1-3. (a) Bapatiso murinai, ita hekwarahi dahaka kara haida ita hanaia totona? (b) Sibona dekenai dahaka henanadai ita henia diba? (Laulau ginigunana herevalaia.)

KEVIN ^[1] be hereva momokani ia dibaia neganai, ia ura bada Iehova ia tura henia. To, lagani momo lalonai, ia be laki gadara ia karaia, kuku ia ania, ia inuinu kekero bona drag ia abia. Kevin be Dirava ena lalonamo ia abia totona, Baibel ese ia taravatua karadia ia rakatania be namo. Unai dainai Kevin be Iehova bona iena Hereva dekenai ia tabekau, ia be mai ena siahu ta ena mauri ia haidaua totona.​—Heb. 4:12.

² Kevin ia bapatiso murinai, ia gaukara goada Keristani kara namodia ia hahedinaraia bona hanamoa totona. (Efe. 4:31, 32) Hegeregere, nega haida ia mamia ena badu haraga karana ia biagua be auka. Ia gwau: “Ia auka lasi egu kara gunadia lau rakatania totona, to egu badu haraga karana lau biagua be auka!” Guriguri bona Baibel stadilaia karana ese Kevin ia durua.

 ³ Kevin hegeregerena, ita momo be ita do bapatiso lasi neganai, iseda kara haida ita haidaua, unai amo Baibel ena hakaua herevadia hegeregerena ita noho. To bapatiso murinai, iseda kara ma haida ita haidaua danu, unai amo Dirava bona Keriso ita tohotohoa diba. (Efe. 5:1, 2; 1 Pet. 2:21) Hegeregere, reana ita be ma haida edia kerere sibona ita laloa, taunimanima ita gari henia, ita udu mauri, eiava unai bamona kara ma haida. Unai bamona karadia ita rakatania be auka, a? Bema oibe, reana sibona ita nanadaia: ‘Egu mauri ai kara badadia lau haidaua vadaeni, to dahaka dainai kara ma haida lau haidaua be auka? Edena dala ai Baibel ese egu mauri ia haidaua momokani diba?’

4. Dahaka dainai nega haida ia auka Iehova ita hamoalea totona?

⁴ Iehova ita dibaia bona lalokau henia taudia ita ura mai iseda kudouna ibounai ida ia moalelaia karadia ita karaia. Herevana unai ura be ia goada, to ita be goevadae lasi dainai, nega haida ia auka Dirava ita hamoalea totona. Aposetolo Paulo hegeregerena, ita gwau: “Kara namo karaia urana be lau lalonai ia noho, to lau hegeregere lasi unai lau karaia totona.”​—Roma 7:18; Iam. 3:2.

5. Ita do bapatiso lasi neganai dahaka ita rakatania, to dahaka gaudia ese ita idia tohoa noho diba?

⁵ Ita be kara dikadia ita rakatania momokani bona hari Keristani kongrigeisen lalonai ita noho. (1 Kor. 6:9, 10) To, ita be goevadae lasi. (Kol. 3:9, 10) Unai dainai, namo lasi ita laloa ita bapatiso murinai eiava lagani momo hereva momokani lalonai ita noho dainai, kerere ta do ita karaia diba lasi, kara gunadia do ita karaia lou lasi o lalohadai bona ura dikadia do idia vara diba lasi. Unai bamona kara bona lalohadai be lagani momo lalonai ita ia tohoa diba.

6, 7. (a) Herevana ita be goevadae lasi, to dahaka dainai iseda hetura karana Iehova ida ita moalelaia diba? (b) Dahaka dainai Iesu ena boubou gauna bona do ia havaraia hahenamo ita laloa bada be namo?

⁶ Herevana ita be goevadae lasi, to namo lasi unai ese ita ia koua Iehova ita tura henia bona hesiai henia noho totona. Mani inai oi laloa: Iehova be ita ia tura henia neganai, ia diba nega haida do ita kerere. (Ioa. 6:44) Dirava be iseda kara bona iseda kudouna ai idia noho gaudia ia diba namonamo dainai, ia diba edena kara dikadia ese ita do idia tohoa noho. Bona ia diba, iseda kara dika gwauatao totona, ia do ita noia. To unai ese Iehova ia koua lasi ita ia lalokau henia bona tura henia noho totona.

⁷ Lalokau dainai Dirava ese dava bada harihari gauna be ita dekenai ia henia, unai be ena Natuna lalokauna ena mauri davalaia boubouna. (Ioa. 3:16) Unai davana lasi harihari gauna dainai Iehova ita noia eda dika ia gwauatao neganai, ita abia dae momokani iseda hetura karana Iehova ida be ia goada noho. (Roma 7:24, 25; 1 Ioa. 2:1, 2) Ita laloa ita be goevadae lasi dainai, unai boubou gauna ese do ia mailaia hahenamo do ita laloa bada lasi, a? Lasi! Unai be hegeregere, iseda imana ia miro neganai ita ura lasi ranu dekenai ita huria. To namona be ita laloatao, Iesu ena boubou gauna be kara dika taudia edia dika gwauatao totona. Iehova ita tanikiu henia, badina herevana ita be goevadae lasi, to iseda hetura karana ia ida ita moalelaia diba.​—1 Timoteo 1:15 duahia.

8. Dahaka dainai Dirava badinaia karadia ita hahedinaraia noho bona eda manoka gaudia ita hanaia be namo?

⁸ Momokani, namo lasi ita laloa ita be goevadae lasi dainai kara dika ita karaia. Iseda hetura karana Iehova ida ia goada noho  totona, Dirava bona Keriso ita tohotohoa bona idia ura henia taudia ai ita lao be namo. (Sal. 15:1-5) Danu ita manokalaia karadia dekenai ita naria namonamo, o reana ita rakatanidia momokani be namo. Herevana vanegai sibona ita bapatiso eiava lagani momo lalonai hereva momokani lalonai ita noho, to namona be iseda ‘lalona do ita hamaoromaoroa noho.’​—2 Kor. 13:11.

9. Edena bamona ita diba mauri matamatana atoa karana be hanaihanai do ita karaia gauna?

⁹ Namona be ita hekwarahi, iseda ‘lalona do ita hamaoromaoroa’ bona “mauri matamata” ita atoa. Paulo ese Keristani taudia ia hagoadaia, ia gwau: “Unai dainai namona be emui kara gunana umui kokia, unai be emui mauri gunana ena dala hegeregerena. Bona ura dikadia ese umui idia hakaua kerere dainai, unai kara gunana be ia dika. To emui lalona do umui hamatamataia noho be namo. Bona kara matamata umui atoa be namo. Unai kara be Dirava ena ura hegeregerena ia vara, ia be maoromaoro momokani bona abidadama dalana ia badinaia.” (Efe. 4:22-24) Inai hereva “emui lalona do umui hamatamataia noho” ese ia hahedinaraia ia be hanaihanai do ita karaia noho be namo. Unai ese ita ia hagoadaia, badina herevana lagani momo Iehova ita hesiai henia, to namona be ita gaukara goada Keristani kara namodia ita hahedinaraia bona hanamoa noho, unai be mauri matamatana ita atoa bamona. Oibe, Baibel ese iseda mauri ia haidaua diba.

10. Dahaka ita karaia unai amo Dirava ena Hereva ese ita ia hakaua, bona dahaka henanadai idia vara?

¹⁰ Bema ita ura Dirava ena Hereva ese ita ia hakaua bona iseda mauri ia haidaua, namona be ita gaukara goada. To dahaka dainai do ita gaukara goada be namo? Bema Iehova be iseda hekwarahi ia hanamoa noho, dahaka dainai ita gaukara goada hereva momokani lalonai ita goada noho totona? Bema Iehova ese iseda kara dika ia laloa lasi, do ia auka lasi Dirava badinaia karadia ita hahedinaraia totona, ani?

11-13. Dahaka dainai ita gaukara goada lalohadai dikadia ita dadaraia totona?

¹¹ Bema iunives ita laloa, ita diba Iehova be mai ena siahu. Hegeregere, dina ena siahu be bada herea. Sekeni ta ta lalonai dina ese diari bona siahu bada ia halasia. To unai diari bona siahu edia kahana maragina sibona be tanobada dekenai ia lao, unai ese tanobada ai mauri gaudia ia durua diba. (Sal. 74:16; Isa. 40:26) Iehova be ena hesiai taudia dekenai siahu ia henia diba. (Isa. 40:29) Oibe, Dirava be goada ia henia diba iseda manoka gaudia ibounai ita hanaia totona, unai amo do ita hekwarahi lasi o ura dikadia ita abia lasi. To, dahaka dainai unai ia karaia lasi?

¹² Iehova be ita dekenai ura kwalimu ia henia. Unai dainai ita hekwarahi Dirava ena ura ita karaia amo ita hahedinaraia Iehova ita lalokau henia bona ita ura ia ita hamoalea. Danu ita hekwarahi ena lohia siahuna ita durua. Satani be Iehova ena lohia siahuna ia hepapahuahulaia, bema mai eda ura ida Iehova ita badinaia, ita diba iseda guba Tamana ese eda hekwarahi do ia laloa bada. (Iobu 2:3-5; Aon. 27:11) Bema ita gaukara goada lalohadai dikadia ita dadaraia, herevana unai bamona ita karaia be auka, ita be Iehova ita badinaia bona ita hahedinaraia ia be iseda lohia.

¹³ Unai dainai, Iehova ese ita ia hadibaia ita “hekwarahi” Dirava badinaia karadia ita hahedinaraia totona. (2 Petero 1:5-7 duahia; Kol. 3:12) Danu ia ura ita gaukara  goada iseda lalohadai bona hemami ita biagua totona. Bema ita gaukara goada unai ita karaia totona, do ita mamia Baibel be iseda mauri ia haidaua noho.

14, 15. Dahaka ita karaia diba unai amo Dirava badinaia karadia ita hahedinaraia totona? (Maua ladana  “Baibel Bona Guriguri Karana ese Edia Mauri Ia Haidaua” itaia.)

¹⁴ Dahaka ita karaia diba unai amo Dirava badinaia karadia do ita hahedinaraia bona ia ita hamoalea? Sibona eda ura dalanai eda kara ita haidaua be hegeregere lasi. Namona be Dirava ena hakaua herevadia ita badinaia. Roma 12:2 ia gwau: “Inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho. Vadaeni umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” Iehova ese Baibel bona ena lauma helaga amo ita ia durua iena ura ita lalopararalaia, ita karaia bona iseda mauri ita haidaua unai amo ena taravatu ita badinaia. Unai ita karaia totona, namona be dina ta ta ai Baibel ita duahia, ita duahia siridia ita laloa dobu bona guriguri amo ena lauma helaga totona ita noinoi. (Luka 11:13; Gal. 5:22, 23) Bema Dirava ena lauma helaga ena hakaua henunai ita noho bona iseda lalohadai be Iehova ena ura hegeregerena, vadaeni iseda lalohadai, hereva bona kara be do idia helaga. Danu ita manokalaia karadia dekenai do ita naria namonamo.​—Aon. 4:23.

¹⁵ Dina ta ta ai Baibel ita duahia neganai namona be iseda pablikeisen idauidau ita stadilaia danu, unai ese ita do ia durua Iehova ena kara hereadaedia do ita tohotohoa. Haida ese Gima Kohorona bona Awake! idia duahia bona ia lalonai idia noho siri ese idia ia durua Keristani karadia idia hahedinaraia eiava idia manokalaia karadia idia hanaia totona.

16. Dahaka dainai ita lalomanoka lasi bema hereva momokani lalonai ita goada haraga lasi?

¹⁶ Namona be ita laloatao, hereva momokani lalonai ita goada karana be do ia vara haraga lasi gauna. Keristani kara namodia hahedinaraia be hanaihanai do ita karaia gauna. Namona be ita haheauka bona ita abia dae iseda mauri lalonai Baibel ese iseda kara do ia haidaua. Matamanai, reana ita sibona do ita hadibaia loulou Baibel ena taravatu ita badinaia totona. To, metairametaira Iehova Dirava ena lalohadai bona kara do ita manadalaia bona tohotohoa diba.​—Sal. 37:31; Aon. 23:12; Gal. 5:16, 17.

17. Bema Iehova ita badinaia, dahaka hahenamo do ita abia?

¹⁷ Daudau lasi Iehova idia tomadiho henia taudia be do idia goevadae bona ia do idia hesiai henia ela bona hanaihanai. Unai nega ai, do ita hekwarahi lasi Dirava badinaia karadia ita hahedinaraia, to do ita moale hanaihanai. To hari, mauri davalaia boubouna dainai Iehova ita tanikiu henia, badina unai ese dala ia kehoa iseda lalokau Diravana ita tomadiho henia totona. Herevana ita be goevadae lasi, to ia ita hamoalea diba bema ita hekwarahi Baibel ena hadibaia dalana ita abia dae.

18, 19. Edena bamona ita diba Baibel be mai ena siahu iseda mauri ia haidaua noho totona?

¹⁸ Kevin, matamanai ita herevalaia tadikaka, be ia gaukara goada ena badu haraga karana ia biagua totona. Baibel ena hakaua herevadia ia laloa dobu bona ia badinaia bona tadikaka taihu edia heduru ia abia dae. Lagani haida murinai, Kevin ese ena mauri ia hanamoa. Ia be hesiai tauna ai ia lao, bona ia be lagani 20 elda maduna ia huaia vadaeni. To hari, ia ura ena hetura karana Iehova ida do ia gimaia noho.

¹⁹ Kevin ena haheitalai ese ia hahedinaraia Baibel ese Dirava ena taunimanima ia durua noho edia mauri idia haidaua totona. Unai dainai, namona be Dirava ena Hereva ese iseda mauri ia haidaua bona ita ia durua Iehova ita tura henia noho totona. (Sal. 25:14) Iehova ese iseda hekwarahi ia hanamoa karana ita itaia neganai, do ita diba momokani Baibel ese iseda mauri ia haidaua noho.​—Sal. 34:8.