taudia haida do ia hahekwakwanaia. Bona oi diba Baibel ese unai dabua ena sitaelo ia taravatua lasi. To, Iehova ena lalohadai be dahaka? Aposetolo Paulo ese inai sisiba ia henia: “Lau ura hahine be mai hemataurai bona laloa maoromaoro ida dabua namona do idia hahedokilaia, namo lasi huina be sitaelo idauidau ai idia pania bona golo eiava pel nadi eiava dava bada dabua idia hahedokilaia. To bema idia gwau idia be Dirava tomadiho henia  hahinedia, sibodia idia hahairaia dalana amo unai do idia hamomokania. Namona be gaukara namodia idia karaia, bona unai be idia ia hahairaia gauna ai ia lao diba.” (1 Tim. 2:9, 10) Momokani, unai hakaua herevana be Keristani tatau ia herevalaia danu. Ita be Iehova ena hesiai taudia dainai, iseda namo sibona do ita laloa lasi bona ita ura lasi ita hahedokilaia dabua ese ma haida ia hahekwakwanaia. Iseda tadikaka taihu ita matauraia bona lalokau henia dainai, edia lalohadai ita laloa bada bona ita ura lasi edia lalomamina ita hadikaia. (1 Kor. 10:23, 24; Fili. 3:17) Baibel ena hereva ita laloa neganai, ita do ia durua Iehova ena lalohadai ita lalopararalaia bona abia hidi maorodia do ita karaia.

15, 16. (a) Bema hanaihanai matabodaga lalohadai ita abia, Iehova ena hemami be edena bamona? (b) Moale karadia ita abia hidi neganai, edena dala ai ita diba Iehova be iseda abia hidi ia moalelaia eiava lasi? (c) Abia hidi badadia be edena bamona ita karaia be namo?

¹⁵ Baibel ese ia hahedinaraia Iehova ia moale lasi bema taunimanima be dala kereredia idia badinaia bona “edia laloa be nega ibounai ia dika.” (Genese 6:5, 6 duahia.) Unai dainai, ita laloparara matabodaga lalohadaidia ita abia be kerere, badina unai ese ta ia doria Baibel ese ia taravatua kara dikadia ia karaia bona unai be Iehova ena laloa dalana lasi. Iamesi ia gwau: “Atai amo ia mai aonegana ia abia tauna ena kara ginigunana be inai: Ia kara goeva. Danu ia be maino tauna, ia laloa maoromaoro, hereva ia badinaia haraga, ia be mai ena hebogahisi bada, bona huahua namodia ia hahedinaraia, taunimanima edia toana ia laloa lasi bona ia koikoi lasi.” (Iam. 3:17) Unai ita diba dainai, lalohadai bona ura dikadia ia havaraia moale karadia ita dadaraia. Idia laloa maoromaoro Keristani taudia be Iehova ese ia inai henia karadia idia hahedinaraia buka, muvi, o kompiuta gadara idia dadaraia. Unai bamona taudia edia lalohadai be ia goeva sibona.

¹⁶ Hekwakwanai ta hamaoromaoro totona dala idauidau ita abia hidi diba bona Iehova be do ia moale. To, abia hidi badana ta ita ura karaia neganai, aonega karana be elda taudia o lo Keristani taudia edia sisiba ita abia be namo. (Tito 2:3-5; Iam. 5:13-15) Oibe, ita ura lasi ma haida ese ita totona abia hidi idia karaia. Namona be Keristani taudia ese edia darana idia hadibaia namonamo. (Heb. 5:14) Ita ibounai ese Paulo ena sisiba do ita badinaia, ia gwau: “Ta ta ese sibona ena maduna do ia huaia.”​—Gal. 6:5.

17. Dirava ena lalohadai hegeregerena abia hidi ita karaia neganai, dahaka namo do ita davaria?

¹⁷ Iehova ena lalohadai hegeregerena abia hidi ita karaia neganai, ia kahirakahira ita lao. (Iam. 4:8) Ia ese ita ia lalonamo henia bona hanamoa dainai ita moale. Bona unai ese iseda abidadama eda guba Tamana dekenai ia hagoadaia. Unai dainai, namona be Baibel ena taravatu bona hakaua herevadia ita badinaia, badina unai ese Dirava ena lalohadai ia hahedinaraia. Oibe, nega ibounai Iehova dekenai gau matamatadia momo do ita dibaia. (Iobu 26:14) To, bema ita hekwarahi, ia ese aonega, diba, bona laloa kehoa do ia henia, unai amo abia hidi maorodia ita karaia diba. (Aon. 2:1-5) Goevadae lasi taudia edia lalohadai bona palani be hanaihanai idia dika, to salamo torea tauna ia gwau: “Lohiabada ena palani, be do ia gini goada hanaihanai, bona ia karaia gwauraia gaudia, be hanaihanai do idia noho.” (Sal. 33:11) Oibe, bema iseda lalohadai bona kara be aonega ibounai Diravana, Iehova ena lalohadai hegeregerena, abia hidi maorodia ita karaia diba.