Mọaleyi to Gigọ́ mẹ sọn Biblu Hihia Mẹ
Mọaleyi to Gigọ́ mẹ sọn Biblu Hihia Mẹ
“Na taun tọn, yẹn nọ mọ awuvivi to osẹ́n Jiwheyẹwhe tọn mẹ.”—LOM. 7:22.
DÍN NUAGOKUN EHELẸ
Nawẹ Biblu hihia po ayihamẹlinlẹnpọn do e ji to ojlẹ dopolọ mẹ po na hẹn ale wá na we gbọn?
Etẹwẹ na gọalọna we nado hẹn wefọ Biblu tọn lẹ do tamẹ nado sọgan nọ yí yé zan nado gọalọna mẹdevo lẹ?
Hihọ́ tẹwẹ Biblu hihia po sọwhiwhe po nọ basina we?
1-3. Ale tẹlẹ wẹ mí na mọyi eyin mí nọ hia Biblu bosọ nọ yí nuplọnmẹ etọn lẹ do yizan mẹ?
“N’NỌ dopẹna Jehovah to afọnnu lẹpo na e gọalọna mi nado mọnukunnujẹ Biblu mẹ.” Mẹmẹyọnnu mẹhomẹ he dọho enẹ ko hia Biblu lọ blebu hugan whla 40, podọ e gbẹ́ to mọwà. Mẹmẹyọnnu jọja de wlan dọ Biblu hihia ko gọalọna emi nado mọdọ Jehovah yin omẹ nujọnu tọn de. Taidi kọdetọn de, ewọ ko dọnsẹpọ Otọ́ olọn mẹ tọn etọn dogọ. E dọmọ: “N’ma ko tindo ayajẹ to gbẹzan ṣie mẹ sọmọ pọ́n!”
2 Apọsteli Pita dotuhomẹna mẹlẹpo nado “wleawuna ojlo vẹkuvẹku na anọ́sin he ma yin fuflusọ ohó lọ tọn.” (1 Pita 2:2) Mẹhe nọ hẹn pekọ wá na ojlo enẹ gbọn Biblu pinplọn po nuplọnmẹ etọn yíyí do yizan mẹ po dali lẹ nọ tindo ayihadawhẹnamẹnu wiwe po lẹndai de po to gbẹ̀mẹ. Yé nọ wleawuna họntọnjiji he dẹn-to-aimẹ hẹ mẹhe yiwanna Jiwheyẹwhe nugbo lọ bosọ nọ sẹ̀n ẹn lẹ. Ale ehe lẹpo yin whẹwhinwhẹ́n dagbe na mí nado “nọ mọ awuvivi to osẹ́n Jiwheyẹwhe tọn mẹ.” (Lom. 7:22) Ṣigba, ale susu devo lẹ gbẹ́ pò. Etẹwẹ yin delẹ to yé mẹ?
3 Lehe hiẹ plọnnu gando Jehovah po Visunnu etọn po go sọ, mọ wẹ owanyi towe na yé podọ na gbẹtọvi hatọ towe lẹ na sinyẹn do niyẹn. Oyọnẹn he pegan Owe-wiwe lẹ tọn tintindo na gọalọna we nado yọ́n lehe Jiwheyẹwhe na whlẹn gbẹtọvi tonusetọ lẹ sọn titonu he to jujujei ehe mẹ do. Gbọnmọ dali, hiẹ na tindo wẹndagbe ayajẹ tọn de nado má hẹ gbẹtọ lẹ to lizọnyizọn towe mẹ. Jehovah na dona we dile a to nuhe a plọn sọn Ohó Jiwheyẹwhe tọn hihia mẹ lẹ má hẹ mẹdevo lẹ.
NỌ HIA BIBLU BOSỌ NỌ LẸNAYIHAMẸPỌN DO E JI
4. Etẹwẹ e zẹẹmẹdo nado nọ hia Biblu bo nọ “lẹnayihamẹpọn” do e ji?
4 Jehovah ma jlo dọ devizọnwatọ emitọn lẹ ni nọ nọ̀ whlẹndo ji to whenue yé to Ohó emitọn hia. E dọna Jọṣua dọmọ: ‘Owe osẹ́n lọ tọn he ma na yì sọn onù towe gba, ṣigba hiẹ na nọ hia bo nọ lẹnayihamẹpọn to e mẹ finẹ to okle po ozán po.’ (Jọṣ. 1:8; Ps. 1:2) Etẹ dọ wẹ anademẹ enẹ te? Enẹ zẹẹmẹdo dọ hiẹ dona nọ hia Biblu po sọwhiwhe po nado penugo bo lẹnayihamẹpọn do e ji to ojlẹ dopolọ mẹ. Eyin hiẹ nọ hia Biblu to aliho enẹ mẹ, e na gọalọna we nado na ayidonugo adà he yọ́n-na-yizan na we hugan bo na na we tuli to ojlẹ lọ mẹ lẹ. To whenue hiẹ dukosọ hẹ hogbe he zọnpọ lẹ, wefọ lẹ, kavi kandai nujijọ tọn mọnkọtọn lẹ, nọ yí sọwhiwhe do hia yé, vlavo gbọn hogbe lọ lẹ yiylọ tọ́n dali. Gbọnmọ dali, nuplọnmẹ Owe-wiwe lẹ tọn tangan de sọgan yinuwado jiwe sisosiso. Naegbọn ehe do yin nujọnu? Na nukunnumimọjẹ ayinamẹ Jiwheyẹwhe tọn de mẹ sọgan whàn we nado yí i do yizan mẹ wutu wẹ.
5-7. Na apajlẹ he dohia dọ Ohó Jiwheyẹwhe tọn hihia po ayihamẹlinlẹnpọn do e ji to ojlẹ dopolọ mẹ po sọgan gọalọna we (a) nado gbọṣi wiweji to walọyizan-liho; (b) nado nọ yí homẹfa po homẹdagbe po do yinuwa hẹ mẹdevo lẹ; podọ (c) nado dejido Jehovah go etlẹ yin to ojlẹ awusinyẹn tọn lẹ mẹ.
5 Eyin hiẹ to Biblu hia bo nọ lẹnayihamẹpọn do e ji to ojlẹ dopolọ mẹ, enẹ na gọalọna we to whenue hiẹ to dogbapọnna owe Biblu tọn he a ma jẹakọ hẹ lẹ. Lẹnnupọndo apajlẹ atọ̀n delẹ ji. Tintan, mẹmẹsunnu jọja de to Biblu hia bo wá jẹ dọdai Hosea tọn ji. To weta 4tọ mẹ, e nọte to whenue e hia wefọ 11 jẹ 13 bo lẹnayihamẹpọn do e ji. (Hia Hosea 4:11-13.) Etẹwutu? Wefọ enẹlẹ dọ̀n ayidonugo etọn na e ko to ahidi hẹ kọgbidinamẹ fẹnnuwiwa tọn to wehọmẹ wutu. E lẹnayihamẹpọn do wefọ lọ lẹ ji bo mọdọ: ‘Jehovah tlẹ nọ mọ nuylankan he gbẹtọvi lẹ nọ wà to nuglọ lẹ. N’ma jlo na hẹn homẹgble Jehovah.’ Mẹmẹsunnu lọ magbe nado gbọṣi wiwe ji to nukun Jiwheyẹwhe tọn mẹ.
6 Awetọ, mẹmẹyọnnu de to owe Joẹli tọn hia bo jẹ weta 2 wefọ 13. (Hia Joẹli 2:13.) Dile e to wefọ lọ hia bo to ayihamẹlẹnpọn do e ji to ojlẹ dopolọ mẹ, e jẹ lẹnnupọndo lehe e sọgan hodo apajlẹ Jehovah tọn do ji, na “dagbenọ wẹ ewọ bosọ gọ́ na awuvẹmẹ, [nọ whleawu] nado sadi, podọ susunọ to lẹblanu mẹ.” E basi dide nado tẹnpọn bo dapana hogbe mẹvlẹko po homẹgble tọn po he e nọ yizan to whedelẹnu he e to hodọna asu etọn kavi mẹdevo lẹ.
7 Atọ̀ntọ, mí ni dọ dọ azọ́n gble do mẹmẹsunnu tatọ́ whẹndo tọn de bọ e jẹ nulẹnpọn ji gando dagbemẹninọ asi po ovi etọn lẹ po tọn go. E hia to Nahumi 1:7 mẹ dọ Jehovah “yọ́n yé he yí tudido yetọn do ewọ mẹ lẹ” bosọ nọ basi hihọ́na yé taidi “figángán de to azán tukla tọn gbè” bo to ayihamẹlẹnpọn do e ji to ojlẹ dopolọ mẹ. Linlẹn enẹ miọnhomẹna ẹn. E doayi mẹtọnhopọn owanyinọ Jehovah tọn go bo doalọtena nuhiha zẹjlẹgo. Enẹgodo, e hia wefọ 15tọ bo lẹnayihamẹpọn do e ji to ojlẹ dopolọ mẹ. (Hia Nahumi 1:15.) Mẹmẹsunnu mítọn mọdọ eyin emi to yẹwheho wẹndagbe lọ tọn dọ to ojlẹ awusinyẹn tọn mẹ, emi na dohia nugbo dọ emi nọ pọ́n Jehovah hlan taidi figángán emitọn. Dile mẹmẹsunnu lọ zindonukọn nado to agbasazọ́n dín, e yin whinwhàn todin nado nọ dekunnu to osẹ ṣẹnṣẹn.
8. Dọ nuplọnmẹ gbigbọmẹ tọn họakuẹ de he hiẹ mọ to Biblu hihia towe whenu.
8 Nuplọnmẹ yọ́n-na-yizan he mí ṣẹṣẹ gbadopọnna enẹlẹ yin didesọn owe Biblu tọn he mẹdelẹ nọ pọnhlan taidi nuhe vẹawu nado mọnukunnujẹemẹ lẹ mẹ. Eyin hiẹ to dogbapọnna owe Hosea, Joẹli, po Nahumi po tọn po linlẹn lọ po nado plọnnu, a na tindo ojlo nado hia wefọ devo lẹ sọn yé mẹ bo lẹnayihamẹpọn do e ji to ojlẹ dopolọ mẹ. Lehe nuyọnẹn po homẹmiọnnamẹ he hiẹ sọgan mọyi sọn kandai yẹwhegán enẹlẹ tọn mẹ po na sù do sọ! Etẹwẹ dogbọn owe Biblu tọn he pò lẹ dali? Ohó Jiwheyẹwhe tọn sọgan yin yiyijlẹdo aigba he tindo zannu diamọndi tọn lẹ to oglọ de go. Dovivẹnu nado kùn aigba ehe ganji! Mọwẹ, nọ hia Biblu lọ blebu po yanwle lọ po nado dín anademẹ po jidenamẹ Jiwheyẹwhe tọn po he taidi adọkunnu lẹ.
NỌ DOVIVẸNU NADO MỌNUKUNNUJẸ NUHE A HIA MẸ
9. Nawẹ mí sọgan hẹn nukunnumọjẹnumẹ mítọn gando ojlo Jiwheyẹwhe tọn go pọnte dogọ gbọn?
9 Dile e yin nujọnu dọ hiẹ ni nọ hia adà Biblu tọn de egbesọegbesọ, mọ wẹ e sọ yin nujọnu dọ hiẹ ni mọnukunnujẹ nuhe a hia mẹ do niyẹn. Enẹwutu, yí owe he titobasinanu Jehovah tọn zinjẹgbonu lẹ zan ganji nado basi dodinnanu gando aṣa gbẹtọ lọ lẹ tọn, nọtẹn lọ lẹ, po nujijọ he a hia lọ lẹ po go. Podọ eyin hiẹ ma yọ́n lehe a sọgan yí nuplọnmẹ Biblu tọn de do yizan mẹ to gbẹzan towe mẹ do, hiẹ sọgan biọ alọgọ mẹho agun tọn kavi Klistiani he whèwhín de tọn. Nado yọ́n lehe e yin nujọnu nado nọ hẹn nukunnumọjẹnumẹ mítọn pọnte dogọ do, mì gbọ mí ni gbadopọnna apajlẹ Klistiani owhe kanweko tintan tọn de tọn he dovivẹnu nado wàmọ. Yinkọ etọn wẹ Apolo.
10, 11. (a) Nawẹ Apolo mọ alọgọ yí nado pegan dogọ to lizọnyizọn etọn mẹ gbọn? (b) Etẹwẹ mí sọgan plọn sọn kandai he gando Apolo go mẹ? (Pọ́n apotin lọ “Be Nuhe A Nọ Plọnmẹ lẹ Sọgbe hẹ Nukunnumọjẹnumẹ Agọe Tọn lẹ Ya?”)
10 Apolo yin Klistiani Juvi de he “yọ́n Owe-wiwe lẹ ganji” bosọ “hunzo to gbigbọ-liho.” Owe Owalọ lẹ tọn dọ gando ewọ go dọmọ: “E to hodọ bo to mẹplọn to aliho he sọgbe mẹ gando Jesu go, ṣigba baptẹm Johanu tọn kẹdẹ wẹ e jẹakọ hẹ.” Apolo ma yọnẹn dọ nuhe emi to pinplọnmẹ gando baptẹm go ma sọgbe hẹ nukunnumọjẹnumẹ Klistiani lẹ tọn to ojlẹ lọ mẹ. To whenue Klistiani asu po asi po Pliskila po Akuila po dotoaina nuplọnmẹ etọn to Efesu godo, yé “hẹn aliho Jiwheyẹwhe tọn họnwun na ẹn to aliho he sọgbe mẹ dogọ.” (Owalọ 18:24-26) Nawẹ Apolo mọaleyi sọn alọgọ ehe mẹ gbọn?
11 To whenue Apolo ko dọyẹwheho to Efesu godo, e yì Akaia. “To whenue e jẹ dọ́n, e gọalọ tlala na mẹhe ko yise na nukundagbe majẹhẹ Jiwheyẹwhe tọn wutu lẹ; na e yí zohunhun do dohia hezeheze to gbangba dọ owhẹ̀ Ju lẹ tọn ma whẹ́n, dile e yí Owe-wiwe lẹ do dohia dọ Jesu wẹ Klisti lọ.” (Owalọ 18:27, 28) To ojlẹ enẹ mẹ, Apolo penugo nado basi zẹẹmẹ baptẹm Klistiani tọn ganji. Na nukunnumọjẹnumẹ etọn ko jideji wutu, e “gọalọ tlala na” omẹ yọyọ lẹ nado basi nukọnyiyi to sinsẹ̀n-bibasi nugbo mẹ. Etẹwẹ mí sọgan plọn sọn kandai ehe mẹ? Taidi Apolo, mí nọ dovivẹnu nado mọnukunnujẹ nuhe mí hia to Biblu mẹ lẹ mẹ. Etomọṣo, eyin yisenọ hatọ he whèwhín de na mí ayinamẹ gando lehe mí sọgan hẹn aliho mẹpinplọn tọn mítọn pọnte dogọ do go, mí na yí whiwhẹ po pinpẹn-nutọn-yinyọnẹn po do kẹalọyi alọgọ etọn. Eyin mí wàmọ, sinsẹ̀nzọn wiwe mítọn na pọnte dogọ.
YÍ NUHE A PLỌN LẸ ZAN NADO GỌALỌNA MẸDEVO LẸ
12, 13. Na apajlẹ de he do lehe Owe-wiwe lẹ yiyizan po azọ́nyinyọnẹn po sọgan gọalọna plọnmẹ Biblu lẹ nado yinukọn do hia.
12 Taidi Pliskila, Akuila po Apolo po, mí sọgan yin dona de na mẹdevo lẹ. Etẹwẹ nọ yin numọtolanmẹ towe to whenue ayinamẹ towe gọalọna jlodotọ de nado duto nuhe to aliglọnna ẹn nado yinukọn to gbigbọ-liho de ji? Kavi taidi mẹho agun tọn de, etẹwẹ nọ yin numọtolanmẹ towe to whenue yisenọ hatọ de dopẹna we, na a na ẹn ayinamẹ Owe-wiwe tọn de he gọalọna ẹn nado jugbọn ninọmẹ sinsinyẹn de mẹ? Matin ayihaawe, Ohó Jiwheyẹwhe tọn yiyizan nado gọalọna mẹdevo lẹ na yé nido hẹn gbẹzan yetọn pọnte nọ hẹn ayajẹ po pekọ po wá na mí. a Pọ́n lehe hiẹ sọgan jẹ yanwle enẹ kọ̀n do.
13 To ojlẹ Elija tọn mẹ, Islaelivi susu whleawu nado basi dide to sinsẹ̀n lalo po nugbo po ṣẹnṣẹn. Ayinamẹ he Elija na yé sọgan gọalọna plọnmẹ Biblu he to awuwhle nado yinukọn to gbigbọ-liho de. (Hia 1 Ahọlu lẹ 18:21.) Kavi eyin jlodotọ de to budi gando lehe họntọn kavi hẹnnumẹ etọn lẹ na yinuwa do go, hiẹ sọgan yidogọna gbemima etọn nado sẹ̀n Jehovah gbọn hoyijlẹdohogo hẹ ẹ sọn Isaia 51:12, 13 mẹ.—Hia.
14. Etẹwẹ na gọalọna we nado nọ flin wefọ Biblu tọn lẹ to whenue hiẹ tindo nuhudo yetọn nado gọalọna mẹdevo lẹ?
14 Na nugbo tọn, Biblu bẹ nudọnamẹ susu hẹn he sọgan jla pọndohlan mẹhe nọ hia ẹ lẹ tọn do, bo sọgan na yé tuli kavi huhlọn. Ṣigba hiẹ sọgan kanse dọ, ‘Nawẹ n’na wagbọn do nọ hẹn wefọ lẹ do tamẹ nado flin yé to whenue n’tindo nuhudo yetọn?’ Nọ hia Biblu bo nọ lẹnayihamẹpọn do linlẹn Jiwheyẹwhe tọn lẹ ji egbesọegbesọ. Gbọnmọ dali, hiẹ na penugo nado hẹn hogbe Biblu tọn lẹ do ayiha mẹ, ehe gbigbọ wiwe Jehovah tọn sọgan gọalọna we nado flin to whenue hiẹ na tindo nuhudo yetọn.—Malku 13:11; hia Johanu 14:26. b
15. Etẹ wiwà wẹ na gọalọna we nado mọnukunnujẹ Ohó Jiwheyẹwhe tọn mẹ to gigọ́ mẹ?
15 Dile Ahọlu Sọlomọni wà do, biọ Jehovah to odẹ̀ mẹ nado na we nuyọnẹn nado penukundo azọngban yẹwhehọluduta tọn towe lẹ go. (2 Otan. 1:7-10) Kẹdẹdile yẹwhegán hohowhenu tọn lẹ wà do, basi “dogbapọnnanu sisosiso po dodinnanu sọwhiwhe tọn po” do Ohó Jiwheyẹwhe tọn ji nado tindo oyọnẹn he pegan gando Jehovah po ojlo etọn po go. (1 Pita 1:10-12) Apọsteli Paulu dotuhomẹna Timoti nado nọ yí “ohó yise tọn lẹ po oplọn dagbe [po]” do na núdùdù ede to gbigbọ-liho. (1 Tim. 4:6) Eyin hiẹ nọ wàmọ, hiẹ na tin to otẹn dagbe mẹ nado gọalọna mẹdevo lẹ to gbigbọ-liho. To ojlẹ dopolọ mẹ, hiẹ nasọ hẹn yise towe lodo.
OHÓ JIWHEYẸWHE TỌN NỌ BASI HIHỌ́NAMẸ NUGBO
16. (a) Ale tẹwẹ Beleanu lẹ mọyi to whenu yé “yí sọwhiwhe do gbadopọnna Owe-wiwe lẹ egbesọegbesọ”? (b) Naegbọn Biblu hihia egbesọegbesọ do yin nujọnu sọmọ to egbehe?
16 Ju he tin to tòdaho Makedonia tọn he nọ yin Belea mẹ lẹ tindo aṣa lọ nado nọ “yí sọwhiwhe do gbadopọnna Owe-wiwe lẹ egbesọegbesọ.” To whenue Paulu dọyẹwheho wẹndagbe lọ tọn na Ju enẹlẹ, yé yí nuhe e dọ lẹ jlẹdo nuhe yé yọnẹn to Owe-wiwe lẹ mẹ go. Etẹwẹ yin kọdetọn lọ? Susu yetọn wá kudeji dọ nuhe plọnmẹ ewọ te lẹ yin nugbo, podọ yé “lẹzun yisenọ.” (Owalọ 17:10-12) Ehe dohia dọ Biblu hihia egbesọegbesọ na zọ́n bọ mí na tindo yise he lodo to Jehovah mẹ. Yise mọnkọtọn he “yin nukundido dejidego nuhe mí to todo lẹ tọn” yin dandannu, eyin mí na luntọ́n biọ aihọn yọyọ Jiwheyẹwhe tọn mẹ.—Heb. 11:1.
17, 18. (a) Nawẹ yise he lodo po owanyi po sọgan basi hihọ́na ahun yẹhiadonu tọn mítọn gbọn? (b) Nawẹ todido nọ basi hihọ́na mí sọn owù lẹ si gbọn?
17 Owhẹ̀ Paulu tọn whẹ́n to whenue e wlan dọmọ: “Na mí mẹhe yin okle tọn lẹ, mì gbọ mí ni gbọṣi lẹnpọn dagbenọ-yinyin mítọn mẹ bo ze tùnudo yise po owanyi tọn po dó podọ todido whlẹngán tọn taidi ogangbakun de.” (1 Tẹs. 5:8) Awhànfuntọ de dona basi hihọ́na ahun etọn to awhàngbenu. Mọdopolọ, ahun yẹhiadonu tọn Klistiani de tọn dona yin hihọ́-basina sọn huhlọn ylando tọn si. Eyin devizọnwatọ Jehovah tọn de tindo yise he lodo to opagbe Jiwheyẹwhe tọn lẹ mẹ bosọ yiwanna Ewọ po gbẹtọvi hatọ etọn lẹ po, ahun yẹhiadonu tọn etọn nọ yin hihọ́-basina. Gbọnmọ dali, e na vẹawu dọ ewọ ni wà nuhe na zọ́n bọ e na hẹn nukundagbe Jiwheyẹwhe tọn bu.
18 Paulu sọ donù ogangbakun go, enẹ wẹ “todido whlẹngán tọn.” To ojlẹ Biblu tọn mẹ, eyin awhànfuntọ de ma basi hihọ́na ota etọn, e bọawu dọ ewọ ni kú to awhàngbenu. Ṣigba, eyin e ṣinyọ́n ogangbakun dagbe de, nudepope he jẹ ota na ẹn ma na gbleawuna ẹn sọmọ. Mí nọ wleawuna todido to azọ́n whlẹngán tọn Jehovah tọn lẹ mẹ gbọn Ohó etọn pinplọn dali. Todido he lodo nọ gọalọna mí nado nọavùnte sọta atẹṣitọ lẹ po “ohó ovọ́” yetọn he nọ bẹplamẹ lẹ po. (2 Tim. 2:16-19) Todido mítọn nasọ na mí huhlọn nado dapana mẹhe sọgan sisẹ́ mí nado wà nuhe Jehovah jẹagọdo lẹ.
BIBLU HIHIA YIN DANDANNU NA WHLẸNGÁN
19, 20. Naegbọn mí nọ yọ́n pinpẹn Ohó Jiwheyẹwhe tọn, podọ nawẹ mí nọ do pinpẹn-nutọn-yinyọnẹn mítọn hia na ẹn gbọn? (Pọ́n apotin lọ “Jehovah Na Mi Nuhe N’Tindo Nuhudo Etọn Pẹpẹ.”)
19 Dile mí to nukọnyi to ojlẹ opodo tọn lọ mẹ, mọ wẹ nuhudo lọ nado ganjẹ Ohó Jehovah tọn go to susu dogọ do niyẹn. Ayinamẹ he mí mọyi sọn e mẹ lẹ nọ gọalọna mí nado jla walọyizan mítọn lẹ do podọ nado dava ayilinlẹn ylando tọn mítọn lẹ. Tulinamẹ po homẹmimiọn etọn po na gọalọna mí nado duto whlepọn he Satani po aihọn etọn po nọ zedonukọnna mí lẹ ji. Anademẹ he Jehovah wleawuna do Ohó etọn mẹ lẹ na gọalọna mí nado gbọṣi aliho ogbẹ̀ tọn ji.
20 Flindọ ojlo Jiwheyẹwhe tọn wẹ yindọ “gbẹtọ wunmẹ lẹpo ni yin whinwhlẹngán.” Devizọnwatọ Jehovah tọn lẹ tin to “gbẹtọ wunmẹ lẹpo” enẹlẹ mẹ. Mọjanwẹ mẹhe mí sọgan gọalọna gbọn yẹwhehodidọ po mẹpinplọn mítọn po dali lẹ tin to yé mẹ do niyẹn. Ṣigba, mẹhe jlo na mọ whlẹngán lẹpo dona tindo “oyọnẹn he pegan nugbo tọn.” (1 Tim. 2:4) Enẹwutu, eyin mí na lùn azán godo tọn ehelẹ tọ́n, mí dona nọ hia Biblu bo nọ yí anademẹ gbọdo etọn lẹ do yizan mẹ. Mọwẹ, eyin mí nọ hia Biblu egbesọegbesọ, mí na dohia dọ mí yọ́n pinpẹn Ohó nugbo họakuẹ Jehovah tọn.—Joh. 17:17.
[Nudọnamẹ odò tọn]
a E họnwun dọ mí ma nọ yí Biblu zan nado gbidikọna kavi gblewhẹdo mẹdevo lẹ. Mí dona nọ yí homẹfa po homẹdagbe po do yinuwa hẹ Biblu plọntọ de dile Jehovah nọ yinuwa hẹ mí do.—Ps. 103:8.
b Etẹwẹ lo eyin hiẹ flin hogbe tangan wefọ de tọn lẹ ṣigba bo wọn owe lọ, weta lọ, po wefọ lọ po? Hiẹ sọgan mọ wefọ enẹ eyin a pọ́n hogbe enẹlẹ to todowhinnu hogbe Biblu tọn lẹ tọn mẹ to vivọnu Biblu tọn, podọ to Watchtower Library mẹ, kavi to Concordance complète des Saintes Écritures—Traduction du monde nouveau mẹ.
[Kanbiọ Oplọn tọn lẹ]
[Apotin to weda 9]
BE NUHE A NỌ PLỌNMẸ LẸ SỌGBE HẸ NUKUNNUMỌJẸNUMẸ AGỌE TỌN LẸ YA?
E nọ jlo mí dọ nuplọnmẹ mítọn ni sọgbe hẹ nukunnumọjẹnumẹ nugbo Biblu tọn agọe tọn lẹ, na mí nido sọgan má oyọnẹn he pegan hẹ mẹdevo lẹ. Po enẹ po to ayiha mẹ, nawẹ hiẹ na na gblọndo kanbiọ he bọdego ehelẹ tọn gbọn?
▪ Mẹnu lẹ wẹ yin “whẹndo ehe” he go Jesu donù to Matiu 24:34 mẹ?—Atọ̀họ̀-Nuhihọ́ lọ Tọn, 15 avril 2010 weda 10-11.
▪ Whetẹnu wẹ “lẹngbọ lẹ” yin kinklan “sọn gbọgbọẹ lẹ go” dile Matiu 25:32 basi zẹẹmẹ etọn do?—Atọ̀họ̀-Nuhihọ́ lọ Tọn, 1er novembre 1995 weda 11-13.
▪ Dile Luku 21:26 dọ do, whetẹnu wẹ “gbẹtọ lẹ nasọ nọ dakú na obu podọ na nukundido nuhe ja aigba ji lẹ tọn wutu”?—Atọ̀họ̀-Nuhihọ́ lọ Tọn, 1er mai 1994 weda 17-18.
Eyin mí tindo aṣa lọ nado nọ hia Biblu egbesọegbesọ bo nọ plọn ẹn po sọwhiwhe po, mí na penugo nado gọalọna mẹdevo lẹ nado to zọnlinzin to hinhọ́n he Jehovah fọ́n bo to titá do Ohó etọn ji lọ mẹ.—Howh. 4:18.
[Yẹdide 9]
Apolo mọ alọgọ yí nado hẹn lizọnyizọn etọn pọnte
[Apotin to weda 11]
“JEHOVAH NA MI NUHE N’TINDO NUHUDO ETỌN PẸPẸ”
Mẹmẹyọnnu jọja de wlan dọmọ: “To nuflinmẹ owanyinọ Jehovah tọn lẹpo mẹ, dehe nọ dotuhomẹna mí nado hia Biblu egbesọegbesọ lẹ wẹ yinuwado ji e hugan to gbẹzan ṣie mẹ. N’jẹ Biblu hia ji to owhe godo tọn he n’yizan to wehọmẹ daho mẹ, podọ e yí nudi owhe awe to asi e nado hia ẹ fó. To ojlẹ enẹ mẹ, n’mọ nuhe n’tindo nuhudo etọn nado de nuhe n’na wà to gbẹzan ṣie mẹ lẹpo to Ohó Jehovah tọn mẹ. Todin, n’ko jẹ Biblu hia ji whla awetọ. Ṣigba, e taidi dọ n’ma tlẹ hia ẹ pọ́n. Biblu vivọ́ hia hẹn ayajẹ wá na mi, etlẹ yin hú lehe e wà do to tintan whenu! E jiawu na mi taun nado mọdọ Jehovah na mi nuhe n’tindo nuhudo etọn pẹpẹ.”
